1. Bema taihu ta na e uramu tadikaka ta baine adavaia, ededia henanadai haida baine lalodia guna be namo?

KRISTEN taudia iboudiai kwaradia na Iesu Keriso, tau ḡoevadaena. To, taihu ta ese tadikaka ta e adavaiamu neganai, ia kwarana na una tadikaka. Una na taina auka badina tadikaka na dia ḡoevadae tauna. Una dainai, bema taihu ta e uramu tadikaka ta baine adavaia, namona na ini henanadai baine lalodia: ‘Dahaka ese e hahedinaraiamu ina tadikaka na ruma bese kwarana namona ai be laomu? Ia ese Iehova ihesiai henina karana be ena mauri lalonai be atoa gunamu, a? Eiava lau be ede na diba tomamu baia headavamu murinai, ia na ruma bese kwarana namona ai be laomu bona be durumaimu Iehova baia hetura henia, a?’ Danu taihu ese ini henanadai baine lalodia: ‘Emai headava lalonai, lau be dahaka kara namodia baina hahedinarai? Lau be haheauka bona heabidae hahinegu, a? Egu hetura karana Iehova ida be goada, a?’ (Koh. 4:9, 12) Bema taihu na disisin namodia momo baine kara murinai baine headava, ia ese ena headava maurina na be moalelaiamu.

2. Ina atikol ai dahaka baita herevalaimu?

² Iseda taihu milion momo na haheitalai namodia badina adavadia na e matauraidiamu. Una dainai, idia baita tenkiu henidia! Ita na ta moalemu badina unu ha’hine ida Iehova ta hesiai henia heboumu! Ina atikol ai ini henanadai toi baita haerelaimu: (1) Headava taihu ese e abimu metaudia haida be dahaka? (2) Dahaka dainai, hahine na adavana henunai baine noho karana baine abia dae na namo? (3) Iesu, Abigail, bona Maria, edia hemataurai karana amo tadikaka bona taihu be dahaka e laloparalaiamu?

3. Dahaka dainai headava taudia iboudiai na metau idauidau be davarimu?

³ Headava na harihari ḡauna ḡoevana Dirava ena amo, to taunimanima na dia ḡoevadae. (1 Ioa. 1:8) Una dainai, Baibul ese headava taudia e hadibadiamu, metau idauidau daidiai idia na “hisi do bae ani.” (1 Kor. 7:28) Mani headava taihu ta ese baine abi diba metaudia haida aita lalodia.

4. Dahaka dainai taihu ta na reana be laloamu ia adavana henunai baine noho na dia maoro?

⁴ Headava taihu ta na reana ena tubu dae dalana dainai, be laloamu ia adavana henunai baine noho na dia maoro. United States ai, Marisol e gwa: “Lau dibagu Iehova ese tau na ruma bese kwarana ai e halaoa, bona Dirava na eto hahine ese tau baine matauraia bona tau ese hahine baine matauraia. To nega momo adavagu baina matauraia na auka. Badina lau na tubu dae gabunai, tanobada taudia e tomu lau ese tau na basina matauraia.”

5. Tatau haida ese ha’hine be ede e lalodia kerere tomamu?

⁵ Eiava reana taihu ese e adavaia tauna e laloamu ha’hine na basita lalodia bada. South America ai, Taihu Ivon e gwa: “Egu gabu ai, tatau be e aniani gunamu, a ha’hine be gabeai. Kekeni maraḡidia be bae nanadu bona ḡau bae haḡoeva, a memero maraḡidia adia be sinadia bona taihudia ese bae kado, bona unu memero na e hamorodiamu ‘ruma ai idia na king.’” Asia ai, Taihu Yingling e gwa: “Emai gado ai hereva ta anina na ha’hine o kekeni na basie skul eiava diba na basie tahua. Idia na ruma ḡaukaradia mo bae kara, bona idia ese edia lalohadai na adavadia vairadiai basie gwaurai. Asi ena lalokau bona Baibul ena hereva se badinaiamu tauna ese adavana ena mauri na e ha-aukaiamu, o Iesu na se tohotohoamu, bona Iehova na se hamoaleamu.​—Efe. 5:28, 29; 1 Pet. 3:7.

6. Ha’hine be dahaka bae kara diba, edia hetura karana Iehova ida bae hagoadaia totona?

⁶ Vanega stadi ai ta itaia, Iehova ese headava tadikakadia e haḡanidiamu edia ruma bese bae naridia, bae ubudia bona bae durudia Dirava bae tomadiho henia. (1 Tim. 5:8) Danu, ena be headava taihudia na e bisimu, to namona na idia ese nega bae ato Baibul bae duahia, bae laloa dobu, bona Iehova bae ḡuriḡuri henia goadagoada. Una na mai hekwarahina. Ha’hine na e bisimu, una dainai be hemamimu idia na asi edia nega eiava goada unu bae kara, to nega bae ato na mai anina bada. Dahaka dainai? Badina Iehova na e uramu ita ta ta eda hetura karana ia ida na baine goada.​—Apos. 17:27.

7. Dahaka ese hahine baine durua ena maduna baine haḡuḡurua?

⁷ Ta itaiamu hahine na baine ḡaukara goada adavana, dia ḡoevadae tauna, henunai baine noho totona. To, Iehova ese e henia madunana na be haḡuḡuruamu bema Baibul ese adavana baine badinaia badidia na be lalopararalaimu bona be abi daemu.

8. Efeso 5:22-24 ena hereva heḡereḡerena, dahaka dainai Kristen hahinena na adavana henunai baine noho?

⁸ Kristen hahinena na adavana baine kamonai henia, badina una na Iehova ena ura ia enai. (Efeso 5:22-24 ba duahia.) Ia ese Tamana guba ai na e abidadama heniamu, e dibamu iena kara iboudiai badidia na lalokau, bona Iehova ena haheḡani na iena namo dainai e henimu.​—Deu. 6:24; 1 Ioa. 5:3.

9. Dahaka be varamu bema Kristen taihuna ta na adavana ena siahu be matauraiamu?

 ⁹ Ina tanobada ese hahine na e hagoadadiamu Iehova ena dala basie lalodia bona bae laloa tatau henudiai bae noho na asi anina. Momokani, unu lalohadai e badinamu taudia na eda lalokau Diravana na asi dibadia. Iehova ese natuna lalokaudia bae hahemaraidia haheḡanidia ta se e henidia. E ḡaukara goadamu, Iehova e henia madunana baine huaia namonamo taihuna, ese maino be havaraiamu ruma bese lalonai. (Sal. 119:165) Adavana, ia, bona natuna ese namo be davarimu.

10. Carol ena hereva amo dahaka ta dibamu?

¹⁰ Adavana, dia ḡoevadae tauna, henunai e nohomu hahinena ese e hahedinaraiamu kwara dagina e heni Diravana, Iehova, na e lalokau heniamu bona e matauraiamu. Carol, South America ai e nohomu, na e gwa: “Mai dibagu adavagu na be kereremu, to danu na dibamu iena kerere dainai baina kara henia dalana ese be hahedinaraiamu lau ese egu hetura Iehova ida be ede na laloa tomamu. Una dainai adavagu henunai na nohomu badina na uramu Tamagu guba ai baina hamoalea.”

11. Dahaka ese taihu ta ladana Aneese e durua dika baine gwautao, bona ena hereva amo dahaka ta dibamu?

¹¹ Nega haida na auka hahine na tau henunai baine noho bona baine matauraia, bema be mamiamu adavana ese iena hemami bona e lalomu ḡaudia na se lalodiamu. To mani headava taihuna Aneese ena kara a laloa, ienai una e vara neganai, ia na e gwa: “Lau na asina uramu baina badu noho badu noho. Na helalotaomu ita iboudai ta kereremu. Egu ura ḡauna na dika baina gwauatao, Iehova heḡereḡerena. Dika na gwautaomu negadiai, lalogu na e mainomu.” (Sal. 86:5) Dika e gwautaomu hahinena na basine hekwarahimu, adavana henunai baine noho.

12. Baibul lalonai be dahaka haheitalai haida e herevalai?

¹² Haida na e hemamimu ta henunai e nohomu tauna na manoka tauna. To una lalohadai na dia maoro. Baibul ese haida henudiai e noho taudia momo danu e herevalaidia, bona idia na goada taudia. Mani  Iesu, Abigail, bona Maria edia haheitalai amo baita diba ḡaudia aita lalodia.

13. Dahaka dainai Iesu na Iehova henunai e nohomu? Ba herevalaia.

¹³ Iesu na Iehova henunai e nohomu, to una anina na dia ia na asi aonegana eiava asi ena diba. Aonega bada tauna ta mo dala haraḡadia bona namodia ai baine hahediba diba, Iesu heḡereḡerena. (Ioa. 7:45, 46) Iehova ese Iesu ena diba na e matauraia bada dainai, guba bona tanobada e karadia neganai ia ida e ḡaukara hebou. (Her. 8:30; Heb. 1:2-4) Iesu e toreisi lou negana amo, Iehova ese “siahu idoinai guba ai bona tanobada ai” na e henia. (Mat. 28:18) Ena be Iesu ena diba na bada, to dounu Iehova enai heduru e tahumu. Dahaka dainai? Badina Tamana na e lalokau heniamu.​—Ioa. 14:31.

14. Tatau be dahaka e dibamu (a) Iehova ese hahine e lalodiamu karana amo? (b) Hereva Lada-isidia 31 ai e hetore herevadia amo?

¹⁴ Tatau bae diba ḡaudia. Iehova na e gwa hahine na adavadia henudiai bae noho badina na dia e laloamu tatau ese ha’hine na e hereadia. Ia ese una na e hahedinaraia, badina ha’hine danu tatau ida e abidia hidi Iesu ida bae lohia hebou totona. (Gal. 3:26-29) Iehova ese Natuna na e abidadama heniamu dainai siahu e henia. Una heḡereḡerena, aonega tauna danu adavana e abidadama heniamu dainai ḡau haidai siahu be heniamu. Hahine namona e herevalaia neganai, Dirava ena Hereva na e gwa, ia ese ena ruma bese na e itadia taomu, edia kohu e hoimu bona e naridiamu, bona ihoidia daladia e karamu. (Hereva Lada-isidia 31:15, 16, 18, ba duahi.) Basitato ia na hesiai hahinena dainai asi ena maoro ena lalohadai baine gwaurai hedinarai. Lasi, adavana ese e abidadama heniamu bona ena lalohadai na e kamonaimu. (Hereva Lada-isidia 31:11, 26, 27, ba duahi.) Tau ese adavana na unu baine matauraia toma neganai, hahine na mai ena moale ida ia henunai be nohomu.

15. Ha’hine be Iesu ena haheitalai amo dahaka e dibamu?

¹⁵ Ha’hine bae diba ḡaudia. Ena be Iesu na ḡau momo e haḡuḡuru, to se lalo ia na asi anina dainai Iehova ena kwara dagina henunai baine noho. (1 Kor. 15:28; Fili. 2:5, 6) Una heḡereḡerena, hahine namona, Iesu ena haheitalai e badinaiamu hahinena, na basine laloamu ia na asi anina dainai adavana baine kamonai henia. Ia ese adavana na be duruamu badina dia e lalokau heniamu mo dainai, to badina badana na ia ese Iehova e lalokau heniamu bona e matauraiamu dainai.

16. Samuel Ginigunana 25:3, 23-28 heḡereḡerena, Abigail ese e davari hekwakwanai be dahaka? (Rau 1 laulauna a itaia.)

¹⁶ Abigail adavana ladana na Nabala. Ia na mataḡaniḡani, hekokoroku, bona asi tanikiu dibana. To Abigail na dounu ia e badinaia. Bema ura neganai, ia ese David bona ena tatau na basinema koudia bena adavana bema alaia. To ia na aonega karana ta e karaia dainai Nabala bona edia ruma bese badana na dika ta asie davaria. Mani Abigail ena boga auka karana a laloa, ia ese tuari taudia 400, mai edia tuari kohudia e vaira henidia, bona mai ena hemataurai ida David e hereva henia. Bona eto adavana ena kerere ahuna baine abia. (1 Sam. 25:3, 23-28 ba duahi.) David na haraḡa herea e laloparara, Iehova ese una hahine goadana e ḡaukaralaia, sisiba namona e henia bona e koua kerere badana basine karaia.

17. Tatau be David bona Abigail edia haheitalai amo dahaka e dibamu?

¹⁷ Tatau bae diba ḡaudia. Abigail na aonega hahinena. David danu e aonega iena  sisiba e kamonai. Una dainai, ia na rara ihahebubuna karanai se kerere. Una heḡereḡerena, aonega tauna ese mai anina bada abi hididia be karamu neganai, adavana ena lalohadai danu be kamonaimu. Reana adavana ena lalohadai ese be duruamu abi hidi kereredia basine kara totona.

18. Ha’hine be Abigail ena haheitalai amo dahaka e dibamu?

¹⁸ Ha’hine bae diba ḡaudia. Iehova e lalokau heniamu bona e matauraiamu hahinena ese ena ruma bese ai namo baine havaraia diba, ena be adavana ese Iehova na se hesiai heniamu o ena taravatu na se badinamu. Ia na Baibul ese se gwaurai badidia dainai ena headava basine hadokoamu. To, adavana e matauraiamu bona e kamonai heniamu dainai, be duruamu Iehova baine dibaia. (1 Pet. 3:1, 2) Ena be adavana na basine kamonai, to Iehova ese Ia e badinaiamu bona e kamonai heniamu karana na e laloa badamu.

19. Edena negai hahine ese adavana na basine kamonai henia?

¹⁹ To, adavana e badinaiamu Kristen hahinena ese adavana na basine duruamu bema be noiamu Baibul ena taravatu o hahekau herevana baine utua. Heḡereḡere, adavana, murimuri tauna ese baine hamaoroa baine koikoi, baine henaohenao, o Baibul ese e taravatuamu karana ta baine karaia. Kristen taudia iboudiai, headava taihudia danu, ese Iehova bae badinaia guna. Bema taihu ta na adavana ese baine noia Baibul ena hahekau herevadia baine utu, namona na basine karaia, to mai ena manau bona goada ida basine karaia badina baine gwauraia hedinarai.​—Apos. 5:29.

20. Ede ta diba tomamu, Maria bona Iehova edia hetura karana na namo herea?

²⁰ Maria ena hetura karana Iehova ida na namo herea. Dirava ena Hereva na mai dibana namonamo. Elisabeta, Ioane Bapatiso sinana, ida e herevahereva neganai, Maria ese Heberu Revarevadia edia hereva na nega 20 bamona e gwaurai. (Luka 1:46-55) Mani ina hereva momokanina a laloa: Ena be Maria na Iosef maohenina, to Iehova ena aneru na Iosef enai se hedinarai guna. Aneru na maoromaoro Maria e hereva henia bona e hamaoroa ia na Dirava Natuna be havaraiamu. (Luka 1:26-33) Iehova  ese Maria na e dibaia namonamo bona e abidadama Natuna na be lalokau heniamu bona be naria namonamomu. Bona ta dibamu, Maria ena hetura karana Iehova ida na dounu namo, ena be Iesu na e mase, e toreisi lou bena guba ela.​—Apos. 1:14.

21. Tatau ese Maria sivaraina, Baibul ai e torea amo dahaka e dibamu?

²¹ Tatau bae diba ḡaudia. Aonega tauna na be moalemu bema adavana ena diba Baibul ai na bada. Basine laloamu adavana ese be hereaiamu o ena dagi be abiamu. E dibamu, Baibul bona ena hahekau herevadia mai dibana taihuna ese ena ruma bese na be durua badamu. Momokani, ena be adavana na e skuli namonamo, to ruma bese tomadihona bona tiokratik ḡaukaradia na iena maduna, ena ruma bese baine gunalaia.​—Efe. 6:4.

22. Ha’hine be Maria ena amo dahaka e dibamu?

²² Hahine bae diba ḡaudia. Hahine ese adavana baine kamonai henia na maoro, to ena abidadama baine hagoadaia karana na ia sibona ena maduna. (Gal. 6:5) Una dainai, nega baine ato sibona baine stadi bona baine lalo dobu. Una ese be duruamu Iehova be lalokau heniamu bona be matauraiamu bona mai moalena ida adavana be kamonai heniamu.

23. Edena dalai adavadia e badinadiamu ha’hinedia na sibodia, edia ruma bese bona kongrigeisin e duruamu?

²³ Iehova e lalokau heniamu dainai adavadia henudia ai e nohomu ha’hinedia na e moale badamu, to Iehova ese e ato kwara dagina asie badinaiamu hahinedia na basie moalemu. Idia na haheitalai namona matamata tatau bona ha’hine ediai. Bona idia ese dia ruma bese ai mo, to kongrigeisin ai danu hemami namona e havaraiamu. (Tito 2:3-5) Hari, Iehova e badinaiamu bona e hesiai heniamu taudia padadiai, ha’hine edia namba na bada herea. (Sal. 68:11) Kongrigeisin lalonai, ita iboudai, herevana tau o hahine, na mai eda ḡaukara. Atikol gabena ai ita ta ta ese una baita haḡuḡurua diba daladia baita herevalaimu.