LESEN 01

Baibul ese Oi Baine Durumu Diba Dalana

PLAY

Ita momo na ta uramu baita diba, ‘Dahaka dainai ta maurimu? Dahaka dainai hisihisi idauidau e varamu? Dahaka dainai taunimanima e masemu? Vaira negadia ai mauri be ede be hetomu?’ Danu, heduru ta tahumu hekwakwanai idauidau baita hanaidia totona, heḡereḡere, ‘Dahaka baita kara diba eda moni baine heḡereḡere eda dabu ḡaudia baita hoi, eiava dahaka baita kara diba eda ruma bese baine moale?’ Taunimanima momo na e gwaumu idia ese henanadai badadia haeredia na Baibul ai e davari, bona dina ta ta ai idia na e moalemu badina Baibul ena sisiba namodia e badinamu. O laloamu Baibul ese taunimanima iboudiai baine durudia diba, a?

1. Ededia henanadai haida be Baibul ese e haerelaidia?

Baibul ese e haerelai henanadai badadia haida be ini: Daika ese ḡau iboudiai e havara? Ta maurimu badina be dahaka? Dahaka dainai taunimanima e hisihisimu? Ta e masemu negana ai, ia be ede e laomu? Bema ita iboudai ta uramu maino ai baita noho, dahaka dainai gabu momo ai tuari e varamu? Vaira negana ai tanobada be ede be hetomu? Baibul ese e hagoadadamu henanadai unuhetomadia haeredia baita tahu na namo, bona taunimanima milion momo na Baibul ai haere maorodia e davari.

2. Edena dala ai Baibul ese baine duruda dina ta ta ai baita moale?

Baibul lalonai sisiba namodia baita davarimu. Heḡereḡere, ia ese ruma bese bae moale dalana na e gwauraia. Baibul ese danu basita lalohekwarahi daladia bona eda ḡaukara baita ura henia daladia na e gwaurai. Ina pablikeisin baita herevalaia heboumu neganai bo itaiamu, Baibul ese topik unuhetomadia momo na e herevalaidia ḡoevaḡoeva. Reana bo abia daemu, “Toretore Helaḡadia [Baibul ai e tore herevadia] iboudiai na . . . mai edia namo.”—2 Timoteo 3:16, NWT.

Ina pablikeisin ese Baibul gabuna na se abia. To, oi be hagoadamumu sibomu ese Baibul ena hereva anidia ba tahu ḡoevaḡoeva. Una dainai, a hagoadamumu, ina pablikeisin ena lesen ta ta ai e tore Baibul siridia na ba duahidia bona o dibadiamu ḡaudia ida ba ha heḡereḡeredia toho.

POIN MA HAIDA

Baita tahua edena dala ai Baibul ese taunimanima e hakaudiamu, edena dalai Baibul iduahina karana ba moalelaia, bona dahaka dainai ma ta ese oi baine durumu Baibul ena hereva anidia ba lalopararalai.

3. Baibul ese ita na be hakauda dibamu

Baibul na tosi diari hereana ta na heto. Oibe, Baibul ese be durudamu decision o abi hidi maorodia baita karamu, bona ia ese be hadibadamu vaira negana ai be dahaka be varamu.

Mani Salamo 119:105 aita duahia, bena ini henanadai ba haerelaidia:

Una salamo e torea tauna ese Baibul be ede e laloa toma?
Oi ese Baibul be ede o laloa tomamu?

4. Baibul ese eda henanadai na be haerelai dibamu

Laḡani momo lalodiai, hahine ta na henanadai badadia haida edia haere e tahuva, bena Baibul ai haere e davari. Mani VIDIO aita itaia, bena ini henanadai ba haerelaidia.

VIDIO: Nega Iboudiai Basita Hesiku! (1:48)

Vidio ai, Doris Eldred be ededia henanadai haeredia e tahuva?
Baibul e stadilaia karana ese ia be ede e durua toma?

Baibul ese e hagoadadamu baita henanadai na ḡau badana. Mani Mataio 7:7 aita duahia, bena ina henanadai ba haerelaia:

Oi be ededia henanadai edia haere o tahumu bona o uramu Baibul ai haere ba davari?

5. Baibul iduahina karana ba moalelaia

Taunimanima momo na Baibul iduahina karana e moalelaiamu bona heduru e abimu. Mani VIDIO aita itaia, bena ini henanadai ba haerelaidia.

VIDIO: Baibul Ba Duahia (2:05)

Vidio ai, matamata taudia ese duahiduahi karana be ede eme herevalaia toma?
Ena be guna unu matamata taudia ese duahiduahi karana na se moalelaiava, to dahaka dainai hari idia ese Baibul e duahiamu karana na e moalelaiamu?

Baibul ena hahediba herevadia ese tauhalo bona helaro bae havara diba. Mani Roma 15:4 aita duahia, bena ina henanadai ba haerelaia:

O uramu ina Baibul ena gwauhamata herevana anina ba dibaia namonamo, a?

6. Ma ta ese baine duruda diba Baibul ena hereva anidia baita lalopararalaidia namonamo

Taunimanima momo na e gwaumu, ‘Vaia, ena be lau sibogu ese Baibul na duahiamu, to danu, ma ta ida Baibul a herevalaia heboumu na namo herea.’ Mani Aposetolo Edia Kara 8:26-31 aita duahidia, bena ina henanadai ba haerelaia:

Baibul ena hereva anidia be ede baita lalopararalai ḡoevaḡoeva toma?—Mani Aposetolo Edia Kara 8:30-31 ba itadia.

Ethiopia tauna na e ura ma ta ese baine durua, Baibul ai e duahiava ḡauna baine lalopararalaia. Hari danu, taunimanima momo na e uramu ma haida ese bae durudia, Baibul ena hereva anidia bae lalopararalaidia.

TAUNIMANIMA HAIDA NA E GWAUMU: “Baibul ena hereva na dobu, ilalopararalaidia danu auka.”

Oi be dahaka bo gwaumu? Dahaka dainai unu o gwau tomamu?

POIN BADADIA

Baibul ese (a) sisiba namodia amo be durudamu hekwakwanai idauidau baita hamaoromaoromu, (b) henanadai badadia e haerelaimu, bona (c) tauhalo bona helaro na taunimanima e henidiamu.