Mary adavana John ida, a e nohova gabuna na Philippines taudia momo e laova eha ḡaukarava bona unuseni ai e nohova. COVID-19 lalonai, Mary na Baibul stadi momo e hamatama, dia e noho gabunai mo to tano ma haida ai danu. Una be ede e karaia toma?

Mary na ena Baibul stadi e nanadaidiava, “E uramu Baibul baine stadilaia tauna ta mai dibamu?” Bema idia na be gwaumu oibe, taihu ese ma be noidiamu, “Bema namo ba durugu baina rin henidia?” Una henanadai manokana ese anina namona be havaraiamu. Dahaka dainai unu ta gwau tomamu? Badina Dirava ena hereva e laloa badamu taudia na e uramu Baibul amo e diba ḡaudia na, varavaradia bona turadia ediai bae herevalai. Una henanadai kwadoḡina amo dahaka e vara?

Mary ena stadi kekenina Jesmin, ese e urava Baibul bae stadilaia taudia foa na Mary enai e gwauraidia hedinarai. Idia ta na Kristin, ena stadi negana na e moalelaiava dainai Mary e noia wiki ta ai nega rua bae stadi. Mary na e ura baine diba, ma haida danu e uramu Baibul bae stadilaia dainai e henanadai neganai, Kristine na e gwa, “Oibe, lau ese turagu baina mailaidia.” Wiki haida lalodiai, Kristin ese Mary, na turana kekenidia foa vairadiai e herevalaia, bena idia danu e ura Baibul bae stadilaia. Gabeai Kristin ese turana ma haida ediai, Mary ese e durudia Baibul e stadilaia sivaraidia e herevalai hedinarai, bona idia haida na e ura Baibul bae stadilaia dainai ladadia e heni.

Danu Kristin na e ura ena femli Philippines ai Baibul bae dibaia. Una dainai ia ese natuna Andrea e hereva henia. Matamanai Andrea na e lalo, ‘Witnes taudia na cult, idia ese Iesu na se abidadama heniamu, bona Taravatu Gunana mo e ḡaukaralaiamu.’ Ena stadi ginigunana murinai e laloparara, ia ese Witnes taudia e lalodiava dalana na kerere. Ena stadi negadia ta ta ai, Baibul amo ḡau matamatana ta e dibaiava neganai ia na e gwauva, “Una na Baibul ena hereva dainai maoro!”

Gabeai, Andrea ese turana kekenidia rarua bona e ḡaukara hebouva kekenina ta enai Mary e gwauraia hedinarai, bena idia danu stadi e hamatama. Andrea lalana Angela na matakepulu. Ia na hanaihanai Mary bona Andrea e stadiva neganai e hakalava, to Mary ese una kara na se dibaiava. Bena dina ta, Angela ese Andrea e hereva henia, Mary baine noia ia ida baine stadi. Angela ese e dibava ḡaudia na e ura heniva. Hua tamona lalonai ia na siri momo e lalotaova, bona e ura wiki ta lalonai nega foa baine stadi. Andrea ese e duruava dainai hanaihanai kongrigeisin heboudia na videoconference amo e abiva.

 Mary bona Kristin edia stadi e abiva negadia iboudiai Kristin adavana, Joshua, na idia badidiai e nohova, una dainai Mary ese e noia edia stadi ai baine helai vareai. Joshua na e gwa, “Baina kamonai mo to henanadai ta basio henigu; bema bo nanadaigumu ba raka ohomu.” Miniti faiv lalodiai ia ese henanadai momo e heni, bona e ura ia danu Baibul baine stadilaia.

Mary na henanadai manokana amo Baibul stadi momo e hamatama. Mary na dala e kara ena stadi momo na tadikaka e henidia idia ese bae stadi henidia. Tano idaudia foa lalodiai, Mary ese Baibul stadi 28 e hamatama.

Matamanai tame herevalaia Mary ena stadi hahinena Jasmin, na April 2021 ai e bapatiso. Kristin be May 2022 ai e bapatiso, bena e lou lao Philippines, ena femli ida baine noho. Kristin ese Mary enai e herevalaidia kekenidia raruosi danu e bapatiso. Angela be hua haida muridiai e bapatiso, bona hari ia na regula painia. Kristin adavana Joshua, natudia Andrea, bona stadi taudia ma haida na e goada e laomu.

Kristen ginigunadia edia negai, sivarai namona e kamonai taudia na, edia ruma bese bona turadia ediai ma e harorolaiva. (Ioa. 1:​41, 42a; Apos. 10:​24, 27, 48; 16:​25-33) Oi danu emu stadi tauna bona kamonai taudia ediai ina henanadai ba gwauraia “E uramu Baibul baine stadilaia tauna ta mai dibamu?” Bema oi na una henanadai manokana bo ḡaukaralaiamu, reana oi danu e uramu Baibul bae stadilaia taudia momo bo davaridiamu.