Ina laḡani Gima Kohorona ena atikol idauidau o duahidia, a? Mani ini henanadai ba haerelaidia:

Isaia 63:9 na e gwaumu Iehova na “lalokau” bona “hebogahisi” Diravana, una ese dahaka e hadibadamu?

Ta dibamu Iehova na mai ena hebogahisi dainai, e uramu eda kara dika na baine gwautao. Isaia 63:9 ese danu e hadibadamu ia na mai ena lalokau ida e uramu baine duruda. Namona na ia baita tohotohoa.​—w21.01, rau 21.

Dahaka dainai Iehova ese kwara dagina e atoa?

Ia ese e lalokau henidamu dainai. Kwara dagina dainai Iehova ena ruma bese na maino ai bae noho bona ḡau iboudiai na bae heau namonamo. Iehova ese e atoa kwara dagina e laloa badamu ruma bese taudia ta ta na e dibamu daika ese abi hidi be karaiamu bona daika ese be gunalaidiamu.​—w21.02, rau 3.

Dahaka dainai Kristen taudia na elektronik ḡaudia ai messaging application bae ḡaukaralai neganai bae henahua toho?

Bema ta na application unu bamona ta e uramu baine ḡaukaralaia, namona na bamona baine abidia hidi namonamo. To messaging grup badadia lalodiai unu be kara tomamu na auka. (1 Tim. 5:13) Danu, namona na se hamomokani ḡaudia sivaraidia ihalasidia karana baine dadarai bona tiokratik ḡaudia na basine ḡaukaralai ena bisnes totona.​—w21.03, rau 31.

Dahaka dainai Dirava ese Iesu na se koua baine hisihisi bona baine mase?

Badi ginigunana na, Iesu na au ai e taua dae, unu amo Iuda taudia na dika amo baine ruhadia. (Gal. 3:10, 13) Badi iharuana na Iehova ese Iesu na treinin e heniava badina gabeai iseda Hahelaḡa Tauna Badana ai bainela. Badi ihatoina na Iesu ese Dirava e badinaia ela bona mase, una ese e hamomokania taunimanima na hahetoho badadia lalodiai Dirava bae badinaia diba. (Iobu 1:9-11)​—w21.04, rau 16-17.

Dahaka ba kara bema haroro ḡaukara ai taunimanima idavaridia na auka?

Bema taunimanima na ruma ai e nohomu negadiai baita vadivadidiamu, momo baita hereva henidiamu. Danu gabu idauidau ai baita haroro. Bona haroro daladia baita haidau, heḡereḡere revareva baita tore.​—w21.05, rau 15-16.

Aposetolo Paulo ese e gwauraia herevana, “taravatu dainai vada na mase taravatu enai,” anina be dahaka? (Gal. 2:19)

Mose ena Taravatu ese e hahedinaraia taunimanima na dia ḡoḡoevadadae bona Israel taudia e durudia Keriso bae abia dae totona. (Gal. 3:19, 24) Taravatu dainai Paulo ese Keriso e abia dae. Una dainai ia na e gwa “taravatu dainai vada na mase taravatu enai”; anina na ia na Taravatu ena iḡui amo vada e ruhaia.​—w21.06, rau 31.

Edena dalai Iehova na haheauka karana ai haheitalai namona e hahedinaraia?

Iehova na e haheaukamu ena be haida ese ladana na e hadikaiamu, ena lohia siahuna e inai heniamu, ia natuna haida ese ia e gwau-edeede henia, Satana ese koikoi herevadia e gwauraimu, Iena hesiai taudia na e hisihisimu, Ia turana e masemu, kara dika taudia ese ma haida e hahisidiamu, bona Ia ese e kara ḡaudia na taunimanima ese e hadikamu.​—w21.07, rau 9-12.

Iosef be edena dala ai haheauka karana ai haheitalai namona e hahedinaraia?

Ena be tadikakana ese e kara auka heniava, to ia na e haheauka. Danu Aigupito ai haida ese e hahebadelaia koikoi bona laḡani momo dibura rumai e noho.​—w21.08, rau 12.

Hagai 2:6-9, 20-22 ai, e perovetalaia heude-heude karana be dahaka?

Ena be taunimanima na asie uramu Basileia sivaraina bae kamonai, to momo ese una sivarai namona na e abia daemu. Kahirakahira Dirava ese tanobada besedia na be haheude-heudediamu, anina na be haoredia vaitanimu.​—w21.09, rau 15-19.

Dahaka dainai eda hesiai ḡaukara ai basita hesiku na namo?

Iehova ese eda hekwarahi na e laloa badamu, bona e moalemu. Bema baita haheaukamu bona basita hesikumu, mauri hanaihanai baita abiamu.​—w21.10, rau 25-26.

Edena dala ai Levitiko karoa 19 ese e durudamu ina sisiba, “ba helaḡa, emui kara idoidiai lalodiai,” baita badinaia? (1 Pet. 1:15)

Una siri na Levitiko 19:2 amo e abia. Karoa 19 ese dina ta ta ai 1 Petro 1:15 ena hereva baita badinaia daladia momo e herevalai.​—w21.12, rau 3-4.