1-2. Angelito ena ekspiriens heḡereḡerena, ita ta ta be dahaka baita kara?

OI TAMAMU bona sinamu be Iehova ena Witnes taudia, a? Bema oibe, namona na ba helalotao dia idia daidiai Iehova turana ai bo laomu. Ena be ita tamada bona sinada na Dirava e hesiai heniamu eiava lasi, to ita ta ta siboda ese eda hetura karana Iehova ida baita hagoadaia na namo.

² Tadikaka ta, ladana na Angelito ena ekspiriens mani aita laloa. Ena ruma bese taudia iboudiai na Iehova ena Witnes taudia. Ia eregabenai, ia na e hemamiva ena hetura karana Dirava ida na dia goada. Ia na e gwa: “Egu ruma bese taudia na Iehova e hesiai heniava dainai lau danu na urava unu baina kara toma.” To, Angelito na nega e ato Dirava ena Hereva e duahia bona e laloa dobu, bona nega momo Iehova e ḡuriḡuri heniava. Bena dahaka e vara? Angelito na e gwa: “Lau na na diba Tamagu lalokauna Iehova turana ai bainala dalana tamona na, sibogu ese ia baina dibaia namonamo.” Angelito ena ekspiriens dainai ini henanadai badadia baita lalomu: Iehova baita dibaia namonamo anina korikori be dahaka? Bona dahaka baita kara unu amo Iehova baita dibaia namonamo?

3. Iehova baita dibaia namonamo anina korikori be dahaka?

³ Bema ta na Dirava ladana, e kara ḡaudia o e gwaurai ḡaudia haida na mai dibana, baita gwaumu ia ese Iehova na e dibaia. To, ita na kara haida baita kara unu amo baita hahedinaraia Iehova na vada ta dibaia. Ḡau badana na nega baita ato Iehova bona iena kara hereadaedia baita dibadia. Unu amo Iehova ena hereva bona ena kara badidia baita lalopararalaimu. Una ese be durudamu bena baita dibamu Iehova ese eda lalohadai, abi hidi, bona kara be  moalelaimu eiava lasi. Iehova ena ura ita edai baita dibaiamu neganai, una ura baita badinaiamu.

4. Baibul ai e herevalaidia taudia edia haheitalai ese ita be ede be duruda tomamu?

⁴ Bema ita na ta uramu Iehova baita hesiai henia, haida ese be kirikirilaida dibamu bona kongrigeisin heboudia baita laomu neganai be hahisida dibamu. To, bema Iehova enai baita tabekaumu, ia ese ita na basine rakatanidamu. Unu amo hetura karana namona Dirava ida baita hamatamaiamu bona una na be goadamu bona be mia hanaihanaimu. Ita ese Iehova baita dibaia namonamo diba, a? Oibe! Mose bona King David na dia ḡoḡoevadadae, to idia ese Iehova na e dibaia namonamo. Edia kara baita lalomu neganai, ita ese henanadai rua baita haerelaimu: Idia be edena dalai Iehova e dibaia? Bona edia haheitalai amo dahaka ta dibamu?

5. Mose be dahaka e kara?

⁵ Mose ese e dibadia ḡaudia na e badinadia. Ia laḡanina na 40 heḡereḡerena neganai, ia na Israel taudia e bamodia to se ura bae gwauraia “Farao natuna hahinena” natuna. (Heb. 11:24) Mose ese dagi na se laloa. Ena be mai dibana ia ese be karaiamu karana na Farao lalona be hahisiamu, to una na se laloa a Israel taudia hari e durudia. Una ese e hahedinaraiamu Mose ena abidadama na goada. Ia na Iehova enai e tabekau. Una abidadama karana dainai iena hetura karana Iehova ida na e goada.​—⁠Her. 3:5.

6. Mose ena haheitalai amo dahaka ta dibamu?

⁶ Tame dibaia ḡauna be dahaka? Mose heḡereḡerena, ita iboudai ese abi hidi ta baita karaiamu: Dirava baita hesiai henia bona ena taunimanima baita bamodia, eiava lasi? Eda mauri ai Dirava baita hesiai henia totona ḡau haida na baita dadaraimu, bona reana Iehova asie dibaia taudia ese ita na be hahisidamu. To, bema Tamada gubai baita abidadama heniamu, baita dibamu ia ese be durudamu.

7-8. Mose ese e dibadia ḡaudia be dahaka?

⁷ Mose na dounu Iehova ena kara e dibaiava bona Ena ura e karaiava. Heḡereḡere, Mose na Iehova ese e noia Israel besena na Aigupto amo baine hakaudia lasi neganai, ia na e gari bona Iehova e hamaoroa loulouva ia na dia heḡereḡere. Dirava na mai hebogahisina ida Mose e haere henia bona e durua. (Eso. 4:10-16) Una dainai, Mose ese hahemaoro hereva aukadia na Farao e hamaorolaia. Iehova ese Israel taudia e hamauridia to Farao bona ena tuari oreana na Davara Kakakakana ai e hamasedia neganai, Mose na Iehova ena siahu e itaia.​—Eso. 14:26-31; Sal. 136:15.

⁸ Israel taudia na Mose ese Aigupto amo e hakaudia lasi murinai, idia na e davariva ḡaudia daidiai e maumau loulouva. Ena be unu e kara tomava, to Iehova ese idia e kara henidia dalana amo Mose ese Iena haheauka karana na e itaia. (Sal. 78:40-43) Mose ese Iehova e noia Israel taudia basine hamasedia bona Iehova na unu e kara toma neganai, Mose ese Iena manau karana hereadaena e itaia danu.​—⁠Eso. 32:9-14.

9. Heberu 11:27 ena hereva heḡereḡerena, dahaka ese Mose ena hetura karana Iehova ida e hagoadaia?

⁹ Mose na Israel taudia ida Aigupto e rakatania murinai, ena hetura karana Iehova ida na e goada, vaitani ia na Tamana gubai e itaia bamona. (Heberu 11:27 ba duahia.) Baibul ese una na e  hahedinaraiamu e gwamu: “Una negana ai Iehova bona Mose e hevaira heheni bona e hereva heheni, tau ta ese turana ida bae hereva hereva na heto.”​—Eso. 33:11.

10. Iehova baita dibaia namonamo totona, dahaka baita kara na namo?

¹⁰ Tame dibaia ḡauna be dahaka? Iehova baita dibaia namonamo totona, dia ena kara hereadia mo baita diba to ena ura danu baita karaia. Hari ina negai Iehova ena ura na, “taunimanima iboudiai bae mauri bona hereva momokani bae diba.” (1 Tim. 2:3, 4) Dirava ena ura baita karaia dalana ta na, taunimanima ediai Ia baita herevalaia.

11. Taunimanima haida ediai Iehova ta herevalaiamu neganai, edena dalai eda diba ienai na e badamu?

¹¹ Nega momo taunimanima haida ediai Iehova ta herevalaiamu neganai, eda diba Ia enai na e badamu. Heḡereḡere, Iehova ese e durudamu kudou maoro taudia ta davaridiamu neganai, iena hebogahisi ta itaiamu. (Ioa. 6:44; Apos. 13:48) Ta stadi henidiamu taudia na edia mauri e haidaumu bona mauri matamatana e badinaiamu neganai, Dirava ena Hereva ena siahu da ta itaiamu. (Kol. 3:9, 10) Dirava ena haheauka karana ta itaiamu dalana na, Ia ese ita na e siaida louloumu eda teritori ai e nohomu taudia baita durudia Ia bae dibaia bona bae mauri totona.​—⁠Roma 10:13-15.

12. Esodo 33:13 ena hereva heḡereḡerena, Mose ese e noinoilaia ḡauna be dahaka bona dahaka dainai?

¹² Mose ese ena hetura karana Iehova ida na e laloa bada. Ena be Mose na Dirava ladanai hoa karadia momo e kara, to mai hematauraina ida Iehova e noia Ia baine dibaia namonamo. (Esodo 33:13 ba duahia.) Una neganai Mose laḡanina na reana 80 mai kahana, to ia na e diba Tamana lalokauna gubai e nohomu na dounu baine dibaia.

13. Edena dalai baita hahedinaraia diba eda hetura karana Dirava ida na ta laloa badamu?

¹³ Tame dibaia ḡauna be dahaka? Herevana ede daudauna Iehova vada ta hesiai henia, eda hetura karana Ia ida na baita laloa bada. Unu baita kara toma dalana ta na, ḡuriḡuri amo Ia baita hereva henia.

14. Dahaka dainai Dirava baita dibaia totona ḡuriḡuri na mai anina bada?

¹⁴ Bema oi na o uramu ta ba hetura henia, herevahereva karana na ḡau badana. Dirava turana ai baola totona, ba ḡuriḡuri henia loulou bona basio gari a emu lalohadai bona emu hemami na Ia ba hamaorolaia. (Efe. 6:18) Turkey ai e nohomu taihuna ta, ladana na Krista na e gwa: “Ḡuriḡuri amo egu lalohadai na Iehova na hamaorolaiamu bona iena heduru na mamiamu neganai, ienai egu lalokau na e habadaiamu bona egu abidadama e hagoadaiamu. Iehova ese egu ḡuriḡuri e haerelaidiamu dalana na itaiamu neganai, lau ese Iehova na Tama ta bona Tura ta bamona na laloamu.”

15. Iehova ese King David be ede e herevalaia toma?

¹⁵ King David e vara neganai, ia tamana sinana bona ena bese taudia na Iehova e toma henia dihova. To ia na dia una badi dainai Iehova e toma henia diho. Iena hetura karana Dirava ida na sibona ese e hagoadaia, bona Iehova ese e lalokau henia bada. Iehova ese David na e gwauraia, “egu lalokau tauna.” (Apos. 13:22) Edena dalai David na Iehova turana ai ela?

16. David na Iehova ese e havara ḡaudia e ita bona e lalodia dobu neganai, dahaka e diba?

 ¹⁶ David na Iehova ese e havara ḡaudia amo Ia e dibaia. David eregabenai, ia na nega momo tamana ena mamoe e reḡudiava. Reana una nega amo ia na Iehova ese e havara ḡaudia e ita bona e lalodia dobu. Heḡereḡere, David na hanuaboi ai guba e itaia neganai ia na dia hisiu tausen momo mo e itadia, to hisiu e karadia Tauna ena kara danu e haerodia. Una dainai, David na ini e gwa toma: “Guba ese Dirava hairaina e gwauraia hedinaraimu; guba ḡaudia ese ia imana ḡaukaradia e hahedinaraiamu.” (Sal. 19:1, 2) David na Dirava ese taunimanima e karadia dalana e haeroa neganai, e diba Iehova ena aonega na bada herea. (Sal. 139:14) Oibe, David ese Iehova e havara ḡaudia e lalodia dobu neganai, e diba Iehova ese ia na e hereaia.​—⁠Sal. 139:6.

17. Iehova ese e havara ḡaudia baita lalodia dobumu neganai, dahaka baita dibamu?

¹⁷ Tame dibaia ḡauna be dahaka? Nega bavato Iehova ese e havara ḡaudia ba moalelai. Dina ta ta iboudiai Iehova ese e havara ḡaudia​—tubutubu ḡaudia, animal bona taunimanima​—na ba lalodia dobu. Unu amo Tamamu lalokauna enai emu diba na bo habadaiamu. (Roma 1:20) Bona bo itaiamu emu lalokau ia enai na be bada be laomu.

18. Salamo karoa 18 ena hereva heḡereḡerena, David be dahaka e diba?

¹⁸ David na e diba ia na Iehova ese e duruava. Heḡereḡere, David na e laloparara ia na Iehova ese e durua dainai tamana ena mamoe na daḡedaḡe animal, laion bona bea amo e gimadia. Ia ese tuari tauna bada hereana, Goliata e hadarerea neganai, e diba ia na Iehova ese e hakauava. (1 Sam. 17:37) Bona King Saulo e mama dainai iena amo e heau neganai, e laloparara una na Iehova ese ia e hamauria dalana. (Salamo karoa 18) Bema David na hekokoroku tauna, ia na bema lalo unu na ia sibona ena goada amo e kara ḡaudia. To ia na e manau, bona ena mauri ai Iehova ena heduru daladia e lalopararalai.​—Sal. 138:6.

19. David ena haheitalai amo tame dibaia ḡauna be dahaka?

¹⁹ Tame dibaia ḡauna be dahaka? Namona na Iehova baita noia baine duruda. Dia una mo to namona na Iena heduru e henimu negana bona dalana baita lalopararalaia. Bema baita manaumu, baita lalopararamu ita siboda ese ḡau iboudiai na basita kara diba bona Iehova ese e durudamu basita kara diba ḡaudia na baita karadiamu. Bona Iehova ese e durudamu daladia ta itamu neganai, eda hetura karana ia ida na be goadamu. Fiji ai e nohomu tadikakana ta, laḡani momo lalodiai Iehova e hesiai henia tauna, ladana na Isaac enai una na e vara. Ia na e gwa: “Egu mauri na laloamu neganai, na dibamu egu stadi na hamatamaia negana amo ema bona hari Iehova ese lau na e durugu. Una dainai, Iehova na momokani e nohomu.”

20. David bona Dirava edia hetura karana amo dahaka ta dibamu?

²⁰ David na Iehova ena kara e tohotoho. Iehova ese taunimanima e havaradia dainai idia ese iena kara bae tohotoho diba. (Gen. 1:26) Iehova baita dibaiamu neganai, ia na baita tohotohoa dibamu. David ese Tamana gubai e nohomu na e dibaia namonamo dainai, ma haida e kara henidiava neganai Ia e tohotohoava. Heḡereḡere, David na Bataseba ida e heudahanai bona ia adavana Uria ihamasena dalana e karaia neganai, ia na Iehova vairanai e kara dika. (2 Sam. 11:1-4, 15) To Iehova ese na e bogaia hisi. David ena hetura karana  Iehova ida na namo dainai, ia na Israel taudia ese e lalokau henia bada bona Iehova ese king ma haida vairadiai ena haheitalai namona e herevalaia.​—1 Han. 15:11; 2 Han. 14:1-3.

21. Efeso 4:24 bona 5:1 edia hereva heḡereḡerena, Dirava baita tohotohoamu neganai, dahaka be varamu?

²¹ Tame dibaia ḡauna be dahaka? Namona na ‘Dirava baita haḡoia’ o baita tohotohoa. Unu baita kara tomamu neganai namo baita davarimu bona ia na baita dibaia namonamomu. Bema Dirava ena kara baita tohotohoamu neganai ita na ta hamomokaniamu ita na ia natuna.​—Efeso 4:24; 5:1 ba duahi.

22-23. Bema Iehova amo ta dibamu ḡaudia baita badinamu, dahaka be varamu?

²² Tame herevalai guna ḡaudia amo tame diba, Iehova ese e havara ḡaudia bona iena Hereva Baibul amo ia baita dibaia diba. Baibul lalonai Dirava e abidadama henia hesiai taudia momo edia haheitalai na e toredia bona idia na baita tohotohodia diba, heḡereḡere Mose bona David. Iehova na ena kaha na e karaia, bona ita danu unu dala baita ḡaukaralaidia Ia baita dibaia namonamo totona.

²³ Iehova idibana karana na asi dokona. (Koh. 3:11) Iehova baita dibaia mo na dia heḡereḡere, to mai anina bada ḡauna na eda mauri lalonai ta dibamu ḡaudia na baita badina. Unu baita kara tomamu bona Tamada lalokauna baita tohotohoamu neganai, ia na ita be raka henida kahimu. (Iak. 4:8) Iena Hereva amo e hagoadadamu ia e tahuamu taudia na basine rakatanidia.