Gima Kohorona matamatadia o duahidia namonamomu, a? Mani ini henanadai ba haerelaidia:

Baibul ai edena sivarai amo ta dibamu Iehova na ita e bogada hisimu?

Israel taudia na Aigupto ai hesiai taudia ai e halaodia neganai, Dirava ese edia hisihisi na e ita bona e bogadia hisi. (Eso. 3:7; Isa. 63:9) Ita na Dirava heida-idana ai e karada dainai hebogahisi karana baita hahedinaraia diba. Ena be nega haida ta hemami ita na dia heḡereḡere ia ese baine lalokau henida totona, to Dirava ese eda hemami na e laloparalaiamu.​—wp18.3-MO, rau 8-9.

Edena dala ai Iesu ena hahediba herevadia ese taunimanima e durudiamu heinai heheni karana bae dadaraia?

Iesu ena negai Iuda taudia momo na e heinai heheniva. Keriso ese e haḡanidia bae manau bona ta ese ena bese basine heaḡilaia. Ia murinai e rakava taudia e haḡanidia namona na ta ta na tadikaka heḡereḡeredia bae lalodia.​—w18.06, rau 9-10.

Dirava ese Mose e hamaoroa Gwauhamata Tanona ai basine vareai, una ese dahaka e hadibadamu?

Mose na Iehova ida e hetura namonamova. (Deu. 34:10) Laḡani 40 muridiai edia laolao dokona e lao heniava ai, Israel taudia na ranu lasi dainai e maumau lou. Dirava ese Mose e hamaoroa nadi hagahagana baine hereva henia. To, Mose ese nadi hagahagana na e botaia. Iehova na e badu dikadika badina Mose ese ena hahediba daladia na se badina bona una hoa karana dainai Dirava se imodaia. (Num. 20:6-12) Una ese e hadibadamu Iehova baita kamonai henia bona baita imodaia na ḡau badana.​—w18.07, rau 13-14.

Ededia dala haida ai taunimanima ta hahemaoro henidiamu?

Taunimanima ese ma haida e hahemaoro henidiamu badidia toi bini: ta ena bese na idau, noho dalana bona laḡani. Dirava heḡereḡerena, namona na taunimanima oromadia na basita lalo to iboudiai na maka tamona ai baita kara henidia. (Kara 10:34, 35)​—w18.08, rau 8-12.

Tadikaka burukadia ese haida bae durudia daladia haida be dahaka?

Herevana tadikaka burukana ta ena asainmen na baine idau to Dirava ese ia na e laloa badamu bona ia ese haida na dounu baine durudia diba. Ia ese hereva momokani asi dibana tauna baine durua, manoka taudia baine hagoadadia, Baibul stadi baine kara, bona ena haroro ḡaukara baine habadaia.​—w18.09, rau 8-11.

Kristen taudia edia Hahediba Mauana ai dahaka bo davarimu?

Kontek kadi bona invateisen. Pepapepa iboudiai 8 bona Gima Kohorona bona Noga! magasin. Danu bo davarimu ḡaudia haida na, buklet, stadi bukadia rua, bona vidio 4, una vidio ta ladana na Dahaka Dainai Baibul Ba Stadilaia?​—w18.10, rau 16.

Hereva lada-isidia 23:23 ena sisiba heḡereḡerena edena dala ai Kristen tauna ese hereva momokani baine “hoia”?

Hereva momokani na moni amo asita hoiamu ḡauna. To, namona na nega baita ato bona baita hekwarahi hereva momokani baita abia eiava baita dibaia totona.​—w18.11, rau 4.

Hosea ese adavana Gomere e kara henia dalana amo dahaka ta dibamu?

Gomere na ariara karadia e kara loulouva, to Hosea ese ena dika e gwauatao bona e abia dae. Bema Kristen tauna ta adavana na baine heudahanai, una Kristen tauna ese ena dika baine gwauatao diba. Bema asi ena kerere tauna o hahine na adavana ida ma baine mahuta hebou neganai ena headava baine hadokoa na asi badina.​—w18.12, rau 13.