Iobu 37:1-24
37 Una dainai lalogu na e hekwarahimu,bona kudougu na e hetahamu.
2 Ia gadona guruna a kamonai;ia uduna amo e lasimu reḡedia danu.
3 Guba idoinai henunai e piua e laomu;bona ena kevaru ese tanobada daigunidia e kevarudia isimu.
4 Una murinai ia gadona e ḡoumu;ia gadona herea-daena na guba rahurahu guruna na heto,bona gadona e hekamonaimu negadia ai kevaru danu se dogoa taomu.
5 Dirava ese gadona guruna e habadaiamu, ta hoamu;kara badadia, ita asi dibada karadia, danu ia ese e karamu.
6 Badina be snow e haḡaniamu, e tomu “Tano ai ba diho”;bona medu sisimu bona medu baroko e hamaorodiamu, e tomu “Ba goada”.
7 Ia ese taunimanima iboudiai imadia na e laodia ahumu,iboudiai na iena ḡaukara bae diba totona.
8 Bena uda boromadia na edia noho gabudia ai e vareaimu;edia kohua lalodiai e nohomu.
9 Koe-hirihiri na taho-diho kahana amo e maimu;bona paraka na mirigini ese e mailaiamu.
10 Dirava laḡana amo medu-hetari na e hekaramu,bona gohu kopidia na e hetarimu.
11 Ori dagadagadia na ranu amo e hahonudiamu;dagadaga ese ena kevaru e hakarohodiamu.
12 Iena hahekau ai e odadia hegiro-hegiromu,ena haheḡani iboudiai ihaḡuḡurudia totona,taunimanima ese e noholaidiamu tanodia iboudiai latadiai.
13 Mata-hakani dainai eiava ena tano dainai eiava hebogahisi daidiai,ia ese e havaraiamu.
14 Iobu e, ina na a kamonai;a gini, Dirava ena hoa karadia ba haerodia,
15 Oi dibamu Dirava ese ede e haḡanidia tomamu,eiava ena dagadaga kevarudia ede e kevarudia isi tomamu, a?
16 Ori ede e heabi isi tomamu mai dibamu a?
Aonega herea-dae Diravana ena hoa karadia na dibamu a?
17 Lai diho kahana amo e hahohomu dainai tano na se mareremu,bena emu dabua na e siahumu;oi na mai dibamu a?
18 Oi na guba ba idia roro diba, ia heḡereḡerena;bona ba ha-aukaia, e havevea aurina hevarivarina ta na heto, a?
19 Ba hadibamai, ede baia hereva henia toma;sivaraimai ihamaoromaorolaidia asi dibamai, dibura dainai.
20 Ta ese baine hamaoroa lau na uramu baina hereva a?Nega ta ai tau ta eto “Baine hadonogu” a?
21 Harihari taunimanima na diari basie roha henia diba,guba e diarimu negana ai,bona lai ese ori e odadia ohomu negana ai.
22 Mirigini kahana amo diari herea-daena na e maimu,itaitana na gold na heto;Dirava hairaina na herea dae bona mai garina.
23 Siahu-idoinai Diravana na basita davaria diba;ia na herea, ena siahu bona ena hahemaoro ḡoevaḡoevana ai;bona ena kara maoromaoro na bada, ia ese basine hadikaia.
24 Una dainai taunimanima ese ia garina e garimu;ia ese sibodia edia aonega e heaḡilaiamu taudia na se matauraidiamu.
