1. (a) Edena dala haida ai Hahemaoro Tauna Iefeta bona Hana edia kara na heḡereḡere? (Rau 3 ai laulau ba itaia.) (b) Ededia henanadai baita haerelaidiamu?

HAHEMAORO tauna Iefeta na hegunalai tauna mai aonegana bona tuari tauna goadana. Hana na adavana Elkana e matauraiava bona ia na manau hahinena. Iefeta bona Hana na Dirava tamona e tomadiho heniava, to edena dala haida ai edia kara na heḡereḡere? Idia ta ta na Dirava e gwauhamata henia, bona edia gwauhamata na e hamomokanidia. Hari ina negai Iehova e gwauhamata heniamu taudia ediai, idia na haheitalai namodia. To, henanadai haida mani aita lalodia: Gwauhamata anina be dahaka? Dahaka dainai Dirava igwauhamata henina karana na mai anina bada? Iefeta bona Hana edia sivarai amo dahaka baita dibamu?

2, 3. Baibul ese Dirava igwauhamata henina karana be ede e herevalaia toma?

² Baibul ena hereva heḡereḡerena, ta e gwauhamatamu anina na lalona e hadaiamu kara haida baine kara, o harihari ḡaudia haida baine heni, o hesiai ḡaukara ta baine karaia, eiava ḡau haida baine dadarai. Gwauhamata na ta sibona ese ena ura kwalimu dainai baine karaia ḡauna. To, bema ta na e gwauhamata ḡau ta baine karaia o lasi, una gwauhamata baine badinaia na namo, badina Dirava matanai una gwauhamata na helaḡa bona mai anina bada. (Gen. 14:22, 23; Heb. 6:16, 17) Baibul ese edena dalai e hahedinaraia Dirava igwauhamata henina karana baita laloa bada?

 ³ Mose ena Taravatu na eto: “Tau ta ese Iehova baine gwau henia hamata, eiava Iehova vairanai baine gwau hamata kara ta baine karaia, ia na basine koikoi; ena gwau hamata do baine hamomokania.” (Num. 30:2) Gabeai, Solomon na ini e gwau toma: “Dirava ba gwau hamata henia negana ai, anina ikarana ai basio halahe; badina be ia ese kavakava taudia se moalelaidiamu. Emu gwauhamata anina ba karaia.” (Koh. 5:4) Iesu ese e hahedinaraia Dirava enai ta karaia gwauhamatana na baita laloa bada, ia na eto: “Vada o kamonai, sene taudia e haduadia, eto, Basio gwau hamata koikoi; a emu gwauhamata Lohiabada enai ba hamomokani.”—Mat. 5:33.

4. (a) Dahaka dainai Dirava enai ta karaiamu gwauhamatana na mai anina bada? (b) Iefeta bona Hana edia amo dahaka baita dibamu?

⁴ Una ese e hahedinaraiamu, Dirava enai ta karamu gwauhamatadia na mai anidia bada. Eda gwauhamata ihamomokanidia karana ese eda hetura karana Iehova ida baine hanamoa eiava baine hadikaia diba. David na eto: “Daika ese Iehova ena ororo baine dara dae? Daika ese ena gabu helaḡana ai baine gini? . . . kara havara se ura heniamu bona se gwau hamata koikoimu tauna ese.” (Sal. 24:3, 4.) Iefeta bona Hana be dahaka gwauhamata e kara? Bona unu gwauhamata bae hamomokani be auka, eiava?

5. Iefeta be dahaka e gwauhamatalaia, bona dahaka e vara?

⁵ Iefeta ese Amono taudia—Dirava ena taunimanima e daḡedaḡe henidia taudia—e tuari henidia murinai, Iehova enai e karaia gwauhamatana na e hamomokania. (Hahe. 10:7-9) Iefeta na e ura dikadika baine kwalimu dainai e gwauhamata, eto: “Amono taudia na lau imaḡu ai boma atodia, bena mai kwalimugu ida Amono taudia ituari henidia amo baina lou mai negana ai na egu ruma iduarana amo dekegu baine raka lasi guna ḡauna na Iehova ena.” Bena dahaka e vara? Iefeta ese Amono taudia e hadareredia bena e lou neganai, natuna kekenina e raka lasi ia ihedavari henina totona. Kekenina bunai “Iehova ena.” (Hahe. 11:30-34) Iefeta natuna enai una anina be dahaka?

6. (a) Iefeta bona natuna kekenina ese e karaia gwauhamatana bae hamomokania be auka, eiava? (b) Dirava igwauhamata henina karana ai, edena dalai Deuteronomi 23:21, 23 bona Salamo 15:4 ese oi e durumumu?

⁶ Iefeta natuna kekenina na tamana ena gwauhamata ihamomokanina totona, dubu helaḡa ai Iehova baine hesiai henia hanaihanai. Iefeta be se lalo namonamo bena e gwauhamata, eiava? Lasi, reana ia na mai dibana natuna kekenina na ruma amo baine raka lasi ia ihedavari henina totona. Una e vara neganai, Iefeta bona natuna na e tai dikadika—idia ediai una na boubou ḡauna badana ta. Iefeta na natuna e itaia neganai, “ena dabua e darea” bona e gwa ia kudouna na e makohi. Natuna na e taiva badina ia na “rami-hebouna ai” baine noho ela bona mase. Dahaka dainai? Iefeta na asi natuna merona, bona natuna kekenina tamona na basine headavamu bona tubuna basine havara dibamu. Una dainai, iena bese ladana baine hesiriu na asi dalana. To una na se laloa. Iefeta na eto: “Iehova vada na gwau henia hamata, bena egu hereva na basina ha-idaua diba.” Bona natuna kekenina na e haere, eto: “Emu hereva heḡereḡerena ai ba kara henigu.” (Hahe. 11:35-39) Idia na Herea Mikamika Diravana e badinaiava bona ienai e karaia gwauhamatana na e hamomokania, ena be una na auka.—Deuteronomi 23:21, 23; Salamo 15:4 ba duahi.

7. (a) Hana be dahaka dainai e gwauhamata, bona dahaka e vara? (b) Hana ena gwauhamata anina Samuel enai be dahaka? (Futnout ba itaia.)

 ⁷ Hana ese danu ena gwauhamata Iehova enai na e hamomokania. Ia na gabani bona haida ese e kirikirilaiava dainai e lalohisihisi bada, to ia ese gwauhamata ta e karaia. (1 Sam. 1:4-7, 10, 16) Hana na ḡuriḡuri amo ena lalometau na Dirava enai e gwaurai, bona e gwauhamata, eto: “Iehova Sabaota e, emu hesiai hahinena egu hisihisi boma itaia, boma lalogu tao, basioma lalogu boio, a natugu maruanena ta na emu hesiai hahinena boma henigu; bena lau ese Iehova bama henia lou, ena mauri dinadia iboudiai huina basinema utua.” * (1 Sam. 1:11) Hana ese ena noinoi haerena na e abia, bona natuna merona ta e havaraia. Hana na e moale hisidae! To, ia ese Dirava enai e gwauhamatalaia herevana na se laloaboio. Hana ese natuna merona e havaraia neganai, eto: “Lau ese Iehova ena amo na noia.”—1 Sam. 1:20.

8. (a) Hana ese e karaia gwauhamatana baine hamomokania be auka, eiava? (b) Salamo 61 ai, David ena hereva ese edena dalai e durudamu Hana ena haheitalai baita laloa?

⁸ Samuel na laḡanina toi ai rata e rakatania neganai, Hana ese ena gwauhamata Dirava enai na e hamomokania. Lalona na ma se haidaua. Ia ese Samuel na Hahelaḡa Tauna Badana Eli dekena e laohaia dubu helaḡa Silo ai, bona eto: “Ina mero dainai na ḡuriḡuri; bena Iehova ese na noia ḡauna e henigu. Taunabunai, Iehova vada na henia; ena mauri dinadia iboudiai ia na Iehova ena.” (1 Sam. 1:24-28) Unuseniai, “Samuel na Iehova vairanai e bada oho bada oho.” (1 Sam. 2:21) Hana enai una anina be dahaka? Ia ese natuna na e lalokau henia badava, to natuna baine tubu dae lalonai dina ta ta ai bae kara hebou ḡaudia na basie kara diba. Mani a laloa, reana ia na e urava natuna baine rosia, bae gadara hebou, bona baine naria—una na heḡereḡere sina lalokauna ta ese natuna e nariamu bona matanai natuna na e tubu daemu. Ena be Hana ese unu na be readiamu, to ia na Dirava enai e karaia gwauhamatana na e badinaia. Ia na Iehova dainai e moale.—1 Sam. 2:1, 2; Salamo 61:1, 5, 8 ba duahi.

9. Ededia henanadai baita herevalaimu?

⁹ Hari tame diba Dirava igwauhamata henina karana na mai anina bada dainai, mani ini henanadai aita lalodia: Ita Kristen tauda be gwauhamata ede bamodia baita kara? Bona, edena dalai baita ḡaukara goada eda gwauhamata baita hamomokanidia?

10. Kristen tauna be dahaka mai anina bada gwauhamatana baine karaia, bona anina be dahaka?

¹⁰ Mai anina bada gwauhamatana binai: Kristen tauna ta ese ena mauri Iehova enai baine gwauhamatalaia. Dahaka dainai? Badina ia na sibona ena ḡuriḡuri ai, Iehova e gwauhamata henia ena mauri lalonai baine hesiai henia ela bona hanaihanai, herevana dahaka baine vara. Iesu ena hereva heḡereḡerena, ta na “sibona” ena ura e dadaraimu, bona e gwauhamatamu ena mauri ibounai lalonai Dirava ena ura baine atoa guna. (Mat. 16:24) Una dina amo, ia na ‘Iehova ena.’ (Roma 14:8) Edia mauri e gwauhamatalaimu taudia iboudiai ese edia gwauhamata bae badinaia na namo, salamo itorena tauna ese Dirava e gwauhamata henia heḡereḡerena, eto: “Dahaka Iehova baina henia, ena harihari-bada idoinai egu ai na davana? Egu gwauhamata anidia na Iehova baina henia, ena orea taudia iboudiai vairadiai.”—Sal. 116:12, 14.

11. Emu bapatiso dinana ai dahaka e vara?

 ¹¹ Oi be emu mauri Iehova enai o gwauhamatalaia bona ranu bapatisona amo una o hamomokania, a? Bema unu o kara toma, una na namo herea! Emu bapatiso dinana mani a laloa lou, oi na taunimanima vairadiai e nanadaimu bema emu mauri na Iehova enai vada o heni, bona o laloparara “emu gwauhamata bona bapatiso dainai, hari oi na Iehova ena Witnes ta bona Iehova ena lauma helaḡa ese e hakauamu oreana lalonai.” Emu haere amo taunimanima vairadiai o hahedinaraia oi ese emu mauri na o gwauhamatalaia bona oi na vada heḡereḡere bapatiso bavabi, unu amo Iehova ena hesiai tauna ta ai baola. Una nega ai Iehova o hamoalea bada!

12. (a) Dahaka henanadai baita heni na namo? (b) Petro na e gwa ededia kara baita goadalai?

¹² To, bapatiso ese Dirava ba hetura henia dalana e kehoamu. Bapatiso murinai, ita na ta uramu eda gwauhamata heḡereḡerena Dirava baita hesiai henia hanaihanai. Una dainai, reana siboda baita henanadai: ‘Egu bapatiso negana amo ema bona hari, lau be lauma dalanai dounu na goadamu, eiava? Lau be mai kudougu idoinai ida Iehova na hesiai henia hanaihanaimu, a? (Kol. 3:23) Lau be hanaihanai na ḡuriḡurimu, Dirava ena Hereva na duahiamu, kongrigeisen  heboudia na laomu, bona haroro ḡaukara na karaiamu, a? Eiava, egu hesiai ḡaukara urana be e maraḡi e laomu, eiava?’ Aposetolo Petro ese e hahedinaraia bema iseda abidadama, diba, haheauka bona Dirava ibadinana karadia baita goadalaimu, hesiai ḡaukara ai na basita manokamu.—2 Petro 1:5-8 ba duahi.

13. E gwauhamata bona bapatiso e abi Kristen tauna be dahaka baine lalopararalaia na namo?

¹³ Dirava enai eda mauri ta gwauhamatalaiamu neganai, una gwauhamata na ma basita haidaua. Bema ta na Iehova ena hesiai ḡaukara ai eiava Kristen mauri dalana ibadinana karana ai baine hesiku, basine gwa diba ia na se gwauhamata bona ena bapatiso na asi anina. * Badina ia na ena kara amo vada e hahedinaraia ia na sibona e heni ena mauri idoinai lalonai Dirava baine badinaia. Bema kara dika badana ta baine karaia, ia na Iehova bona kongrigeisen vairadiai ena kara baine gwauraia hedinarai. (Roma 14:12) Asita uramu Iesu ese ita na baine gwauraida ‘eda lalokau gunana vada ta negea.’ To, ta uramu ini baine gwau toma: “Emu kara, emu lalokau, emu abidadama, emu heduru bona emu haheauka na dibagu. Emu kara gabedia ese danu emu kara gunadia e hereamu.” (Apok. 2:4, 19) Iehova baita hamoalea totona, namona na baita ḡaukara goada eda gwauhamata heḡereḡerena baita kara.

14. Mai anina bada gwauhamata iharuana be dahaka, bona dahaka dainai?

¹⁴ Mai anina bada gwauhamata iharuana na, headava gwauhamatana. Dahaka dainai? Badina headava na helaḡa. Tau bona hahine na Dirava bona taunimanima vairadiai edia headava gwauhamatadia e gwauraimu. Idia na nega momo e gwauhamatamu bae helalokau heheni, bae henari heheni, bona bae hemataurai heheni, bona unu bae kara toma “raruosi edia mauri dinadia iboudiai lalodiai ina tanobada ai, Dirava ena headava taravatuna heḡereḡerena.” Reana haida na unu hereva korikoridia na se gwaurai, to idia na dounu Dirava vairanai e gwauhamata. Idia na e gwauraidiamu headava taudia, bona edia headava anina na edia mauri dinadia iboudiai lalodiai bae noho hebou. (Gen. 2:24; 1 Kor. 7:39) Iesu na eto: “Dirava ese vada e hahekapudia taudia na taunimanima ese basie hapararadia.” Una dainai, bae headava taudia ese ina bae laloa na namo, edia headava lalonai hekwakwanai e varamu neganai, headava na basie hadokoa.—Mar. 10:9.

15. Dahaka dainai Kristen taudia ese tanobada taudia edia lalohadai basie tohotohoa na namo?

¹⁵ Momokani, headava ta na dia ḡoevadae. Badina dia ḡoevadae taudia rarua e headavamu. Una dainai, Baibul na e gwaumu headava taudia na nega haida “hisi bae ani.” (1 Kor. 7:28) Ina tanobada ai momo ese headava na asie matauraiamu. Edia headava lalonai hekwakwanai e varamu neganai, e hesikumu bona adavadia e rakatanidiamu. To, una na dia Kristen taudia edia kara. Bema ta na ena headava gwauhamatana basine badinaia, ia na Dirava e koiamu, bona Dirava ese koikoi taudia na e inai henidiamu! (Lev. 19:12; Her. 6:16-19) Aposetolo Paulo na eto: “Mai adavamu a? Basio hadihoa.” (1 Kor. 7:27) Paulo na unu e gwau toma, badina dibana Iehova ese headava ihadokona karana na e inai heniamu.—Mal. 2:13-16.

16. Headava ihadokona bona ihapararana karana ai Baibul be dahaka e gwaumu?

¹⁶ Iesu ese e hahedinaraia, Baibul ai e gwauraia headava ihadokona badina tamona na, bema ta na e heudahanai bona adavana ese iena dika se uramu baine gwauatao, ena headava baine hadokoa diba. (Mat.  19:9; Heb. 13:4) To, bema ta na adavana ida bae parara be ede bamona? Baibul ese una danu e hahedinaraia ḡoevaḡoeva. (1 Korinto 7:10, 11 ba duahia.) Baibul ese headava ihapararana karana na se herevalaia. To, headava Kristen taudia haida na ini badi haida daidiai e laloamu bae parara na maoro, heḡereḡere adavadia ese e daḡedaḡe henidiamu, edia lauma dalana e kouamu, eiava adavadia na aposteit tauna o hahinena. *

17. Kristen headava taudia ese edia headava be ede bae hagoadaia toma?

¹⁷ Headava taudia ese edia hekwakwanai na elda taudia ediai bae herevalai neganai, namona na elda taudia ese bae nanadaidia bema idia na Lalokau Korikorina be Dahaka? vidiona vada e itaia, bona Emu Ruma Bese Baine Moale Diba buklet e duahia eiava lasi. Dahaka dainai? Badina unu heduru ḡaudia ese Dirava ena hahekau herevadia e hahedinaraimu bona headava taudia momo e durudiamu. Tau ta mai adavana ida na ini e gwau toma: “Ina buklet a stadilaiamu dainai, emai headava maurina na a moalelaiamu, dia guna heḡereḡerena.” Hahine ta ena headava laḡanidia na 22, bona kahirakahira ena headava na e dika; ia na ini e gwau toma: “Ai raruosi na a bapatiso, to ḡau momo ai asia lalotamonava. Una vidio na nega korikori e halasia! Hari ai raruosi na emai headava maurina a moalelaiamu.” Oi be do headava, a? Namona na emu headava lalonai Iehova ena hahekau herevadia ba badinadia. Bema unu bo kara tomamu, mai moalemu ida emu headava gwauhamatana bo hamomokaniamu!

18, 19. (a) Kristen tama sina momo be dahaka e kara? (b) Ful-taim hesiai ḡaukara e karamu taudia be ede baita lalodia toma?

¹⁸ Iefeta bona Hana edia gwauhamata be edena dala ai e heḡereḡere? Edia gwauhamata dainai Iefeta natuna kekenina bona Hana natuna merona na dubu helaḡa ai hesiai ḡaukara helaḡadia e karava. Una na mauri dalana hereadaena. Hari ina negai, Kristen tama sina momo ese natudia e hagoadadiamu ful-taim hesiai ḡaukara bae kara bona edia mauri lalonai Dirava ena hesiai ḡaukara bae laloa bada. Unu e kara tomamu taudia na baita hanamodia.—Hahe. 11:40; Sal. 110:3.

¹⁹ Hari ina negai, tanobada heḡeḡemadai Iehova ena Witnes edia ful-taim hesiai ḡaukara e karamu taudia iboudiai na 67,000 heḡereḡerena. Idia haida na Betele ai e ḡaukaramu, haida be konstraksen o seket ḡaukaradia e karamu, ma haida be hesiai ḡaukara sikulidia ai e hahedibamu, o spesol painia eiava misinari ḡaukara e karamu, eiava Assembly Hall bona Baibul sikuli rumadia e narimu. Idia iboudiai na “Vow of Obedience and Poverty” pepana e hahonua, una pepa ai idia na e gwauhamata Basileia ḡaukara iduruna totona, bae abi hesiai ḡaukaradia na mai edia ura ida bae kara, kohu o moni momo maurina bae dadaraia, bona moni ḡaukara na basie kara. Idia ese e karaiamu hesiai ḡaukarana na e laloa badamu. Bona dibadia edia ful-taim hesiai ḡaukarana na mai anina bada, una dainai mai manaudia ida edia gwauhamata heḡereḡerena ful-taim hesiai ḡaukarana e karaiamu.

20. ‘Dina ta ta ai’ dahaka baita kara na namo, bona dahaka dainai?

²⁰ Ini tame herevalai gwauhamatadia amo oi be Dirava enai edena gwauhamata vada o karaia—ginigunana, iharuana, eiava toiosi? Bo lalopararamu emu gwauhamata basio laloa maraḡi na namo. (Her. 20:25) Bema ta na Iehova enai ena gwauhamata basine hamomokaniamu, dika baine davari diba. (Koh. 5:6) Unai dainai, namona na mai moaleda ida Iehova ‘ladana baita hanamoa eda ane ai; dina ta ta ai eda gwauhamata anidia baita kara.’—Sal. 61:8.