Genese 13:1-18
13 Abram ese Aigupto tanona e rakatania, ia mai adavana ida. Ena kohu idoinai e laohaia; Lot danu e hakaua lao. Idia na diho kahana amo e lou.
2 Abram ena boromakau na momo herea, ena silver bona ena gold danu momo herea.
3 Diho kahana amo e laolao ela, Betele ai e kau, ena taruha gabuna gunana ai ma e taruha, Betele bona Ai padadiai;
4 gunaguna ihaboulaina patana e larebaia gabuna bunai. Unuseni ai Abram ese Iehova ladana e hahanea.
5 Lot danu, Abram e bamoa tauna, ena mamoe bona ena boromakau na momo, ena dabua kalagadia danu momo.
6 Taunabunai una tano na dia heḡereḡere idia raruosi gabu tamona ai bae noho hebou, badina na edia kohu na momo bona gabu na dia bada.
7 Bena Abram ena boromakau ireḡudia taudia na Lot ena boromakau ireḡudia taudia ida e heai. Una negana ai Kanaan taudia bona Perisi taudia na una tano ai e nohova.
8 Bena Abram ese Lot e hamaoroa, eto, Mani ita raruosi basita heai, eda boromakau ireḡudia taudia danu basie heai, badina be ita na varavara.
9 Tano idoinai na oi vairamu ai mia, ani? Mani emu kara, egu ai ba raka siri; oi na lauri kahana boma lao, lau be idiba kahana bama lao; eiava oi na idiba kahana boma lao, lau be lauri kahana bama lao.
10 Bena Lot na e gaga isi, Ioridane kourana e itaia, idoinai mai ranuna: Iehova ese Sodoma bona Gomora do se habua tari negana ai una tano na Iehova ena imea na heto, eiava Aigupto tanona, Soara dalana ai e laomu, na heto.
11 Bena Lot na Ioridane kourana idoinai e abia hidi, mairiveina kahana ela. Idia raruosi na e haheparara.
12 Abram na Kanaan tanona ai e noho; bona Lot na taora hanuadia ela, Sodoma kahana ai e taruha.
13 A Sodoma taudia na didika, Iehova vairanai e kara havara.
14 Bena Lot e raka oho murinai Iehova ese Abram e hereva henia, eto, A gaga isi; o ginimu gabuna ai ba roha roha, mirigini kahana ai, diho kahana ai, mairiveina kahana ai, tahodiho kahana ai.
15 Badina be o itaiamu tanona idoinai baina henimu, bona oi garamu baina henidia ela bona hanaihanai.
16 Oi garamu na tano ḡahuna na heto baina hahutumadia; taunabunai, tau ta tano ḡahuna dimura-dimuradia iduahidia bema diba, ia na oi garamu iduahidia bema diba.
17 A tore isi, ina tano ba rakaia hanai, latana amo, lababana amo; badina be lau ese baina henimu.
18 Bena Abram na ena dabua kalagana e lokua, e tore isi, ela, Heberon ai e taruha, Mamare ena au helaḡadia badidiai. Unuseni ai ihaboulaina patana ta e larebaia, Iehova ena.
