1. Edena kara namona be Iehova ena taunimanima ediai ta itaiamu?

 IDAUNEGAI, Baibul na e peroveta Dirava ena taunimanima na ia Natuna ena hahekau henunai, mai edia ura ida Iehova bae hesiai henia. (Sal. 110:3, NWT) Hari ina negai una peroveta herevana na e ḡuḡurumu. Laḡani ta ta ai, Iehova ena hesiai taudia na mai edia ura bada ida haroro ḡaukara ai hora hanred milion momo e ḡaukaralaimu. Una ḡaukara e karaiamu neganai davadia na se henimu. Danu nega e atomu tauani, hemami, bona lauma dalanai tadikaka taihu e durudiamu. Elda bona hesiai taudia na hora momo lalodiai edia hebou kahadia e heḡaeḡaelaimu bona tadikaka taihu e vadivadidiamu. Dahaka dainai unu e kara tomamu: Badina Iehova bona dekedia taudia e lalokau henidiamu.​—Matt. 22:37-39.

2. Roma 15:1-3 ena hereva heḡereḡerena, Iesu be dahaka haheitalai namona e hahedinaraia?

² Ma haida ilalodia bada karana ai Iesu na haheitalai namona. Ita na ta uramu ia baita tohotohoa. (Roma 15:1-3 ba duahi.) Ia e tohotohoamu taudia na hahenamo be davarimu. Iesu na e gwa: “Ḡau ihenina be namo bada, ḡau iabina be namo maraḡi.”​—Apos. 20:35.

3. Ina atikol ai dahaka baita herevalaimu?

³ Ina atikol ai, Iesu ese ma haida idurudia totona sibona ena namo se lalo negadia haida baita herevalaimu, bona baita itaiamu edena dalai iena haheitalai baita tohotohoa diba. Danu haida idurudia urana baita habadaia daladia baita herevalaimu.

4. Edena dalai Iesu ese ma haida edia namo e lalo guna?

⁴ Nega haida Iesu tauanina na e hesikuva to ma haida e durudia. Kaperanaum hanuana badinai, taunimanima loḡora na Iesu bae itaia totona ororo ta badinai e hegogo neganai, mani Iesu e karaia ḡauna a laloa. Una hanuaboi ibounai lalonai Iesu na e ḡuriḡuri. Una dainai reana ia na de hesiku bada herea, to hutuma padadiai ogoḡami bona gorere taudia e itadia neganai e ura baine durudia. Ia ese edia gorere e hanamo bona hahegoada hereva namo hereadia danu e heni​—unu na e gwauraidiamu Iesu ena Ororo Harorona.​—Luka 6:12-20.

5. Ruma bese kwaradia e hesikumu neganai, edena dalai Iesu sibona se helalo karana bae tohotohoa diba?

⁵ Ruma bese kwaradia ese Iesu bae tohotohoa dalana. Mani ina haheitalai a laloa: Ruma bese kwarana ta na dina ibounai bema ḡaukara, bena mai hesikuna ida ruma bema lao. Ena be e ura una hanuaboi ai edia ruma bese tomadihona na basine karaia, to Iehova e noia goada baine henia una stadi baine karaia. Iehova ese ena ḡuriḡuri na e haerelaia, bona vaevae e karamu heḡereḡerena una stadi na e karaia. Una hanuaboi ai natudia ese mai anina bada ḡauna ta e dibaia, tamadia sinadia ese lauma ḡaudia na e lalo badamu.

6. Iesu ese ena nega e ḡaukaralaia haida e durudia haheitalaina ta a gwauraia.

⁶ Iesu ese sibona baine noho negana na e ḡaukaralaia haida e durudia. Turana Ioane Bapatiso e alaia sivaraina e kamonai neganai mani Iesu ena hemami a laloa. Ia na e lalohisihisi bada herea, ani? Baibul na e gwaumu: “Iesu na [Ioane ena mase sivaraina] vada e kamonai; bena vanaḡi ai una gabu e heautania, gabu ḡaḡaena ela.” (Mat. 14:10-13) Ta lalopararamu dahaka dainai ia na e ura sibona baine noho. Ita momo na ta dara dokomu neganai ta uramu siboda baita noho. To Iesu enai una na se vara. Badina taunimanima hutuma na ia e ura bainela gabuna ela guna. Iesu be dahaka e kara? Hutuma edia dabu ḡaudia e lalo, bona “e bogadia hisi.” Edia dabu lauma dalanai na e itaia, bona e durudia haraḡa. Ia ese ḡau momo “e hadibadia.”​—Mar. 6:31-34; Luka 9:10, 11.

7-8. Tadikaka o taihu heduru e uramu neganai, edena dalai elda ese Iesu e tohotohoamu?

 ⁷ Elda taudia ese mai edia lalokau ida Iesu e tohotohoamu dalana. Elda na ita iduruda totona sibodia edia namo se lalomu dainai, ta lalodia badamu! Kongrigeisin ese idia e karamu ḡaudia momo na asie itamu. Heḡereḡere, tadikaka taihu na medikol dalanai heduru e uramu neganai, Hospital Liaison Committee tadikakadia na heduru e heni haraḡamu. Nega momo heduru unuhetomadia na hanuaboi ai e varamu! To idia ese e lalometaumu tadikakana eiava taihuna na e bogaia hisimu dainai, idia bona edia ruma bese ese una tadikaka o taihu ena namo na e atoa gunamu.

⁸ Danu, elda taudia na orea ena konstraksin ḡaukara idauidau bona disaster relief ḡaukaradia ai e hedurumu. Bona eda kongrigeisin ai elda na hora momo e ḡaukaralaimu ita e hadibadamu, e hagoadadamu, bona e durudamu. Namona na mai kudouda idoinai ida unu tadikaka iboudiai bona edia ruma bese baita tenkiu henidia. Edia kara dainai Iehova ese baine hanamodia! Momokani, taunimanima ma haida heḡereḡeredia, elda ese ḡau iboudiai bae haerodia namonamo na namo. Dia namo nega bada herea tiokratik ḡaukaradia ai bae haore dainai, edia ruma bese maurina baine dika.

9. Filipi 2:4, 5 ena hereva heḡereḡerena, Kristen taudia ese edena lalohadai bae abia na namo?

⁹ Filipi 2:4, 5 ba duahi. Ita iboudai na dia elda tauda, to Iesu ese sibona ena ura e dadaraia karana na baita tohotohoa diba. Baibul na e gwa Iesu na “hesiai merona anitarana e  abia.” (Fili. 2:7) Mani una hereva anina aita laloa. Hesiai tauna namona na dala be tahumu biaguna be hamoaleamu. Oi na Iehova ena hesiai tauna bona tadikakamu isiaidia ilao henina tauna dainai, o uramu ba hesiai henidia. Una na ba karaia diba bema ini heduru daladia ba lalodia.

10. Siboda ese ededia henanadai baita heni be namo?

¹⁰ Emu kara ba haerodia. Sibomu ba henanadai: ‘Lau be mai egu ura ida sibogu egu ura na dadaraimu, haida baina durudia totona, a? Heḡereḡere, bema bae noigu tadikaka iahuna ta baina vadivadia eiava taihu iahuna ta baina laohaia hebou, lau be dahaka ba karamu? Bema tadikaka ese hebouhebou gabuna ihaḡoevana o Kingdom Hall ihanamona totona heduru e noimu neganai, lau be heduru ba heni haraḡamu, a?’ Iehova ese ia dainai eda nega, goada bona kohu ta ḡaukaralaimu ma haida ta durudiamu karana na e moalelaiamu. Bema ta itaiamu una kaha ai ḡau haida baita hamaoromaoro na namo, dahaka baita kara diba?

11. Edena dalai ḡuriḡuri karana ese baine duruda diba, siboda eda ura idadaraina urana baita hahedinaraia?

¹¹ Mai lalomu idoinai ida Iehova ba ḡuriḡuri henia. Reana o dibamu una kaha ai ḡau haida ba hamaoromaoro na namo, to lalomu na dia goada. Bema unu bamona, mai lalomu idoinai ida Iehova ba ḡuriḡuri henia. Mai momokanimu ida, emu hemami na Iehova ba hamaorolaia, bona ba noia “ena ura namodia iura henidia bona ikaradia” urana na lalomu ai baine havara.​—Fili. 2:13.

12. De bapatiso eregabe tadikakadia be dahaka bae kara diba?

¹² Bema oi na eregabe tadikakana bona do bapatiso, Iehova ba noia baine durumu kongrigeisin iduruna urana bavabia totona. Tano haida ai, elda na momo, to hesiai taudia be dia momo, bona unu hesiai taudia momo na i’iahu. Orea na e tubumu dainai, eregabe tadikakadia momo ese Iehova ena taunimanima inaridia karana ai elda taudia bae durudia na namo. Bema bae siaimu gabunai mai emu ura ida emu hesiai ḡaukara bo karaiamu, bo moalemu. Dahaka dainai? Badina Iehova bo hamoaleamu, lada namona bo abiamu, bona haida idurudia karana amo e maimu moalena bo abiamu.

13-14. Dahaka baita kara diba unu amo tadikaka taihu baita durudia? (Rau 1 laulauna ba itaia.)

¹³ Ba noho heḡaeḡae haida edia dabu negadiai ba durudia. Aposetolo Paulo ese Heberu Kristen taudia e sisiba henidia, eto: “Kara namo bona kohu iharina na basio rea, badina be Dirava ese helaḡa karadia enehetomadia e moalelaimu.” (Heb. 13:16) Una na sisiba namona, ani? Una revareva e abia murinai, Iudea ai e nohova Kristen taudia na edia ruma, bisnes, bona varavaradia dia Kristen taudia na e rakatanidia, bona ‘ororo e heau lao.’ (Mat. 24:16) Una negai, bae heduru heheni na ḡau badana. Bema una do se vara ai Paulo ena sisiba, ta ta ena ḡau bae hari heheni sisibana, bema badinaia, edia noho gabuna matamatana ai una bema karaia na dia auka.

¹⁴ Reana dia nega iboudiai tadikaka taihu ese edia dabu ḡaudia na be gwaurai hedinaraimu. Heḡereḡere, tadikaka ta na adavana e mase dainai be lalohisihisimu. Una tadikaka be, be uramu aniani, motuka, eiava ruma ḡaukaradia ai baita durua, a? Reana basine herevalaimu badina se uramu baita hekwarahi. To bema heduru baita henimu ia na be moale badamu. Dia namo baita lalo ta ese da be duruamu eiava heduru e uramu neganai baine hadibada bena baita durua. Sibomu ba henanadai, ‘Bema egu ai una hekwakwanai bema vara, lau be nama ura dahaka heduru nama abi?’

15. Haida baita durudia totona, laloda baita hadai dahaka baita kara na namo?

 ¹⁵ Taunimanima na basie gari to emu ai heduru bae noi diba. Mai dibamu emu kongrigeisin ai ededia tadikaka taihu na hanaihanai e noho heḡaeḡaemu ma haida bae durudia. Idia na asie uramu baita mamia ta hahekwarahidiamu. Ta dibamu heduru ta uramu neganai be durudamu, bona ta uramu idia baita tohotohodia! Alan, laḡanina 45 elda ta, na e ura taunimanima na basie gari to ienai heduru bae noi diba. Alan ese Iesu ena haheitalai e haeroa neganai, e gwa: “Ena be Iesu ena ḡaukara na momo, to taunimanima badadia bona maraḡidia na ia dekena e laova bona asie gariva ienai heduru bae noi. Idia ese Iesu e itaiava neganai, e dibava ia ese idia na e lalodia badava. Na uramu mai kudougu idoinai ida Iesu baina tohotohoa, bona na uramu taunimanima na basie gari to lau egu ai heduru bae noi diba, bona bae diba na lalokau henidiamu bona na lalodia badamu.”

16. Edena dalai Salamo 119:59, 60 baita badinaia karana ese be durudamu, Iesu ena haheitalai baita badinaia namonamomu?

¹⁶ Namona na basita lalomanoka bema Iesu na asita tohotohoa ḡoevaḡoevamu. (Iak. 3:2) Artist ai e uramu bainela tauna ese be peniamu laulauna na dia ia e hadibaia tauna ena laulau ida be heḡereḡere ḡoevaḡoevamu. To bema ena kerere amo diba be abimu bona be hekwarahimu ia e hadibaiamu tauna ena haheitlai baine tohotohoa namonamo, ena penipeni dalana na be namo be laomu. Una heḡereḡerena, bema siboda eda Baibul stadi amo ta dibamu ḡaudia baita badinamu, bona baita hekwarahimu eda kara baita hamaoromaoromu, Iesu ena haheitalai na baita badinaia namonamo dibamu.​—Salamo 119:59, 60 ba duahi.

17-18. Bema Iesu heḡereḡerena siboda eda ura baita dadaraimu, dahaka hahenamo baita abimu?

¹⁷ Siboda eda ura baita dadaraia karana ese ma haida be durudiamu, idia danu sibodia edia ura basie lalo badamu. Elda ta ladana Tim na e gwa: “Eregabe tadikaka haida na e goada bona hesiai taudia ai ela​—idia haida laḡanidia na mamaraḡi​—to idia ese tadikaka ma haida e itadia mai edia ura ida kongrigeisin e durua dainai, idia danu unu e kara toma. Kongrigeisin iduruna totona sibodia edia ura e dadarai dainai, emai kongrigeisin bona elda taudia na e durudia badamu.”

¹⁸ Hari ita na sibodia e helalomu taudia padadiai ta nohomu. To Iehova ena taunimanima edia kara na idau. Iesu ese sibona ena ura e dadaraia karana ta dibaia dainai, laloda ta hadai ia baita tohotohoa. Momokani, ita ta na dia heḡereḡere ia “aena gabudia ai” baita raka ḡoevaḡoeva diba, to ia aena gabudia baita badina namonamo diba. (1 Pet. 2:21) Bema baita hekwarahimu Iesu heḡereḡerena siboda eda ura baita dadaraimu, ita danu Iehova ena lalonamo baita abiamu bona baita moalemu.