1-2. (a) Iesu ena mauri bona hesiai ḡaukara ta haeromu neganai, eda hemami be ede bamona? (b) Ina atikol ai dahaka baita herevalaimu?

 TA LALOKAU heniamu tauna ta e masemu neganai, ta reaia badamu! Ia do se mase ai ena hisihisi ta laloa loumu neganai, ta lalohisihisimu. To, ia ese e hadibada ḡauna ta eiava ihagoadada o ihamoaleda totona e karaia o e gwauraia ḡauna ta, ta laloamu neganai, ta moalemu.

² Una heḡereḡerena, Iesu ena hisihisi bona ena mase sivaraidia ta duahimu neganai, ta lalohisihisimu. Memorial negadiai, ita na nega ta atomu Iesu ena mauri idavalaina boubouna anina ta laloamu. (1 Kor. 11:24, 25) To, Iesu tanobada ai e nohova neganai, e gwaurai bona e kara karadia ta haerodiamu neganai, ta moale badamu. Danu, ia ese ita daidai hari e karamu ḡaudia bona vaira negai be karamu ḡaudia ta lalodiamu neganai, una ese e hagoadadamu. Unu iboudiai bona iena lalokau ita edai baita lalodia dobumu karana ese ita na be hagoadadamu, dala idauidau ai eda tenkiu karana baita hahedinaraia, ina atikol ai una baita herevalaiamu.

3. Iesu ena mauri idavalaina boubouna dainai baita tenkiu badidia haida be dahaka?

³ Iesu ena mauri bona mase ta lalodiamu neganai, ta uramu eda tenkiu karana baita hahedinaraia. Iesu na ena hesiai ḡaukara lalonai, Dirava ena Basileia ese baine havara hahenamodia  na taunimanima e hadibalaidia. Una Basileia ena hereva momokanidia na ta lalodia badamu. Bona ta tenkiumu badina mauri idavalaina boubouna ese dala e kehoa, eda hetura karana Iehova bona Iesu ida baita moalelaia totona. Danu Iesu e abidadama heniamu taudia edia helaro na mauri hanaihanai bae abia bona edia lalokau mase taudia bae itadia lou. (Ioa. 5:28, 29; Roma 6:23) Ita na ḡau ta asita karaia unu hahenamo baita abi totona, bona Dirava bona Keriso ese ita daidai e kara ḡaudia davadia na basita halou dibamu. (Roma 5:8, 20, 21) To, eda tenkiu karana baita hahedinaraia diba. Edena dala ai?

4. Maria, hane Magdala ese ena tenkiu karana be ede e hahedinaraia toma? (Laulau ba itaia.)

⁴ Mani Iuda hahinena ta ladana Maria, hane Magdala ena sivarai aita laloa. Ena mauri na e dika herea, badina demoni seven ese e hahisia bada. Ia na e lalo ta ese basine durua diba. To, Iesu ese demoni edia amo e ruhaia neganai e moale dikadika! Ia na Iesu ena hahediba ai ela bona ena nega, goada, bona kohu amo Iesu ena hesiai ḡaukara e durua, unu amo ena tenkiu karana e hahedinaraia. (Luka 8:1-3) Ena be Maria na Iesu ese ia dainai e karaia ḡauna e laloa bada, to reana se diba vaira negai Iesu ese harihari ḡauna hereadaena baine henia. Iesu na ena mauri baine heni taunimanima daidiai, unu amo “bae abidadama henia taudia iboudiai” na mauri hanaihanai bae abia diba. (Ioa. 3:16) To, Maria na Iesu e badinaia, unu amo ena tenkiu karana e hahedinaraia. Iesu na hisihisi auna ai e hisihisi neganai, Maria na ia badinai gini, Iesu bona ma haida lalodia e hagoada. (Ioa. 19:25) Iesu e mase murinai, Maria bona hahine rarua na muramura mai bonadia e laohai gara gabuna Iesu idahulaina. (Mar. 16:1, 2) Maria na Iesu e badinaia dainai hahenamo bada e abi. Ia na e moale, badina Iesu na mase amo e toreisi lou murinai ia ida e hedavari bona e herevahereva. Una na hahediba taudia momo ese asie abia hahenamona.​—Ioa. 20:11-18.

5. Edena dala ai eda tenkiu karana baita hahedinaraia?

 ⁵ Ita danu Iehova bona Iesu ese ita daidai e kara ḡaudia iboudiai daidiai eda tenkiu karana baita hahedinaraia. Una baita karaia dalana na eda nega, goada, bona moni baita ḡaukaralai Basileia ḡaukarana baita durua. Heḡereḡere, tomadiho ḡoevana totona e ḡaukaralaimu rumadia ihaginidia bona ihanamodia ḡaukaradia ai baita heduru.

6. Dahaka dainai baita gwau dibamu mauri idavalaina boubouna na harihari ḡauna ita ta ta edai?

⁶ Iehova bona Iesu ese ita e lalokau henidamu karana ta laloamu dainai, ta uramu idia baita lalokau henidia. (1 Ioa. 4:10, 19) Bona eda lalokau idia ediai na e badamu badina ta lalopararamu Iesu na ita ta ta daidai e mase. Aposetolo Paulo ese una na e lalopararalaia bona e moale, bona Galatia tadikakadia e tore henidia neganai una e hahedinaraia, eto: “Dirava Natuna . . . ese e ura henigu bona sibona e heni, lau daigu ai.” (Gal. 2:20) Iehova ese Iesu ena mauri idavalaina boubouna amo e verimu mai, ia turana ai baola totona. (Ioa. 6:44) Iehova ese emu ai ḡau namona ta e itaia dainai dava bada ḡauna amo e hoimu ia turana ai baola totona, una o dibamu dainai o moalemu, a? Una ese emu lalokau Iehova bona Iesu ediai e hagoadaiamu, a? Namona na siboda baita henanadai, ‘Una lalokau dainai lau be dahaka baina kara?’

7. Laulau ai heḡereḡerena, edena dala ai Iehova bona Iesu ediai eda lalokau baita hahedinaraia? (2 Korinto 5:14, 15; 6:1, 2)

⁷ Dirava bona Keriso ilalokau henidia karana ese e hagoadadamu ma haida baita lalokau henidia. (2 Korinto 5:14, 15; 6:1, 2 ba duahidia.) Eda lalokau baita hahedinaraia dalana ta na, haroro ḡaukara baita goadalaia. Ta davaridiamu taudia iboudiai baita hereva henidia.  Bona ta basita dadaraia herevana ena tano, iduhu, dagi, o noho dalana na idau. Unu amo ita na Iehova ena ura ta badinaiamu, “ia na e uramu taunimanima iboudiai bae mauri bona hereva momokani bae diba.”​—1 Tim. 2:4.

8. Edena dala ai eda tadikaka taihu baita lalokau henidia?

⁸ Dirava bona Keriso ediai eda lalokau baita hahedinaraia dalana ma ta na, tadikaka taihu baita lalokau henidia. (1 Ioa. 4:21) Namona na baita lalodia bada bona edia hekwakwanai lalodiai baita durudia. E lalokau heniamu tauna ta e masemu neganai tauhalo baita henidia, e goreremu neganai baita vadivadidia, bona e lalo manokamu neganai baita hagoadadia. (2 Kor. 1:3-7; 1 Tes. 5:11, 14) Hanaihanai idia daidiai baita ḡuriḡuri, badina dibada “kara maoromaoro tauna ena ḡuriḡuri ese anina e havaraiamu mai siahuna ida.”​—Iak. 5:16.

9. Tadikaka taihu baita lalokau henidia dalana ma ta be dahaka?

⁹ Eda tadikaka taihu baita lalokau henidia dalana ma ta na, baita hekwarahi idia ida maino ai baita noho. Namona na Iehova ese dika e gwautaomu karana baita tohotohoa. Iehova na mai ena ura ida Natuna e siaia eda kara dika daidiai e mase, una dainai eda tadikaka o taihu ese e hahisidamu neganai, namona na mai eda ura ida edia dika baita gwautao. Ita na asita uramu Iesu ena parabole ta lalonai, e gwauraia hesiai tauna heḡereḡerena baita kara. Ena be iena abitorehai badana na biaguna ese e gwauatao, to ia ese bamona hesiai tauna ta ena abitorehai maraḡina na se gwauatao. (Mat. 18:23-35) Bema kongrigeisin lalonai oi bona ta padamui ai na hekwakwanai ta e vara, namona na Memorial hebouna do sola neganai baola ia ida maino ba karaia guna. (Mat. 5:23, 24) Unu bo kara tomamu neganai, bo hahedinaraiamu Iehova bona Iesu na o lalokau henidia badamu.

10-11. Edena dala ai elda taudia ese bae hahedinaraia Iehova bona Iesu na e lalokau henidiamu? (1 Petro 5:1, 2)

¹⁰ Edena dala ai elda taudia ese bae hahedinaraia Iehova bona Iesu na e lalokau henidiamu? Dala badana ta na, Iesu ena mamoe bae reḡudia namonamo. (1 Petro 5:1, 2 ba duahidia.) Iesu ese aposetolo Petro enai una na e hahedinaraia. Petro ese Iesu na nega toi e ḡorea murinai, e ura dikadika baine hamomokania Iesu na e lalokau heniava. Iesu na mase amo e toreisi lou murinai, Petro e nanadaia: “Simona Iona e, o lalokau henigumu a?” Ta dibamu Petro na e hekwarahi Biaguna enai ena lalokau baine hahedinaraia totona. Iesu ese Petro e hamaoroa: “Egu mamoe ba reḡudia.” (Ioa. 21:15-17) Bona Petro ese ena mauri ibounai lalonai, Lohiabada ena mamoe na e reḡudia namonamo, unu amo e hamomokania Iesu na e lalokau henia.

¹¹ Elda taumui e, Memorial negana lalonai, edena dala ai ba hahedinaraia Iesu ena hereva Petro enai na o laloa badamu? Iehova bona Iesu ediai emu lalokau ba hahedinaraia totona, hanaihanai mamoe vadivadi ba karaia bona manoka taudia ba durudia Iehova bae lou henia. (Esek. 34:11, 12) Danu, Memoral baema Baibul stiuden bona kamonai matamata taudia ba hagoadadia, unu amo bae mamia idia na o lalodia badamu.

12. Dahaka dainai Iesu do se mase hanuaboinai e gwaurai herevadia baita lalodiamu ese be hagoadadamu? (Ioane 16:32, 33)

¹² Iesu do se mase hanuaboina ai, ena hahediba e hamaorodia, eto: “Tanobada ai umui na hisi bavani; to, ba haheauka, badina be lau  ese tanobada vada name hadarerea.” (Ioane 16:32, 33 ba duahidia.) Dahaka ese Iesu e durua inaina vairadiai e haheauka o se gari bona e abidadama ela bona mase? Ia na Iehova enai e tabekau. Mai dibana ena hahediba danu hahetoho be davarimu, una dainai Iehova e noia baine gimadia. (Ioa. 17:11) Dahaka dainai una ese ita e hagoadadamu basita gari? Badina Iehova ena siahu ese inaida na e hereadia. (1 Ioa. 4:4) Iehova ese ḡau iboudiai na e itamu. Una dainai baita abia dae bema Iehova enai baita tabekaumu, eda gari karana baita hanaiamu.

13. Iosef, Arimatea tauna be edena dala ai e hahedinaraia ia na se gari?

¹³ Iosef, Arimatea tauna ena haheitalai mani aita laloa. Ia na Iuda taudia ese e matauraia badava. Ia na Sanhedrin, Iuda taudia edia kota badana ena memba ta. To, Iesu tanobada ai ena hesiai ḡaukara e karaiava lalonai, Iosef na taunimanima e gari henidiava. Ioane na e gwa Iosef na ‘Iesu ena hahediba tauna ta, to Iuda taudia garidia e gariva dainai, una na se gwauraia hedinarai.’ (Ioa. 19:38, NWT) Ena be Iosef ese Basileia sivaraina na e ura henia, to Iesu e abidadama heniava karana na haida ediai se hahedinaraia. Ia na ena dagi bona hahenamo iboudiai baine haboiodia garidia e gari. To, Baibul na e gwaumu Iesu e mase murinai, Iosef na “Pilato dekena ela, e noia goadagoada, Iesu tau-anina baine abia.” (Mar. 15:42, 43) Iosef na Iesu e durua neganai e hahedinaraia ia na Iesu ena hahediba ta.

14. Bema taunimanima o gari henidiamu, dahaka ba kara na namo?

¹⁴ Iosef heḡereḡerena, oi danu taunimanima garidia o garimu, a? Skuli ai eiava ḡaukara gabunai, nega haida o hemaraimu ba gwau hedinarai oi na Iehova ena Witnes ta, a? Oi be so uramu pablisa ai baola eiava ba bapatiso badina haida ese oi ede bae lalomu toma lalohekwarahina o abiamu, a? Dia namo hemami unu bamodia ese bae koumu kara maorodia ikaradia ai. Mai kudoumu ibounai ida Iehova ba ḡuriḡuri henia. Ba noia goada baine henimu ena ura ba karaia totona. Iehova ese emu ḡuriḡuri e haerelaimu daladia bo itamu neganai, lalomu be goadamu bona basio garimu.​—Isa. 41:10, 13.

15. Iesu na hahediba vairadiai e hedinarai murinai, idia na e moale dainai dahaka e kara? (Luka 24:52, 53)

¹⁵ Iesu e mase neganai hahediba taudia na e lalohisihisi bada. Mani idia edia hemami a laloa. Idia na dia turadia lalokauna mo e haboioa, to danu e mamia idia na vaitani asi edia helaro. (Luka 24:17-21) To, Iesu na idia ediai  e hedinarai neganai, e durudia unu amo bae laloparara Baibul ena peroveta herevadia na ia enai e ḡuḡuru. Danu mai anina bada ḡaukarana ta e henidia. (Luka 24:26, 27, 45-48) Iesu na dina 40 muridiai guba ela neganai, ena hahediba taudia na vada asie lalohisihisi to e moale bada herea. Idia na e moale badina mai dibadia Biagudia na mauri bona heḡaeḡae idia baine durudia edia ḡaukara matamatana bae haḡuḡurua. Oibe, e moale dainai Iehova imodaina karana na asie hadokoa.​—Luka 24:52, 53 ba duahidia; Apos. 5:42.

16. Edena dala ai Iesu ena hahediba taudia baita tohotohodia?

¹⁶ Edena dala ai Iesu ena hahediba taudia baita tohotohodia? Dia Memorial negana ai mo, to laḡani ibounai lalonai Iehova itomadiho henina karana ai baita moale na namo. Unu baita kara toma totona, eda mauri lalonai Dirava ena Basileia baita atoa guna. Heḡereḡere, momo na edia ḡaukara sediual e haidau unu amo haroro ḡaukara bae karaia, hebou baela, bona ruma bese tomadiho bae karaia hanaihanai. Ma haida be kohu momo iabidia karana e dadaraia, unu amo kongrigeisin bae durua eiava pablisa dia momo gabudia baela. Iehova baita hesiai henia hanaihanai totona baita haheauka na ḡau badana, badina ia na e gwauhamata bema eda mauri lalonai Basileia baita atoa gunamu, be hanamodamu.​—Her. 10:22; Mat. 6:32, 33.

17. Ina Memorial negana ai lalomu ba hadaia dahaka ba kara? (Laulau ba itaia.)

¹⁷ Ita na ta ura dikadikamu Tuesday, April 4 ai Memorial hebouna baitala. To, basita nari ela bona una dina baine abia bena Iesu ena mauri, mase, bona ia bona Iehova edia lalokau ita edai baita lalodia. Namona na Memorial negana ibounai lalonai unu ḡau baita lalodia. Heḡereḡere, nega baita ato Nega Matamata Trensleisen Baibul ena Apendiks B12 ai ina kaha “Iesu Ena Wiki Ginigabena Tanobada Ai,” baita duahia bona baita laloa dobu. Iesu ena mauri sivaraina o duahiamu lalonai, emu tenkiu karana, lalokau, gari lasi karana, bona moale ihahedinaraina totona, bae hagoadamu siridia ba tahudia. Bena emu tenkiu karana ba hahedinaraia daladia ba lalodia. Namona na ba diba Iesu ese ina Memorial negana ai ia ilalotaona totona bo karamu ḡaudia iboudiai na be lalodia badamu.​—Apok. 2:19.