Genese 17:1-27
17 Abram ena mauri laḡanidia na taurahanai-ta-ahui taurahani-ta negana ai, Iehova ese ienai e hedinarai, e hereva henia, eto, Lau na Siahu Diravana; lau vairagu ai ba raka mai maoromaoromu ida;
2 taravamu aina atua raruosi eda, bona garamu baina hahutumadia.
3 Bena Abram na tano ai e goru diho; bena Dirava ese e hereva henia, eto,
4 Lau ese taravamu na atuamu: bese diaḡau do ba havaradia lau daigu ai.
5 Ladamu danu basie hatoa lou “Abram”, a ladamu bae hatoa “Abraham”,* badina be bese diaḡau ihavaradia tauna ai vada na halaomu.
6 Garamu lau ese baina hahutumadia, bese idau-idau do ba havaradia, hanua pavapavadia danu oiemu amo bae vara.
7 Taravamu na atuamu be lau ese baina badinaia ita raruosi eda, bona garamu murimu ai bae vara edia, ela bona uru iboudiai, baine mia hanaihanai taravatuna: emu Dirava ai bona murimu ai bae vara garamu edia Dirava ai do bainala.
8 Oi ese o noholaia hedoa-hedoamu tanona na oi bona murimu ai bae vara garamu danu baina henimui, Kanaan tanona idoinai na umui emui ela bona hanaihanai: lau na emui Dirava ai bainala.
9 Dirava ese Abraham ma e hamaoroa, eto, Oi danu egu taravatu do ba badinaia, oi bona murimu ai bae vara garamu ela bona uru idoidiai.
10 Ba badinaia, bona murimu ai bae badinaia, taravatuna binai: emui maruane iboudiai bae peritomedia,
11 kopimui bae ivadia, eda taravatu toana.
12 Uru iboudiai lalodiai, vara matamata mamaruanedia edia vara dinadia bae taurahani ai na bae peritomedia, umui emui ai bae vara memerodia, bona emui hesiai hahinedia ese emui ruma ai bae havaradia memerodia, idau bese memerodia edia bese taudia ediai ba hoidia danu bae peritomedia.
13 Emui ruma ai bae vara memerodia bona ba hoidia memerodia, iboudiai ba peritomedia: unu amo egu taravatu toana na kopimui ai baine mia, badina be ia na mia-hanaihanai taravatuna.
14 A maruane ta basiema peritomea, ia na asi ahuna ena bese ai; ia na egu taravatu itata-utuna tauna.
15 Dirava ese Abraham ma e hamaoroa, eto, Adavamu Sarai ladana basio hatoa lou “Sarai”, a ladana ba hatoa “Sara”.
16 Lau ese baina hanamoa, natumui ta baine vara: momokani, baina hanamoa, ia na bese idau-idau sinadia ai bainela; hanua pavapavadia ia ese baine havaradia.
17 Bena Abraham na tano ai e goru diho, to lalona ai e kiri, eto, Ena mauri laḡanidia na sinahu-ta tauna ese natuna baine havaraia a? Sara danu ena mauri laḡanidia na taurahani-ta-ahui be baine mara a?
18 Bena Abraham ese Dirava e noia, eto, Ismael na oi vairamu ai bema noho bema namo.
19 A Dirava ese Abraham e haere henia, eto, Lasi, adavamu Sara ese natumu ta baine havaraia, ladana ba hatoa Isaak.* Egu taravatu baina badinaia ienai bona murinai bae vara garana ediai, ela bona hanaihanai.
20 A Ismael ome gwauraia herevana vada na kamonai; benaini, vada na hanamoamu, ia besena baine vara, garana bae hutuma; lohia gwauta-rarua ia ese baine havaradia, bese badana ai baina halaoa.
21 A egu taravatu na Isaak enai baina badinaia, merona bunai Sara ese baine abia, laḡani vairai.
22 Dirava ese ena hereva e hadokoa, bena ia ese Abraham e rakatania.
23 Bena Abraham ese natuna Ismael e abia, bona ena hesiai tataudia iboudiai, ena ruma ai e vara taudia bona e hoidia taudia danu, e abidia, iboudiai e peritomedia una dina ai, kopidia e ivadia, Dirava ese e haduaia heḡereḡerena.
24 Abraham ena mauri laḡanidia na taurahani-ta-ahui taurahani-ta, e peritomea negana ai.
25 Natuna Ismael ena mauri laḡanidia na gwauta toi, e peritomea negana ai.
26 Abraham mai natuna Ismael ida dina tamona ai e peritomedia.
27 Ena ruma tataudia iboudiai danu, ena ruma ai e vara taudia bona bese idau edia amo e hoidia taudia, iboudiai na ia ida e peritomedia nega tamona ai.
