KĨTHOOMO KĨA 34

Nĩatĩa Tũũmba Kũthithia Nĩkenda Twonia Jehova Nĩtũmwendete?

CHETHA

Nũkwigua ũrĩna ũcoore amwe na Mũrungu kuuma ũrĩkwambia kwiritana Bibiria? Rĩ, no wende gwĩta na mbere gũkũria ũcoore bũu amwe nawe? Kethĩra nĩu, riikana o ũrĩa Jehova akwona ũgĩĩta na mbere kũmwenda, nou agakwenda na gũkũmakĩra nkũrũki. Nĩatĩa ũũmba kũmwonia atĩ nũmwendete?

1. Nĩatĩa twonagia Jehova nĩtũmwendete?

Twonanagia wendo bwetũ kĩrĩ Jehova na njĩra ya kũmwathĩkĩra. (Thooma 1 Johana 5:3.) Atĩkinyagĩĩria muntũ kinya ũrĩkũ amwathĩkĩra. Ĩndĩ, natwejaga kaanya ga kũthuura kethĩra tũkamwathĩkĩra kana tũtĩmwathĩkĩra. Nĩkĩ? Jehova arĩenda ‘tumwathikira kuuma nkorone.’ (Aroma 6:17) Kũu nĩkuuga, atĩkwenda tũmwathĩkĩra tontũ nĩtũgũkinyĩĩrua, ĩndĩ tontũ nĩtũmwendete. Gĩcuncĩ kĩa 3 na kĩa 4 kĩa iuku rĩrĩ, bibanganĩtue nĩkenda bigũtethia kwonania wendo bwaku kĩrĩ Jehova gũkũrũkĩĩra kũthithia jarĩa jamũgwĩragia, na gũciebania na jarĩa jatĩmũgwĩragia.

2. Nĩkĩ bũũmba kwĩthĩrwa bũrĩ bũbũũmũ kwonania wendo bwetũ kĩrĩ Jehova?

“Mithangiko ni imiingi iria itirimaga uria wagirite.” (Zaburi 34:19) Twinthe nĩtũrũjaga na gũtaũkĩrwa gwetũ twingwa. Kinya twomba kwĩthĩrwa tũgĩkũrũkagĩĩra mathĩĩna ja kĩmbeca, waagi bwa ĩota, na mantũ jangĩ jamoomũ. Rĩrĩa twakũrũkĩĩra mantũ jamoomũ, no twone bũrĩ bũbũũmũ kũthithia jarĩa Jehova endaga. Gĩtũmi nĩ tontũ kũthithia mantũ jamathũũkũ nĩbu bwĩthagĩrwa bũrĩ ũntũ bũbũũthũ. Ĩndĩ, rĩrĩa wathithia jonthe jarĩa Jehova agũkwĩra, nwonanagia atĩ nũmwendete nkũrũki ya gĩntũ kinya kĩrĩkũ. Na nĩ ũrikithagia atĩ ũrĩ mwĩtĩkĩkua kĩrĩwe. Kwou, kinya wee akaa mwĩtĩkĩkua kĩrĩ gwe. Gũtĩrĩo akarogũtiganĩria.—Thooma Zaburi 4:3.

ĨNJA NKŨRŨKI

Iritane, nĩkĩ Jehova agwĩragua rĩrĩa wamwathĩkĩra, na nĩmbi biũmba gũgũtethia kũthithia ũu.

3. Nthitango ĩrĩa ĩkwegie

Kũringana na iuku rĩa Bibiria rĩa Ayubu, mantũ jarĩa Shaitani athitangĩre najo Ayubu jatamwegie wenka akĩ, ĩndĩ jegie antũ bonthe barĩa bakwenda gũtumĩkĩra Jehova. Thooma Ayubu 1:1, 6–2:10, rĩu bwarĩĩrie biũria bibi:

Kũringana na Shaitani, nĩkĩ Ayubu aathĩkĩĩre Jehova?—Tega Ayubu 1:9-11.
Nĩ mantũ jarĩkũ Shaitani aathitangĩre najo antũ bonthe, jarĩa kinya gwe akũthitangĩte najo?—Tega Ayubu 2:4.

Thooma Ayubu 27:5b, rĩu bwarĩĩrie kĩũria gĩkĩ:

Nĩatĩa Ayubu arikithĩrie kamma atĩ neendete Jehova?

Ayubu naarikithĩrie atĩ nendete Jehova na njĩra ya gũtũũra arĩ mwĩtĩkĩkua kĩrĩwe

Nĩtũrikithagia atĩ nĩtwendete Jehova rĩrĩa twakara tũrĩ etĩkĩkua kĩrĩwe

4. Gwĩria nkoro ya Jehova

Thooma Njuno 27:11, rĩu bwarĩĩrie biũria bibi:

Nĩatĩa Jehova aigagua rĩrĩa wonania ũũme na wamwathĩkĩra? Nĩkĩ?

5. Womba kwaa mwĩtĩkĩkua kĩrĩ Jehova

Wendo bwetũ kĩrĩ Jehova nĩbũtũmaga twĩra bangĩ bũmwegie. Wĩtĩkĩkua bwetũ kĩrĩwe nĩbũtũtethagia kũthithia ũu kinya rĩrĩa tũkwona bũtĩ bũbũũthũ. Tega VIDIO, rĩu bwarĩĩrie biũria birĩa bithingatĩte.

VIDIO: Teteera Wĩtĩkio Bwaku Kinya Rĩrĩa Antũ Bakũregana Naagwe (5:09)

Rĩ, kwĩrĩo wonaga bũrĩ bũbũũmũ kwĩra bangĩ bwegie Jehova?
Kĩrĩ vidio,nĩmbi biatetherie Gryson gũcinda ũguaa bwawe?

Nĩ ũntũ bũbũũthũ kwaa etĩkĩkua kĩrĩ Jehova rĩrĩa twenda jarĩa endete na twamena jarĩa amenete. Thooma Zaburi 97:10, rĩu bwarĩĩrie biũria bibi:

Kũringana na jarĩa wairitana, nĩ jamwe ja mantũ jarĩkũ Jehova endete? Na nĩ mantũ jarĩkũ jamwe amenete?
Nĩatĩa ũũmba kwiritana kwenda mantũ jarĩa meega na kũmena jarĩa mathũũku?

6. Nĩtũgunĩkaga rĩrĩa twathĩkĩra Jehova

Kwathĩkĩra Jehova rĩonthe nĩbu ũntũ bũrĩa bwega nkũrũki. Thooma Isaya 48:17, 18, rĩu bwarĩĩrie biũria bibi:

Kũringana na maoni jaaku-rĩ, kamma Jehova naijĩ mantũ jarĩa jagũtwagĩra nkũrũkĩ? Nĩkĩ ũkuuga ũu?
Nĩatĩa ũgunĩkĩte kuuma ũrĩkwambĩria kwiritana Bibiria, na wamenya Jehova?

ANTŨ BAMWE BAUGAGA: “Mathithio jakwa jatĩgwĩragia Mũrungu kana jamũthũũria.”