Ieremia 5:1-31
5 Ierusalem ariaradia ai ba heau lao ba heau mai,ba itaia bona ba haeroa.
Ena ariara lalodiai ba ita hetahu-hetahu,tau ta ba davaria eiava lasi,e hahemaoro ḡoevaḡoevamu bona hereva momokanina e tahuamu tauna;unu amo ena dika bama gwau tao.
2 Ena be e tomamu “Iehova e maurimu heḡereḡerena”,to e gwau hamata koikoimu.
3 Iehova e, oi matamu ese kara momokanina e tahuamu, ani?Oi ese vada o harahudia mase,a lalodia asie hisihisi;oi ese vada o aladia ore,a mata-hakani asie ura.Idia ese vairadia e ha-aukadia,vairadia na nadi-aukadia na heheto,a idia na asie ura bae helalo kerehai.
4 Bena lau nato: Ini na ogoḡami taudia mo,lalodia na asie pararamu;badina be Iehova ena dala na asi dibadia,edia Dirava ena taravatu danu asi dibadia.
5 Lohia dekedia bainala, baina hereva henidia;badina be idia na Iehova ena dala dibadia,edia Dirava ena taravatu danu dibadia.A idia iboudiai ese danu maduna auna vada e hakwaidua,bona iḡuidia vada e hamotudia.
6 Taunabunai, uda amo leona ta ese baine aladia mase;tano ḡaḡaena amo sisia daḡedaḡena ta ese baine habuadia tari.Taiga ta ese edia hanua e bani henidiamu,bae raka lasi taudia iboudiai na ia ese baine daredia patapata;badina be edia kara dika na momo,edia raka-muri na bada.
7 Emu dika na ede baina gwaua tao toma?Oi natumu ese vada e rakatanigu,dirava koikoidia ladadia ai vada e gwau hamata.Bogadia na hakunuva negadia ai,idia na e heuda hanaiva,ariara hahinedia edia ruma ai e didi vareaiva.
8 Idia na hosi mamaruanedia,bogadia e kunumu bona taudia e lokalokamu,ta ta dekena tauna dekena tauna adavadia e tubebe henidiamu.
9 Iehova na e tomu:
Unu ḡau daidiai davadia basina henidia a?
Bese unuhetomana latanai dava basina atoa a?
10 Ena vine imeana ba rakaia hanai, ba havahua,a basio havahuraia vaitani;ia rigina ba padadia oho,badina be idia na dia Iehova ena.
11 Badina be Israel iduhuna bona Iuda iduhuna naegu ai vada e hebeatai vaitani.Iehova na e herevamu.
12 Idia ese Iehova e herevalaia koikoi, eto:Ḡau ta basine karaia;dika ta ita eda ai basine kau,dare bona doe basita mamidia.
13 Peroveta taudia na lai kavakava ai bae hahelao,hereva momokanina na dia idia ediai.Unu bae halou henidia toma.
14 Taunabunai Dirava, Iehova Sabaota, na ini e gwau tomamu:Ina hereva vada e gwauraia dainai,a itaia, egu hereva na lahi ai baina halaodia oi udumu ai,bona ina bese na au rakuraku ai baina halaoa,bena lahi ese baine aradia ore.
15 Israel besena e, a itaia,bese ta na dauha amo baina mailaia umui latamui ai.Iehova na e herevamu.Una bese na e hesiriu hanaihanaimu besena,ia na bese gunana;ia na gadona asi dibamu besena,bae hereva negadia ai lalomu basine parara.
16 Edia diba pauana na gara hekehona na heto;idia iboudiai na goada-dikadika taudia.
17 Emu taboro bae ha-orea,bona emu aniani ḡaudia danu;natumu mamaruanedia bona hahinedia bae ha-oredia,bona emu mamoe seridia bona emu boromakau seridia danu;emu vine bae haoredia,bona emu suke audia danu;emu hanua aukadia, o abidadama henidiamu hanuadia, nadare ai bae habuadia tari.
18 Iehova na e tomamu: To unu dinadia ai lau ese basina ha-oremui vaitani.
19 Bena emu bese taudia baeto “Badina be dahaka Iehova, eda Dirava, ese ini kara iboudiai na eda ai vada e kara?” negana ai, oi ese ba hamaorodia, baoto “Umui ese vada o rakatanigu, bona emui tano lalonai dirava idaudia isiaidia vada o lao heni heḡereḡerena, umui ese danu idau tano, dia emui tano, lalonai idau taudia isiaidia do ba lao heni”.
20 Iakob iduhuna ai ina hereva ba gwauraia,Iuda tanona ai ba gwauraia hedinarai, baoto:
21 Asi lalomui bona asi daramui taumui e, a kamonai,mai matamui, to asio heitamu;mai taiamui, to asio kamonaimu.
22 Iehova na e tomamu:
Asio gari henigumu a?
Lau vairagu ai asio heude-heudemu a?
Lau ese kone na atoa, davara hetoana,davara ilao-ahuna, baine mia hanaihanai ḡauna,davara ese basine hanaia diba ḡauna.
Ena be hurehure na e heabi isimu, to basie kwalimu diba;ena be kone ai e poumu, to basie hanaia diba.
23 A ina bese taudia lalodia na a’auka, bona mai gwau-edeededia;idia na vada e raka siri, dauha vada ela.
24 Lalodia ai idia na asie tomu:Iehova, eda Dirava, garina baita gari;ia ese medu e henidamu, negana korikori ai,lahara medudia bona guitau medudia;bona vada e duanaidia taboro puradia ai baela puradia naia ese e badinadiamu, eda.
25 Ini na emui kara havara ese emui amo vada e abi oho,bona emui kara dika ese namo na emui amo vada e laoa ahu.
26 Badina be kara dika taudia na egu orea taudia bogaragidiai e nohomu;bona idia na e komumu, manu ibani-henidia taudia na heheto.Idia ese rikiriki e atoamu,taunimanima e abidiamu.
27 Edia ruma na kara dibaka ai e honumu,bosea na manu ai e honumu na heto;taunabunai idia na vada e lohia, vada e taḡa,
28 taudia vada e bada bona vada e raho namo.
Edia kara dikadia na asie hamaraḡidiamu;asie hahemaoro ḡoevaḡoevamu;ihareha idurudia asie goadalaiamu,bona e dabumu taudia ahudia korikori asie gimadiamu.
29 Iehova na e tomu:
Ini ḡau daidiai matadia basina hakanidia a?
Bese inihetomana latanaidava basina atoa a?
30 Hoa bada bona gari bada ḡauna ta natano ai vada e vara:
31 peroveta taudia na e peroveta koikoimu,bona edia hahedua heḡereḡeredia ai hahelaḡa taudia na e lohiamu;bona egu orea taudia na e uramu unu baine heto,a nega dokona baine kau ai be ede ba kara toma?
