Iehova ena Witnes taudia edia Kingdom Hall ai Dirava ladana helaḡana bo itaiamu. Una dainai, ihaḡoevana bona ihanamona ḡaukaradia na a lalo badamu, una na emai tomadiho kahana ta. Iboumai a hedurumu.

Hebou ta ta muridiai a haḡoevaiamu. Hebou muridiai, tadikaka bona taihu na mai moaledia ida Kingdom Hall ihaḡoevana totona ḡaukara haida e karamu. To, wiki lalonai dina ta na Kingdom Hall ibounai a haḡoevaia namonamomu. Elda o hesiai tauna ta ese una ḡaukara e nariamu, ia ese lista ta e badinaiamu. Heḡereḡere, floa a daromu bona a mopumu, kahu a dahumu, sea ato namonamomu, toileti a haḡoevamu, windo bona mira a dahumu, momoru a negemu, bona ariara a haḡoevamu. A laḡani ta lalonai, dina ta abia hidimu ḡaukara badadia baia kara totona. Natumai danu ḡaukara haida e karamu, unu amo a hadibadiamu emai tomadiho gabuna bae matauraia.—Kohelete 5:1.

Meintenens ḡaukaradia a karamu. Laḡani ta ta ai Kingdom Hall lalona bona murimurina a sekedia namonamomu. Bema ḡau haida didika, a hanamo haraḡamu, unu amo Kingdom Hall basine dika haraḡa bona moni basia nege kava. (2 Sisiga 24:13; 34:10) Kingdom Hall namona bona ḡoevana ai Dirava baita toma henia diho na ḡau badana. Una dainai, Kingdom Hall ihaḡoevana bona ihanamona ḡaukaradia ai a hedurumu neganai, a hahedinaraiamu Iehova a lalokau heniamu bona ia itoma heni dihona gabuna a matauraiamu. (Salamo 122:1) Danu, una dala amo emai gabu ai e nohomu taudia ese Dirava bae imodaia.—2 Korinto 6:3.

• Dahaka dainai emai Kingdom Hall a naridia namonamomu?

• Kingdom Hall baine ḡoeva totona, dahaka a karamu?