Diabolo ese Heva na se hamaoroa bema Dirava ese e taravatua au huahuana baine ania, ia na baine mase to tauanina kahana ta (hari ina negai taunimanima edia lalohadai basine mase diba maurina) na gabu ma ta ai baine mauri. Satana na gaigai amo Heva e hereva henia bema una au huahua na baine ania ia “na basine mase.” Ia na e ura Heva lalona baine ania bena Heva na baine lalo una au huahua be aniamu neganai basine mase dibamu, tanobada ai mauri namona be moalelaiamu bona baine laloa ia na heḡereḡere sibona baine henari diba.​—Gen. 2:17; 3:3-5.

Bema ina hahediba koikoi herevana​—basine mase diba maurina​—na dia Eden imeana ai e matama, ia be edena negai e matama? Ita na asi dibada. To ita mai dibada ḡauna na tomadiho koikoi edia hahediba herevadia iboudiai na Abata badana ai e ore, badina una negai Noa mai ena ruma bese ida​—tomadiho momokani e badinaia taudia​—mo e roho mauri.

Una dainai, ta e masemu bona ma gabu ta ai e maurimu lalohadaina na reana Abata murinai e matama. Dirava ese Babel ai gado e haidau bona taunimanima na “e hakarohodia rohoroho, tanobada kahadia idoidiai” neganai, idia ese una lalohadai danu vada e abia matama. (Gen. 11:8, 9) Herevana una lalohadai koikoina e matama negana na mai dibada eiava lasi, to ta diba momokanimu “koikoi idoidiai tamadia,” Satana Diabolo na una lalohadai e hamatamaia tauna bona e itaiamu taunimanima iboudiai ese una lalohadai e abia daemu neganai, ia na e moalemu.​—Ioa. 8:44.