1. Dahaka dainai Iehova ese mauri ḡaudia e havara?

NEGA ta ai Iehova na sibona e nohova. To ia na dounu e moaleva. Ia daika ida baine noho na dia ḡau badana. To, ia na e ura ma haida danu bae noho bona bae moale. Oibe, lalokau dainai, Iehova ese mauri ḡaudia e havara.​—Sal. 36:9; 1 Ioa. 4:19.

2. Iehova e havara ḡaudia daidiai, Iesu bona aneru edia hemami be edeheto?

² Ginigunana be, Iehova ese Natuna, Iesu, e havaraia. Bena ia ese Iesu amo “ḡau iboudiai”​—⁠heḡereḡere aneru iboudiai​—e karadia. (Kol. 1:16) Iesu na Tamana ida e ḡaukara hebou bona e moale dikadikava. (Her. 8:30) Bona aneru iboudiai danu e moaleva. Badina idia matadiai e itava, Iehova bona Iesu ese ḡau iboudiai guba ai bona tanobada ai e kara. Bena aneru be dahaka e kara? Idia ese Dirava e hanamoa badina Dirava ese tanobada e karaia, bona ma e hanamoa loulou badina ia ese e havara ḡaudia na matadiai e itava. (Iobu 38:7; Her. 8:31) Iehova ese e havara ḡaudia ta ta ese ena lalokau bona aonega e hahedinarai.​—Sal. 104:24; Roma 1:20.

3. Ita ese 1 Korinto 15:21, 22 ai tame duahia, Iesu ena boubou ese dahaka namo e havaraia?

³ Iehova na e ura ena tanobada mai hairaina ai taunimanima na bae mauri hanaihanai bona bae moale. To, Adam bona Heva ese Tamadia e gwau-edeede henia dainai, idia bona edia bese na basie mauri hanaihanai diba. (Roma 5:12) To, Iehova be dahaka e kara? Maoromaoro, ia ese taunimanima baine hamauridia dalana e gwauraia hedinarai. (Gen. 3:15) Iehova na Iesu baine bouboulaia, unu amo Adam bona Heva edia bese na kara dika bona mase edia iḡui amo baine ruhadia. Bena Dirava ese ia bae abia hidi taudia ta ta na mauri hanaihanai baine henidia.​—Ioa. 3:16; Roma 6:23; 1 Korinto 15:21, 22 ba duahi.

4. Ina atikol ai ededia henanadai baita herevalaidiamu?

 ⁴ Vaia Dirava e gwauhamata mase taudia na be tore isi loumu, to ita na ta uramu henanadai haida edia haere baita diba. Heḡereḡere, edena dalai mase taudia be tore isi loumu? Ede baita diba tomamu eda family bona turada na mase amo e tore isi lou? Tore isi lou karana ese ita be ede be hamoaleda tomamu? Bona edena dalai tore isi lou karana ese e hadibadamu Iehova na lalokau, aonega, bona haheauka Diravana? Unu henanadai ta ta mani aita haerelaidia.

5. Dahaka dainai baita gwau dibamu, mase taudia haida be hatoredia isi lou gunamu, bena una murinai ma haida be tore isi loumu?

⁵ Iehova ese Iesu amo mase taudia hutuma be hatoredia isi loumu neganai, reana haida do be hatoredia isi lou gunamu, bena una murinai ma haida be tore isi loumu. Dahaka dainai? Bema taunimanima iboudiai na nega tamona ai be tore isi loumu, una ese daradara be havaraiamu. Bona Iehova na ḡau iboudiai e karadia ḡoevaḡoevamu Diravana. Ia dibana bema ḡau iboudiai be organize namonamomu, taunimanima na maino ai be noho dibamu. (1 Kor. 14:33) Aonega bona haheauka Diravana, Iehova, na Iesu ida tanobada e karaia ḡoevaḡoeva guna, una murinai taunimanima e karadia. Iesu danu baine Lohia Laḡanidia 1,000 lalodiai, ia na mai aonegana bona haheaukana ida Aramagedono amo be roho maurimu taudia ida tanobada ai ruma, aniani, dabua, bona tore isi lou taudia bae durudia ḡaudia ma haida be heḡaeḡaelai gunamu.

6. Aposetolo Edia Kara 24:15 ai tame duahia, Iehova ese daidia danu be hatoredia isi loumu?

⁶ Aramagedono amo be roho maurimu taudia edia ḡaukara badana ta binai: Namona na idia ese Dirava ena Basileia bona Iehova ena taravatu na tore isi lou taudia  bae hadibalaidia. Dahaka dainai? Badina mase amo be tore isi loumu taudia momo na kara dika taudia. (Aposetolo Edia Kara 24:15 ba duahia.) Idia ese sensi momo bae kara be namo, unu amo Keriso ena boubou ḡauna amo namo bae abia. Iehova asi dibadia taudia hutuma ediai Dirava sivaraina ba hahedibalaia na ḡaukara badana, ani? Tore isi lou taudia ta ta be pablisa tamona ese be stadi heniamu, hari ta karaiamu heḡereḡerena, a? Idia be edena kongrigeisin be siaidia laomu, unu amo treinin bae abi bena idia ese tore isi lou taudia matamatadia bae stadi henidia? Una negai dahaka be varamu na do asi dibada namonamo. To, ita dibada ḡauna binai: Keriso ena Lohia Laḡanidia 1,000 bae ore neganai, “tanobada na Iehova idiba-maorona ai baine honu.” (Isa. 11:9) Unu laḡani 1,000 lalodiai, ita ese ḡaukara bada hereana baita moalelaiamu!

7. Tore isi lou taudia baita durudiamu neganai, dahaka dainai idia baita bogadiahisi na ḡau badana?

⁷ Keriso ena Lohia Laḡanidia 1,000 lalodiai, ita ese Iehova baita hamoalea totona, sensi momo na dounu baita karamu. Unu amo tore isi lou taudia baita durudiamu neganai baita bogadiahisimu, badina idia ese sensi momo bae kara na namo, unu amo lalohadai kereredia o ura dikadia bae dadaraidia, bena Iehova ena taravatu iboudiai be badinadia namonamomu. (1 Pet. 3:8) Oibe, tore isi lou taudia ese danu be itaia dibamu, ita Iehova ena taunimanima danu ta hekwarahimu Iehova baita hamoalea bona baita tomadiho henia totona.​—Fili. 2:12.

8. Dahaka dainai ta dibamu, tore isi lou dinanai eda family bona turada toadia na basita readiamu?

⁸ Badi haida daidiai ta dibamu, tore isi lou dinanai, eda family bona turada toadia na basita readiamu. Gunaguna mase amo e tore isi lou taudia amo ta dibamu, vaira negana ai Iehova ese taunimanima toadia, gadodia reḡena, bona edia memori na be heni loumu, unu amo ta na ena mase dinana ai ta itaia heḡereḡerena ai ma baita itaia loumu. Baita helalotao, Iesu ese mase na mahuta ida e haheḡereḡerea, bona tore isi lou be mahuta amo ta nogamu karana ida e haheḡereḡerea. (Mat. 9:18, 24; Ioa. 11:11-13) Ita na mahuta amo ta nogamu neganai, ita toada, gadoda reḡena, bona eda memori na gabudiai. Lasaro ena haheitalai mani aita laloa. Ia na dina foa vada e mase dainai, tauanina na e bodaḡa. To, Iesu ese Lasaro na mase amo e hatorea isi lou neganai, Maria bona Mareta ese Lasaro toana na se reaia, bona Lasaro ese danu idia na dounu e lalodia tao.​—Ioa. 11:38-44; 12:1, 2.

9. Dahaka dainai be tore isi loumu taudia lalodia bona tauanidia na dia dina tamona ai be ḡoevadae takumu?

⁹ Iehova e gwauhamata, Paradaiso ai, Keriso henunai baine noho tauna ta basineto, “E goreregumu.” (Isa. 33:24; Roma 6:7) Una dainai, mase taudia be tore isi loumu neganai, tauanidia na ḡoevadae. To, idia na dia dina tamona ai be ḡoevadae takumu, lasi, badina bema unuheto, reana idia ese edia family bona turadia toadia na be lalodia boiomu. Itaitana na Keriso ena Lohia Laḡanidia 1,000 lalodiai, taunimanima iboudiai na taina ruana be ḡoevadae be laomu. To laḡani 1,000 dokodiai, Iesu ese Basileia na Tamana baine henia. Una negai, Basileia ese ena ḡaukara iboudiai baine haḡuḡuru vaitani, heḡereḡere, taunimanima na ḡoevadae taudia ai vada ela.​—1 Kor. 15:24-28; Apok. 20:1-3.

10. Mase taudia be tore isi loumu neganai, emu hemami be edeheto?

¹⁰ Emu family o turamu bo hedavari henidia loumu neganai, emu hemami be edeheto?  Una negai oi bo kirimu eiava bo taimu, a? Una negai oi be mai moalemu ida Iehova ihanamona anedia bo abimu, a? Una negai oi na Dirava bona Iesu edia lalokau karana bo mamia momokanimu, badina idia raruosi ese mase amo taunimanima vada e hatoredia isi lou.

11. Ioane 5:28, 29 ai tame duahia, Dirava e badinaiamu taudia ediai be dahaka be varamu?

¹¹ Tore isi lou taudia ese edia kara na be haidaumu bena Dirava ena taravatu be badinamu neganai, idia na be moale dikadikamu. Bona idia na be mauri hanaihanaimu. To, Dirava e gwau-edeede henia taudia na Paradaiso ai basie nohomu.​—Isa. 65:20; Ioane 5:28, 29 ba duahi.

12. Tanobada ai be nohomu taudia iboudiai be Iehova ese ede be hanamodia tomamu?

¹² Basileia baine lohia neganai, Dirava ena taunimanima iboudiai ediai Hereva Lada-isidia 10:22 ena hereva na be momokanimu, etomu: “Iehova ena hahenamo ese taḡa e habadaiamu, bona lalo-hisihisi sina taina se atoa kaumu.” Iehova ena lauma helaḡa ena heduru dainai, Dirava ena taunimanima edia lauma taḡana na be bada be laomu, anina na idia ese Keriso ena kara be tohotohomu ela bona idia danu ḡoevadae taudia ai be laomu. (Ioa. 13:15-17; Efe. 4:23, 24) Oibe, dina ta ta ai, idia na taunimanima namodia bona goadadia ai be laomu. Unai negai, ita na mauri namona baita moalelaiamu! (Iobu 33:25) To, tore isi lou karana ba laloa dobu karana ese oi be ede be durumu tomamu?

13. Salamo 139:1-4 ai tame duahia, edena dalai tore isi lou karana amo ta dibamu Iehova na ita ta ta e dibada ḡoevaḡoeva?

¹³ Paragraf matamadiai tame itaia, tore isi lou neganai, taunimanima edia memori bona kara iboudiai na Iehova ese be henidia loumu. Una anina be dahaka? Iehova ese oi na e lalokau henimumu dainai, ia ese emu lalohadai, hemami, hereva, bona kara na e lalodia taomu. Una dainai, bema ia ese oi na mase amo baine hatoremu isi lou, ia ese emu memori, lalohadai, bona kara na be henimu lou haraḡamu. King David dibana Iehova ese ita ta ta na e laloda badamu. (Salamo 139:1-4 ba duahi.) Iehova ese ita e dibada ḡoevaḡoeva herevana ta kamonaimu neganai, iseda hemami be ede heto?

14. Iehova ese ita e dibada ḡoevaḡoeva karana baita laloa dobumu neganai, eda hemami be ede bamona?

¹⁴ Iehova ese ita e dibada ḡoevaḡoeva karana baita laloa dobumu neganai, ita na basita lalohekwarahi. Dahaka dainai? Baita laloatao, Iehova ese ita ta ta na e laloda badamu. Ia ese eda kara idauidau na se lalodia maraḡimu. Eda mauri lalonai ta karamu ḡaudia iboudiai na Ia ese e lalodia taomu. Una ese ita laloda e hagoadaiamu! Ita na siboda asita nohomu. Dina ta ta ena miniti ta ta lalodiai, Iehova na ita dekedekedai e nohomu bona e uramu baine duruda.​—2 Sis. 16:9.

15. Edena dalai tore isi lou karana ese e hamomokaniamu Iehova na aonega Diravana?

¹⁵ Mase na hahegari herevana mai siahuna. Satana ena orea ese mase herevana amo ma haida e doridiamu turadia taodia bae tore, o kerere ta bae karaia totona. To, ita na mase garina asita garimu. Ita dibada, ena be ita na inaida ese bae hamaseda, to Iehova ese baine hamaurida lou diba. (Apok. 2:10) Ita dibada, Iehova ta hesiai heniamu na ḡau ta ese basine hadikaia  diba. (Roma 8:35-39) Iseda tore isi lou helarona ese e hamomokaniamu, Iehova na aonega Diravana! Ena be Satana ena orea ese mase ena hahegari herevadia e gwauraimu, to ita na asita garimu, bona Iehova ta badinaia goadamu.

16. Ededia henanadai na sibomu ba heni na namo? Bona edena dalai emu haere amo bo dibamu oi na Iehova o abidadama heniamu?

¹⁶ Bema Iehova e inai heniamu taudia ese oi bae hagarimu, baeto, oi be hamasemumu, oi be Iehova bo badinaiamu badina ia ese mase amo be hamaurimu loumu, a? Ede o diba tomamu una negai oi na ia bo badinaia dibamu? Dala ta be oi sibomu ba henanadai: ‘Dina ta ta ai lau be na karamu disisin maraḡidia amo na hahedinaraiamu, lau na Iehova na abidadama heniamu, a?’ (Luka 16:10) Eiava ma ba henanadai, ‘Egu mauri o lifestyle amo na hamomokaniamu, lau ese Iehova ena gwauhamata na abia daemu, heḡereḡere ia na e gwauhamata egu dabu ḡaudia iboudia be henimu bema Basileia ba tahua gunamu, a?’ (Mat. 6:31-33) Bema unu henanadai ba haerelaidia baoto, oibe, anina na oi ese o hamomokaniamu oi na Iehova oi abidadama heniamu, bona o heḡaeḡaemu gabeai be varamu hahetoho idauidau ba haheaukalaidia totona.​—Her. 3:5, 6.

17. (a) Edena dalai tore isi lou karana ese e hahedinaraiamu, Iehova na haheauka Diravana? (b) Edena dalai baita hahedinaraia, ita na Iehova ena haheauka karana dainai ia ta tenkiu heniamu?

¹⁷ Iehova sibona mai dibana edena dina bona hora ai ina nega oromana dikana baine haorea. (Mat. 24:36) To, ia na e makaia negana korikorina be nariamu. Ia na e ura dikadikamu mase taudia baine hatoredia isi lou, to doini e haheaukamu. (Iobu 14:14, 15) Ia na be narimu ela bona mase taudia baine hatoredia isi lou negana korikorina baine kau. (Ioa. 5:28) Iehova e haheaukamu badidia namodia daidiai, ia baita tenkiu henia. Mani a laloa: Iehova e haheaukamu dainai, ita bona taunimanima hutuma na mai iseda nega baita “helalo-kerehai” totona. (2 Pet. 3:9) Iehova na e uramu taunimanima iboudiai bae mauri ela bona hanaihanai. Oibe, Iehova e haheaukamu dainai baita tenkiu henia. Edena dalai? Namona na mauri hanaihanai e uramu bae abia taudia baita tahudia ela bona baita davaridia, bena baita durudia Iehova bae lalokau henia bona bae hesiai henia. (Apos. 13:48) Bena idia na Iehova ena haheauka karana amo namo bae davaria, ita heḡereḡereda.

18. Dahaka dainai ma haida edia hekwakwanai o metau baita haheaukalaidia na namo?

 ¹⁸ Iehova na be haheaukamu bona be narimu ela bona laḡani 1,000 bae ore guna, una murinai, ia ese ita na ḡoevadae taudia ai baine halaoda. Ena be Iehova na una nega e nariamu, to eda dika idauidau na e gwautaomu. Dirava e karamu heḡereḡerena, namona na ma haida edia kara namodia baita lalo bona baita haheauka. Taihu ta mani aita laloa​—ia adavana na lalometau gorerena e abia bona se hebouva. Taihu eto: “Una na auka. Emai mauri na e idau taku, bona gunaguna a palani ḡaudia na vada basia kara dibamu.” To metau lalonai, ina taihu na mai lalokauna ida adavana ena gorere e haheaukalaia. Ia na Iehova enai e tabekau bona nega iboudiai adavana e duruava. Iehova heḡereḡerena, taihu na hekwakwanai se laloa momo, to adavana ena kara namodia hari e lalo badava. Taihu eto: “Adavagu ena kara namodia na momo, bona madi taina ruana e hekwarahiva baine namo helaoreana.” Momokani, ḡau badana na iseda ruma bese o kongrigeisin taudia edia hekwakwanai o metau idauidau baita haheaukalaidia!

19. Harihari dahaka baita kara be namo?

¹⁹ Dirava ese tanobada e havaraia neganai, Iesu bona aneru na e moale. To bema Iehova e lalokau heniamu bona e hesiai heniamu ḡoevadae taudia hutuma ese tanobada be hahonuamu, Iesu bona aneru edia moale na be bada hereamu. Bona Iesu rarana amo e hoidia taudia na guba be laomu bona Keriso ida be halohiamu neganai, idia na be moalemu badina edia ḡaukara amo taunimanima e durudiamu. (Apok. 4:4, 9-11; 5:9, 10) Bona moale ese taitai bona hisihisi gabudia be abimu, badina be gorere, daradoko, bona mase vada e ore. (Apok. 21:4) Una nega o nariamu lalonai, namona na Iehova ena lalokau, aonega bona haheauka karadia ba tohotoho. Unu amo oi na bo moale hanaihanaimu, herevana dahaka hahetoho bo davarimu. (Iak. 1:2-4) Ita ese Iehova baita tenkiu henia badina ia na e gwauhamata, eto, “mase taudia do bae tore isi lou”!​—Apos. 24:15.