1, 2. (a) Dahaka dainai lada bada tauna ta ladana mo ba diba karana ese se hahedinaraiamu ia na o dibaia namonamo? (b) Momo ese Iesu be ede e laloa tomamu?

TANOBADAI lada bada taudia na momo. Haida be edia hanua ai, taoni ai, eiava tano ai na mai ladadia. Haida be mai ladadia tanobada heḡeḡemadai ai. To, lada bada tauna ta ladana mo ba diba karana ese se hahedinaraiamu ia na o dibaia namonamo. Danu iena mauri dalana ibounai, bona ia be taunimanima ede bamona na asi dibamu.

² Taunimanima momo na mai dibadia Iesu Keriso, ena be ia na laḡani 2,000 gunanai tanobada ai e nohova. To, momo na dounu e daradaramu Iesu be daika. Haida na e gwaumu ia na tau namona. Ma haida na e gwaumu ia na peroveta tauna. To haida na e abia daemu Iesu na Dirava bona bae tomadiho henia na namo. O laloamu ia baita tomadiho henia be maoro, eiava?

3. Dahaka dainai Iehova Dirava bona Iesu Keriso ba dibadia namonamo na ḡau badana?

³ Iesu ba dibaia namonamo na ḡau badana. Dahaka dainai? Badina Baibul na e gwaumu: “Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.” (Ioane 17:3) Oibe, Iehova Dirava bona Iesu Keriso baita dibadia  namonamo neganai, tanobada paradaisona ai mauri hanaihanai baita abia diba. (Ioane 14:6) Danu, Iesu na mauri dalana maorona bona haida ikara namo henidia dalanai haheitalai namona e hahedinaraia. (Ioane 13:34, 35) Ina buka karoana ginigunanai, Dirava sivaraina momokanina ta herevalaia. Hari, Baibul ese Iesu Keriso e herevalaia dalana baita dibaiamu.

4. Ina hereva “Mesia” bona “Keriso” anidia be dahaka?

⁴ Iesu do se vara neganai, Baibul na vada e peroveta Dirava ese Mesia, eiava Keriso, baine siaia. Ina hereva “Mesia” (Heberu gado herevana) bona  “Keriso” (Grik gado herevana) anidia na “E Horoa Tauna.” Ina e gwauhamatalaia Tauna na bae horoa, anina na Dirava ese dagi badana ta baine henia. Gabe karoadia ai, ita ese Mesia ena ḡaukara badana, Dirava ena gwauhamata ihaḡuḡurudiai, baita dibamu. Danu, Iesu amo hari ta abimu hahenamodia baita dibadiamu. To, Iesu do se vara neganai, momo na e daradarava, ‘Daika be Mesia ai be laomu?’

5. Iesu ena hahediba taudia be dahaka e abia dae momokani?

⁵ Aposetolo edia negai, Iesu, tau Nasaret, ena hahediba taudia na e abia dae momokani ia na gwauhamata Mesiana. (Ioane 1:41) Hahediba ta ladana Simona Petro, na Iesu e hamaoroa: “Oi na Keriso.” (Mataio 16:16) To, edena dalai unu hahediba taudia bona ita na ta diba momokanimu Iesu na gwauhamata Mesiana?

6. Iehova ese abidadama taudia e durudia Mesia bae dibaia namonamo dalana mani a haheitalaia.

⁶ Iesu do se vara neganai, Dirava ena peroveta taudia ese Mesia sivaraina ibounai e perovetalai. Unu peroveta herevadia ese haida baine durudia ia bae dibaia namonamo totona. Ini baita haheitalaia toma: Bema oi na bae noimu basi stopu eiava peleini abi gabunai asi dibamu tauna ta ba ha-udaia. Oi bae durumu totona, ia toana bae hadibamu na namo, ani? Una heḡereḡerena, Baibul ena perovata taudia amo Iehova ese Mesia baine kara ḡaudia bona enai bae vara ḡaudia iboudiai e hahedinarai. Unu peroveta herevadia edia ḡuḡuru karana ese abidadama taudia baine durudia ia bae dibaia namonamo totona.

7. Ededia peroveta herevadia rua na Iesu enai e ḡuḡuru?

⁷ Haheitalai rua mani a lalodia. Ginigunana be, laḡani 700 mai kahana gunanai, peroveta tauna Mika na e gwa, gwauhamata Mesiana na Iuda tanona ena taoni maraḡina ta, Betelehem, ai baine vara. (Mika 5:2)  Iesu be edeseniai e vara? Una taoni ai! (Mataio 2:1, 3-9) Iharuana be, laḡani handred momo gunanai, Daniel 9:25 ena peroveta herevana ese Mesia baine hedinarai laḡanina​—29 C.E.​—e hahedinaraia. * Unu peroveta herevadia bona peroveta herevadia ma haida e ḡuḡuru karana ese e hamomokania Iesu na gwauhamata Mesiana.

8, 9. Iesu e bapatiso neganai dahaka ese e hamomokania ia na Mesia?

⁸ Laḡani 29 C.E. dokonai e ḡuḡuru ḡaudia ese e hamomokaniamu Iesu na gwauhamata Mesiana. Una laḡani ai Iesu na Ioane Bapatiso dekena ela Ioridane Sinavaina ai baine habapatisoa. Iehova ese Ioane enai toa ta baine hahedinaraia unu amo Mesia baine dibaia. Ioane ese Iesu ena bapatiso ai, una toa e itaia. Baibul na e gwaumu: “Iesu e bapatisoa; bena ranu amo e dae kau negana ai na guba e parara, bena ia ese Dirava ena Lauma e itaia, pune na heto e diho, ia tubuana ai e kau. Bona gado ta guba amo e boi dobi, eto, Lau Natugu binai, egu lalokau; lau ese ia na lalo namo heniamu.” (Mataio 3:16, 17) Ioane ese e vara ḡauna e itaia bona e kamonaia murinai, e diba momokani Iesu na Dirava ese e siaia. (Ioane 1:32-34) Una dina ai, Dirava ena lauma, o ena ḡaukara siahuna, na Iesu tubuana ai e kau neganai, ia na Mesia o Keriso ai ela, Dirava ese e abia hidi Hegunalai Tauna bona Pavapava ai bainela.​—Isaia 55:4.

⁹ Baibul ena peroveta herevadia e ḡuḡuru bona Iehova Dirava guba amo e hereva karana ese e hahedinaraia Iesu na gwauhamata Mesiana. To Baibul ese Iesu Keriso enai henanadai badadia rua e haerelaidia: Ia be ede amo ema, bona ia be taunimanima ede bamona?

10. Iesu tanobada do sema neganai, Baibul ese ena noho be ede e herevalaia toma?

¹⁰ Baibul na e gwaumu Iesu tanobada do sema neganai, ia na gubai e nohova. Mika na e peroveta Mesia na Betelehem ai baine vara bona “ena hematama na nega gunana amo.” (Mika 5:2) Nega momo, Iesu sibona na e gwa taunimanima ta ai do se vara neganai, ia na gubai e nohova. (Ioane 3:13; 6:38, 62 ba duahi; 17:4, 5) Iesu na gubai e nohova dainai, Iehova ida e hetura namonamo.

11. Edena dalai Baibul ese e hahedinaraiamu Iesu na Iehova Natuna lalokauna?

¹¹ Iesu na Iehova Natuna lalokauna. Baibul ese e gwauraiamu “e vara ḡaudia iboudiai roboadia,” badina ia na Dirava ese e havaraia guna. * (Kolose 1:15) To ḡau ma ta dainai ia na idau. Ia na Dirava “Natuna vara-edeana.” (Ioane 3:16) Anina na Iesu na Dirava sibona ese e havaraia. Danu, Dirava ese Iesu e ḡaukaralaia ḡau iboudiai e havaradia. (Kolose 1:16) Ma danu, Iesu na e gwauraia “Hereva.” (Ioane 1:14) Una ese e hadibadamu ia na Dirava ena gwaukau tauna, ia ese hahediba herevadia na Tamana natuna ma haida, aneru bona taunimanima, ediai e gwaurai.

12. Ede ta diba tomamu Iesu na dia Dirava ida heḡereḡere?

¹² Haida na e laloamu Iesu na Dirava heḡereḡerena, una momokani eiava? Baibul ese una na se gwauraia. Paragraf 11 ai tame diba, Iesu na Dirava ese e havaraia. Una dainai, ia na mai matamana, to Iehova Dirava hari asi matamana eiava asi dokona. (Salamo 90:2) Iesu danu nega ta se laloa ia na Tamana ida heḡereḡere. Baibul na e  gwaumu Tamana ese Natuna e hereaia. (Ioane 14:28 ba duahia; 1 Korinto 11:3) Iehova sibona na “Siahu-idoinai Diravana.” (Genese 35:11) Una dainai, ia na asi ihaheḡereḡerena. *

13. Baibul ese Iesu na e gwauraia “asita itaiamu Diravana heida-idana,” anina be dahaka?

¹³ Laḡani bilioni momo lalodiai, guba hisiudia bona tanobada do asie vara neganai, Iehova bona Natuna Iesu na e hetura namonamova. E helalokau heheniva! (Ioane 3:35; 14:31) Iesu ena kara na Tamana ena kara ida heḡereḡere. Una dainai, Baibul ese e gwauraiamu “asita itaiamu Diravana heida-idana.” (Kolose 1:15) Oibe, tanobadai natu ta ese tamana ena kara e hahedinaraiamu heḡereḡerena, Iesu ese Tamana ena kara e hahedinaraia ḡoevaḡoeva.

14. Edena dalai Iesu na taunimanima ta bamona e vara?

¹⁴ Iehova Natuna Iesu na mai ena ura ida guba e rakatania bona tanobada ema taunimanima ta bamona baine noho. To reana bo laloamu, ‘Lauma tauna ta be edena dalai taunimanima ta bamona baine vara diba?’ Una baine vara totona, Iehova na hoa karana ta e karaia. Ia ese Natuna roboana ena mauri na guba amo e kokia bena Iuda haneulato rami-hebouna, ladana Maria boganai e atoa. Una dainai tanobadai ia na asi tamana. Bena Maria ese natu ḡoevadaena ta e havaraia bona ladana e hatoa Iesu.​—Luka 1:30-35.

15. Dahaka dainai baita gwa diba, Iesu ena amo Iehova baita dibaia namonamomu?

¹⁵ Iesu tanobadai e nohova neganai, e herevalai bona e kara ḡaudia ese baine duruda ia baita dibaia namonamo.  Dia una mo, to Iesu ena amo Iehova baita dibaia namonamomu. Dahaka dainai? Mani a laloa lou, ia ese Tamana ena kara e hahedinaraia ḡoevaḡoeva. Una dainai, Iesu ese ena hahediba ta e hamaoroa: “Eme itagu tauna ese Tamagu danu vada eme itaia.” (Ioane 14:9) Baibul ena Evanelia bukadia hani​—Mataio, Mareko, Luka bona Ioane​—ese Iesu Keriso ena mauri, ḡaukara bona kara e herevalaidia.

16. Iesu ese dahaka e hahedibalaia, bona ena hahediba herevadia be daika ena amo?

¹⁶ Momo na mai dibadia Iesu na “Hahediba tauna.” (Ioane 1:38; 13:13) Dahaka e hahedibalai? Ia ese “basileia sivaraina namona e harorolaiava”​—una na, Dirava ena Basileia, guba gavamanina, ia ese tanobada idoinai baine lohiaia bona hahenamo momo na kamonai taudia baine henidia. (Mataio 4:23) Una be daika ena hereva? Iesu sibona e gwa: “Egu hahediba herevadia na dia lauegu, to e siaigu Diravana ena,” una na Iehova. (Ioane 7:16) Iesu na mai dibana Tamana na e uramu taunimanima ese Basileia sivaraina namona bae kamonaia. Karoa 8 ai, Dirava ena Basileia bona baine haḡuḡurua ḡaudia baita dibadiamu.

17. Iesu be edeseniai e hahedibava, bona dahaka dainai e ura haida baine hadibadia?

¹⁷ Iesu be edeseniai e hahedibava? Taunimanima e davaridiava gabudiai​—taoni, hanua, maketi gabudiai bona edia ruma ai. Iesu na se laloa taunimanima na ia dekena baela. Ia hari idia dekedia e laova. (Mareko 6:56; Luka 19:5, 6) Dahaka dainai Iesu na unu e kara toma bona ena nega bada na haroro bona hahediba ai e ḡaukaralaia? Badina unu amo Dirava ena ura baine karaia. Iesu na hanaihanai Tamana ena ura e karaiava. (Ioane 8:28, 29) To badi ma ta dainai ia na e harorova. Ia ese aru taudia e bogadia hisiva. (Mataio 9:35, 36 ba duahi.) Edia tomadiho  igunalaidia taudia ese Dirava sivaraina momokanidia bona ena ura na bema hadibalaidia na namo, to asie karaia. Iesu na mai dibana taunimanima ese Dirava ena Basileia sivaraina bae kamonai na ḡau badana.

18. Iesu ena kara namodia amo edena o moalelaiamu?

¹⁸ Iesu na lalokau bona hebogahisi tauna. Una dainai taunimanima ese asie gari heniava bona ia na manau tauna. Natu danu asie gariva. (Mareko 10:13-16) Iesu na taunimanima toadia na se lalova. Ia ese kara gageva bona hahemaoro gageva e inai henidiava. (Mataio 21:12, 13) Ena be haida ese hahine asie matauraidiava, to ia ese mai hematauraina ida e kara henidiava. (Ioane 4:9, 27) Iesu na manau herea tauna. Nega ta ia ese ena aposetolo aedia e huri, una ḡaukara na vaevae hesiai taudia edia ḡaukara.

19. Edena haheitalai ese e hahedinaraiamu, Iesu ese haida edia dabu ḡaudia na e lalodia badava?

¹⁹ Iesu ese haida edia dabu ḡaudia na e lalodia badava. Dirava ena lauma siahuna amo hoa karadia e kara neganai  e hedinarai ḡoevaḡoeva. (Mataio 14:14) Heḡereḡere, lepera tauna ta na Iesu dekena ela bena e gwa: “Boma ura, boma haḡoevagu.” Iesu ese una tau ena hisihisi na e lalopararalaia. Iesu ese e bogaia hisi, imana e toia roro bona e daua toho bena eto: “Na uramu, vada a ḡoeva.” Bona una gorere tauna na e namo lou! (Mareko 1:40-42) Una tau na e moale dikadika, ani?

20, 21. Iesu ese edena dalai e hahedinaraia ia na Dirava e badinaia?

²⁰ Iesu na haheitalai namona Dirava ibadinana karanai. Iesu na noho daladia idauidau ai bona daḡedaḡe bona hisihisi idauidau e davari, to Tamana e badinaia ḡoevaḡoeva. Iesu na mai ena goada ida Satana ena hahetoho e dadaraidia. (Mataio 4:1-11) Nega ta, varavarana ese asie abia dae, e gwauva “ia na vada e kavaia.” (Mareko 3:21) To edia kara ese Iesu na se koua; dounu Dirava ena ḡaukara e karaia. Ena be e ere dika henia bona e hahisia,  to e haheauka, bona e daḡedaḡe heniava taudia na se inai henidia.​—1 Petro 2:21-23.

²¹ Iesu na e abidadama ela bona mase​—inaina ese e hahisia ela bona e hamasea. (Filipi 2:8 ba duahia.) Ena tanobada maurina dinana ginigabenai e haheaukalai ḡaudia mani a lalo. E dabaiatao, e samania koikoi, diadi dikadia ese e hahemaoro henia kerere, hutuma ese e kirikirilaia, bona tuari taudia ese e hahisia. Au ai e kokoa, hahodi ginigabena e abia, bena eto: “Vada e ore”! (Ioane 19:30) To dina ihatoinai, Tamana ese lauma tauna ta ai e hatoreaisi lou. (1 Petro 3:18) Pura haida muridiai, guba e lou lao. Unuseniai, “Dirava idibana kahana ai vada e helai” bona e nari king siahuna baine abia totona.​—Heberu 10:12, 13.

22. Iesu na Dirava e abidadama henia ela bona mase dainai dahaka e vara?

²² Iesu na Dirava e abidadama henia ela bona mase dainai dahaka e vara? Iesu ena mase ese dala e kehoa ita ese tanobada paradaisonai mauri hanaihanai baita abia diba, matamanai Iehova ena ura heḡereḡerena. Iesu ena mase ese una dala e kehoa na karoa gabenai baita herevalaiamu.