Twinthe nĩtwĩthagĩrwa na maoni mwanya mwanya jegie ũrĩa tũgekĩra na ũrĩa tũkwoneka. Kethĩra tũkathingata jamwe ja moritani jarĩa jonanĩtue Bibiriene, tũkathuura mĩkĩĩre ĩmĩega ĩrĩa twendete, na ĩrĩa ĩkagwĩria Jehova. Gatũtegeere jamwe ja moritani jau.

1. Nĩ moritani jarĩkũ ja Bibirĩa jabuĩrĩte gũtũtongeeria rĩrĩa tũkũthuura mĩkĩĩre yeetũ na kwigemia?

Tũbuĩrĩte Kũthuura ‘nguu iria ciagirite na tukarage na nthoni, na uume bwa nkoro,’ na rĩonthe tũkarage tũtheri nĩkenda antũ bangĩ bone ‘nituthingataga mantu ja Murungu.’ (1 Timotheo 2:9, 10) Thũgaanĩria moritani jaja jana ja Bibirĩa: (1) Nguũ cietũ nibuĩrĩte kwĩthĩrwa “ciagirite.” O ta ũrĩa wonete kĩrĩ mĩcemanio ya kĩũthũrano, Akũũjĩ ba Jehova nĩbekagĩra na njĩra mwanya mwanya, ĩndĩ nĩtwonanagia nĩtũtĩĩaga Mũrungu ũrĩa tũthathaagia gũkũrũkĩĩra nguũ cietũ na ũrĩa tũmenyagĩĩra mĩtundu yeetũ. (2) Gwĩkĩra na njĩra ĩrĩna “nthoni” nĩkuuga mwonekanĩre jwetũ jũtĩtũma tũkucĩĩria antũ kĩwendo, na jũtĩĩthĩrwa jũrĩ jwa gũcionania. (3) Twonanagia “uume bwa nkoro” rĩrĩa twarega kũthingata mĩkĩĩre o yonthe ya nguũ injerũ ĩrĩa ĩraumĩra na kwigemia. (4) Mwonekanĩre jwetũ rĩonthe jũbuĩrĩte kwonania ‘nituthingataga mantu ja Murungu,’ nĩkenda bangĩ boone nĩtũthathaagia Mũrungu wa mma.—1 Akorintho 10:31.

2. Mwonekanĩre jwetũ jwomba kwĩthĩrwa na maumĩĩra jarĩkũ kĩrĩ barĩa tũthathaagia nabo?

Kinya kethĩra tũrĩ na ũciathi bwa kũthuura birĩa tũgekĩra, nĩtũbuĩrĩte kũthũgaanĩria maumĩĩra jarĩa mwonekanĩre jwetũ jũũmba kwĩthĩrwa najo kĩrĩ bangĩ. Nĩtũciũmagia ũrĩa tũkũũmba tũtĩkaigithie muntũ kinya ũrĩkũ bũbũĩ, na nkũrũki tũgaciũmia ‘kuthithiria mutuuri wetu, mantu jaria meega’ na jakũmwaka.—Thooma Aroma 15:1, 2.

3. Nĩatĩa mwĩkĩĩre jwetũ jũũmba gũtũma antũ bangĩ benda kwiritana bwegie Jehova?

Kĩnya kethĩra nĩtũgeragia gwĩkĩra bwega magiita jonthe, nĩtũciũmagia gwĩkĩra bwega nkũrũki rĩrĩa twĩtĩte mĩcemanio ya kĩũthũrano na ũtungatĩri. Tũtĩngĩenda kwangaratania antũ batĩkathikĩĩre nkuma ĩnjega gũkũrũkĩĩra ũrĩa tũkwonekana. Mwanya na ũu, ũrĩa tũkwonekana kwomba gũtũma antũ benda kwiritana nkũrũki bwegie Jehova, na ‘kugakumithia uritani bwa Murungu Mwonokia wetu.’—Tito 2:10.

 ĨNJA NKŨRŨKI

4. Mwonekanĩre jwetũ jũmwega nĩjwonanagia atĩ nĩtũgũtĩĩa Jehova

Nĩ gĩtũmi kĩrĩkũ gĩkĩnene gĩtũmaga tũmenyeera mono ũrĩa tũkwonekana? Thooma Zaburi 47:2, rĩu bwarĩĩrie biũria bibi:

• Tontũ nĩtwĩtanagĩrua na riĩtwa rĩa Jehova, nĩatĩa mwĩkĩĩre jwetũ jũbuĩrĩte kwĩthĩrwa jũkari?

• Ũrĩthũgaania nĩ ũntũ bwa ũũme kũmakĩra urĩa tũkwoneka rĩrĩa twĩtĩte mĩcemanione na ũtungatĩrine? Nĩkĩ ũkuuga ũu?

 5. Ũrĩa tũũmba gũtua matua jameega jegie nguũ na mantũ ja kwigemia

Tega VIDIO.

Kwĩthĩrwe nguũ cietũ nĩ cia goro kana tĩ cia goro, nibuĩrĩte kwĩthĩrwa itheri na ciagĩrĩte kũringana na mantũ jarĩa tũkũthithia. Thooma 1 Akorintho 10:24 na 1 Timotheo 2:9, 10. Rĩu, bwarĩĩrie nĩkĩ tũtĩbuĩrĩte gwĩkĩra nguũ irĩa . . .

• itĩtheri na itĩkwagĩra.

• igũtwiinya, ikwonania irũngo bia mwĩrĩ, kana igũtũma antũ bakucĩĩrua kĩwendo.

Kĩnya gũkethĩra Akristũ batĩ Waathone bwa Musa, Waatho bũu nĩbũtũtethagia kũmenya mathũgaanio ja Jehova. Thooma Kuriikanithia Maathana 22:5, rĩu bwarĩĩrie kĩũria gĩkĩ:

• Nĩkĩ tũtĩbuĩrĩte kwigemia kana gwĩkĩra nguũ irĩa ciũmba gũtũma muntũ mũrũme oneka ta muntũ mũka, kana muntũ mũka oneka ta muntũ mũrũme?

Thooma 1 Akorintho 10:32, 33 na 1 Johana 2:15, 16, rĩu bwarĩĩrie biũria bibi:

• Nĩkĩ tũbuĩrĩte kũmenyeera mwonekanĩre jwetũ jũtĩkagitarie bangĩ naarĩa tũkaraga kana kĩũthũranone?

• Nĩ mĩĩkĩĩre ĩrĩkũ na kwigemia kwa mĩthemba ĩrĩkũ antũ bendete mono naarĩa ũkaraga?

• Ũrĩthũgaania mĩĩkĩĩre ĩu na kwigemia kũu no kwagĩre Mũkristũ? Nĩkĩ ũgũcookia ũu?

 NA NJĨRA ĨNKUĨ

Rĩrĩa twatua matua jameega jegie mwonekanĩre jwetũ, nĩtwonanagia gĩtĩĩo kĩrĩ Jehova na kĩrĩ bangĩ.

Gũcookera

• Nĩkĩ Jehova onaga mwĩkĩĩre jwetũ na kwigemia bũrĩ ũntũ bwa gĩtũmi?

• Nĩ jamwe ja moritani jarĩkũ ja Bibiria jabuĩrĩte gũtũtongeeria rĩrĩa tũkũthuura nĩmbi tũgekĩra na birĩa tũkaigemia nabio?

• Mwonekanĩre jwetũ jwomba gũtũma antũ bangĩ bethĩrwa na maoni jarĩkũ jegie ũthathayia bwa mma?