Numera 16:1-50
16 Kora Isahara, Kohat Levi tubuna, bona Datan Eliab, bona Abiram Eliab, bona Onu Pelete, Ruben iduhuna tauna, hahaniosi e heḡaeḡae;
2 bena e tore isi, Mose dekena ela, idia bona orea lohiadia sinahu-rua imahui, hebou ese e abidia hidi taudia, iboudiai na mai haridia taudia.
3 Idia na Mose bona Aaron vairadiai e hebou, e heai henidia, eto, Umui raruosi na o hekokorokumu; badina be hebou taudia iboudiai na hehelaḡa; oibe, ibouboudiai, bona Iehova na bogaragidiai e nohomu. Dahaka dainai umui raruosi ese Iehova ena orea taudia o lohiadiamu?
4 Mose ese una hereva e kamonai, bena ia na tano ai e goru diho.
5 Bena ia ese Kora mai ena orea taudia ida e hamaorodia, eto, Daba ai Iehova ese baine hahedinaraia, daika be iena, bona daika na helaḡa, bona daika na ienai baine kahi lao; bena baine abia hidi tauna ese baine raka henia kahi.
6 Ini ba kara toma: oi Kora, bona emu orea taudia iboudiai, na gida keberedia helaḡadia bavabi;
7 bena kerukeru gida ba uda, bona muramura mai bonadia na gida latadiai bavato kau, Iehova vairanai; bena Iehova ese baine abia hidi tauna na baine helaḡa. Levi taumui, umui hari o hekokorokumu.
8 Mose ese Kora ma e hereva henia, eto, Umui Levi taumui ese egu hereva a kamonai.
9 Israel Diravana ese umui vada e abimui hidi Israel oreana taudia bogaragidia amo, ba raka henia kahi, Iehova ena dubu ai ba ḡaukara, bona hebou taudia vairadiai ba gini, iena hesiai taudia. Una na ḡau pipikina a?
10 Ia ese vada e boirimui, umui bona varavaramui Levi taudia iboudiai, ia ba raka henia kahi. Be, hahelaḡa dagina danu o tahuamu a?
11 Matona, oi bona emu orea taudia iboudiai vada o hebou, Iehova vada o heai henia. Aaron be daika, umui ese ia o maumauraiamu a?
12 Bena Mose ese Datan Eliab bona Abiram Eliab e boiridia. A idia eto, Ai na basia vasi.
13 Rata bona bada-ranuna e arumu tanona amo vada o hakaumai lasi, tano ḡaḡaena ai baia mase dahaka, harihari emai pavapava ai baola o tomu. Una na ḡau pipikina a?
14 Ina danu, rata bona bada-ranuna tanona ta ai asio hakaumai vareai, uma bona vine imeadia asio henimai, ai ahumai. Ini taunimanima na matadia ba hakepuludia a? Ai na basia vasi.
15 Mose na e badu dikadika, Iehova e noia, eto, Edia boubou basio abi dae. Lau be edia doniki ta asina dadia, bona idia ta asina hadikaia.
16 Bena Mose ese Kora e hamaoroa, eto, Kerukeru emu orea taudia ida baoma, Iehova vairanai ba gini, oi bona emu orea taudia bona Aaron.
17 Emui gida keberedia helaḡadia danu bavabi kau, muramura mai bonadia ba uda; ta ta ena kebere ena kebere bae mailaidia Iehova vairanai, kebere helaḡadia sinahu-rua imahui. Oi danu emu ba mailaia. Aaron danu ena baine mailaia.
18 Taunabunai, idia na ta ta ena kebere ena kebere e abi, gida e uda, bona muramura mai bonadia gida latadiai; bena hebou kalagana iduarana ai e gini, Mose bona Aaron ida.
19 Bena Kora ese orea idoinai e haboudia idia vairadiai, hebou kalagana iduarana ai. Bena Iehova diaridiarina e hedinarai, hebou taudia iboudiai ese e itaia.
20 Bena Iehova ese Mose bona Aaron e hamaorodia, eto,
21 Ena hebou amo ba raka siri, bena baina habuadia tari.
22 Bena idia na tano ai e goru goru diho, eto, Dirava e, taunimanima iboudiai laumadia Diravana, tau tamona baine kara dika dainai ina hebou idoinai ba badu henidia a?
23 Bena Iehova ese Mose ma e hamaoroa, eto,
24 Hebou taudia ba hamaorodia, Kora bona Datan bona Abiram edia kalaga amo bae raka oho.
25 Bona Mose e tore isi, Datan bona Abiram dekedia ela; Israel tau-badadia ese e ḡavaia.
26 Bena ia ese hebou taudia e hamaorodia, eto, Ene kara havara taudia edia kalaga amo ba raka oho, bona edia ḡau ta basio daua toho, idia edia dika ai ba dika na garina.
27 Taunabunai, idia na Kora bona Datan bona Abiram edia kalaga amo e raka siri. Bena Datan bona Abiram e raka lasi, idia bona adavadia bona natudia badadia bona natudia maraḡidia, edia kalaga iduaradia ai e gini.
28 Bena Mose eto, Ini amo ba diba, Iehova ese vada e siaigu, ini ḡaukara iboudiai ikaradia totona; dia lau sibogu asina kara.
29 Ini tatau be taunimanima iboudiai vaevae edia mase dalana ai bema mase, bona taunimanima iboudiai vaevae edia dika dalana ai bema dika, ba diba Iehova ese se siaigu.
30 A Iehova ese kara matamatana ta bema havaraia, tano uduna bema hahaḡaia idia bona edia ḡau iboudiai bema hadonodia, mauridia ai mase taudia edia gabu ai bema diho, vada ba diba idia ese Iehova vada e dadaraia.
31 Ena hereva e doko ai, idia henudia tanona e parara;
32 tanobada ese uduna e hahaḡaia bona e hadonodia, mai edia ruma taudia ida, bona Kora ena orea taudia iboudiai mai edia kohu ida.
33 Taunabunai, idia mai edia orea idoinai na mauridia ai mase taudia edia gabu ai e diho. Tano ese e habubunidia, hebou taudia bogaragidiai e mase ore.
34 Bena Israel taudia, e ginidia heḡeḡe taudia, ese edia tai lolololo e kamonai ai, e heau karoho; eto, Tano ese baine hadonoda na garina.
35 Bena lahi na Iehova ena amo e diho, hari tatau sinahu-rua imahuiosi, muramura mai bonadia e gabu taudia, e aradia ore.
36 Bena Iehova ese Mose ma e hereva henia, eto,
37 Hahelaḡa tauna Aaron natuna Eleasara ba hamaoroa, Iahi bogaragina amo kebere helaḡadia baine abidia lasi, gidadia baine bubu nege; badina be idia na hehelaḡa.
38 Ene kara havara daidiai vada e mase taudia edia gida keberedia na hehelaḡa: ba hododia severa-severa, ihaboulaina patana iḡovana ḡaudia ai baela, badina be Iehova vairanai e hahelaḡadia, taunabunai idia na hehelaḡa. Unu amo idia na toa ai baela, Israel taudia edia.
39 Taunabunai, hahelaḡa tauna Eleasara hari auri labora-labora keberedia, lahi ese e aradia taudia edia kebere, e abidia, e hododia severa-severa, ihaboulaina patana iḡovana,
40 bona helalo-tao toana, Israel taudia ese bae laloa tao, idau tauna ta, dia Aaron garana, na Iehova basine raka henia kahi, muramura mai bonana igabuna totona; Kora mai bamona ida heḡereḡeredia ai baela na garina. Iehova ese Eleasara unu e hamaoroa toma, Mose uduna amo.
41 Kerukeru, Israel oreana taudia ibouboudiai ese Mose bona Aaron e maumauraidia, eto, Umui ese Iehova ena orea taudia vada o aladia mase.
42 Ibouboudiai na Mose bona Aaron ialadia totona e hebou; bena e roha lao, hebou kalagana e itaia, ori ese vada e ḡovaia ahu, bona Iehova diaridiarina vada e hedinarai.
43 Bena Mose bona Aaron na hebou kalagana iduarana amo e raka lasi.
44 Bena Iehova ese Mose e hamaoroa, eto,
45 Ene e heboumu taudia edia amo a raka siri; lau ese aina habuadia tari. Bena raruosi na tano ai e goru diho.
46 Bena Mose ese Aaron e hamaoroa, eto, Emu gida keberena bavabia, muramura mai bonadia gida ai bavato kau; ba laohaia haraḡa-haraḡa hebou taudia dekediai, idia daidiai herohemaino karana ba karaia; badina be badu na Iehova ena amo vada e kau, dai-hanai gorerena vada e vara.
47 Bena Aaron ese kebere e abia, Mose ena hereva heḡereḡerena, bena e heau lao hebou taudia bogaragidiai. Dai-hanai gorerena na vada e vara matama, taunimanima ediai. Bena ia ese muramura mai bonadia na gida ai e ato kau, hebou taudia daidiai herohemaino karana e karaia.
48 Ia ese mase taudia bona mauri taudia padadiai e gini; bena gorere vada e doko.
49 Gorere ese e hamasedia taudia na gerebu-ta daha-hani sinahu-hitu;* a Kora ena kara havara dainai e mase taudia be ma idau.
50 Bena Aaron ese Mose e lou henia, hebou kalagana iduarana ai. Gorere vada e doko.
Footnotes
^ Gerebu-ta daha-hani sinahu-hitu: 14,700.
