1, 2. Laḡani 2018 ai, edena hebou ese taunimanima be hatamonadiamu, bona dahaka dainai? (Rau 12 ai laulau ba itaia.)

MARCH 31, 2018 ai, dina be dihomu neganai, Dirava ena taunimanima bona kamonai taudia momo na laḡani ta ta ai e karaiamu Lohiabada ena Anibou hebouna be laomu. Una dina ai, taunimanima milion momo na be hegogomu Keriso ena mase Ilalotaona totona. Laḡani ta ta ai, una mai anina bada hebouna ese tanobada heḡeḡemadai taunimanima e hatamonadiamu!

² Iehova bona Iesu na e moale dikadikamu badina e itaiamu tanobada heḡeḡemadai taunimanima milion momo na una mai anina bada hebouna e laomu. Baibul na e peroveta “hutuma bada-herea . . . asi iduahidia, bese idau-idau bona iduhu idau-idau bona hanua idau-idau bona gado idau-idau amo” na bae lolo badabada, baeto: “Hahemauri na iseda Dirava, terono ai e helaimu Diravana, bona Mamoe Natuna, ediai.” (Apok. 7:9, 10) Laḡani ta ta ai Memorial hebouna ta karaiamu neganai, Iehova bona Iesu ta hanamodiamu!

3. Ina atikol ai ededia henanadai be haerelaimu?

 ³ Ina atikol ese henanadai haida be haerelaimu. (1) Edena dala ai ita ta ta na Memorial totona baita heḡaeḡae bona baita lao henia na mai ena namo? (2) Ededia dala ai Memorial ese Dirava ena taunimanima edia lalotamona karana e hagoadaiamu? (3) Edena dala ai lalotamona karana baita hahedinaraia diba? (4) Memorial ginigabena ta baita abiamu, a? Bema oibe, edena negai?

4. Dahaka dainai Memorial hebouna baitala na mai anina bada?

⁴ Memorial hebouna ilao henina karana ena namo ba laloa. Ba helalotao, kongrigeisen heboudia na eda tomadiho kahana ta. Ta dibamu Iehova bona Iesu ese ina mai anina bada hebouna ilao henina totona e hekwarahimu taudia na e lalodiamu. Momokani, ta uramu Iehova bona Iesu na bae itada ita na Memorial hebouna baitala diba, ena be mai eda gorere eiava eda noho dalana na dia heḡereḡere. Bema eda kara amo baita hahedinaraiamu tomadiho heboudia na ta lalodia badamu, Iehova ese ladada na ‘ilalo-taoda bukana’​—“mauri bukana”​—ai be toremu, una buka lalonai mauri hanaihanai bae abia taudia ladadia mimia.​—Mal. 3:16; Apok. 20:15.

5. Memorial dinana e kahikahimu neganai, edena dala ai baita diba bema ita na ‘abidadama tauda eiava lasi’?

⁵ Memorial dinana e kahikahimu neganai, namona na nega baita ato baita ḡuriḡuri bona eda hetura karana Iehova ida baita haeroa. (2 Korinto 13:5 ba duahia.) Edena dala ai una baita karaia? Namona na ‘siboda baita hetahu’ bema ita na ‘abidadama tauda eiava lasi.’ Una baita karaia totona, siboda baita henanadai: ‘Lau na abia daemu Iehova ese ina orea mo e abia hidi iena ura baine haḡuḡurua totona, a? Na ḡaukara goadamu Basileia sivaraina namona baina harorolaia bona baina hahedibalaia totona, a? Egu kara amo na hahedinaraiamu ini na dina gabedia bona Satana ena lohia negana na kahirakahira be oremu, a? Iehova Dirava enai egu mauri na gwauhamatalaia negana amo, lau be dounu Iehova bona Iesu na abidadama henidiamu, a?’ (Mat. 24:14; 2 Tim. 3:1; Heb. 3:14) Unu henanadai haeredia baita haerodia karana ese be durudamu eda abidadama baita hagoadaia totona.

6. (a) Mauri hanaihanai iabina dalana tamona be dahaka? (b) Edena dala ai elda ta na laḡani ta ta ai Memorial totona e heḡaeḡaeva, bona edena dala unu ba kara toma?

⁶ Memorial anina e herevalaia siridia ba duahi bona ba lalodia dobu. (Ioane 3:16; 17:3 ba duahi.) Mauri hanaihanai iabina dalana tamona na, Iehova ba ‘dibaia’ bona Natuna vara-edeana, Iesu, ‘bavabidadama henia.’ Memorial totona ba heḡaeḡae neganai, namona na ba stadilai ḡaudia haida bavabidia hidi, unu ese bae durumu Iehova bona Iesu ba raka henidia kahi totona. Mani laḡani momo elda ḡaukara e karaia tauna ta ese e karaia ḡauna aita laloa. Laḡani momo lalodiai, ia ese Memorial bona Iehova bona Iesu edia lalokau e herevalai Gima Kohorona edia atikol e habouva. Memorial purana e kahikahiva neganai, unu atikol e duahidia louva bona Memorial ena namo e laloa dobuva. Nega ta ta ai, magasin matamatadia ta eiava rua e habouva. Una elda ese e davaria unu atikol e duahidia louva bona Memorial ena Baibul duahiduahi e laloa dobuva karana amo laḡani ta ta ai ḡau matamatadia e dibava. Mai anina bada ḡauna na, e mamia laḡani ta ta ai ena lalokau Iehova bona Iesu ediai na e goadava.  Unu bamona stadi karana ese baine durumu emu lalokau Iehova bona Iesu ediai ba habadaia bona Memorial hebouna amo namo ba davaria.

7. (a) Lohiabada ena Anibou hanuaboina ai, Iesu be dahaka e ḡuriḡurilaia? (b) Dahaka ese e hahedinaraiamu Iehova ese Iesu ena ḡuriḡuri na e haerelaia?

⁷ Lohiabada ena Anibou ginigunana e karaia hanuaboina ai, Iesu na e ḡuriḡuri ena hahediba na lalotamona ai bae noho totona, ia bona Tamana e lalotamonamu heḡereḡerena. (Ioane 17:20, 21 ba duahi.) Iehova ese Natuna lalokauna ena ḡuriḡuri na e haerelaia, bona hari taunimanima milion momo ese e abia daemu Iehova ese Natuna e siaia. Memorial na Dirava ena taunimanima edia hebou idau hereana ta, badina una hebou ese Iehova ena Witnes taudia e hatamonadiamu. Tanobada heḡeḡemadai bese idauidau bona kopi kaladia idauidau taudia na hebou gabudia ai be hegogomu. Gabu haida ai, bese idauidau na asie hebou tamonamu tomadiho totona, eiava una e karaiamu neganai ma haida ese e gwauraidia dikamu. To Iehova bona Iesu ese una lalotamona karana na e moalelaiamu!

8. Iehova ese Esekiel be dahaka e hamaoroa?

⁸ Ita na Iehova ena taunimanima dainai, eda lalotamona karana na dia ḡau matamatana ita edai. Momokani, Iehova ese una na vada e perovetalaia. Mani peroveta tauna Esekiel e henia herevana aita laloa, e hamaoroa au rua baine atodia hebou, au ta na “Iuda” ena bona ma ta na “Iosef” ena. (Esekiel 37:15-17 ba duahi.) July 2016 Gima Kohorona ena atikol ta “Questions From Readers” ese ini e herevalaia toma: “Iehova ese Esekiel e hamaoroa Israel besena na Gwauhamata Tanona bae lou henia neganai, idia na bese tamona ai baela. Una peroveta herevana ese danu, ina nega dokona ai Dirava ena taunimanima bae lalotamona karana e herevalaia.”

9. Edena dala ai Esekiel ena peroveta herevana na Memorial negadia ai e ḡuḡurumu?

⁹ Laḡani 1919 amo, Iehova ese metairametaira horoa taudia e hatamonadia guna, laulau dalanai idia na “Iuda” ena au. Gabeai, tanobada helarona bae abia taudia ​—laulau dalanai idia na “Iosef” ena au​—e haboudia horoa taudia ida bae ḡaukara hebou, unu orea ruaosi na “seri” tamona ai ela. (Ioa. 10:16; Sek. 8:23) Iehova na e gwauhamata ia imana ai unu au ruaosi baine hatamonadia. (Esek. 37:19) Hari ina negai, unu orea ruaosi na mai lalotamonadia ida King tamona e hesiai heniamu​—ia na Iesu Keriso, Baibul ese e gwauraia Dirava ena “hesiai tauna David.” (Esek. 37:24, 25) Laḡani ta ta ai horoa taudia bona “mamoe idaudia” na Keriso ena mase Ilalotaona totona e heboumu neganai, Esekiel ese e herevalaia lalotamona karana e ḡuḡurumu! To, ita ta ta be dahaka baita kara diba una lalotamona karana baita hahedinaraia totona?

10. Edena dala ai lalotamona karana baita hahedinaraia diba?

¹⁰ Lalotamona karana baita hahedinaraia dalana ginigunana na, baita manau. Iesu tanobada ai e nohova neganai, ena hahediba e haḡanidia bae manau. (Mat. 23:12) Bema baita manaumu, hekokoroku lalohadaina baita dadaraiamu. Danu, manau karana ese baine duruda hahekau taudia baita kamonai henidia, bona kongrigeisen ai lalotamona baine mia. Mai anina bada ḡauna na, eda manau karana ese Dirava be hamoaleamu, badina Ia ese “hekokoroku  taudia e laodia ahumu, a manau taudia e harihari henidiamu.”​—1 Pet. 5:5.

11. Edena dala ai parao bona wain anidia baita lalodia karana ese baine hatamonada diba?

¹¹ Lalotamona karana baita hahedinaraia dalana iharuana na, Memorial ai e ḡaukaralaimu parao bona wain anidia baita lalodia. Memorial negana do se kau ai​—bona Memorial hanuaboina ai​—asie hatubua paraona bona wain kakakakana edia namo baita haerodia. (1 Kor. 11:23-25) Parao ese Iesu tauanina ḡoevadaena, e bouboulaia ḡauna, e laulaulaia, bona wain ese ia rarana e laulaulaia. To, parao bona wain anidia baita lalopararalaidia mo na dia heḡereḡere. Ba helalotao, Keriso ena mauri davana ihenina karana ese lalokau hereadaedia rua e hahedinarai​—ta be Iehova ese ita daidai Natuna e siaia neganai e hahedinaraia lalokauna, bona ma ta na Iesu ese mai ena ura ida ena mauri e heni karana amo e hahedinaraia lalokauna. Edia lalokau baita laloa karana ese baine hagoadada baita lalokau henidia totona. Danu, Iehova ilalokau henina karana na varo ta heḡereḡerena, ita bona tadikakada e hatamonadamu bona e hagoadadamu.

12. Iesu ese king ta ena parabole amo, edena dala ai e hahedinaraia Iehova na e uramu dika baita gwautao?

¹² Lalotamona karana baita hahedinaraia dalana ihatoina na, ma haida edia dika baita gwautao. Ita e hahisidamu taudia edia dika baita gwautaomu neganai, ta hahedinaraiamu Keriso ena mauri davana ihenina karana amo eda dika e gwauatao karana na ta laloa badamu. Mani Mataio 18:23-34 ai Iesu ese e gwauraia parabolena ta ba laloa. Sibomu ba henanadai: ‘Lau e hagoadagumu Iesu ena hereva baina badinaia totona, a? Tadikakagu edia kara na lalopararalaiamu bona haheaukalaiamu, a? Lau be na noho heḡaeḡaemu e hahisigumu taudia edia dika baina gwautao, a?’ Vaia, kara dika na idauidau, bona kara dika haida na dia ḡoevadae tauda ese baita gwautaomu na auka. To, ina parabole ese e hadibadamu Iehova na e uramu dika baita gwautao. (Mataio 18:35 ba duahia.) Iesu ese e hahedinaraia, Iehova ese eda dika na basine gwautaomu, bema tadikakada edia dika basita gwautaomu. Una na mai anina bada! Iesu ena hereva heḡereḡerena ma haida edia dika  baita gwautaomu neganai, lalotamona ai baita noho dibamu.

13. Edena dala ai baita hamomokania ita na maino ikarana tauda?

¹³ Ma haida edia dika ta gwautaomu neganai, ta hamomokaniamu ita na maino ikarana tauda. Namona na aposetolo Paulo ena sisiba baita laloatao, eto: “Lauma ena lalo-tamona ba kahua tao, maino ena iḡui ai.” (Efe. 4:3) Ina Memorial negana bona Memorial hanuaboina ai, ma haida ba kara henidia dalana ba lalohadailaia. Sibomu ba henanadai: ‘Egu kara amo na hahedinaraiamu ma haida na asina badu henidiamu, a? Lau ese maino bona lalotamona karana na hahedinaraimu, a?’ Ini mai anidia bada henanadaidia baita lalodia dobu na namo.

14. Edena dala ai baita hahedinaraia diba ‘lalokau ai ta haheauka hehenimu’?

¹⁴ Lalotamona karana baita hahedinaraia dalana ihahanina na, lalokau baita hahedinaraia, unu amo Iehova, lalokau Diravana, baita tohotohoa. (1 Ioa. 4:8) Asita uramu tadikakada na ini baita lalodia toma, “Baina lalokau henidia, to basina ura henidia”! Una lalohadai na dia Paulo ena sisiba heḡereḡerena, ia na eto, “lalokau ai ba haheauka heheni.” (Efe. 4:2) Mani a laloa, Paulo na eto, baita “haheauka heheni” na namo, bona namona na “lalokau ai” una baita karaia. Eda kongrigeisen ai Iehova ese e veridia mai taudia na idauidau. (Ioa. 6:44) Idia na Iehova ese e boiridia, badina e lalokau henidiamu. Una dainai, bema tadikakada na Iehova ese e lalokau henidiamu, idia baita lalokau henidia be asi anina, a? Lasi. Namona na Iehova ena haheḡani heḡereḡerena lalokau baita hahedinaraia!​—1 Ioa. 4:20, 21.

15. Ede ta diba tomamu Memorial ginigabena ta baita abiamu?

¹⁵ Nega ta, ita na Memorial ginigabena baita abiamu. Ede ta diba tomamu? Paulo ese Korinto taudia e tore henidia revareva ginigunana ai, horoa Kristen taudia e hamaorodia, laḡani ta ta ai Iesu ena mase ilalotaona karana amo, ‘Lohiabada ena mase baita hahedinaraia, ela bona ia do bainema.” (1 Kor. 11:26) Iesu ese nega dokona e perovetalaia neganai, ina hereva “bainema” danu e gwauraia. Ia ese hisihisi badana e herevalaia neganai, eto: “Taunimanima Natuna toana guba ai baine hedinarai; una negana ai tanobada besedia iboudiai bae tai; badina be Taunimanima Natuna bae itaia, ori latanai bainema, mai siahu-badana bona mai hairaina ida. Bena [Iesu] ese ena aneru baine siaidia, kibi reḡena badana ida, e abidia hidi taudia lai haniosi gabudia amo, bona tanobada dokona ela bona guba dokona amo, bae gogodia.” (Mat. 24:29-31) Unu ‘e abidia hidi taudia bae gogodia’ negana na tanobada ai dounu e nohomu horoa Kristen taudia ese ahudia guba ai bae abia negana e herevalaia. Una na hisihisi badana baine matama murinai, to Aramagedono tuarina do basine vara negana ai, baine vara. Bena Iesu bona taunimanima 144,000 ese tanobada pavapavadia bae hadareredia. (Apok. 17:12-14) Memorial ginigabena na horoa taudia guba ai do asie haboudia negana ai baita abiamu, badina una negana ai Iesu vada “bainema.”

16. Dahaka dainai lalomu ba hadaia ina laḡani ena Memorial hebouna baola?

¹⁶ Namona na laloda baita hadai March 31, 2018 ai, Memorial hebouna baitala. Bona Iehova baita noia baine duruda iena taunimanima ida lalotamona ai baita noho totona! (Salamo 133:1 ba duahia.) Ba helalotao, nega ta ita na Memorial ginigabena baita abiamu. Una dainai, namona na baita ḡaukara goada Memorial hebouna baitala, bona unu hebou ai e hahedinaraiamu lalotamona karana baita laloa bada.