Daniel 4:1-37
4 A King Nebukadnesara ena hereva, bese idau-idau bona basileia idau-idau bona gado idau-idau iboudiai, tanobada idoinai e noho heniamu taudia iboudiai ediai, binai. Maino baine bada emui ai!
2 Vada na laloa, namona be toa bona hoa karadia Herea Mikamika Diravana ese egu ai vada e kara mani aina hamaorolaimui.
3 Iena toa na daka bada!
lena hoa karadia na daka siahu!
lena basileia na e hesiriu hanaihanaimu,bona ena lohia siahuna na uru uru latadiai.
4 Lau Nebukadnesara na egu ruma ai na noho namonamova, egu pavapava rumana ai egu namo na habadaiava.
5 Nega ta na nihi, bena una nihi ese e hagarigu; egu mahuta patana latanai na hekureva negana ai, egu lalo-hadai bona mata-hanai ḡaudia kwaragu lalonai ese e hagarigu.
6 Taunabunai na hahedua, aonega taudia iboudiai Babulono ai na vairagu ai bae mailaidia, nihi anina bae hadibalaigu totona.
7 Bena mea taudia, babalau taudia, Kaldea taudia bona hisiu toadia mai dibadia taudia na e raka vareai; bena lau ese nihi na hamaorolaidia, a anina ihadibalaigu na asi dibadia.
8 Dokona ai Daniel e raka vareai; ia ladana ta na Beletesasara, egu dirava ladana e nemailaia, bona dirava helaḡadia ese e roheamu. Bena una nihi na hamaorolaia, nato,
9 Beletesasara e, oi na mea tauna badana, badina be lau dibagu dirava helaḡadia ese vada e rohemu, bona ḡau hehunina ta na dia hehuni oiemu ai. Na itaia nihina binai; oi ese anina do ba hamaorolaigu.
10 Egu mahuta patana latanai na hekureva negana ai, mata-hanai ḡaudia kwaragu lalonai bini: na roha lao, au ta na itaia, tanobada bogaraginai; ia na ḡaulatalata.
11 Au na e tubu, e lo e laova, dorina na guba ai e kau, bena tanobada idoinai dokona amo e itaiava.
12 Rauna na kasiri-kasiri, huahuana na momo herea, taunimanima iboudiai adia aniani ḡaudia. Uda boromadia na ia ikerukeruna ai e hekureva, bona atai manudia na ia rigina ai e nohova, mauri ḡaudia iboudiai na ia ese e ubudiava.
13 Egu mahuta patana latanai na hekureva negana ai, kwaragu ena mata-hanai lalonai na itaia, hegima tauna helaḡana ta na guba amo e diho.
14 E boi lolo, ini e gwau toma: Au ba hagaria, rigina ba lapadia oho, rauna ba padadia oho, huahuana ba ḡiḡidia rohoroho; uda boromadia na ia henuna amo bae heau lasi bona manu na rigina amo bae roho oho.
15 A au badina mai ramuna ida na tano ai ba rakatania, bona iḡeḡelaina aurina, auri bona auri-laboralabora amo e karaia ḡauna, amo ba ḡeḡea; bena rei matamata bogaraginai do baine mia. Guba hununa ese baine hapariparia; uda boromadia ida baine noho tanobada reina ai.
16 Ia lalona, taunimanima lalona, na baine idau, boroma lalona bae henia; bena laḡani hitu na ia latanai bae ha-ore.
17 Irevana na hegima taudia edia hahedua amo, bona ihahemaoro-henina na helaḡa taudia edia hereva amo, bena mauri taudia na bae diba, Herea Mikamika Diravana ese taunimanima edia basileia e lohiaiamu, bona e uramu baine henia tauna na e heniamu, bona uhuḡai herea tauna na hekwara tauna ai e halaoamu.
18 Una nihi na lau, King Nebukadnesara, ese na itaia. A oi, Beletesasara e, anina ba gwauraia hedinarai, badina be aonega taudia iboudiai egu basileia lalonai na anina ihamaorolaigu asi dibadia, a oi na mai dibamu, badina be dirava helaḡadia ese vada e rohemu.
19 Bena Daniel, ladana ta na Beletesasara, kudouna na e hetaha nega sisina ai; bona ena lalo-hadai ese e hagaria.
Bena hanua pavapavana eto, Beletesasara e, nihi eiava anina ese basine hagarimu.
Beletesasara na e haere, eto, Egu lohia e, bema nihi na e inai henimumu taudia latadiai bona anina na oi inaimu latadiai, una na bema namo.
20 Au o itaia, e tubu bona e lo e laova ela bona dorina na guba ai e kau bona tanobada idoinai dokona amo e itaiava ḡauna,
21 rauna na kasiri-kasiri bona huahuana na momo herea, taunimanima iboudiai adia aniani ḡaudia, bona ikerukeruna ai uda boromadia e hekureva bona rigina ai atai manudia e nohova ḡauna,
22 pavapava e, una na oi. Oi na vada o tubu bona vada o lo; vada o tubu badabada ela bona guba, bona emu siahu na e laomu ela bona tanobada dokodia.
23 Hanua pavapavana ese hegima tauna helaḡana e itaia, guba amo e diho, eto: Au ba hagaria, ba habuaia tari, a au badina mai ramuna ida na tano ai ba rakatania, bona iḡeḡelaina aurina, auri bona auri-laboralabora amo e karaia ḡauna, amo ba ḡeḡea, bena rei matamata lalonai baine mia; bena guba hununa ese baine hapariparia, uda boromadia ida baine noho, ela bona laḡani hitu na ia latanai bae ha-ore.
24 Pavapava e, anina binai: Herea Mikamika Diravana ena hahedua egu lohia bona egu pavapava latamu ai vada e kau;
25 e tomu taunimanima bogaragidia amo bae lulumu lasi, uda boromadia ida ba noho; rei do bavani, boromakau na heto, bona guba hununa ese baine hapariparimu; laḡani hitu na oi latamu ai bae ha-ore, ela bona ba diba Herea Mikamika Diravana ese taunimanima edia basileia e lohiaiamu, bona e uramu baine henia tauna na e heniamu.
26 Bona e haheḡani, au badina mai ramuna ida baine mia heḡereḡerena ai, emu basileia baine mia oiemu, oi ba diba Guba Diravana e lohiamu negana amo.
27 Taunabunai, pavapava e, egu hahealo na boma abia dae; emu kara dika boma hadoko, kara maoromaorodia boma kara, bona emu kara havara danu boma hadoko; e hahisidiamu taudia boma bogadia hisi; bena reana emu noho-maino taina ma baine daudau.
28 Ina idoinai na King Nebukadnesara latanai e kau.
29 Hua gwauta-rua e ore, bena ia ese pavapava rumana Babulono ai guhina latanai e raka eva-evava.
30 Bena hanua pavapavana eto, Ina na Babulono badana, egu siahu hereana amo vada na haginia, lau pavapava egu noho gabuna bona lau pavapava hairaigu ihabadana ani?
31 Hanua pavapavana na dounu e herevava ai, gado ta na guba amo e diho, eto, King Nebukadnesara e, vada e hereva henimumu, e tomu “Basileia na emu amo vada eme heabi oho;
32 taunimanima bogaragidia amo bae lulumu lasi, uda boromadia ida ba noho; rei do bavani, boromakau na heto; laḡani hitu na oi latamu ai ba ha-ore, ela bona vada ba diba, Herea Mikamika Diravana ese taunimanima edia basileia e lohiaiamu, bona e uramu baine henia tauna na e heniamu”.
33 Bena asi vanahana una hereva anina e vara Nebukadnesara latanai. Taunimanima bogaragidia amo e lulua lasi, bena rei e aniva, boromakau na heto, bona tau-anina na guba hununa ese e haparipariava, ela bona huina e lata, ugava huina na heto, bona kahauna na manu kahaudia na heheto.
Nebukadnesara ena hereva
34 Unu dina dokodia ai, lau Nebukadnesara na gaga dae guba ai, bena daragu ma e vara lou, bona Herea Mikamika Diravana na hanamoa, e noho hanaihanaimu Diravana na imodaia bona na heatolaia.
Badina be ia siahuna na mia hanaihanai siahuna,bona iena basileia na uru ta ela bona ma uru ta e hesiriumu;
35 tanobada inoholaina taudia iboudiai e nenediamu, dia ḡau ta na heto;ia na sibona ena ura e karamu guba oreana bogaraginai,bona tanobada inoholaina taudia bogaragidiai danu;ta ese ia imana basine laoa ahu diba,eiava basine nanadaia, basineto “Dahaka o karamu?”
36 Una negana ai danu daragu ma e vara lou; bona pavapava dagina bona hairaina ma e ahulaigu, egu basileia ihahairaina totona. Egu hahealo taudia bona egu lohia taudia ese e tahugu, bona egu basileia ai e haginigu, bena egu siahu na e bada e laova.
37 Harihari lau Nebukadnesara ese guba Pavapavana na imodaiamu, na heatolaiamu bona na matauraiamu; badina be iena kara iboudiai na mamaoro-mamaoro bona ena dala na ḡoḡoeva-ḡoḡoeva; bona mai hekokorokudia ida e rakamu taudia ihahemaraidia na mai dibana.
