Kahirakahira, Dirava ena gavamani matamatana na guba amo tanobada taudia iboudiai baine lohiadia neganai, idia na bae noho hebou namonamo bona ḡaukara namodia idauidau bae kara. Dirava ese Iesu Keriso e abia hidi, tanobada baine lohiaia. Ia ese baine lohiadia taudia na nega iboudiai baine durudia namonamo. Una King ese idia na baine lalokau henidia, baine kara namo henidia, baine bogadia hisi, bona baine hahemaoro henidia namonamo.​—Isaia 11:4; NWT.

Tanobada matamatana ai, taunimanima na edia bese eiava kastom ese basine hapararadia. Idia na lalotamona ai bae noho. (Apokalupo 7:9, 10) Idia ese Dirava bona dekedia taudia na bae lalokau henidia, bona bae ḡaukara hebou edia noho gabuna, tanobada, na bae reḡua namonamo, Dirava ena ura heḡereḡerena.​—Salamo 115:16.

Guba Gavamanina ese tanobada baine lohiaia neganai, Dirava ese lai, medu, bona weather idauidau na baine biagudia dainai, ḡau iboudiai na bae heau namonamo. (Salamo 24:1, 2) Iesu na tanobada ai e nohova neganai, ia ese lai o hurehure dika rohorohona ta na e hadokoa​—unu amo e hahedinaraia, ia ese Dirava ena siahu na baine ḡaukaralaia diba. (Mareko 4:39, 41) Keriso baine lohia neganai, taunimanima ese tano laga o disasta iboudiai garidia na basie gari. Danu, Dirava ena Gavamani baine lohia neganai, ita bona animal bogaraḡidai maino baine mia, bona hodahoda o environment na basita hadikaia lou.​—Hosea 2:18.

Taunimanima na bae ḡoevadae. Idia ta basine gorere, basine buruka, o basine mase. (Isaia 35:5, 6) Idia ese gabu mai hairaina bona ḡoevana bae moalelaia​—matamana negana ai Adam bona Heva ese Eden umana e moalelaiava heḡereḡerena. Tanobada matamatana ai, aniani idauidau bona momo herea bae tubu, Eden ai e vara heḡereḡerena. (Genese 2:9) Paradaiso ai, taunimanima iboudiai na bae “boga kunu”​—idaunegai Dirava ena Israel taudia ediai e vara heḡereḡerena.​—Levitiko 26:4, 5.

Dirava ena gavamani baine lohia neganai, taunimanima iboudiai na maino ai bae noho, bae hebogahisi heheni bona bae hemataurai heheni. Idia na basie tuari, basie hahegari, bona basie dabu. Dirava na e gwauhamata eto: “Ta ta ena vine auna ena vine auna bona ena suke auna ena suke auna henudiai bae helai, bona tau ta ese basine hagaridia.”​—Mika 4:3, 4.

Famili ta ta na sibodia edia ruma bae hagini bena bae noholai hanaihanai, bona ita ese imada ḡaukaradia na baita moalelaimu. Baibul eto, Dirava ena tanobada matamatana ai taunimanima na “basie hekwarahi kava.”​—Isaia 65:21-23.

Dirava na e gwauhamata, eto: “Tanobada na Iehova idiba-maorona ai baine honu.” (Isaia 11:9) Tanobada matamatana ai, taunimanima na Iehova ena aonega bona Ia ese e havara ḡau mai hairaidia amo ḡau momo bae dibadia. Idia ese tuari kohudia ikaradia eiava bamodia ihahisidia karadia basie dibamu. (Isaia 2:4) To, idia na maino bona tanobada ireḡuna daladia bae diba.​—Salamo 37:11.

Dirava ese tanobada na e karaia ḡoevaḡoeva, unu amo dina ta ta ai ita na baita moale diba. Ia na e gwauhamata, ita ese tano baita noholaia hanaihanai. (Salamo 37:29; Isaia 45:18) Una gwauhamata anina baine ḡuḡuru totona, Dirava ese “mase baine ha-orea vaitani” guna na namo. (Isaia 25:8; NWT) Dirava e gwauhamata, eto: “Mase bona dara-doko bona taitai bona hisihisi bae ore.” (Apokalupo 21:4) Dirava ese mauri hanaihanai hahenamona na taunimanima iboudiai baine henidia, taudia bini: (1) Ina tanobada dokona ai Dirava ese baine harohodia mauri taudia, bona (2) tanobada matamatana ai mase amo bae tore isi lou taudia.​—Ioane 5:28, 29; Aposetolo Edia Kara 24:15.

 Hari ina negai, tanobada idoinai, taunimanima milion na e heḡaeḡaemu tanobada matamatana ai bae noho totona. Ena be idia na dia ḡoḡoevadadae, to idia na Dirava ena tanobada matamatana bae noholaia taudia edia kara e tohotohomu. Edena dala ai? Idia na Iehova Dirava bona ia ese e siaia tauna Iesu Keriso e dibadiamu.​—Ioane 17:3.

Oi be o uramu ba diba edena dala ai ina tanobada dokona amo ba roho mauri bona tanobada matamatana ai ba noho, a? Bema oi na Free Bible Study course o uramu, mani Iehova ena Witnes ta ba hereva henia.