Dahaka Ba Kara Guna Bena Tanobada Matamatana ai Ba Noho?

PLAY

Rau 7-9 sivaraina amo ta diba, Dirava ese kara dika taudia bona problem iboudiai na kairakaira baine haoredia. Una be vara momokanimu, a? Oibe, badina be Dirava na e gwauhamata, eto:

“Tanobada na baine lao bubuni.”—1 IOANE 2:17.

To, taunimanima haida na be roho maurimu badina be Dirava ma e gwauhamata, eto:

“Dirava ena ura e karaiamu tauna na baine noho hanaihanai.”—1 IOANE 2:17.

Una dainai, Dirava ena ura bo karaiamu neganai, oi na tanobada dokona amo bo roho maurimu. To Dirava ena ura baita dibaia totona, namona na Dirava baita dibaia guna.

DIRAVA BA DIBAIA BENA TANOBADA DOKONA AMO BA ROHO MAURI

Iesu eto: “Mauri hanaihanai binai: idia ese oi Dirava Korikori tamona bae dibamu.” (Ioane 17:3) Tanobada dokona ai baita roho mauri bona baita noho hanaihanai totona, ita ese baita karaia ḡauna ginigunana binai: Dirava baita dibaia guna. Una anina be Dirava e maurimu eiava ena kara haida mo baita dibadia be heḡereḡere, a? Lasi, to ita ese baita karaia ḡauna iharuana binai: Dirava turana ai baitala. Ita ese turada haida na ta bamodia momomu, badina ta uramu idia baita dibadia namonamo. Dirava turana ai baitala totona, unu baita kara toma na maoro. Baibul ai ta dibadia hereva momokanidia ese ita na e durudamu Dirava turana ai baitala totona, mani haida aita herevalaidia.

Baibul ai Ta Dibadia Hereva Momokanidia Haida be Dahaka?

Dirava na e uramu ita na Paradaiso ai baita noho.

Dirava ese Adam bona Heva e karadia bena gabu mai hairaina ta ai e atodia, ladana na Eden. Idia na tau bona hahine ginigunadia, idia na ḡoḡoevadadae, bona Dirava ese ḡau iboudiai e henidia, idia bae moale totona. Idia na bae mauri hanaihanai diba. Idia na basie mase diba, bema idia na Dirava turana. To, idia ese Dirava ena taravatuna ta na e utua.

Adam dainai hari dika idauidau ta davarimu.

Adam na Dirava se badinaia dainai, ia bona taunimanima iboudiai ese mauri hanaihanai e haboioa. Baibul na eto: “Tau ta dainai dika tanobada ai e vareai, bona dika ese mase e vareailaia; bena mase ese taunimanima iboudiai e butudia tao.” (Roma 5:12) Bema tama ta o sina ta na mai ena TB gorerena, reana natuna ta be havaraiamu danu mai ena TB, ani? Una heḡereḡerena, bema Adam na dia ḡoevadae, anina na ia besena ibounai danu na dia ḡoḡoevadadae. Una dainai, hari ita na baita burukamu bona baita masemu.

Iesu dainai Dirava ese ita baine duruda.

Baibul na eto: “Dirava ese tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.” (Ioane 3:16) Dirava ese Iesu na tanobada e siaia, ena mauri baine heni, ita baine hamaurida helaoreana. Una lalokau karana dainai, India tau burukana ta (laḡanina 86) na eto: “Una ese e hahedinaraiamu Iehova a ese lau na e lalokau henigumu. Una lalokau karana amo mauri hanaihanai helarona e henigu.”

Dirava ena haheḡani o taravatu baita badinadia na maoro.

Baibul na eto, Dirava ena “haheḡani baita badina.” (1 Ioane 2:3) Badina be, Iehova Dirava ese hari ina nega ai mauri baita moalelaia daladia na ita e hadibalaidamu. (Isaia 48:17, 18) Ia na se uramu ita na baita hisihisi. Iena gwauhamata binai: Bema ita na iena taravatu baita badinaiamu, hari ina nega ai baita moalemu, bona vaira negana ai mauri hanaihanai baita abiamu.

DINA TA TA AI DIRAVA ENA HEREVA—BAIBUL—BA DUAHIA

Dirava ba ḡuriḡuri henia baine durumu bona ena ura ba karaia, unu amo tanobada dokona ai oi na ba roho mauri diba

Hanaihanai ita na ta anianimu baita mauri helaoreana. To Iesu eto: “Dia aniani amo mo taunimanima basie mauri, a Dirava uduna amo e lasimu herevadia iboudiai amo danu.”—Mataio 4:4.

Hari ina nega ai, Iehova Dirava ena hereva na Baibul lalonai baita duahimu. Una buka helaḡana bo stadilaiamu negadiai, Dirava ese guna e kara ḡaudia, ia ese hari e karamu ḡaudia, bona ia ese vaira nega ai baine kara ḡaudia na bo dibadiamu.

DIRAVA BA ḠURIḠURI HENIA GOADA BAINE HENIMU

Oi be o uramu Dirava ena taravatu ba badinaia to kara dikadia haida na doini o karamu, a? Dirava e dibaiamu taudia ese kara dikadia na e hadokomu.

Asia hahinena ta mani aita laloa—matamanai, ia na mata-bodaḡa maurina e badinaiava. To ia ese Baibul e stadilaia bena Dirava ena taravatu ta e dibaia, eto: “Heuda-hanai [“Mata-bodaḡa,” NWT] ba heautania.” (1 Korinto 6:18) Ia ese Dirava e ḡuriḡuri henia bena goada e abi dainai, una kara dikana na e hadokoa. To dounu, ia ese hahetoho ma haida baine tuari henidia na namo. Ia eto: “Bema lalohadai bodaḡadia na abimu, Iehova na ḡuriḡuri heniamu, badina dibagu ina hahetoho na sibogu basina tuari henia diba. Iehova na lau turagu badina be na ḡuriḡurimu negadia ai lau na e durugumu.” Una Asia hahinena heḡereḡerena, taunimanima milion momo danu na Dirava e dibaiamu. Bona Dirava ese goada na idia e henidiamu dainai, edia mauri e haidaumu bona Dirava ena taravatu e badinamu.—Filipi 4:13.

Bema oi na Dirava bo dibamu, ‘Dirava danu oi be dibamumu,’ anina na ia turana ai bo laomu. (Galatia 4:9, NWT; Salamo 25:14, NWT) Oi na ia turana dainai, tanobada dokona ai ba roho mauri bena Dirava ena tanobada matamatana ai ba noho. To una tanobada matamata toana be ede heto? Rau 13-15 sivaraina ese una be herevalaiamu.

a Iehova na Dirava ladana, Baibul ai na unu e hedinarai toma.

GIMA KOHORONA