Filipi 4:1-23
4 Taunabinai, varavaragu e, egu lalokau taumui, na ura henimuimu taumui, egu moale badina, egu dagi toana: lalokau e, Lohiabada lalonai ba gini tutuka-tutuka.
2 Euodia bona Sunutuke na noidiamu, lalodia bae tamona Lohiabada lalonai.
3 Oi danu, o kahagumu taumu e, ene hahine ba kahadia, badina be idia na lau ida a ḡaukara hebouva, sivarai namo ena; Klemento bona lau ida a ḡaukara hebouva taudia oredia danu. Idia ladadia na mauri bukana ai vada e tore.
4 Nega idoidiai Lohiabada lalonai ba moale. Ma na gwau loumu: ba moale.
5 Emui lalo-manau na taunimanima iboudiai bae diba. Lohiabada vada eme kahikahi.
6 Ḡau ta basio lalo haguhilaia; a ḡau iboudiai ḡuriḡuri ai, noinoi ai, heimodai ai, emui ura na Dirava ba hamaorolaia.
7 Bena Dirava ena maino, eda diba idoinai e hereaiamu mainona, ese lalomui bona daramui baine gima, Keriso Iesu lalonai.
8 Varavaragu e, orena binai: momokani ḡaudia iboudiai, hemataurai ḡaudia iboudiai, maoromaoro ḡaudia iboudiai, ḡoevaḡoeva ḡaudia iboudiai, lalokau ḡaudia iboudiai, haridia namodia ḡaudia iboudiai, ba haero. Ena namo taina mia ḡauna, eiava ena heimodai taina mia ḡauna, ba haeroa.
9 O davariva ḡaudia, o abi daeva ḡaudia, egu ai o kamonaiva o itava ḡaudia, unu mo ba kara; bena Maino Diravana ese baine bamomui.
10 Lohiabada lalonai na moale badamu, vada o lalolaigu loumu dainai. Dibagu o lalolaigu gunava, to asi emui dala ta.
11 Egu ogoḡami na asina herevalaiamu; badina be vada na manada, egu ai e miamu ḡaudia baina moalelai.
12 Ogoḡami dibagu; taḡa danu dibagu. Gabu iboudiai, ḡau iboudiai, bogakunu bona hitolo, taḡa bona ogoḡami, vada na manadalai.
13 Goada e henigumu Diravana dainai lau na ḡau iboudiai ikaradia ai na goadamu.
14 Ḡau tamona, egu hisihisi lalonai o kahagumu be namo.
15 Filipi taumui e, umui dibamui, sivarai namo iloalaina na matamaia negana ai, Makedonia na rakatania murinai, ekalesia oreana ta ese ikahalaigu ḡaudia ihenidia bona iabidia herevadia se gwaurai, umui mo sibomui.
16 Badina be Tesalonika ai na nohova ai, umui ese egu ogoḡami ikahalaina ḡaudia o siai loulouva.
17 Dia herahia ḡauna asina tahuamu, a huahua hari na tahumu, ihanamolaimui ḡaudia ai baela huahuadia.
18 Lau na vada na abi vaitani; egu ḡau na momo. Badina be Epafrodito ese emui amo e mailai ḡaudia vada na abi; bonadia nanamo ḡaudia, boubou ḡaudia, Dirava ese e abi daemu mai moalena ida.
19 Egu Dirava ese o dabumu ḡaudia baine henimui ḡuḡuru, ena kohu herea-daedia, Keriso Iesu lalonai baine henimui.
20 Tamada Dirava baita imodaia hanaihanai. Amen.
21 Keriso Iesu ena helaḡa taudia iboudiai ba hahenamo henidia. Varavarada dekegu ai e nohomu ese e hahenamo henimumu.
22 Helaḡa taudia iniseni ai, haida danu Kaisara ena ruma ai e nohomu, iboudiai ese e hahenamo henimuimu.
23 Lohiabada Iesu Keriso ena harihari-bada na laumamui ai baine mia.
