1. Ededia dalai sisiba ta abimu, bona dahaka dainai ita iboudai sisiba baita abi na namo?

 ITA iboudai na nega ta ta ai sisiba baita abi na namo. Nega haida, reana ta matauraiamu tauna ta baita noiamu bena sisiba herevadia be henimu. Bona nega haida, e laloda badamu tadikakana ese eda “kerere”​—gabeai baita lalohisihisilaiamu ḡauna​—be itaiamu dainai be sisiba henidiamu. (Gal. 6:1) Eiava, kerere badana ta karaia neganai ihamaoromaoroda totona sisiba baita abimu. Herevana edena dalai sisiba baita abi, to namona na baita abidia dae. Unu baita kara toma na mai ena namo bona be hamauridamu!​—Her. 6:23.

2. Hereva Lada-isidia 12:15 ena hereva heḡereḡerena, dahaka dainai sisiba baita abi dae?

² Eda atikol ena siri badana ese e hagoadadamu, ‘aonega taudia edia hereva baita kamonai.’ (Her. 22:17) Dia taunimanima iboudiai na ḡau iboudiai mai dibadia; anina na ta ena diba bona ekspiriens ese eda na e hanaia. (Hereva Lada-isidia 12:15 ba duahia.) Una dainai sisiba baita abi dae na manau karana. Una ese e hahedinaraiamu eda diba na mai hetoana; bona ta dibamu ta uramu baita kara ḡaudia baita haḡuḡuru totona, haida edia heduru baita abi na namo. Aonega tauna King Solomon na Iehova ena lauma helaḡa ena siahu amo ina e torea: “Ta se hahealomu negana ai, taunimanima edia lalo-hata ḡaudia asie tubu namonamomu; a hahealo taudia na hoho negana ai na e tubu ḡoevaḡoevamu.”​—Her. 15:22.

3. Ededia dala amo reana sisiba baita abimu?

³ Sisiba na reana dala ma ta amo baita abimu eiava ta ena amo baita abimu. Dala ma ta amo sisiba baita abimu anina be dahaka? Reana Baibul eiava eda pablikeisin ta ai baita duahiamu ḡauna ta ese be durudamu, baita lalopararamu ta karaiamu karana na kerere dainai, baita haidauamu. (Heb. 4:12) Una na dala ma ta amo sisiba baita abi karana. Ta ena amo sisiba baita  abimu anina be dahaka? Anina na elda ta eiava tadikaka ta ese ita edai baita hamaoromaoro ḡaudia na be gwaurai hedinaraimu. Una na ta ena amo sisiba baita abi karana. Bema ta na ita e lalokau henidamu dainai Baibul amo be sisiba henidamu, namona na e gwauraimu herevadia na baita kamonai, baita lalodia bada, bona baita badinadia.

4. Kohelete 7:9 ena hereva heḡereḡerena, sisiba ta abimu neganai dahaka basita kara na namo?

⁴ Vaia, ta ese be sisiba henidamu neganai iabi daena na be aukamu. Reana baita badumu danu. Dahaka dainai? Ena be baita gwaumu ita na dia ḡoevadae, to ta ese eda kerere be gwauraia hedinaraimu bona ihamaoromaorona sisibana be henimu neganai, reana edai na be aukamu baita abia dae totona. (Kohelete 7:9 ba duahia.) Reana hahekora herevadia baita gwauraimu. Eiava sisiba e heni badina baita henanadailaiamu o sisiba e heni dalana baita badulaiamu. Reana sisiba e heni tauna ena kerere baita tahumu, bena baita gwaumu: ‘Ia na asi ena maoro lau baine sisiba henigu. Ia danu e kereremu!’ Bona bema baita abiamu sisibana na dia ita eda ura heḡereḡerena, baita dadaraiamu eiava ita eda ura heḡereḡerena ai baine sisiba tauna baita tahuamu.

5. Ina atikol ai dahaka baita herevalaimu?

⁵ Ina atikol ai, Baibul ai sisiba e abia dae bona e dadarai taudia sivaraidia baita herevalaimu. Danu dahaka ese baine duruda sisiba baita abi dae, bona unu amo hahenamo baita abimu dalana baita herevalaimu.

6. King Rehoboam ese e abi sisibadia dainai e kara karana amo dahaka ta dibamu?

⁶ Mani Rehoboam ena haheitalai a laloa. Israel ena king ai ela neganai, ena hanua taudia ese edia noinoi ḡauna na ia dekena e laohaia. E noia tamana, Solomon ese idia e henidia maduna metauna baine kokia. Rehoboam na kara maorona e karaia, taunimanima baine haere henidia totona, Israel ena tatau badadia ediai heduru e tahu. Unu tatau badadia ese e hamaoroa bema taunimanima edia noinoi ḡauna baine karaia, idia ese ia na be hesiai heniamu. (1 Han. 12:3-7) To, Rehoboam ese una sisiba na se abia dae, una dainai ia ida e tubu dae tataudia ediai heduru ma e tahu. Unu tatau laḡanidia na reana 40 heḡereḡerena, una dainai reana mauri ai ḡau haida na da mai dibadia. (2 Sis. 12:13) To, una nega ai idia ese Rehoboam na sisiba kererena e henia. Idia ese e hamaoroa taunimanima edia maduna baine habadaia. (1 Han. 12:8-11) Sisiba idaudia rua e abi dainai, Iehova bema ḡuriḡuri henia bona bema nanadaia edena sisiba bema badinaia. To, ia ese eregabe edia sisiba herevadia na e ura heni bona e abi dae. Una dainai Rehoboam bona Israel taudia ediai dika bada herea e vara. Ita danu, reana baita abiamu sisibana na dia nega iboudiai ita ta uramu baita kamonaia ḡauna. To, bema una na Dirava ena Hereva amo, namona na baita abia dae.

7. King Usia ena haheitalai amo dahaka ta dibamu?

⁷ King Usia ese sisiba herevadia na e dadarai. Iehova ena dubu ai, hahelaḡa taudia mo bae vareai gabunai e vareai, bona e ura muramura mai bonana baine gabua. Iehova ena hahelaḡa taudia ese e hamaoroa: “Usia e, dia oiemu ḡaukara muramura mai bonana ba gabua Iehova ena, a Aaron garana hari vada e hahelaḡadia, muramura mai bonadia bae gabu.” Usia be dahaka e kara? Bema mai manauna ida sisiba bema abi dae bona maoromaoro dubu bema rakatania, reana Iehova ese ena dika na bema gwauatao. To, “Usia na e badu.” Dahaka dainai sisiba e dadarai? Usia na e laloava ia na king dainai, mai ena maoro ena ura karadia baine kara. To, Iehova ese una na se  abia dae. Asi ena maoro baine karaia ḡauna e karaia dainai, Iehova ese lepra tauna ai e halaoa, bona e lepra “ela bona ena mase dinana.” (2 Sis. 26:16-21) Usia ena haheitalai ese e hadibadamu, herevana ita be daika, to bema Baibul amo e maimu sisibadia baita dadaraimu, Iehova ena lalonamo na baita haboioamu.

8. Iobu ese sisiba e abi neganai, dahaka e kara?

⁸ Sisiba e dadarai taudia haida da tame herevalaidia, to Baibul ese sisiba e abi dae dainai hahenamo e abi taudia danu e herevalaidia. Mani Iobu aita laloa. Ena be Dirava na e gari heniava, to ia na dia ḡoevadae. Ia na hekwakwanai momo daidiai, lalohadai kereredia haida e gwaurai. Una dainai, Iehova bona Elihu edia amo sisiba e abi. Iobu be dahaka e kara? Mai ena manau ida sisiba na e abi dae. Ia na eto: “Lalogu se pararamu ḡaudia vada na gwauraidia . . . una dainai lau na sibogu na hedadaraimu, ḡahu bona kahu ai na helalo kerehaimu.” Iobu na ena manau karana dainai Iehova ese e hanamoa.​—Iobu 42:3-6, 12-17.

9. Edena dalai Mose na haheitalai namona sisiba iabi daena karana ai?

⁹ Mose na haheitalai namona, badina kerere badana ta e karaia neganai sisiba na e abi dae. Nega ta ai, e badu bena Iehova na se matauraia. Una dainai, Gwauhamata Tanona ai na se vareai. (Num. 20:1-13) Mose na una dainai se moale karana e herevalaia neganai, Iehova na e gwa: “Ena hereva na basio gwauraia lou.” (Deu. 3:23-27) Mose na se badu. To, Iehova ese e karaia abi hidina na e abia dae, bona dounu Iehova ese e ḡaukaralaia Israel taudia e gunalaidia. (Deu. 4:1) Sisiba iabi daena karana ai Iobu bona Mose edia haheitalai namodia baita tohotoho. Iobu ese ena lalohadai dalana na e haidaua bona hahekora herevadia na se gwaurai. Mose ese e hahedinaraia Iehova ena sisiba na e abia dae, badina ena be ia ese e laloa bada hahenamona na e haboioa, to dounu Iehova e abidadama heniava.

10. (a) Hereva Lada-isidia 4:10-13 ese sisiba iabi daena karana ena namo be ede e hahedinaraia toma? (b) Sisiba karana ai haida ese edena lalohadai maorona e hahedinaraia?

¹⁰ Hahenamo baita abimu bema abidadama taudia Iobu bona Mose edia haheitalai baita tohotohomu. (Hereva Lada-isidia 4:10-13 ba duahi.) Tadikaka taihu momo na unu e kara toma. Congo ai e nohomu tadikaka ladana Emmanuel, ese e abia sisibana e herevalaia neganai, e gwa: “Egu kongrigeisin ai lo tadikaka haida ese e itaia, egu hetura karana Iehova ida na be dikamu neganai e durugu. Edia sisiba herevadia na badina dainai, hekwakwanai momo ai asina vareai.” * Canada ai painia taihu ta ladana Megan, ese sisiba na ini e herevalaia toma: “Na abimu sisibadia na dia nega iboudiai na uramu baina kamonai sisibadia, to unu na baina kamonai na namo sisibadia.” Bona Croatia amo tadikaka ta ladana Marko, na e gwa: “Ena be hahenamo ta na haboioa, to na lalo loumu neganai, na lalopararamu na abia sisibana ese e durugu egu hetura karana Iehova ida baina hagoadaia lou.”

11. Tadikaka Karl Klein ese sisiba iabi daena karana be ede e herevalaia toma?

¹¹ Sisiba iabi daena karana ai haheitalai namona ma ta na Tadikaka Karl Klein, guna Gavanin Bodi ena memba ta. Ena mauri sivaraina ai, Joseph F. Rutherford, ia turana namona ta, ese e sisiba henia negana e herevalaia. Tadikaka Klein na e gwa, matamanai ia na se moale. Eto: “Dina ma ta ai Tadikaka Rutherford ida a hedavari neganai, ia na mai moalena ida e gwa, ‘Namo Karl!’ To lalogu na dounu e hisihisiva dainai, dia lalogu ibounai ida na haere henia. To e hamaorogu, ‘Karl, nahuamu ba  tohoa! Diabolo na e uramu oi baine hamorumu!’ Mai hemaraigu ida na hamaoroa, ‘Lasi Tadikaka Rutherford, emu ai na asina badumu.’ To mai dibana dounu na baduva, una dainai ma e hamaorogu lou, ‘Na lalopararamu. To nahuamu ba tohoa. Diabolo na e uramu oi baine hamorumu.’ Ena hereva na maoro! Bema dounu baita badu, tadikaka ese e sisiba henida dainai, ita na Diabolo ena dala ta kehoamu.” * (Efe. 4:25-27) Tadikaka Klein ese Tadikaka Rutherford ena sisiba na e abia dae dainai, idia na dounu tura namodia ai ela.

12. Edena dala ai manau karana ese baine duruda diba sisiba baita abi dae? (Salamo 141:5)

¹² Dahaka ese baine duruda diba sisiba baita abi dae? Baita manau na namo bona baita helalotao ita na dia ḡoḡoevadae bona nega haida na ta kara kereremu. Matamanai tame herevalaia heḡereḡerena, Iobu na lalohadai kereredia e gwaurai. To, gabeai ena lalohadai e haidaua dainai Iehova ese e hanamoa. Dahaka dainai? Badina Iobu na e manau. Ena manau karana na e hahedinaraia badina ena be Elihu na maraḡi, to Iobu ese ena sisiba na e abi dae. (Iobu 32:6, 7) Una heḡereḡerena, ita danu manau karana ese be durudamu sisiba baita badinamu, ena be asita moalelaidiamu eiava sisiba e henimu tauna na maraḡi. Canada ai e nohomu elda ta na e gwa, “Basita goada dibamu, bema ta ese basine sisiba henidamu.” Ita iboudai na ta uramu lauma huahuadia baita hahedinarai bona Kristen hesiai ḡaukarana dounu baita karaia.​—Salamo 141:5 ba duahia.

13. Ta abimu sisibadia be ede baita lalodia toma?

¹³ Sisiba na ba laloa Dirava ena lalokau karana. Iehova ese eda namo na e lalo badamu. (Her. 4:20-22) Ia ese ena Hereva, Baibul pablikeisin, eiava lo tadikaka o taihu ta amo e sisiba henidamu neganai, e hahedinaraiamu ita na e lalokau henidamu. Heberu 12:9, 10 na e gwaumu ita “ihanamoda” totona, unu e kara tomamu.

14. Sisiba ta abimu neganai dahaka baita laloa bada na ḡau badana?

¹⁴ Sisiba herevana ba laloa, dia e heni dalana. Nega haida, baita mamiamu ta abia sisibana na dia dala maorona ai e heni. Vaia, sisiba e henimu tauna na baine hekwarahi dala maoronai sisiba baine heni. * (Gal. 6:1) To bema ta ese e sisiba henidamu, namona na e heni sisibana baita laloa​—ena be baita laloamu dala maoronai bema heni na namo. Reana siboda baita henanadai: ‘Ena be sisiba e heni dalana na asina moalelaia, to e gwaurai ḡaudia haida momokani, a? Sisiba e heni tauna ena kerere na basina laloa to e heni sisibana amo lau be  dahaka na dibamu?’ Aonega karana na sisiba amo namo baita abi dalana baita laloa bada.​—Her. 15:31.

15. Dahaka dainai sisiba baita tahu o baita noi na namo?

¹⁵ Baibul ese e hagoadadamu sisiba baita tahu. Hereva Lada-isidia 13:10 na e gwaumu: “Aonega na sisiba e abia daemu [“tahuamu,” NWT] taudia ediai.” Una na momokani! Asie narimu to sisiba e noimu taudia na lauma dalanai be goadamu, to sisiba asie noimu taudia be basie goadamu. Una dainai lalomu ba hadaia sisiba ba tahu.

16. Ededia negai sisiba baita tahu?

¹⁶ Edena negai tadikaka o taihu ta ena amo sisiba baita tahu? Mani ini nega idaudia toi ba lalo. (1) Taihu ta na ekspiriens taihu ta e noia ena Baibul stadi ta ai baine helai vareai bona gabeai e noia ena hahediba dalana be ede baine hanamoa toma. (2) Singul taihu ta na e ura piripou latana ta baine hoia, bona una piripou laulauna na lo taihuna enai e hahedinaraia bena e noia ena lalohadai baine gwauraia. (3) Tadikaka ta na e abia hidi ena pablik tok ginigunana baine heni. Ia ese tok heni karana e manadalaia tadikakana ta e noia ena tok baine kamonaia bona ena hahediba karana baine hanamoa daladia haida baine gwaurai. Ena be tadikaka ta na laḡani momo lalodiai tok de heni, to namona na tok heni karana e manadalaia tadikakana ma ta ena sisiba o heduru baine noi bona baine badina.

17. Edena dala ai sisiba karana amo namo baita davarimu?

¹⁷ Vaira puradia eiava huadia lalodiai, sisiba na reana ta ena amo baita abimu eiava dala ma ta amo baita abimu. Bema una baine vara, namona na tame herevalai ḡaudia ba lalodia lou. Ba manau. Sisiba herevana ba laloa, dia e henimu dalana. Bona o abiamu sisibana ba badinaia. Aonega na dia ta varalaia ḡauna. To, bema ‘hahealo herevadia baita kamonaidiamu’ bona ‘hahediba herevadia baita abi daemu,’ Dirava na e gwauhamata baita ‘aonegamu.’​—Her. 19:20.