Kinya kethĩra bũkageria buru kwĩthĩrwa na mũranũ na nja ĩrĩ na kũgwĩrua, mantũ jatĩĩrĩgĩri no jakarĩke jarĩa joomba gũtũma bwĩthĩrwa bũrĩ bũbũũmũ gwĩta na mbere kũgwĩrua. (Mutumiiria 9:11) Na njĩra ya wendo, Mũrungu natweejaga ũteethio rĩrĩa twagwatwa nĩ mathĩĩna. Wathingatĩĩra mooritani jaja ja Bibiria, ũgwe na njeku, no bũũmbane kinya kĩrĩ mathĩĩna jamarito buru.

ŨRĨA BIBIRIA YUUGAGA: “Geragireni Murungu mantu jonthe jaria jabuthangikagia, nikwithirwa niwe wenka ubumenyagiira.” (1 Petero 5:7) Rĩonthe riikana atĩ Mũrungu tĩwe ũreetaga mathĩĩna. (Jakubu 1:13) O ũrĩa ũkũmũthengeera, no u agagũteethia na njĩra cionthe irĩa ikũũmbĩkana. (Isaya 41:10) “Bumwonoragiirie nkoro cienu.”—Zaburi 62:8.

Kinya wathooma na wairitana Bibiria ntukũ cionthe, ũkaborerua. Ta maumĩĩra, ũkaigua ũrĩa Jehova ‘atuboragiria mokiene jetu jonthe.’ (2 Akorintho 1:3, 4; Aroma 15:4) Augĩte agakwaa “ukiri bwa Murungu, buria butimenyeka uria bung’ana.”—Afilipi 4:6, 7, 13.

ŨRĨA ŨŨMBA KŨTHITHIA:

• Romba Jehova agũteethie gũkĩrĩĩria na kũthũgaania bwega

• Thũgaanĩria njĩra cionthe na ũthuure ĩrĩa ĩkwagĩra buru kĩrĩ gwe

ŨRĨA BIBIRIA YUUGAGA: “Nkoro ya muntu umuciuku nigitaga umenyo, na gutu kwa muntu umuume gucwaga umenyo.” (Njuno 18:15) Menya mantũ jonthe bwega. Menya kĩrĩa o muntũ wonthe wa nja yaaku akũbatara. Aranĩria nabo. Bathikĩĩre.—Njuno 20:5.

A ũkeeja gũkuĩrwa nĩ mwendwa waaku? Menya ũkĩra kwonania ũrĩa ũkwigua. Riikana atĩ kinya Jesũ ‘naumirwe ni methori.’ (Johana 11:35; Mutumiiria 3:4) Kinya kuurũka na kũmaama bwega nĩ gwa gĩtũmi. (Mutumiiria 4:6) Bũu bũgagũteethia kũrwaa na ũntũ bwa gũkuuna nkoro.

ŨRĨA ŨŨMBA KŨTHITHIA:

• Ĩthĩrwa na wĩthĩre bwa kwaranĩria na nja yaaku mbere kinya mũtino juumĩra. Rĩrĩa mathĩĩna jakaumĩra, bakaaria naagwe batĩgũkĩra

• Aranĩria na bangĩ barĩa boomba kwĩthĩrwa baragwatwa nĩ ũntũ ta bũu

ŨRĨA BIBIRIA YUUGAGA: “Mucore akaraga ari na wendani magita jonthe, [nĩ] mutano-ng’ina wa muntu aciari nikenda agatethia igita ria mithangiko.” (Njuno 17:17) Acoore baaku nĩbakwenda gũgũteethia, ĩndĩ no baremwe kũmenya ũrĩa boomba kũthithia. Menya ũkĩra kũbeera kĩrĩa kĩongwa ũkũbatara. (Njuno 12:25) Cwaa kinya ũteethio bwa mantũ ja Mũrungu, kĩrĩ barĩa bagũciũkĩrwa nĩ Bibiria. Mataaro jarĩa bagakwaa kuuma kĩrĩ Bibiria jagagũteethia.—Jakubu 5:14.

Ũkoona ũteethio bũrĩa ũkũbatara wethĩrwa na wĩthĩre bwa kũgwatanĩra na antũ barĩa barĩ na wĩtĩkio kamma kĩrĩ Mũrungu, na barĩa berĩgagĩĩra mawĩrane jawe. Kinya ũkaborerua na njĩra ĩnene wateetheria barĩa bakũbatara gwĩkĩrwa inya. Aranĩria nabo mantũ jegĩĩ wĩtĩkio bwaku kĩrĩ Jehova na mawĩrane jawe. Ĩthĩrwa na wĩru gũteetheria barĩa barĩ na ũbatu, na menya ũciathũra na barĩa bakwendete na gũkũmakĩra.—Njuno 18:1; 1 Akorintho 15:58.

ŨRĨA ŨŨMBA KŨTHITHIA:

• Aranĩria na mũcoore wa akuĩ na wĩtĩkĩĩrie agũteethie

• Na njĩra ya wĩtĩkua, gweeta moobatu jaaku jongwa