To, Iehova na e uramu ita na mai haheaukada ida ia ese e abia hidi negana baita naria. Dahaka dainai? Edena dala ai mai moaleda ida baita nari?

DAHAKA DAINAI IEHOVA NA E URAMU BAITA NARI?

Baibul na e gwaumu: “Taunabunai Iehova na e henarimu, baine hanamomui e tomamu; taunabunai ia na e tore isimu, baine bogamui hisi e tomamu. Badina be Iehova na hahemaoro ḡoevaḡoeva Diravana; ia e nariamu taudia iboudiai na nanamo.” (Isa. 30:18) Isaia ese una hereva e torea neganai, ia na kamonai habou Iuda taudia e hereva henidiava. (Isa. 30:1) To idia padadiai, Iuda taudia haida na Dirava e abidadama heniava, bona una hereva ese idia na e hagoadadia. Hari ina negai, Iehova ena hesiai taudia ediai una hereva na mai anina.

Una dainai mai haheaukada ida baita nari, badina Iehova na mai haheaukana ida e narimu. Ia ese dika baine haorea negana na vada e abia hidi, bona una baine vara dinana bona horana e nariamu. (Mat. 24:36) Una nega ai be hedinarai ḡoevaḡoevamu, Iehova bona ena hesiai taudia latadiai Diabolo ese e gwaurai herevadia na koikoi. Bena Iehova ese Satana bona ia e badinaiamu taudia iboudiai be haorediamu, to ita na be ‘bogada hisimu.’

Ena be una nega ta nariamu lalonai, Iehova ese iseda hekwakwanai na basine laodia ahumu, to baita moale daladia e hadibadamu. Una na Isaia ena amo e herevalaia. (Isa. 30:18) a Mani bae duruda ḡaudia foa aita herevalai.

EDENA DALA AI MAI MOALEDA IDA BAITA NARI?

1. Ḡau namodia ba lalo. King David ena mauri ibounai lalonai kara dika na e varava. (Sal. 37:35) To ia na e gwa: “Iehova enai ba laḡa ani, ia ba naria mai haheaukamu ida; Ialomu basine hekwarahi, ena ḡaukara ai e taḡamu tauna dainai, eiava ena lalo-hadai dikadia anidia e karamu tauna dainai.” (Sal. 37:7) David sibona ese una sisiba e badinaia dalana na, Iehova ese ia baine hamauria gwauhamatana e laloa. Danu, Iehova amo e abi hahenamodia iboudiai e lalodia. (Sal. 40:5) Ita danu, eda hekwakwanai basita lalodia momo, to ḡau  namodia baita lalo, una amo mai moaleda ida Iehova baita naria diba.

2. Iehova ihanamona karadia ba goadalai. Salamo 71 itorena tauna David na Iehova enai ini e gwau toma: “A lau be baina helaro Ioulou, bona oi ihanamomu baina habadaia loulou.” (Sal. 71:14) Ia ese Iehova be edena dala ai e hanamoa? Haida ediai Iehova e herevalaia bona ane amo e hanamoa. (Sal. 71:​16, 23) David heḡereḡerena Iehova ta nariamu lalonai baita moale diba. Ia ta hanamoamu daladia na haroro ḡaukara ai, bamoda ida ta herevaherevamu negadia ai, bona tomadiho anedia ta abimu negadia ai. Basileia anena ta o abiamu neganai, herevadia na ba lalodia dobu.

3. Tadikaka taihu amo goada bavabi. David na hekwakwanai e davari neganai, Iehova e hamaoroa, eto: “Oi ladamu baina heatolaia, . . . Dirava e matauraiamu taudia vairadiai.” (Sal. 52:9) Ita danu eda tadikaka bona taihu amo goada baita abi diba, iseda hebou ai, haroro ḡaukara negadia ai, bona ta moale heboumu negadia ai.—Roma 1:​11, 12.

4. Baibul amo emu helaro ba hagoadaia. Salamo 62:5 na e gwaumu: ‘Lau . . . ese Dirava mo na nariamu, asi reḡereḡegu; badina be egu helaro na ienai.’ Eda helaro baine goada bona basita daradara na ḡau badana. Namona na baita abia dae vaitani Iehova ena gwauhamata iboudiai na be ḡuḡurumu, ena be nega daudau lalonai baita nari. Iseda helaro baine goada totona Dirava ena Hereva baita stadilaia. Baita stadilai ḡaudia haida na ini: Peroveta herevadia e ḡuḡuru dalana, Baibul e torea taudia iboudia ese e hahedinaraia hereva badana be dahaka, bona Iehova ena kara. (Sal. 1:​2, 3) Danu, mauri hanaihanai gwauhamatana baine ḡuḡuru negana ta nariamu lalonai, Iehova baita noia iena “lauma helaḡa” amo baine duruda. Unu amo eda hetura karana ia ida na dounu baine goada.—Iuda 20, 21.

King David bamona, bavabia dae Iehova ese ia e nariamu taudia na e gimadiamu, bona hanaihanai e lalokau henidiamu. (Sal. 33:​18, 22) Mai haheaukamu ida Iehova ba naria dalana na, ḡau namodia ba lalo, Iehova ihanamona karadia ba goadalai, tadikaka taihu amo goada bavabi, bona Baibul amo emu helaro ba hagoadaia.