Esodo 40:1-38
40 Iehova ese Mose e hereva henia, eto,
2 Hua gini-gunana dinana gini-gunana ai hebou kalagana mai dubuna ida ba hagini.
3 Lalonai taravatu mauana bavatoa bona ba sesea ahu.
4 Pata helaḡana danu lalonai bavatoa, mai kohuna idoinai, ḡau ta ta ena gabu ena gabu ai. Lamepa patana danu lalonai bavatoa; bona ena lamepa ba ha-ara.
5 Muramura patana, gold ḡauna, na taravatu mauana vairanai bavatoa; bena dubu ba sesea ahu.
6 Ihaboulaina patana na dubu vairanai bavatoa, hebou kalagana lalonai;
7 bona hurihuri dihuna, mai ranuna, na hebou kalagana bona ihaboulaina patana padadiai bavatoa.
8 Maḡu dabuadia danu ba tau dae heḡeḡe, bona maḡu ba sesea ahu.
9 Bena dehoro helaḡana bavabia, dubu mai kohuna idoinai ba nevaridia: unu ba hahelaḡadia toma, bena bae helaḡa.
10 Ihaboulaina patana danu mai kohuna ida ba nevaridia: unu ba hahelaḡadia toma; hari ihaboulaina patana baine helaḡa herea.
11 Hurihuri dihuna danu mai ihahelai-kauna ḡauna ida ba nevaridia, vada bae helaḡa.
12 Bena Aaron mai natuna ida hebou kalagana iduarana ai bae gini bou. Ba hadigudia;
13 bena Aaron na dabua helaḡadia do ba hadokilaia. Bena ba horoa, baine helaḡa; lauegu hahelaḡa tauna ai bainela.
14 Natuna danu bavabidia, ba hadokilaidia;
15 bena ba horodia, tamadia o horoa heḡereḡerena, egu hahelaḡa taudia ai baela. Ihorodia dainai idia na hahelaḡa taudia ai baela, edia uru iboudiai, ela bona hanaihanai.
16 Mose na unu e kara toma. Iehova ese e haḡania heḡereḡerena, unu mo e kara toma.
17 Laḡani iharuana gini-gunana dinana gini-gunana ai dubu na e haginia.
18 Mose ese dubu e haginia: hahelaikau ḡaudia na gabudia ai e atodia; haba kahadia e hagini; raroraro e toi hanai; bona du e holo.
19 Bena dubu na kalaga amo e koua heḡeḡe, bona guhi dabuana amo e ḡovaia ahu, Iehova ese e haḡania heḡereḡerena.
20 Bena taravatu nadidia e abi, maua helaḡana ai e uda. Maua ena maduna e toi hanai, bona ikaruhina amo e karuhia ahu.
21 Bena maua na dubu lalonai e huaia vareai, bona e sesea ahu, Iehova ese e haḡania heḡereḡerena.
22 Pata helaḡana na hebou kalagana ai e atoa, dubu mirigini kahana ai, seseahu murimurinai;
23 bona flaoa helaḡana na pata latanai e dabaraia, Iehova vairanai, Iehova ese e haḡania heḡereḡerena.
24 Bena lamepa patana na hebou kalagana ai e atoa, pata helaḡana e havaira henia, dubu diho kahana ai;
25 bena lamepa e ha-ara Iehova vairanai, Iehova ese e haḡania heḡereḡerena.
26 Bena muramura patana, gold ḡauna, na hebou kalagana ai e atoa, seseahu vairanai;
27 bona muramura mai bonadia ia latanai e gabu, Iehova ese e haḡania heḡereḡerena.
28 Bena dubu e sesea ahu.
29 Bena hebou kalagana dubuna iduarana vairanai ia ese ihaboulaina patana e atoa, bona ḡole-oho boubouna bona flaoa boubouna ia latanai e ato, Iehova ese e haḡania heḡereḡerena.
30 Bena ihaboulaina patana bona hebou kalagana padadiai ia ese hurihuri dihuna e atoa, bona ranu e seia,
31 Mose bona Aaron bona Aaron natuna imadia bona aedia ihurilaidia ranuna.
32 Hebou kalagana ai e raka vareai bona ihaboulaina patana e raka henia kahi negadia iboudiai idia na unu e digu tomava, Iehova ese Mose e haḡania heḡereḡerena.
33 Bena maḡu dabuadia e tau dae heḡeḡe, dubu bona ihaboulaina patana e ḡeḡe ahu, bona e sesea ahu.
Mose ena ḡaukara idoinai unu e haḡuḡurua toma.
34 Bena ori ese hebou kalagana e ḡovaia ahu, bona Iehova diaridiarina ese dubu e hahonua.
35 Taunabunai Mose na asi ena dala hebou kalagana ai baine raka vareai, badina be ori ese e ḡovaia ahu, bona Iehova diaridiarina ese dubu e hahonua.
36 Edia laolao iboudiai ori ese dubu e daetania negadia ai, Israel taudia na e tore isi, edia laolao ela.
37 A ori ese e ḡovaia ahu negadia ai, idia na asie tore isi, asie laolao, ela bona ma e daetania.
38 Badina be edia laolao iboudiai lalodiai Iehova ena ori ese dubu e ḡovaia ahu dina ai, bona hanuaboi ai lahi na ia lalonai, Israel taudia iboudiai vairadiai.
