1, 2. (a) Dahaka baita kara na mai anina bada, bona dahaka dainai? (b) Ina atikol ai dahaka baita herevalaimu?

ITA na Kristen tauda korikoridia dainai, ta kamonaimu sivaraidia baita haero namonamo bona lalohadai maorodia baita abi na namo. (Her. 3:21-23; 8:4, 5) Bema unu basita kara tomamu, Satana bona ena tanobada ese eda lalohadai bae hadikaia diba. (Efe. 5:6; Kol. 2:8) Momokani, sivarai korikorina baita dibamu neganai lalohadai maorona baita abiamu. Hereva Lada-isidia 18:13 na eto: “Tau ta [“sivarai,” NWT] do se kamonai negana ai na e haeremu, una na ena kavakava bona ena hemarai.”

² Ina atikol ai, sivarai korikoridia bona lalohadai maorodia iabidia karana bae koua daladia haida baita herevalaimu. Danu, Baibul ena hahekau herevadia bona haheitalai haida amo sivarai maorodia ihaerodia daladia baita dibamu.

3. Dahaka dainai Hereva Lada-isidia 14:15 ena hahekau herevana baita badinaia na namo? (Rau 3 ai laulau ba itaia.)

³ Hari ina negai, taunimanima na sivarai momo herea e kamonaimu. Unu sivarai na Intanet, televisen, niuspepa, bona ḡau ma haida amo e halasimu. Taunimanima momo na turadia eiava mai dibadia taudia haida edia amo e-mail, teks meseij, bona sivarai  ma haida e abimu. Sivarai kereredia ihalasidia karana na e vara momomu dainai, namona na baita henahua toho bona ta kamonaimu herevadia baita haerodia namonamo. Baibul ai edena hahekau herevana ese baine duruda diba? Hereva Lada-isidia 14:15 na e gwaumu: “Lalo-duhu tauna ese hereva iboudiai e abi daemu, a lalo-parara tauna ese e rakalaiamu dalana na e raraia taomu.”

4. Edena dala ai Filipi 4:8, 9 ese baine duruda baita duahi ḡaudia baita abi hidi, bona dahaka dainai sivarai maorodia baita diba na ḡau badana? (Maua ladana “Sivarai Korikoridia Idibadia Totona Iduruda Ḡaudia Haida” ba itaia danu.)

⁴ Abi hidi namodia baita kara totona, sivarai badidia baita diba na namo. Una dainai, namona na baita duahi ḡaudia baita haero namonamo bena baita abi hidi. (Filipi 4:8, 9 ba duahi.) Intanet eiava e-mail ai e halasimu sivarai kereredia itadia o iduahidia karana ai eda nega na basita haore kava. Bona aposteit edia websait baita dadaraidia na mai anina bada. Idia na e uramu Dirava ena taunimanima bae hamanokadia bona hereva momokani bae hadikaia. Hereva koikoidia ese ta baine hakaua kerere bena abi hidi kereredia baine kara. Hereva koikoidia ese daramu bona kudoumu na bae hadikaia diba.​—1 Tim. 6:20, 21.

5. Israel taudia be dahaka sivarai e kamonai, bona dahaka e kara?

⁵ Sivarai koikoidia iabi daedia karana ese dika bae havaraia diba. Heḡereḡere, Mose ena negai e vara ḡauna mani aita laloa, hasinadoa taudia 12 na Gwauhamata Tanona itana ela neganai, idia 10 ese sivarai dikana e mailaia. (Num. 13:25-33) Iehova ena taunimanima ese una sivarai e kamonai neganai e gari dikadika. (Num. 14:1-4) Dahaka dainai e gari? Reana e lalova hasinadoa taudia momo ese sivarai dikana e mailaia dainai, edia hereva na momokani. Idia na asie ura abidadama tataudia, Iosua bona Kaleb, ese e gwauraia sivarai namona bae kamonaia. (Num. 14:6-10) Idia ese sivarai korikorina na asie tahua bona Iehova enai asie tabekau, to una sivarai dikana e abia dae. Una na kavakava karana!

6. Dahaka dainai Iehova ena taunimanima ihadikadia herevadia ta kamonaimu neganai basita daradara?

⁶ Iehova ena taunimanima ihabadelaidia herevadia ta kamonaimu neganai, baita henahua toho na namo. Ba helalotao, Satana na Dirava ena hesiai taudia e habadelaidiamu tauna. (Apok. 12:10) Una dainai, Iesu na eto, inaida ese ita na ‘bae gwau dika henida koikoi.’ (Mat. 5:11) Bema una hereva baita laloa badamu, Iehova ena taunimanima ihadikadia herevadia baita kamonaimu neganai basita daradaramu.

7. E-mail eiava teks meseij ta do asita siaia neganai, dahaka baita laloa na namo?

⁷ Turamu bona mai dibamu taudia ediai e-mail eiava teks meseij isiaidia karana o moalelaiamu, a? Bema oibe, nius ihalasina oreadia amo sivarai matamatana ta o itaiamu eiava ekspiriens ta o kamonaimu neganai, reana bo uramu oi ese una sivarai ba halasia guna, nius e gwauraimu tauna heḡereḡerena. To, e-mail eiava teks meseij ta do so siaia neganai, sibomu ba henanadai: ‘Lau be mai dibagu baina halasia herevana be momokani, a? Sivarai ibounai mai dibagu, a?’ Bema asi dibamu, tadikakada bogaraḡidiai hereva koikoidia bo halasi dibamu. Bema o daradaramu, basio siaia.

8. Tano haida ai, inaida be dahaka e karamu, bona edena dala ai baita durudia dibamu?

⁸ E-mail eiava teks meseij isiaidia haraḡa karana na mai ena dika danu. Tano haida ai, eda ḡaukara na e taravatumu. Unu tano ai, inaida na mai edia ura ida ihabadelaida herevadia e halasimu ita bae hagarida eiava basita heabidadama heheni totona. Idaunegai Soviet Union ai e vara ḡauna ta mani aita laloa. KGB pulisidia ese sivarai koikoidia  e halasiva, e gwauva tadikaka haida ese Iehova ena taunimanima taodia e tore. * Tadikaka momo ese unu sivarai koikoidia e abi dae dainai, Iehova ena orea e rakatania. Una ese lalohisihisi e havaraia! To moale ḡauna na, gabeai momo na e lou, to haida na asie lou. Edia abidadama na e manoka. (1 Tim. 1:19) Edena dala ai una dika baita dadaraia? Sivarai koikoidia na basita gwaurai. Hereva iboudiai na basio abi dae kava. Sivarai korikoridia ba diba guna na namo.

9. Sivarai maorona idibana karana e kouamu ḡauna ma ta be dahaka?

⁹ Nega haida sivarai kahadia haida na momokani eiava sivarai na kahadia mo ta kamonaimu neganai, lalohadai maorodia iabidia na auka. Ena be sivarai kahana haida na momokani, to bae hakauda kerere diba. Dahaka baita kara diba unu sivarai ese basie hakauda kerere totona?​—Efe. 4:14.

10. Dahaka dainai Israel taudia ese tadikakadia na eto bae tuari henidia, bona edena dala ai una na asie karaia?

¹⁰ Iosua ena negai, Israel taudia na Ioridane Sinavaina ena west kahana ai e nohova neganai, e vara ḡauna mani aita laloa. (Ios. 22:9-34) Idia na e kamonai Ioridane sinavaina ena ist kahana ai e nohova Israel taudia (Ruben bona Gad iduhudia bona Manase iduhuna kahana) ese Ioridane badinai boubou patana badana ta e haginia. Una sivarai kahana na momokani. Una west kahana taudia ese sivarai ibounai na asie abia dainai, e laloava tadikakadia ese Iehova e gwau-edeede heniava, una dainai e hebou, ist kahana ai e nohova Israel taudia bae tuari henidia. (Iosua 22:9-12 ba duahi.) To do asie tuari neganai, idia ese tatau haida e siaidia sivarai momokanina bae abia totona. Unu tatau be dahaka e diba? Ruben bona Gad iduhudia bona Manase iduhuna kahana ese boubou patana e haginia badina na, dia boubou ḡaudia bae heni, to baine hahelalodiatao ḡauna. Una pata na e haginia unu amo vaira negana ai, taunimanima na bae diba idia  danu Iehova e abidadama heniava hesiai taudia. Unu Israel taudia na e moale badina ḡau iboudiai e tahu namonamo bona sivarai korikorina e diba, una dainai tadikakadia na asie tuari henidia!

11. (a) Dahaka dainai Mefiboset na e hahemaoro henia kerere? (b) Edena dala ai David ese una hahemaoro kererena na bema dadaraia diba?

¹¹ Ita ta ta na haida ese e hahemaoro henida kereremu badina sivarai kahadia haida mo e kamonaimu. Mani King David bona Mefiboset edia sivarai aita laloa. David ese Mefiboset enai hariharibada bona hebogahisi karana e hahedinaraia, bona tubuna Saulo ena tano ibounai e henia lou. (2 Sam. 9:6, 7) To gabeai, David ese Mefiboset ihahebadelaina herevadia haida e kamonai. David na se hetahu una be sivarai momokanina eiava, to ia ese Mefiboset ena kohu iboudiai e abi. (2 Sam. 16:1-4) Gabeai, Mefiboset ida e herevahereva neganai, David na e laloparara ia na kerere bona Mefiboset ena kohu kahana ma e henia lou. (2 Sam. 19:24-29) Bema David na sivarai kahana e kamonai neganai basinema haraḡa to ḡau iboudiai bema tahu namonamo guna, una hahemaoro kererena na basinema vara diba.

12, 13. (a) Taunimanima ese Iesu e habadelaia koikoi neganai, ia be dahaka e kara? (b) Dahaka baita kara diba bema ta ese baine habadelaida koikoi?

¹² To, bema ta ese baine habadelaimu be ede bamona? Iesu bona Ioane Bapatiso ediai una na e vara. (Mataio 11:18, 19 ba duahi.) Iesu ese hahebade koikoi herevana be ede e laloa toma? Ia ese ena nega bona goada ibounai na se ḡaukaralaia sibona ena maoro baine herevalaia totona. To, taunimanima e hagoadadia sivarai momokanidia​—ia e kara bona e hahedibalai ḡaudia​—bae tahu namonamo. Iesu na eto: “Tau ta ese e karamu kara namodia ese e hamomokaniamu, ia na aonega tauna.”​—Mat. 11:19, NWT.

¹³ Una hereva amo mai anina bada ḡauna ta, ta dibaiamu. Nega haida, taunimanima na be hereva kereremu eiava be gwauraida dikamu. Bona baita uramu edia kara dainai bae hahemaoro henidia eiava baita uramu kara ta baita karaia ladada e hadikaia karana baita hamaoromaoroa. To, ḡau ta baita karaia diba. Bema ta ese baine habadelaida koikoi, namona na eda kara amo taunimanima na bae itaia una hahebade herevana na koikoi. Momokani, Iesu ena haheitalai ese e hahedinaraiamu, eda Kristen kara namodia ese hahebade koikoidia na baine koudia diba.

14, 15. Edena dala ai siboda eda laloparara baita abidadama henia karana ese baine hahekwakanaida diba?

¹⁴ Lalohadai maorodia iabidia totona sivarai momokanidia idibadia na mai hekwarahina. Badina ta na, ita na dia ḡoevadae tauda. Bema mai eda abidadama ida laḡani momo Iehova ta hesiai henia be ede bamona? Reana haerohaero namonamo karana bona laloparara vada ta abi. Reana eda lalo maoromaoro karana dainai ma haida ese e matauraidamu. To, ita be siboda idoa ai ta heatomu, a?

¹⁵ Oibe, siboda eda laloparara ai baita tabekau vaitanimu neganai, ita na sibodia idoa ai ta heatomu. Eda hemami bona ura ḡaudia ese eda lalohadai dalana bae biagua diba. Bena baita laloamu e vara hekwakwanaina na ta lalopararalaiamu, ena be sivarai korikorina na asi dibada. Una ese dika baine havaraia diba! Baibul ese e hadibada ḡoevaḡoevamu, siboda eda laloparara na basita abidadama henia.​—Her. 3:5, 6; 28:26.

16. Ina haheitalai ai, restron ai be dahaka e vara, bona Tom na haraḡa herea dahaka lalohadai e abi?

¹⁶ Ina haheitalai aita laloa: Adorahi ta ai,  lo elda ta, ladana Tom na restron ta lalonai elda tauna John e itaia neganai e daradara, John na teibolo ma ta ai hahine ta ida helai, una hahine na dia ia adavana. Tom ese e itadia raruosi e kiriva, bona edia hebamo karana e moalelaiava. Una dainai e lalohekwarahi bona e lalova: ‘John bona adavana edia headava be hadokoamu? John adavana enai be dahaka be varamu? Natudia be ede bamona?’ Tom ese hekwakwanai unu bamodia na guna e ita. Bema una na oi ese boma itaia, emu hemami be ede bamona?

17. Ina haheitalai ai, Tom be gabeai dahaka e diba, bona una ese dahaka e hadibadamu?

¹7 Ena be Tom na haraḡa herea e lalo John ese adavana na se badinaia, to sivarai korikorina mai dibana, a? Una adorahina ai, Tom ese John e rini henia. Mani a laloa, Tom na e moale badina e diba una hahine na John taihuna bona tano ma ta amo ela John e ha vadivadia. Idia raruosi na laḡani momo asie heita heheni. Bona John taihuna na una gabu ai basine noho daudaumu dainai, John ida restron ai e aniani hebou. Ia adavana na dia heḡereḡere dainai sela. Moale ḡauna na, Tom ese ena lalohadai kererena na ma haida ediai se herevalaia. Unu amo dahaka ta dibamu? Ena be laḡani momo Dirava ta hesiai heniamu, to lalohadai maorona baita abia totona sivarai korikorina baita diba guna na namo.

18. Edena dala ai ma ta baita badu henia karana ese lalohadai kererena baine havaraia diba?

¹⁸ Kongrigeisen ai tadikakada ta baita badu heniamu neganai, hekwakwanai ihamaoromaorona na auka. Bema una hekwakwanai baita laloa momomu, tadikakada ena kara baita daradaralaia matamamu. Una dainai, bema haida edia amo una tadikaka ihabadelaina herevadia baita kamonaimu, baita uramu unu hereva baita abi dae. Dahaka ta dibamu? Tadikakada baita badu heniamu neganai, hahebade herevadia amo lalohadai kereredia baita abi dibamu. (1 Tim. 6:4, 5) Una dainai kudouda amo badu eiava mama karadia na baita koki, unu amo lalohadai kereredia basita abi. Namona na tadikakada na basita inai henidia, to baita lalokau henidia bona mai kudouda idoinai ida edia dika baita gwautao.​—Kolose 3:12-14 ba duahi.

19, 20. (a) Baibul ai ededia hahekau herevadia ese bae duruda sivarai maorodia baita diba totona? (b) Stadi gabena ai dahaka baita herevalaimu?

¹⁹ Hari ina negai, sivarai korikoridia idibadia bona ihaerodia namonamo karana na mai hekwarahina, badina sivarai na kahadia haida mo ta kamonaimu, bona ita na dia ḡoevadae tauda. To dahaka ese baine duruda diba? Namona na Baibul ena hahekau herevadia baita diba bona baita badina. Una hahekau herevana ta na, bema sivarai korikorina do asita kamonai neganai baita haere haraḡamu, una na kavakava karana bona mai hemaraina. (Her. 18:13) Baibul ena hahekau herevana ma ta ese e hadibadamu, hereva iboudiai na basita abi dae kava. (Her. 14:15) Bona, ena be laḡani momo Dirava ta hesiai henia, to baita henahua toho bona siboda eda laloparara basita abidadama henia. (Her. 3:5, 6) Baibul ena hahekau herevadia ese be gimadamu bema sivarai korikoridia baita dibamu amo lalohadai maorodia baita abimu bona abi hidi maorodia baita karamu.

²⁰ To hekwakwanai ma ta na, taunimanima oromadia eiava toadia amo baita hahemaoro karana. Stadi gabena ai, una kara baita hahedinaraia diba daladia haida baita herevalaimu bona baita itaiamu dahaka ese baine duruda diba unu dala baita dadaraidia.