Evidens momo ese e hahedinaraimu laḡani 29 C.E. ai Iesu ese bapatiso e abia neganai, ia na Hahelaḡa Tauna Badana ai ela. To unu evidens be dahaka? Iesu ese bapatiso e abia neganai, ia ese e hahedinaraia ia na e ura ena mauri na boubou patana latanai baine bouboulaia​—una pata ese Dirava ena “ura” e laulaulaia. (Gal. 1:4; Heb. 10:5-10) Una pata na Iesu e bapatiso neganai e gini dainai, baita gwau dibamu, una nega amo ema bona hari, lauma dubu badana danu e ginimu​—una dubu lalonai e nohomu taudia na Iesu ena boubou ḡauna e abidadama heniamu, idia ese dala maorona ai Iehova bae tomadiho henia diba. Una lauma dubuna ai boubou patana na mai anina bada ḡauna ta.​—Mat. 3:16, 17; Heb. 5:4-6.

Una lauma dubu badana e ginimu dainai, hahelaḡa tauna badana ta ese ḡaukara baine kara na namo. Una dainai, Dirava ese Iesu na “Lauma Helaḡa bona siahu [amo] e horolaia.” (Apos. 10:37, 38; Mar. 1:9-11) To, ede ta diba tomamu Iesu na Hahelaḡa Tauna Badana ai ela guna, una murinai ia na e mase bena e toreisi lou? Mose ena Taravatu lalonai Aaron bona ia gabuna e abia taudia iboudiai na hahelaḡa taudia badadia, bona edia haheitalai amo ḡau ta baita lalopararalaiamu.

Mose ena Taravatu eto, hahelaḡa tauna badana sibona mo na kalaga ena Helaḡa Herea gabuna ai baine raka vareai, bona gabeai una na e gwauraia dubu ena Helaḡa Herea daiutuna, ia na seseahu o ketin iharuana lalonai e miava. A daiutu ginigunana be e gwauraiava, gabu helaḡana. Atonement o kara dika itahunidia dinana sibona ai mo, hahelaḡa tauna badana na Helaḡa Herea gabuna ai baine raka vareai diba. (Heb. 9:1-3, 6, 7) Aaron bona ia gabuna e abia taudia iboudiai na e abidia hidi, hahelaḡa tauna badana ai e halaodia gunava, una murinai idia na kalaga ena ketin e hanaiava bena Helaḡa Herea gabuna ai e raka vareaiva. Una heḡereḡerena, Iehova ese Iesu danu e abia hidi ena lauma dubuna badana ena Hahelaḡa Tauna Badana ai e halaoa guna, una murinai Iesu na e mase bena “seseahu,” ia “tauanina bunai,” e hanaia, guba maurina e abia. (Heb. 10:20) Una dainai, aposetolo Paulo eto “Keriso ema,” ia na “hahelaḡa tauna badana” bena “kalaḡana bada-hereana bona namo-hereana amo e raka hanai, dia taunimanima imadia e karaia ḡauna,” anina na, “guba ai vada e raka vareai.”​—Heb. 9:11, 24.

Iesu ela guba bona ita daidai ena mauri ḡoevadaena e heni neganai, ia ese gwauhamata matamatana e hamomokania. Ia be dahaka e kara?

Ginigunana be, Iesu na Iehova vairanai e gini; iharuana be, Iesu ese ena boubou ḡauna na Iehova e henia; bona ihatoina be, Iesu ese e bubua rarana na Iehova ese e abia dae. Unu dala toi muridiai, Iesu ese gwauhamata matamatana e hamomokania.

To Iehova ese edena nega korikorina ai Iesu ena boubou ḡauna e abia dae na Baibul ese ita na se hamaorolaida. Bona Iesu ese gwauhamata matamatana e hamomokania negana korikori na basita gwauraia hedinarai dibamu. To, ita dibada Iesu na guba ai e daekau bena dina 10 muridiai na, Pentekoste dinana. (Apos. 1:3) Unu dina 10 lalodiai, Iesu ese ena boubou ḡauna na Iehova e henia, bona Ia ese na e abia dae. (Heb. 9:12) Bona Pentekoste dinana ai taunimanima sibodia ese una na matadia korikorina ai e hamomokania. (Apos. 2:1-4, 32, 33) Una nega amo, gwauhamata matamatana anina vada e guguru.

Point binai, Iesu ese e bubua rarana na Iehova ese e abia dae murinai, una ese gwauhamata matamata e hamomokania. Unu e vara toma badina be Hahelaḡa Tauna Badana, Iesu, na herohemaino tauna ena ḡaukara e karaiamu.​—Heb. 7:25; 8:1-3, 6; 9:13-15.