Ieremia 14:1-22
14 Ina doe herevana na Iehova ena amo Ieremia enai e kau, eto:
2 Iuda na e taitaimu, ena ikoukou na e manokamu;ena taunimanima na tano ai e rohe ahumu,bona Ierusalem ena taitai na e daemu.
3 Ena lohia ese edia hesiai taudia na e siaidia laomu,ranu bae utu totona;idia ese ranu gabudia e lao henidiamu,a ranu asie davariamu;edia hodu na asi anidia e loulaidiamu,e hemaraimu bona e baiamu,kwaradia e ḡovadia ahumu.
4 Ruarua taudia daradia e dokomu,medu na tano ai se dihomu dainai;biru taudia na e hemaraimu,kwaradia e ḡovadia ahumu.
5 Dia hahinena tano paka ai ese natuna, vara matamata ḡauna, na e rakataniamu,rei lasi dainai;
6 uda donikidia na ororo nemuka-nemukadia ai e ginimu,e laḡa dae laḡa daemu, uda sisiadia na heheto,matadia na e valahu-valahumu,aniani avadia lasi dainai.
7 Iehova e, ena be emai kara havara ese e habadelaimaimu,to oi ladamu bagunai ba ḡaukara;badina be emai raka-muri na momo,ai ese vada a kara dika henimu.
8 Israel ena helaro e, ena hahemauri dika negadia ai,anina be dahaka tano ai ba noho idau tauna na heto,eiava laolao tauna dala amo e raka sirimu, ena mahuta gabuna e tahuamu, na heto?
9 Anina be dahaka daradara tauna heḡereḡerena ai baola,eiava goada tauna hahemauri karadia asi dibana heḡereḡerena ai?
Ḡau tamona, Iehova e, oi na ai bogaragimai ai,bona ai na oi ladamu vada e henemailaimai;basio rakatanimai.
10 Iehova ese ina bese na ini e herevalaia tomamu:Unu loa-kava loa-kava daladia mo e ura henidia bona aedia na asie rudia dainai,Iehova ese se abidia daemu;harihari edia kara havara baine lalodia tao,bona edia kara dika davadia baine henidia.
11 Iehova ese e hamaorogu, eto: Ina bese taudia edia noho-namo basio ḡuriḡurilaia.
12 Ena be e anivagamu, to edia taitai basina kamonai; ena be ḡole-oho bouboudia bona flaoa bouboudia bae hahelaḡadia, to basina abidia dae; a dare amo bona doe amo bona dai-hanai goreredia amo baina aladia mase.
13 Bena lau nato, Ḡaubada Iehova e, a itaia, peroveta taudia ese vada e hamaorodiamu, e tomu “Dare basio itaia bona doe basio mamia, a lau ese maino korikori baina henimui ina gabu ai”.
14 Bena Iehova ese e hamaorogu, eto, Peroveta taudia ese hereva koikoidia e gwauraimu lau ladagu ai; lau ese asina siaidia, bona asina haḡanidia eiava asina hereva henidia. Idia ese mata-hanai koikoina bona bagu-haoro asi anina bona sibodia edia lalo-hadai koikoidia na e perovetalai henimuimu.
15 Taunabunai, hari peroveta taudia, lau ladagu ai e perovetamu to asina siaidiamu taudia, e gwaumu “Dare bona doe na ina tano ai basie kau” taudia, na Iehova ese ini e herevalaidia tomamu: Unu peroveta taudia na dare bona doe ese baine ha-oredia;
16 bona e peroveta henidiamu taudia na Ierusalem ariaradia ai bae negedia lasi, doe bona dare ese bae aladia mase, bena idia bona adavadia bona natudia mamaruanedia bona hahinedia iguridia tauna ta basine noho; badina be idia sibodia edia kara dika na idia latadiai ma baina bubu.
17 Ina hereva ba hamaorolaidia, baoto:
Iruru-matagu bae diho boi bae diho rani, idia na basie doko;badina be egu bese natuna hane-ulato rami-hebouna vada e haberoa dikadika,vada e rahua mase.
18 Tano paka ai bama raka lasi,a itaia, dare ai vada e mase taudia mo;bona hanua ai bama raka vareai,a itaia, doe ese e havaradia goreredia mo.Badina be peroveta tauna bona hahelaḡa tauna eseedia ḡaukara na tano idoinai e karamu,to asi aonegadia.
19 Iuda vada o dadaraia vaitani a?Oi laumamu ese Siona e inai heniamu a?Dahaka dainai vada o rahumai mamase,bena asi ihamaurimai dalana?Maino a tahua, a ḡau namona ta se vara;ihamaurimai dalana a tahua, a hahegari mo a davaria.
20 Iehova e, emai kara dika a gwaurai hedinaraimu,bona tamamai edia kara havara danu;badina be vada a kara dika henimu.
21 Oi ladamu bagunai basio dadaraimai,emu terono herea-daena basio hahemaraia;ba helalo tao,bona emu gwauhamata emai ai na basio tataia utu.
22 Bese idau-idau edia dirava bogaragidiaita ese medu ihadihona mai dibana a?Eiava guba sibona esebatugu baine hadihoa a?Iehova e, emai Dirava, oi benai ani?Emai helaro na oiemu ai,badina be oi ese ini ḡau iboudiai o karadiamu.
