Genese 7:1-24
7 Iehova ese Noa e hamaoroa, eto, Emu ruma taudia iboudiai lagatoi lalonai ba hakaudia vareai, badina be vada na itamu, ina uru ai oi sibomu kara maoromaoro taumu.
2 Mauri ḡaudia iboudiai tanobada ai bavabidia: ḡoevaḡoevadia na hitu hitu amo bavabidia, maruane hitu hahine hitu, unu bavabidia toma; a asi ḡoevaḡoevadia na rua rua amo, maruane ta hahine ta bavabidia.
3 Atai manudia idau-idau danu bavabidia, maruane hitu hitu amo, hahine hitu hitu amo, besedia na tanobada ai do bae vara lou helaoreana.
4 Badina be dina hitu bae ore murinai lau ese medu baina hadihoa tanobada ai, dina hari-ahui boi hari-ahui, mauri ḡaudia iboudiai tanobada ai vada na karadia ihabua-taridia totona.
5 Bena Iehova ena hahedua iboudiai na Noa ese e kara ḡuḡuru.
6 Noa ena mauri laḡanidia na sinahu tauratoi negana ai, utu-utu badana ese tanobada idoinai e utua dae.
7 Bena Noa bona natuna bona adavana bona ravana hahinedia laḡatoi ai e gui, utu-utu dainai.
8 Mauri ḡaudia ḡoevaḡoevadia bona asi ḡoevaḡoevadia, bona manu, bona tano ai e raumu ḡaudia,
9 iboudiai na rua rua amo, maruane bona hahine, Noa ida e gui kau lagatoi ai, Dirava ese Noa e haḡania heḡereḡerena.
10 Bena dina hitu e ore murinai, utu-utu badana na tanobada idoinai e utua dae.
Utu-utu badana
11 Noa ena mauri laḡanina ihasinahu-tauratoina, hua iharuana, hua dinana ihagwauta-hituna, abata bada-hereana e lasi bona medu bada-hereana e diho matama.
12 Una medu na dina hari-ahui boi hari-ahui e dihova.
13 Una dina ai Noa mai adavana ida, bona natuna tatoiosi, Sem bona Ham bona Iafet, mai adavadia ida, lagatoi ai e gui.
14 Boroma bona boromakau idau-idau danu, bona tano ai e raumu ḡaudia idau-idau, bona manu idau-idau, e gui kau;
15 mauri ḡaudia ibouboudiai rua rua amo, Noa ida lagatoi ai e gui,
16 maruane hahine ida e gui kau, Dirava ena hahedua heḡereḡerena. Bena Iehova ese lagatoi ai e koudia ahu.
17 Dina hari-ahui lalodiai utu-utu na tanobada idoinai e utua daeva, e bada e laova, a lagatoi e keni dae atai ai.
18 Utu-utu na e bada e laova; a lagatoi na ranu kopina ai e hureva.
19 Utu-utu na tanobada idoinai e utua dae vaitani; ororo iboudiai guba henunai e miava na e bubuni;
20 ororo doridia ai ranu ena dobu na roha hani mai kahana.
21 Bena mauri ḡaudia iboudiai tanobada ai e mase, manu bona boromakau bona boroma idau-idau bona tano ai e raumu ḡaudia bona taunimanima;
22 tano kaukauna ai e mauri nohova ḡaudia, ududia ai mai edia mauri laḡana ḡaudia, ibouboudiai e mase ore.
23 Tano kopina ai e mauriva ḡaudia iboudiai na e hebua tari, taunimanina bona boromakau bona tano ai e raumu ḡaudia bona atai manudia. Noa mo sibona, bona ia ida lagatoi ai e nohova ḡaudia, vada e mauri.
24 Ranu ese tanobada e habubunia ela bona dina sinahu-ta imahui.
