Ieremia 3:1-25
3 Iehova na e tomu:
Tau ta ese adavana bema hadihoa,bena una hahine ese bema rakataniabona tau ta ma bema adavaia,adavana gunana ese ma bema lou henia a?
Una tano basinema miro bada a?
Oi na vada o mata bodaga tatau momo ediai;bena lau dekegu ai ba lou mai a?
2 Ba gaga isi, ororo nemuka-nemukadia ba itadia!
Edena gabu ai oi na tau ta ida asio eno bou?
Dala isedia ai vada o helai, tatau vada o naridia,Arabia hahinena tano ḡaḡaena ai na heto.
Emu mata-bodaga karadia amotano vada o hamiroa.
3 Taunabunai, batugu vada e helao ahu,bona hadohado negana ai medu se diho;ḡau tamona bagumu ita-itana na ariara hahinena baguna na heto,so uramu ba hemarai.
4 Ina harihari vada o boi henigu, ani,oto, Tamagu e! Kekenigu ai o hetura henigu.
5 Baine badu ela bona hanaihanai,bona lalona baine siahu ela bona dokona a?
A itaia, vada o hereva vaitani,to vada o kara dika mai goadamu idoinai.
Iehova ese Israel bona Iuda e sisiba henidia
6 King Iosia ena nega ai, Iehova ese e hereva henigu, eto, Una kara hebeatai besena, Israel, ena kara vada o itaia a? Ia na ororo badadia iboudiai e dara daeva, bona au mauridia iboudiai henudiai elava, unuseni ai lebulebu karadia e karava.
7 Bena lau nato “Ina idoinai baine ha-orea murinai ia ese baine lou henigu”; a ia na se lou mai, tadikakana koikoina Iuda ese karana e itaia.
8 Ia ese e itaia, una kara hebeatai besena Israel ena heuda-hanai karadia iboudiai daidiai lau ese na hadihoa bona hekoho revarevana na henia; ḡau tamona ia tadikakana koikoina Iuda na se gari, a ia danu ela, eha lebulebu.
9 lenai lebulebu na ḡau pipikina dainai, ia ese tano e hamiroa, nadi bona au ediai e lebulebu.
10 Ḡau tamona, ia tadikakana koikoina Iuda ese ina idoinai e itaia, to lau dekegu ai se lou mai mai lalona idoinai ida, a mai koikoina ida ema. Iehova na e herevamu.
11 Bena Iehova ese e hereva henigu, eto, Kara hebeatai besena Israel ena kerere vada eme hedinarai na taina maraḡi, a koikoi besena Iuda ena kerere na bada.
12 Aola, ina hereva na mirigini kahana ba gwaurai henia, baoto:
Iehova na e tomu:Kara hebeatai besena Israel e, a lou!Iehova na e tomu:Mai badugu ida basina haḡeremu,badina be lau na mai hebogahisigu;lau na basina badu hanaihanai.
13 Iehova na e tomu:Emu kerere a gwaurai hedinarai mo;Iehova, emu Dirava, o daḡedaḡe henia,bona idau taudia ida o eno bou au mauridia iboudiai henudiai,bona lau gadogu so kamonai henia,vada ba gwaurai hedinarai.
14 Iehova na e tomu:Kara hebeatai memeromui e, a lou;badina be biagumui na lau.Lau ese baina abimui, hanua ta amo ta,bona iduhu ta amo rarua,bena Siona ai baina hakaumui dae.
15 Lau ese ireḡumui taudia baina henimui, na lalo namo henidiamu taudia; bena idia ese aonega bona lalo-parara amo bae ubumui.
16 Iehova na e tomu, Tano ai ba vara rohoroho bona ba hutuma negana baine kau ai, unu dinadia ai idia ese Iehova ena taravatu mauana basie herevalaia lou. Basie laloa une, basie laloa tao, basie henanadailaia, bona ta ma basine hekara lou.
17 Una negana ai Ierusalem na bae gwauraia Iehova ena terono; bona bese iboudiai na ienai bae hebou Iehova vairanai, Ierusalem ai; bona sibodia edia lalo-hadai dikadia iḡavadia ai basie hetoahu.
18 Unu dinadia ai Iuda besena na Israel besena ida bae tami hebou, bona mirigini tanona amo baema bou, senemui na henidia tanona na ma bae mai henia.
19 Lau na laloa natugu bogaragidiai baina atomu,bona tano namona baina henimu, tano mai hairaina,basileia iboudiai edia e hereadiamu tanona.
Bona na laloa danu oi ese boma gwauraigu “Tamagu”,bona lau iḡavagu amo basioma raka siri.
20 Iehova na e tomu:
Israel besena e!
Momokani, kara hebeatai hahinena ese adavana e dihotaniamu na heto,oi ese vada o kara hebeatai henigu.
21 Ororo nemuka-nemukadia ai gado ta e hekamonaimu,Israel garana edia taitai bona edia noinoi;badina be edia dala vada e hagagevaia,Iehova, edia Dirava, vada e laloa boio.
22 Kara hebeatai memeromui, a lou mai;emui kara hebeatai amo baina hamaurimui.
A itaia, ai na a vasimu,badina be oi na Iehova, emai Dirava.
23 Momokani, ororo ese e koimaimu,bona lebulebu karadia ororo badadia ai ese e dibaḡanimaimu.
Momokani, Israel ihamaurina beIehova, emai Dirava, enai.
24 A eregabemai negadia amo hari hemarai ḡauna ese tamamai edia hekwarahi anidia iboudiai vada e hadonodia: edia mamoe seridia bona edia boromakau seridia, natudia mamaruanedia bona natudia hahinedia danu.
25 Emai hemarai ai baia hekure; emai hemarai ese baine ḡovamai ahu; badina be ai ese Iehova, emai Dirava, vada a kara dika henia, ai bona tamamai danu, eregabemai negadia amo ema bona ina dina; bona Iehova, emai Dirava, gadona asia kamonai henia.
