1, 2. Abi hidi ta karamu neganai, dahaka dainai Ihavarada Tauna baita kamonai henia na aonega karana? (Rau 19 ai laulau ba itaia.)

BEMA oi na mero eiava kekeni, reana emu vaira negana dainai momo na heduru herevadia e henimumu. Emu tisa eiava haida ese e hagoadamumu sikuli badadia baola bona moni ḡaukara namona ta ba tahua. To, Iehova ena sisiba na ma idau. Ia na e uramu sikuli ai ba ḡaukara goada unu amo ba gradueit murinai sibomu ba henari diba. (Kol. 3:23) To, emu mauri lalonai mai anidia bada ḡaudia o uramu bavabi hidi neganai, ia ese e hagoadamumu ena hahekau hereva namodia ba lalo, unu amo ina nega dokonai Iena ura ba badinaia.​—Mat. 24:14.

² To ba helalotao, Iehova na mai dibana vaira negai be dahaka bae vara bona tanobada dokona danu mai dibana. (Isa. 46:10; Mat. 24:3, 36) Danu mai dibana dahaka ese baine hamoaleda bona dahaka ese laloda baine hahisia. Una dainai, ena be taunimanima edia sisiba haida na nanamo, to bema unu sisiba na dia Dirava ena Hereva heḡereḡerena, unu na dia aonega sisibadia.​—Her. 19:21.

3, 4. Adam, Heva bona natudia ese sisiba dikana e badinaia neganai dahaka e vara?

³ Matamana negana amo Satana ese sisiba dikana e heni. Ia na e hekokoroku bona sibona sisiba ihenina tauna ai e hahelao, bena Heva e hamaoroa bema adavana ida sibodia edia mauri dalana bae abia hidi, idia na be moalemu. (Gen. 3:1-6) To, Satana na sibona e helalo. E ura Adam bona Heva​—bona gabeai bae vara natudia​—na ia bae matauraia bona bae tomadiho henia, dia Iehova. To Satana be idia daidiai ḡau haida e kara eiava? Iehova ese Adam bona Heva na ḡau iboudiai e henidia​—e haheadavadia, imea hairana ta ai e atodia, bona tauanidia na ḡoevadae dainai bae mauri hanaihanai diba.

⁴ To, Adam bona Heva ese Dirava e gwau-edeede henia, sibodia Dirava ena amo e daudau. Una dainai dika bada herea e vara. Flaoa na auna amo ta utuamu neganai e masemu, una heḡereḡerena idia na metairametaira e buruka ela bona e mase. Natudia danu edia kara dika ese e butudia tao. (Roma 5:12) Hari inai negai danu, taunimanima momo na se uramu Dirava bae matauraia. To e uramu sibodia edia ura bae badina. (Efe. 2:1-3) E davarimu hekwakwanaidia ese e hahedinaraia ḡoevaḡoevamu, “asi aonega ta . . . ese Iehova baine laoa ahu diba.”​—Her. 21:30.

5. Dirava be mai dibana taunimanima be dahaka bae kara diba, bona ia maoro, a?

⁵ To, Iehova na mai dibana taunimanima haida, memero kekeni namodia momo danu, ese ia bae tahua bona bae hesiai henia diba. (Sal. 103:17, 18; 110:3) Unu matamata taudia na e lalodia badamu! Oi danu idia ta, a? Bema oibe, Dirava ese e henimu “ḡau namodia” momo na o moalelaimu. (Salamo 103:5 ba duahia; Her. 10:22) Ina stadi ai baita herevalaimu “ḡau namodia” haida bini: lauma anianidia, tura namodia, tahua ḡaudia namodia, bona ura kwalimu korikorina.

6. Dahaka dainai o uramu Dirava ba dibaia, bona Iehova be dahaka e henimumu?

⁶ Ita edai Ihavarada Tauna idibana urana na mia, to animal ediai una ura na lasi. (Mat. 4:4) Dirava bo kamonai henia namonamomu neganai, emu laloparara bona aonega be badamu bona bo moalemu. Iesu na eto: “E dibamu lauma ḡaudia bae tahu na namo taudia na e moalemu.” (Mat. 5:3, NWT) Dirava ese Baibul bona “hesiai tauna mai ena kamonai bona mai ena kara maoromaoro” amo e henidamu lauma anianidia ese eda abidadama e hagoadaiamu. (Mat. 24:45) Bona unu lauma anianidia na idauidau!​—Isa. 65:13, 14.

7. Dirava ese e henimu lauma anianidia baita abi edia namo haida be dahaka?

⁷ Dirava ese e henimumu lauma anianidia ese aonega bona laloparara baine henimu, una ese dala momo ai baine gimamu diba. (Hereva Lada-isidia 2:10-14 ba duahi.) Unu kara ruaosi ese be durumumu bena bo lalopararamu hahediba herevadia, heḡereḡere Dirava na lasi lalohadaina na koikoi. Danu, baine gimamu ina lalohadai moni bona kohu ese moale e havaraiamu herevana ba dadaraia totona. Bona be durumumu ura kereredia bona kara dikadia ba dadarai totona. Una dainai hanaihanai Dirava ena aonega bona laloparara ba tahu, bona ba lalo unu na dava bada ḡaudia! Unu kara namodia bo manadalaimu neganai, bo  mamiamu Iehova na oi e lalokau henimumu bona e uramu ba moale.​—Sal. 34:8; Isa. 48:17, 18.

8. Dahaka dainai hari Dirava ba raka henia kahi na namo, bona edena dala ai una ese vaira nega ai baine durumu?

⁸ Satana ena tanobada na kahirakahira be oremu, bona Iehova sibona ese ita be gimadamu bona be naridamu. Una nega ai ia ese eda dabu ḡaudia be henimu. (Hab. 3:2, 12-19) Oibe, hari na nega namona Tamada guba ai ba raka henia kahi bona emu abidadama ia enai ba hagoadaia. (2 Pet. 2:9) Bema unu bo kara tomamu, herevana dahaka emu ai bae vara, to emu hemami na salamo e torea tauna David heḡereḡerena, eto: “Iehova na vairagu ai na atoamu nega idoinai; badina be ia na lau idibagu kahana ai dainai lau na basina marere.”​—Sal. 16:8.

9. (a) Ioane 6:44 ena hereva heḡereḡerena, Iehova be dahaka e karamu? (b) Witnes taudia ma haida ta hedavari henidiamu neganai, hemamina be ede bamona?

⁹ Iehova ese kudou maoro taudia na e veridia maimu, ia e tomadiho heniamu besena ai bae vareai totona. (Ioane 6:44 ba duahia.) Hereva momokani asi dibana tauna ta na nega ginigunana bo hedavari heniamu neganai, ia be mai dibamu namonamo, a? Reana ladana bona toana mo mai dibamu. A Iehova e dibaia bona e lalokau heniamu tauna na nega ginigunana bo hedavari heniamu na dia unuheto. Ena be ena mauri dalana, tano, iduhu eiava kastom na idau, to ia na vaitani idaunega o dibaia tauna​—bona ia danu mai dibana oi!

10, 11. Edena dala ai Iehova ena taunimanima edia kara na heḡereḡere, bona una ena namo oiemu ai be dahaka?

¹⁰ Heḡereḡere, ta ta emui “gado” na mai dibamui​—una na hereva momokani ena “gado ḡoeva-daena.” (Sef. 3:9) Una anina na umui raruosi na Dirava o abidadama heniamu, iena taravatu bona nega vaira helarona na mai dibamui. Ta ba dibaia totona unu ḡau ba diba na mai anidia bada, badina unu amo bo heabidadama hehenimu. Bona emui hetura karana danu be mia daudaumu.

 ¹¹ Oi na Iehova o tomadiho heniamu tauna ta dainai, turamu namodia na momo, bona tanobada heḡeḡemadai e nohomu. Idia haida na do so hedavari henidia. O laloamu una hebamo namona be haida ese danu e moalelaiamu eiava?

12. Dahaka tahua ḡaudia bavato diba?

¹² Kohelete 11:9–12:1 ba duahi. Oi be tahua ḡaudia haida o lalomu bona o uramu ba haḡuḡuru, a? Reana o uramu dina ta ta Baibul ba duahia. Eiava o uramu emu hereva bona hahediba daladia ba hanamodia. Una tahua ḡauna ta o haḡuḡuruamu eiava haida ese e hanamomumu neganai, emu hemami be ede bamona? Oi na o moalemu, ani? Ba moale na namo, badina oi ese Iesu o tohotohoamu bona Dirava ena ura o atoa gunamu.​—⁠Sal. 40:8; Her. 27:11.

13. Edena dala ai Dirava ihesiai henina karana ese kohu momo itahuna karana e hereaia?

¹³ Emu hesiai ḡaukaradia o lalo badamu dainai, emu ḡaukara na o moalelaiamu bona emu mauri na mai anina. Aposetolo Paulo eto: “Ba gini tutuka-tutuka, basio marere. Lohiabada ena ḡaukara lalonai ba goada balaheni nega idoinai; badina be dibamui emui hekwarahi Lohiabada lalonai na asio hekwarahilaia kavamu.” (1 Kor. 15:58) Ena be haida na mai edia moni bona kohu namodia momo to asie moalemu. (Luka 9:25) King Solomon enai una na e vara.​—Roma 15:4.

14. Solomon amo dahaka o dibamu?

¹⁴ Taḡa tauna Solomon na ḡau haida e kara sibona baine hahemoale unu amo moale ena namo baine dibaia. (Koh. 2:1-10) Una dainai ruma e hagini, uma bona imea hairaidia e kara, bona e urava ḡaudia iboudiai e kara. Una murinai ena hemami be edeheto? E moale eiava? Haere na Solomon sibona ese e gwauraia, eto: “Imagu ḡaukaradia iboudiai bona ikaradia hekwarahidia idoidia na haerodia; bena lalogu e parara, idoinai na asi anina . . . Ihanamogu ḡauna ta lasi.” (Koh. 2:11) Iena sivarai amo dahaka o dibamu?

15. Salamo 32:8 ena hereva heḡereḡerena, dahaka dainai abidadama na mai anina bada, bona ena namo be dahaka?

¹⁵ Iehova na se uramu abi hidi kereredia daidiai ba lalohisihisi. Momokani, Dirava ba kamonai henia bona iena ura bavatoa guna totona, namona na bavabidadama henia. Unu bo kara tomamu neganai, basio lalohisihisimu. Bona Iehova ese emu “lalokau ia ladana dainai vada o hahedinarai” na basine laloa boiomu. (Heb. 6:10) Una dainai ba ḡaukara goada emu abidadama ba hagoadaia, bena sibomu ese bo hamomokaniamu Tamamu guba ai na oi e lalokau henimumu.​—Salamo 32:8 ba duahia.

16. Dahaka dainai ura kwalimu baita laloa bada bona baita ḡaukaralaia namonamo?

¹⁶ Paulo eto: “Lohiabada Laumana e nohomu gabudia ai ura kwalimu danu e nohomu.” (2 Kor. 3:17) Oibe, Iehova ese ura kwalimu e ura heniamu, bona e uramu una ura kwalimu ba laloa bada bona ba ḡaukaralaia namonamo, badina una na oi igimamu. Reana o dibadia matamata taudia haida na ponografi e itamu, eiava matabodaḡa karadia e karamu, dika bae davari spot gadaradia ai e vareaimu, drag e animu eiava e kekeromu. Ena be matamanai e moalemu, to una moale na se daudaumu. Gabeai dika e davarimu, reana unu kara e manadalaimu, daihanai goreredia e davarimu, eiava  e masemu. (Gal. 6:7, 8) Una ese e hahedinaraia ḡoevaḡoevamu, sibodia e hekoimu dainai edia “ura kwalimu” na e ḡaukaralaia kereremu.​—Tito 3:3.

17, 18. (a) Dahaka dainai Dirava ikamonai henina karana na mai ena namo? (b) Adam bona Heva ese matamanai e moalelaia ura kwalimuna be hari taunimanima ese e moalelaiamu ḡauna edia idau be dahaka?

¹⁷ Momokani, Iehova ikamonai henina karana na mai ena namo ita edai, be durudamu eda mauri baita naria namonamo totona. (Sal. 19:7-11) Danu, bema emu ura kwalimu na Dirava ena taravatu bona hahekau herevadia heḡereḡerediai bo ḡaukaralaia namonamomu, Dirava bona tamamu sinamu bo hamoalediamu bona be abidadama henimumu. Momokani, Dirava na e uramu ia e abidadama heniamu taudia ese ura kwalimu korikorina bae moalelaia, una na Baibul ese e gwauraiamu, “Dirava natuna edia ura-kwalimu herea-daena.”​—Roma 8:21.

¹⁸ Adam bona Heva ese ura-kwalimu herea-daena e moalelaia. Eden imeana ai, Dirava ese taravatu hida e henidia? Tamona. Idia na au ta huahuana mo basie ania. (Gen. 2:9, 17) O laloamu una be taravatu aukana bona idia ihametaudia ḡauna, a? Lasi. Hari, taunimanima na taravatu momo herea e atomu bona haida e doridiamu unu taravatu bae dibadia bona bae badinadia.

19. Eda ura kwalimu baita moalelaia totona Iehova bona Iesu ese dahaka e hadibadamu?

¹⁹ Iehova na mai aonegana ida ena hesiai taudia e durudiamu. Ia na taravatu momo herea se henidamu, to e hadibadamu iena lalokau baita tohotohoa. Ia na e uramu iena hahekau herevadia baita badina bona dika baita inai henia. (Roma 12:9) Iesu ese ena Ororo Harorona e gwaurai herevadia ese e durudamu taunimanima e kara dikamu badidia baita lalopararalai totona. (Mat. 5:27, 28) Keriso na Dirava ena Basileia Pavapavana dainai, tanobada matamatana ai dounu be hadibadamu, unu amo ia heḡereḡerena kara maoromaoro bona taravatu ḡoevadia baita ura heni. (Heb. 1:9) Danu be durudamu tauanida bona darada bae ḡoevadae. Mani a laloa, kara dika ena hisihisi basio mamia loumu. Bena dokonai, Iehova ese e gwauhamatalaia “ura-kwalimu herea-daena” bo moalelaiamu.

20. (a) Iehova ese iena ura kwalimu be ede e ḡaukaralaia tomamu? (b) Edena dala ai iena haheitalai baita tohotohoa?

²⁰ Tanobada matamatana ai eda ura kwalimu na dounu mai hetoana. Dirava bona taunimanima ilalokau henidia karana eda ura kwalimu baine biagua. Iehova ese e noidamu ia baita tohotohoa. Ena be iena ura kwalimu na asi hetoana, to lalokau ai taunimanima bona aneru e kara henidiamu. (1 Ioa. 4:7, 8) Una dainai bema Dirava ena lalokau baita tohotohoamu eda ura kwalimu baita moalelaiamu.

21. (a) David ena hemami Iehova enai be ede e herevalaia toma? (b) Gabe stadina ai dahaka baita herevalaimu?

²¹ Iehova ese e henimu “ḡau namodia,” heḡereḡere lauma anianidia, tura namodia, tahua ḡaudia namodia, bona ura kwalimu korikorina o lalodia badamu, a? (Sal. 103:5) Bema oibe, reana emu hemami na David ena heḡereḡerena, Salamo 16:11 ai ena ḡuriḡuri ai eto: “Mauri dalana oi ese o haheitalaigumu; oi vairamu ai moale e ḡuḡurumu, oi imamu idibana ai moale ḡaudia na e mia hanaihanaimu.” Gabe stadina ai, Salamo 16 ena hereva badadia haida baita herevalaimu. Una ese be durudamu eda mauri baita moalelaia totona.