Ieremia 48:1-47
48 Moab herevana. Iehova Sabaota, Israel Diravana, na ini e gwau tomamu:
Nebo madi ihabaina, badina be vada e havahua!
Kiriataimi vada e hahemaraia, vada e abia;kohoro vada e hahemaraia, vada e ḡiḡia dobi;
2 Moab harina namona vada e boio.
Hesebon ai ia ihadikana e henegalaia, eto,“Aoma, basileia dagina amo baita negea daure”.
Oi danu, Madmene, udumu bae koua,dare ese baine hahavamu.
3 A hakala! Taitai Horonaimi amo:
“Hahevahu bona hahebua-tari bada-herea!”
4 Moab vada e habuaia tari;taitai na e hekamonaimu ela bona Soara.
5 Badina be Luhiti e dae heniamu dalana ai,idia na mai taidia ida e dae laomu,bona Horonaimi e hekei heniamu dalana ai,hahebua-tari taitaina vada e kamonai.
6 A heau, sibomui maurimui ba tahua!
Tano ḡaḡaena ai ba noho, uda donikina na heto!
7 Badina be, emui gabu aukadia bona emui kohu o abidadama henidia dainai,umui danu bae abimui.
Kemoso* danu bainela, dauhai bae hanohoa,mai ena hahelaḡa taudia bona ena lohia taudia ida.
8 Hahebua-tari tauna na hanua iboudiai latadiai baine kau,hanua ta basine roho mauri.
Koura na baine vahu,bona taora na baine hahebua tari,Iehova vada e hereva heḡereḡerena.
9 Moab na hanina ba henia,badina be e uramu baine roho lao;ena hanua loḡora bae vahu,asi inoholaidia bae mia.
10 Iehova ena ḡaukara na mai Iahedona ida e karaiamu tauna bae uduguiraia; ena dare na rara ihahebubuna amo e ruamu tauna na bae uduguiraia.
11 Moab na merona negana amo vada e noho namonamo,vine ranuna asi nurinurina na heto;hodu ta amo hodu ta ai asie vedaia,bona dauhai asie hanohoa;taunabunai ia mamina na doini lalonai e miamu,bona bonana na se idaumu.
12 Taunabunai Iehova na e tomu: A itaia, dinana be maimu lau ese ihaegena taudia na ia dekena baina siaidia lao; bena idia ese bae haegea, ena hodu anidia bae bubu ore, bona ena hodu bae hamakohidia.
13 Bena Moab ese Kemoso hemaraina baine hemarai, Israel iduhuna ese Betele, edia heabidadama, hemaraina e hemaraiva heḡereḡerena.
14 Dahaka dainai o tomu “Ai na haheauka taumai
bona tuari taumai mai goadamai” a?
15 Pavapava badana, ladana Iehova Sabaota, na e tomu:
Moab mai ena hanua loḡora ida ihabua-taridia tauna vada e dae ema,bona ena eregabe taudia herea-daedia na mase ai vada e diho lao.
16 Moab ena hahehisi vada eme kahikahi,bona ena hisi-ani e mai haraḡamu.
17 Ia taina ba tai, o nohoa heḡeḡemu taumui iboumui ai,bona ia ladana mai dibamui taumui iboumui ai,baoto “Dagi auna herea-daena, au mai hairaina,madi vada e kwaidu”.
18 Dibon inoholaina taumu e!Hairaimu amo a diho, tano haura-haurana ai ba helai.Badina be Moab ihabua-tarina tauna vada ema, oi ihadikamu totona;emu gabu aukadia vada e habuadia tari.
19 Aroere inoholaina taumu e!Dala isena ai ba gini, ba gima,heau tauna bona roho-mauri hahinena ba nanadaidia,baoto “Edeheto?”
20 Moab vada e hahemaraia, badina be vada e makohi.A lolo, a tai!Aranon badibadinai ba gwauraia, baoto“Moab vada e vahu”.
21 Hahemaoro na atai taorana ai vada e kau, Holon, Iahasaha Mefata,
22 Dibon, Nebo, Bete-diblataimi,
23 Kiriataimi, Bete-gamulu, Bete-meono,
24 Kerioto, Bosra, bona Moab tanona hanuadia iboudiai, daudaudia bona kahikahidia, latadiai.
25 Moab ena doa vada e utua oho, bona imana vada e kwaidu. Iehova na e herevamu.
26 Ba hakekeroa; badina be ia na sibona e hahebada, Iehova e hamaraḡia. Taunabunai, Moab na sibona ena mumuta ai baine hekui-hekui; taunimanima ese bae kirikirilaia.
27 Israel na so kirikirilaia a? Henao taudia bogaragidiai o davaria, bena o herevalaia negadia iboudiai kwaramu o haladoladoa a?
28 Moab inoholaina taumui e!
Hanua ba rakatanidia, haga nadina ai ba noho,koura dobudobu hagahagadia ai ena ruma e karaiamu punena na heto ba noho.
29 Moab ena heaḡi sivaraina vada ta kamonai;ia na e heaḡi dikadikamu;ena heabi-isi, ena heaḡi, ena hekokoroku, na dibada,bona lalona ena hedadarai danu.
30 Iehova na e tomu:Ena ere-daḡedaḡe dibagu;ena hekokoroku herevadia na kokoikoi,ena kara danu kokoikoi.
31 Taunabunai, Moab taina na taimu,Moab idoinai dainai na tai lolomu,Kuri-here taudia daidiai na taimu.
32 Sibma vinena e!Oi na tailaimu badamu, lasere na tailaia maraḡimu.Oi rigimu ese davara e hanaia,ela bona lasere ai e kau;emu au huahuadia bona emu vine huahuadia navada e habuadia tari.
33 Moab tanona, huahua momo tanona, amolalo-namo bona moale vada e abi oho.Lau ese vine ranuna vada na hadodoa, vine itaolaina gabuna ai;asi tauna ta ese e moimoilaiamu mai moale lolona ida,lolo na dia moale lolona.
34 Hesebon bona Eleale e taimu; gadodia e daemu ela bona Iahasa, bona Soara amo ela bona Horonaimi bona Eglata-selisia. Badina be Nimirimi ranudia vada e kororo.
35 Iehova na e tomu: Moab ai atai gabuna ai boubou karadia e karamu bona muramura mai bonana na ena dirava e gabu heniamu tauna na baina hadokoa.
36 Taunabunai lalogu na e taimu ivilikou na heto, Moab dainai; bona lalogu na e taimu ivilikou na heto Kiri-here taudia daidiai; una dainai e habou kohudia na vada e ore.
37 Badina be kwara iboudiai bae nau, bona auki iboudiai huidia bae abi; ima iboudiai bae heḡasi, bona koekoe ai puse dabuadia bae herio.
38 Moab rumadia iboudiai guhidia ai bona hanua ariaradia ai e herohe ahumu, badina be Moab vada na huaria, ta ese se balaia henimu hoduna na heto. Iehova na e herevamu.
39 Madi, vada e makohi! Madi ihabaidia, e tai lolololomu! Moab madi, ena hemarai dainai vada e gini muri! Taunabunai Moab na e kirikirilaiamu bona e garilaiamu ḡauna ai vada e hahelao, e noho hetabiramu taudia ediai.
40 Badina be Iehova ini e gwau tomamu:
A itaia, ta baine roho haraḡa-haraḡa, ugava na heto,hanina baine toi roro, Moab ihadikana totona;
41 hanua na bae abidia,bona gabu aukadia bae dadi.
Una dina ai Moab ena tuari taudia lalodia nae hekamonaimu hahinena lalona heḡereḡerena ai baela.
42 Moab na bae habuaia tari, basie gwauraia lou bese ta;badina be ia sibona e hahebada, Iehova e hamaraḡia.
43 Moab inoholaina taumu e!
Laḡaḡa bona hedai-dobi gurina bona idoa na vairamu ai.
Iehova na e herevamu.
44 Mai laḡaḡana ḡauna amo baine heau oho tauna nahedai-dobi gurina lalonai baine moru,bona guri lalona amo baine hekamo dae tauna naidoa ese baine idoaia.
Badina be lau ese ini ḡau na Moab latanai baina hadihoa,edia dika davana iabina laḡanina ai.
Iehova na e herevamu.
45 Hesebon ikerukeruna aiheau taudia na e ginimu,edia goada na vada e ore;badina be lahi na Hesebon amo vada e lasi,lahi hururu-hururuna Sihon ena ruma amo;Moab baguna vada e huaria,bona heloḡo-heloḡo taudia kwaradia tubuadia danu vada e huaridia.
46 Moab e, madi ihabaimu!Kemoso ena orea taudia vada e baia;badina be natumu mamaruanedia vada e ḡuidia,bona natumu hahinedia na iḡuidia ai vada e laohaidia.
47 Moab ena noho ma baina hanamoa lou, dina gabedia ai.
Iehova na e herevamu. Hahemaoro Moab latanai herevadia bunu.
Footnotes
^ Kemoso na Moab taudia edia dirava.
