Iehova matanai headava gwauhamatadia na hehelaḡa. Ia na e gwaumu, headava taudia bae hebadina heheni na namo. (Mt 19:5, 6) Dirava ena orea lalonai headava taudia momo na haheitalai namodia. To headava ta na dia ḡoevadae. Hekwakwanai na be varamu. Momo na e laloamu headava lalonai hekwakwanai e varamu neganai bae parara eiava bae divos, to una lalohadai na baita dadaraia. Tadikaka bona taihu ese edia headava be ede bae gimaia toma?

Mani dala badadia faiv ba lalodia.

1. Nahuamu ba tohoa bona headava baine hadikaia diba ḡaudia ba dadarai, heḡereḡere heḡahusi bona moale karadia dikadia.​—Mt 5:28; 2Pe 2:14.

2. Dirava turana ai baola, bona ba hekwarahi emu headava lalonai Dirava ba hamoalea.​—Sa 97:10.

3. Nega iboudiai kara namodia ba hahedinarai, bona dala idauidau ai adavamu ba durua.​—Kol 3:8-10, 12-14.

4. Adavamu ida o herevaherevamu negadiai, ba hemataurai heheni.​—Kol 4:6.

5. Mai lalokaumu ida adavamu ena ura ba haḡuḡurua.​—1Ko 7:3, 4; 10:24.

Tadikaka bona taihu ese headava e matauraiamu neganai, idia ese headava e hamatamaia Diravana, Iehova, e matauraiamu.

VIDIO LADANA “BAITA HEAU MAI HAHEAUKADA IDA”​—TARAVATU BAITA BADINADIA BA ITAIA, UNA MURINAI INI HENANADAI BA HAERELAIDIA:

• Ena be matamanai headava maurina na namo, to gabeai dahaka hekwakwanai bae vara diba?

• Bema haida e itaiamu edia headava lalonai lalokau na lasi, Baibul ai ededia sisiba ese bae durudia diba?

• Iehova ese headava lalonai e ato taravatudia haida be dahaka?

• Headava maurina baine namo totona, tau bona hahine ese dahaka bae kara be namo?