1, 2. Tony ena ekspiriens ese edena dala ai e hahedinaraiamu ta ena kara na baine haidaua diba?

STIUDEN ta ladana Tony na kahirakahira haiskul amo e dropout. Ia na asi tamana, bona sikuli na se moalelaiava, bona wiken ai muvi e itava eiava turana e bamodiava. Ia na se daḡedaḡeva bona drag se ḡaukaralaiva. Ena mauri na asi anina na heto. Bona e laloava Dirava na lasi. Nega ta Witnes tauna ta adavana ida e hedavari henidia bona idia ediai ena daradara bona henanadai e herevalai. Idia ese buklet rua, The Origin of Life​—Five Questions Worth Asking bona Was Life Created? e henia.

² Witnes tauna adavana ida e lou lao neganai, e itaia Tony ena kara na e idau. Unu buklet ruaosi na e stadilai loulouva, una dainai rau ta ta na makadia e kara eiava e lokudia. Witnes tauna adavana ida e hamaorodia, “Momokani Dirava ta na e nohomu.” Bena Baibul stadi e abia dae, bona taina ruana ena kara e idau. Danu, ena sikuli e laloa badava bona maka namodia e abiva. Sikuli hedmasta danu Tony ena abidadama e itaia neganai e hoa. Bona ini e gwau toma: “Emu kara na e idau bona emu maka na nanamo. Oi be Iehova ena Witnes o bamodiamu dainai, a?” Tony e gwa, ‘Oibe,’ bena ia ese e haroro henia. Ena haiskul na e haorea namonamo. Hari ia na regula painia bona hesiai tauna ta. Bona e moalemu  badina ia Tamana namona na Iehova.​—Sal. 68:5.

3. Iehova ese matamata taudia be dahaka sisiba e henidia?

³ Tony ena ekspiriens ese e hadibadamu Iehova ese umui matamata taumui na e lalomui badamu. Ia na e uramu emui mauri na ba moalelaia. Una dainai, e sisiba henimuimu e gwaumu: “Eregabemu dinadia ai ikaramu Diravana na ba laloa tao.” (Koh. 12:1) Hari ina nega ai, nega haida una na mai hekwarahina. To, Dirava ena heduru amo ba kwalimu diba, dia emu matamata negana ai mo to emu mauri ibounai lalonai. Una baita lalopararalaia totona, Israel taudia ese Gwauhamata Tanona e abia bona David ese Goliata e hadarerea sivaraidia mani aita herevalai.

4, 5. Israel taudia ese Kanaan e hadarerea bona David ese Goliata e hadarerea karana amo dahaka ta dibamu? (Rau 24 ai laulau ba ita.)

⁴ Israel taudia na kahirakahira Gwauhamata Tanona ai bae vareai neganai, Dirava ese na se haḡanidia tuari daladia bae diba eiava tuari totona bae heḡaeḡae. (Deu. 28:1, 2) To, e hamaorodia iena haheḡani bae badina bona ia bae abidadama henia. (Ios. 1:7-9) Reana taunimanima na be lalomu una na dia sisiba namona. To una na sisiba hereadaena, badina Iehova ese ena taunimanima na e durudia Kanaan taudia bae hadareredia totona. (Ios. 24:11-13) Oibe, Dirava baita kamonai henia totona baita abidadama henia na namo, bona una abidadama dainai hanaihanai baita kwalimumu. Guna bona hari ina negai una na mai anina bada.

⁵ Tuari tauna goadana ta, Goliata, ena lata na 2.9 mita bona mai ena tuari kohudia. (1 Sam. 17:4-7) A David enai be ḡau rua: vilipopo ta bona ena Dirava Iehova e abidadama henia. Asi edia abidadama taudia na bema lalo David ese Goliata baine tuari henia na kavakava karana. To, edia lalohadai na kerere! Goliata hari kavakava tauna.​—1 Sam. 17:48-51.

6. Ina stadi ai dahaka baita herevalaimu?

⁶ Vanega stadina ai poin 4 ta herevalai, ede bamona unu ese bae duruda eda mauri baita moalelaia. Unu na eda abidadama ihagoadana ḡaudia, turada namodia baita lalodia bada, tahua ḡaudia namodia baita ato, bona eda ura kwalimu baita laloa bada. Mani unu poin 4 ma aita herevalaidia badabada, bona Salamo 16 ai hahekau herevadia haida baita lalo.

7. (a) Lauma ḡaudia e lalo badamu tauna ena kara be ede bamona? (b) David ‘ahuna’ be dahaka, bona edena dala ai una ese e durua?

⁷ Lauma ḡaudia e lalo badamu tauna na Dirava e abidadama heniamu bona ḡau iboudiai na Dirava ena lalohadai heḡereḡerenai e haeromu. Ia ese Dirava ena hahekau daladia e tahumu bona mai ena ura ida e badinaiamu. (1 Kor. 2:12, 13) David na haheitalai namona. Ena ane ai ini e gwau toma: “Iehova vada na abia hidi, lau ahugu bona lauegu kehere.” (Sal. 16:5) David ese ia ‘ahuna’ eiava ena hetura karana Dirava ida na e laloa bada, bona ihamaurina tauna ai e halaoa. (Sal. 16:1) Una dainai eto: “Lalogu na e moalemu.” Oibe, David e hamoaleava ḡauna na, iena hetura karana Dirava ida.​—Salamo 16:9, 11 ba duahi.

8. Moale korikori e havaraiamu ḡaudia haida be dahaka?

⁸ David ese e mamia moalena na taḡa bona moale karadia e lalo badamu taudia ese asie mamiamu. (1 Tim. 6:9, 10) Canada ai, tadikaka ta na eto: “Moale korikori na dia eda mauri ai ta ura henimu ḡaudia amo baita abiamu, to ita ese harihari ḡaudia namodia e henimu Diravana Iehova, ta heniamu ḡaudia amo una moale baita abiamu.” (Iak. 1:17) Oibe, Iehova bo abidadama heniamu bona  bo hesiai heniamu neganai, emu mauri na bo moalelaiamu. Emu abidadama be ede ba hagoadaia toma? Nega bavato Dirava ena Hereva ba duahia, e kara ḡaudia ba ita, bona ena kara namodia heḡereḡere iena lalokau emu ai ba lalodia.​—Roma 1:20; 5:8.

9. Edena dala ai David e kara heḡereḡerena, Dirava ena Hereva ba badinaia?

⁹ Nega haida Dirava ena lalokau e hahedinaraiamu dalana ta na e sisiba henidamu, tama lalokauna ese natuna e sisiba heniamu heḡereḡerena. David ese Dirava ena sisiba na e abi dae. Eto: “Iehova na hanamoamu, ia ese e hahealo henigumu; hanuaboi lalonai lau lalogu ese e hadibagumu.” (Sal. 16:7) Oibe, ia ese Dirava ena lalohadai e lalo dobu, e abi dae bona e badina. Mai emu abidadama ida unu bo kara tomamu neganai, emu lalokau Dirava enai bo habadaiamu bona bo uramu ia ba badinaia. Danu lo Kristen tauna ai bo laomu. Taihu ta ladana Christin na eto: “Na duahimu ḡaudia na hetahulaimu bona na lalodia dobumu neganai, na mamiamu Iehova ese ini hereva na lau idurugu totona e tore!”

10. Isaia 26:3 ena hereva heḡereḡerena, lauma ḡaudia baita lalo bada ena namo haida be dahaka?

¹⁰ Lauma ḡaudia ilalodia bada karana ese emu diba be habadaiamu, unu amo tanobada ai e varamu ḡaudia bo lalopararalaimu bona Dirava ena ura vaira negana totona bo dibamu. Dahaka dainai Dirava ese diba bona laloparara e henimumu? Ia na e uramu emu mauri ai mai anidia ḡaudia bavato guna, abi hidi namodia ba kara, bona mai moalemu ida vaira negana ba naria. (Isaia 26:3 ba duahia.) United States ai e nohomu tadikakana ta ladana, Joshua, na ini e gwau toma: “Iehova dekedekenai baita nohomu neganai, ḡau iboudiai na baita lalodia maoromaoromu.” Una na momokani bona moale baine havaraia diba.

11. David ese tura namodia idavaridia dalana be ede e herevalaia toma?

¹¹ Salamo 16:3 ba duahia. David na tura namodia idavaridia dalana na mai dibana. Ia ese Iehova e lalokau heniamu taudia ibamodia karana na e ‘moalelaia.’ E gwauraidia “helaḡa taudia,” badina edia kara na ḡoeva, bona kara maoromaoro e badinaiamu. Salamo itorena tauna ma ta ese turana iabidia hidi karana danu unu e laloa toma. Eto: “Lau na e gari henimumu taudia iboudiai bona emu hahedua herevadia e badinadiamu taudia bamodia.” (Sal. 119:63) Vanega stadina ai ta herevalai heḡereḡerena, oi ese danu Iehova e gari heniamu bona e badinaiamu taudia bogaraḡidiai tura namodia ba davari diba. Una anina na laḡanidia idauidau taudia danu oi turamu ai baela diba.

12. David bona Ionatan edia hebamo e hagoadaia ḡauna be dahaka?

¹² Salamo e torea tauna David na dia ena uru taudia mo e hetura henidiava. David turana ‘hereadaena’ ta ladana be daika? Ladana na Ionatan. Baibul ese edia hebamo namona na e herevalaia. To oi mai dibamu Ionatan laḡanina na bada David laḡanina be maraḡi? Edia hebamo e hagoadaia ḡauna be dahaka? Raruosi na Dirava e abidadama heniava, e hemataurai heheniva, bona ta ta ena kara namodia e lalo bada, heḡereḡere se gari Dirava inaina bae tuari henidia totona.​—1 Sam. 13:3; 14:13; 17:48-50; 18:1.

13. Emu hebamo be ede ba habadaia toma? Haheitalai ta ba gwauraia.

¹³ David bona Ionatan heḡereḡeredia, ita ese Iehova e lalokau heniamu bona e abidadama heniamu taudia ibamodia karana na ta ‘moalelaiamu.’ Laḡani momo Dirava e hesiai henia taihuna ta, Kiera, na eto: “Lau turagu na tano idauidau taudia, edia noho daladia bona kastom na idauidau.” Unu bo kara tomamu neganai, Dirava ena Hereva bona lauma  helaḡa ese e hatamonadamu dalana bo itaiamu.

14. (a) Dahaka ese baine durumu diba tahua ḡaudia namodia bavato? (b) Matamata taudia haida ese edia tahua ḡaudia be ede e herevalai toma?

¹⁴ Salamo 16:8 ba duahia. David na ena mauri lalonai Dirava ihesiai henina karana e laloa bada. Oi danu emu mauri lalonai Iehova ihesiai henina karana bo laloa badamu bona tahua ḡaudia namodia bo atomu neganai, moale korikori bo davariamu. Tadikaka ta ladana, Steven, eto: “Tahua ḡauna ta na atoa, na haḡuḡurua, bona egu mauri ai na hanamo ḡaudia na lalo loumu neganai na moalemu.” Germany tadikakana ta, hari tano ma ta ai ena hesiai ḡaukara e karaiamu, na ini e gwau tomamu: “Na burukamu neganai, asina uramu baina lalo na kara ḡaudia iboudiai na sibogu baina hahemoale totona na kara.” Oi danu unu o lalo tomamu, a? Bema oibe, namona na emu diba bona goada ba ḡaukaralaia Dirava ba imodaia bona haida ba durudia. (Gal. 6:10) Hesiai ḡaukaradia ai tahua ḡaudia bavato, bona Iehova ena heduru ba noia unu tahua ḡaudia ba haḡuḡuru totona. Ia na mai moalena ida ḡuriḡuri unuhetomadia e haerelaimu.​—1 Ioa. 3:22; 5:14, 15.

15. Ededia tahua ḡaudia bavato diba? (Maua ladana “Tahua Ḡaudia Haida” ba itaia.)

¹⁵ Ededia tahua ḡaudia bavato diba? Tahua ḡaudia haida na, Kristen heboudiai sibomu emu hereva dalana amo haere ba heni, ba painia, eiava Betele ai ba ḡaukara. Reana gado ma ta ba dibaia unu amo sivarai namona na una gado ai ba harorolaia. Barak, ful-taim hesiai ḡaukara e karaiamu matamata tauna ta na e gwaumu: “Dina iboudiai na nogamu neganai, na moalemu badina mai egu goada idoinai Iehova ena ḡaukara ba karaiamu, dia ta ena.”

16. David ese Iehova ena kara maoromaoro taravatudia be ede e lalodia toma, bona dahaka dainai?

¹⁶ Salamo 16:2, 4 ba duahi. Vanega stadina ai ta diba, Dirava ena kara maoromaoro taravatudia bona hahekau herevadia baita badinamu neganai, namo baita ura heniamu bona dika baita inai heniamu. (Amos 5:15) Salamo e torea tauna David na e laloparara Iehova na kara “namo” iboudiai  Badina. Kara namo tauna na kara maoromaoro e laloa badamu tauna. David na e ḡaukara goadava Dirava ena kara namodia baine tohotoho. Danu David na Dirava ese e inai heniva ḡaudia e inai heni. Kaivakuku itomadiho henidia karana na e inai henia, badina una kara ese taunimanima e hakaudia kerereva bona Dirava se imodaiava to kaivakuku imodaidiava.​—Isa. 2:8, 9; Apok. 4:11.

17, 18. (a) David ese tomadiho koikoi taudia edia kara be ede e herevalaia toma? (b) Hari taunimanima “edia lalo-hisihisi e habadaiamu” ḡaudia be dahaka?

¹⁷ Baibul negadia ai, nega momo tomadiho koikoi e badinaiava taudia na matabodaḡa karadia e karava. (Hos. 4:13, 14) Tomadiho unuhetomana ese momo e veridiava kara dikadia bae kara. To una ese moale korikorina se havaraia. David eto, ‘Dirava idauna e abia hidiva taudia ese edia lalo-hisihisi e habadaiava.’ Natudia danu e bouboulaidiava. (Isa. 57:5) Iehova ese kara unu bamodia e inai henidiava! (Ier. 7:31) Bema oi na una nega ai boma noho bona tamamu sinamu na Iehova e abidadama heniava bona e badinaiava taudia, oi na boma moale, ani?

¹⁸ Hari ina negai danu, tomadiho koikoi taudia ese matabodaḡa karadia, tatau rarua eiava hahine rarua e mahuta heboumu karana na e abia daemu. To Baibul negadia amo ema bona hari kara unu bamodia e karamu taudia na asie e moalemu. (1 Kor. 6:18, 19) Sibodia “edia lalo-hisihisi e habadaiamu.” Una dainai memero kekeni e, Tamamui guba ai ba kamonai henia. Namona na sibomu ese ba hamomokania Dirava ikamonai henina karana na mai ena namo. Matabodaḡa karana ena dika idauidau ba lalodia. Bo lalopararamu, una nega sisina bo mamiamu moalena na basine mia daudau ḡauna. (Gal. 6:8) Joshua, matamanai ta herevalaia tauna, na eto: “Eda ura kwalimu na ta uramu daladia ai baita ḡaukaralaia diba, to baita ḡaukaralaia kereremu neganai basita moalemu.”

19, 20. Iehova e abidadama heniamu bona e badinaiamu matamata taudia be dahaka hahenamo bae abi diba?

¹⁹ Iesu ese murinai e raka taudia e hamaorodia, eto: “Umui ese egu hereva ba badinadia, bena egu hahediba korikori ai baola. Hereva momokani danu ba diba; bona hereva momokani ese baine ruhamui nege.” (Ioa. 8:31, 32) Ta moalemu badina Dirava ese tomadiho koikoi, babalau karadia bona ḡau ma haida amo e ruhada. Bona matamanai tame herevalai heḡereḡerena, vaira negana ai “Dirava natuna edia ura-kwalimu herea-daena” baita abiamu. (Roma 8:21) Hari una ura kwalimu bo moalelaia dibamu bema ‘Keriso ena hereva’ o hahediba herevadia bo badinamu. Unu amo, dia “hereva momokani” mo bo dibamu to bo badinaiamu danu.

²⁰ Memero kekeni, Dirava ese e henimui ura kwalimuna ba laloa bada. Bona ba ḡaukaralaia namonamo, unu amo bo karamu abi hididia ese vaira negana ai danu be durumumu. Matamata tadikakana ta na eto: “Emu matamata negana ai emu ura kwalimu bo ḡaukaralaia namonamomu neganai, una ese gabeai be durumumu abi hidi badadia ba kara totona, heḡereḡere edena ḡaukara bavabia hidi, bona ba headava eiava lasi.”

21. Edena dala ai “mauri korikori” dalana ai ba raka hanaihanai diba?

²¹ Ina nega oromana lalonai, taunimanima ese e gwauraiamu mauri namona na basine mia daudaumu. Ita na asi dibada kerukeru be dahaka be varamu. (Iak. 4:13, 14) Una dainai, aonega karana na “mauri korikori” eiava mauri hanaihanai dalana ai ba raka. (1 Tim. 6:19) Momokani Dirava ese ita na se doridamu, una dala ai baita raka totona. Abi hidi na ita ta ta edai. Iehova na ‘ahumu’ ai ba halaoa. Ia ese e henimu “ḡau namodia” momo ba lalodia bada. (Sal. 103:5) Bona bavabia dae ia ese emu moale baine habadaia bona una moale na baine mia hanaihanai.​—Sal. 16:11.