1, 2. (a) Edena dala ai taunimanima momo na e pararamu? (b) Ina stadi ai ededia henanadai baita haerelaimu?

SAOT Europe ai, taihu ta na guna ena mauri ai e vara ḡauna e laloa lou neganai, eto: “Maraḡigu ai, lau na hahemaoro kereredia mo na itava. Una dainai, egu tano ai politikol karadia na dadarai, bona politikol e inai heniva taudia momo edia lalohadai na abi daeva. Danu, laḡani momo lalodiai lau na terorist merona ta ida a heturava.” Saot Africa ai, tadikaka ta ese guna e karava daḡedaḡe karadia badidia e herevalai, eto: “Na abia daeva egu bese ese bese ma haida na e hereadia, bona politikol oreana ta ai na vareai. E hadibamaiva inaimai na io amo baia aladia​—emai bese taudia danu bema idia na politikol oreadia ma haida bae durudia.” Central Europe taihuna ta na eto: “Lau ese ma haida na na inai henidiava, bona edia bese eiava tomadiho idau taudia na asina ura henidiava.”

² Hari ina negai, momo edia kara na unu taunimanima tatoiosi ese guna e karava karadia heḡereḡeredia. Politikol heiriheiridia e varamu badina momo na e uramu sibodia bae helohia, bona tano momo ai, idau tano taudia na asie lalodia badamu. Baibul ese e perovetalaia heḡereḡerena, ini dina gabedia ai taunimanima  na “bae tudaga” eiava basie lalotamona. (2 Tim. 3:1, 3) Ina tanobada ai taunimanima momo e pararamu lalonai, Kristen taudia be edena dala ai edia lalotamona karana bae gimaia diba? Aposetolo edia negai, Iesu ese politikol heiriheiridia ai e vara ḡauna ta e hamaoromaoroa dalana, baita stadilaiamu amo ḡau momo baita dibamu. Mani ini mai anidia bada ḡaudia toi aita herevalai: (1) Dahaka dainai Iesu na se ura politikol edia heiriheiri lalodiai baine vareai? (2) Edena dalai Iesu ese e hahedinaraia Dirava ena hesiai taudia na politikol heiriheiridia ai basie vareai? Bona (3) edena dalai Iesu ese e hadibada ma haida baita daḡedaḡe henidia na dia maoro?

3, 4. (a) Iesu ena negai Iuda taudia edia lalohadai be dahaka? (b) Unu lalohadai dainai Iesu ena hahediba be dahaka e lalova?

³ Iesu ese e haroro henidiava Iuda taudia momo na e ura dikadikava Roma amo bae gini siri bena sibodia bae helohia. Gwau-edeede Iuda taudia ese taunimanima lalodiai una ura na e hagoadaiava. Idia momo ese Iuda, tau Galilea, ena lalohadai e badinaiava. Aposetolo edia negai ia na mesia koikoina bona momo e hakaudia kerereva. Iuda edia histori itorena tauna Josephus na eto, Iuda “ese ena taunimanima e hagoadadiava bae gwau-edeede, bona Roma ena tax monina e heniva taudia bae gwauraidia dika.” Roma taudia ese Iuda na e hamasea. (Kara 5:37) Unu gwau-edeede Iuda taudia haida na daḡedaḡe karadia e karava edia ura bae haḡuḡuru totona.

⁴ To, Iuda taudia ma haida na mai edia ura ida politikol Mesiana ta ena mai e nariava. E laloava una Mesia bainema neganai, edia bese baine hanamoa bona Roma edia iḡui amo baine ruhadia. (Luka 2:38; 3:15) Momo na e abia daeva Mesia ese tanobada ai basileia ta na Israel ai baine haginia. Una baine vara neganai, gabu idauidau ela Iuda taudia momo na bae lou edia hanua. Nega ta Ioane Bapatiso ese Iesu e nanadaia: “Be maimu tauna na oi, eiava idauna ta baita naria?” (Mat. 11:2, 3) Reana Ioane na e urava baine diba ma ta ese Iuda taudia e larova ḡaudia baine haḡuḡuru diba eiava. E toreisi lou tauna Iesu ida Emausa dalana ai e hedavari hahediba rarua danu, e tomava Mesia ese hahemauri baine havaraia. (Luka 24:21 ba duahia.) Gabeai, Iesu na ena aposetolo ese e nanadaia: “Lohiabada e, basileia vada ina nega ai Israel ba henia lou eiava?”​—Kara 1:6.

5. (a) Dahaka dainai Galilea taudia na e urava Iesu na edia pavapava ai bainela? (b) Edena dala ai Iesu ese edia lalohadai e hamaoromaoroa?

⁵ Mesia unu e laloa tomava dainai Galilea taudia na e urava Iesu na edia pavapava ai bae halaoa. Reana e laloava Iesu na hegunalai tauna namona ai bainela diba. Ia na mai hereva dibana; gorere taudia baine hanamodia diba; bona hitolo taudia edia aniani baine heni diba. Iesu ese tatau 5,000 mai kahana e ubudia neganai, taunimanima edia lalohadai na e diba. Baibul na eto: “Iesu dibana idia na baema, bae dabaia tao, edia hanua pavapavana ai bae halaoa eto; una dainai ia na sibona ororo ai ma eha dara dae lou.” (Ioa. 6:10-15) Murina dinana ai, Galilea gohuna kahanai, reana taunimanima lalodia na e keru. Bena Iesu ese hutuma ediai ena ḡaukara badina korikorina e herevalaia. Ia ema badina na dia tauani idurulaina ḡaudia baine henidia, to Dirava ena basileia baine hadibadia. Eto: “Basio ḡaukara e oremu anianina iabina, a baine mia ela bona mauri hanaihanai anianina iabina ba ḡaukara.”​—Ioa. 6:25-27.

6. Edena dala ai Iesu ese e hahedinaraia, ia na se ura tanobada ena politikol siahuna baine abia? (Rau 3 ai laulau ba itaia.)

⁶ Iesu do se mase neganai, ia na e diba ena  hahediba haida na e laloava ia ese Ierusalem ai basileia ta baine haginia. Edia lalohadai ihamaoromaorona totona, ia ese mina parabolena e herevalaia. Una parabole ai Iesu, “lohia ta,” na gabu ta bainela bona nega taina daudau baine noho. (Luka 19:11-13, 15) Danu, Iesu ese Roma ena lohia taudia e hadibadia ia na politikol karadia ai basine vareai. Pontio Pilato ese e nanadaia: “Oi na Iuda taudia edia pavapava, a?” (Ioa. 18:33) Reana Pilato na e gari badina e laloava Iesu ese taunimanima baine doridia Roma bae gwau-edeede henia. Iesu na e haere: “Egu basileia na dia ina tanobada ḡauna.” (Ioa. 18:36) Ia ese politikol karadia na e dadarai, badina ena Basileia na guba ḡauna. Ia ese Pilato e hamaoroa tanobada ai ena ḡaukara na “hereva momokani” baine gwauraia hedinarai.​—Ioane 18:37 ba duahia.

7. Dahaka dainai nega haida politkol edia heiriheiri karadia idadaradia na auka?

⁷ Iesu heḡereḡerena eda ḡaukara baita lalopararalaiamu neganai, kudouda ai danu politikol edia heiriheiri karadia na baita dadarai. Nega haida una na auka. Seket tauna ta na eto: “Emai gabu ai taunimanima momo ese edia gwau-edeede karadia na e habadamu. Edia bese e abi isimu, bona e laloamu sibodia bae helohia neganai edia mauri na baine namo. Ta moalemu, badina tadikaka ese Basileia sivaraina namona iharorolaina karana na e laloa badamu, unu amo edia Kristen lalotamona karana e gimaiamu. Idia na Dirava enai e tabekaumu badina Ia ese hahemaoro kereredia bona eda hekwakwanai na baine haoredia.”

8. Aposetolo edia negai Iuda taudia edia hekwakwanai ta be dahaka?

⁸ Hahemaoro kereredia ese nega momo politikol lalodiai heiriheiri e havaramu. Iesu ena negai, tax monina ihenina karana dainai politikol lalonai heiriheiri e varava. Iuda, tau Galilea, matamanai e herevalaia tauna, ese Roma e gwau-edeede heniava badina taunimanima ladadia e rejistava unu amo tax monina bae heni. Roma ena lohia henunai e nohova taudia, Iesu e kamonai heniava taudia danu, e haḡanidia edia kohu, tano, bona ruma daidiai tax monidia bae heni. Bona tax gogo taudia ese edia koikoi karadia na e habadava, una ese hekwakwanai e havaraiava. Tax gogo taudia na nega haida gavamani moni e henidiava unu amo dagi bae abi bena moni momo bae kara. Sakaio, Ieriko ai tax gogo taudia biagudia, na taḡa tauna ai ela badina koikoi dalanai taunimanima edia moni e abiva. (Luka 19:2, 8) Tax gogo taudia momo edia kara na unuheto.

9, 10. (a) Edena dala ai Iesu inaina na e urava politikol hepahuahuna ta ai ia bae dibaḡania? (b) Iesu ena haere amo dahaka ta dibamu? (Rau 3 ai laulau ba itaia.)

 ⁹ Iesu inaina na tax monina ihenina karana ai e urava Iesu bae dibaḡania. Iesu enai “tax monina” e henandailaia, una tax na denario ta Roma taudia bae henidia. (Mataio 22:16-18 ba duahi.) Iuda taudia na se urava una tax monina bae heni. Badina una moni ihenina karana ese e hahedinaraiamu idia na Roma ena lohia henunai. “Herod ena orea taudia” ese una e henanadailaia, badina e laloava bema Iesu baineto tax na basie heni, bae habadelaia baeto ia na Roma gavamanina e gwau-edeede heniava. A bema baineto tax bae heni na namo, ia murinai e rakava taudia ese bae dadaraia diba.

¹⁰ Iesu na una hekwakwanai ihamaoromaorona ai e henahua toho. Eto: “Kaisara ena, Kaisara ba henia; Dirava ena, Dirava ba henia.” (Mat. 22:21) Momokani, Iesu na mai dibana tax gogo taudia bogaraḡidiai koikoi karadia na bada. To, se ura unu kara ese bae hakaua kerere, a taunimanima edia hekwakwanai ihamaoromaorona ḡauna, Dirava ena Basileia hari e laloa bada. Unu amo ia murinai e rakamu taudia ediai haheitalai namona e hahedinaraia. Idia ese politikol heiriheiridia bae dadarai na namo, ena be toana na ta na maoro bona ma ta na kerere. Kristen taudia ese Dirava ena Basileia bona ena kara maoromaoro e tahumu. Una dainai, kara kereredia ai eda lalohadai na basita hagoada, eiava basita herevalaidia.​—Mat. 6:33.

11. Edena dala ai hahemaoro maoromaoro na dala maorona ai baita karaia diba?

¹¹ Iehova ena Witnes taudia momo ese politikol karadia daidiai guna e abiva lalohadaidia na e dadarai. Great Britain ai, taihu ta na eto: “Iunivesiti ai, taunimanima edia mauri istadilaina sikulina na karaia murinai, taunimanima ese edia kara bae haidau lalohadaidia na abiva. Na urava kopi korema taudia edia maoro baina hahedinaraia, badina e hahemaoro henimai kerereva. Ena be nega momo hepapahuahu lalodiai na kwalimuva, to dokonai na lalohisihisiva. Asina lalopararava taunimanima ese kudoudia amo bese idaudia basie hahemaoro henidia kerere. To, Baibul na stadilaia matama neganai, na laloparara kudougu ai una lalohadai baina kokia guna na namo. Bona kopi kuro taihuna ta ese e durugu unu na kara toma. Hari, lau na saini gado kongrigeisen ta ai na regula painiamu, bona taunimanima iboudiai na haroro henidiamu.”

12. Iesu ese ena hahediba e hadibadia edena “hatubu muramurana” bae dadaraia?

¹² Iesu ena negai, tomadiho na nega momo politikol ida e ḡaukara hebouva. Buka ta (Daily Life in Palestine at the Time of Christ) na eto: “Iuda taudia na tomadiho oreadia ai e haridia, politikol oreadia heḡereḡeredia.” Una dainai, Iesu ese ena hahediba e hamaorodia: “Matamui bae papa, Farisea taudia bona Herod ena orea taudia edia hatubu ḡauna na garina nahuamui ba toho.” (Mar. 8:15) Iesu ese Herod e herevalaia neganai, reana Herod ena orea taudia e gwauraidia. Una orea ta na, Farisea taudia, idia na e urava Iuda taudia na siboda bae helohia. Mataio bukana ese e hahedinaraia Iesu ese Sadukea taudia danu e herevalaidia. Idia na e urava Roma ese doini baine lohiadia badina ia amo dagi badadia e abiva. Iesu ese ena hahediba e hadibadia, unu orea toiosi edia hatubu muramurana eiava hahediba herevadia bae dadarai. (Mat. 16:6, 12) Iesu ese una hereva na taunimanima ese ia pavapava ai e ura bae halaoa murinai e gwauraia.

13, 14. (a) Edena dalai politikol bona tomadiho heiriheiridia ese daḡedaḡe bona hahemaoro kereredia e havaramu? (b) Dahaka dainai hahemaoro kereredia ese daḡedaḡe karadia na basie hamaoromaoro? (Rau 3 ai laulau ba itaia.)

¹³ Tomadiho na politikol ida e ḡaukara heboumu  neganai, daḡedaḡe karadia na bae vara diba. Iesu ese ena hahediba e hadibadia unu kara amo bae gini siri na namo. Una dainai hahelaḡa taudia bona Farisea taudia na e urava Iesu bae alaia. Idia na taunimanima ese Iesu bae kamonai henia bena edia tomadiho bona politikol dagidia bae haboio garina e gariva. Idia na eto: “Ita na basita ruamu, taunimanima iboudiai ese bae abiabiraia; bena Roma taudia baema, eda Dubu Helaḡa bona eda bese bae abi oho.” (Ioa. 11:48) Una dainai, Hahelaḡa Tauna Badana Kaiafa ese Iesu ihamasena palanina e gunalaia.​—Ioa. 11:49-53; 18:14.

¹⁴ Hanuaboi ai, Kaiafa ese tuari taudia haida e siaidia Iesu bae dabaia tao. Iesu na mai dibana ia na bae ḡuia dainai, ena aposetolo ida edia aniani hebou ginigabena e karaia neganai, e noidia dare eiava kaia haida bae abi kau. Dare rua hona na heḡereḡere, unu amo mai anina bada ḡauna ta baine hadibadia. (Luka 22:36-38) Gabeai, Petro ese dare amo Iesu iḡuina tauna ta e haberoa. Ia na e badu badina idia ese Iesu e hahemaoro henia kerere. (Ioa. 18:10) To Iesu ese Petro e hamaoroa: “Emu dare na gabuna ai ba toia vareai lou; badina be dare e abia taudia iboudiai na dare amo do bae mase.” (Mat. 26:52, 53) Unu amo hahediba na Iesu ese una hanuaboi ai e gwauraia ḡuriḡurina e lalopararalaia​—idia na dia tanobada ena. (Ioane 17:16 ba duahia.) Hahemaoro kereredia na Dirava sibona ese baine hamaoromaorodia.

15, 16. (a) Edena dala ai Baibul ese Kristen taudia e durudia heiriheiri karadia bae dadarai? (b) Iehova ese hari tanobada e itaiamu neganai dahaka idau e itaiamu?

¹⁵ Paragraf matamanai e herevalaia saot Europe taihuna na una sivarai amo diba e abia. Eto: “Na itaiava daḡedaḡe karadia ese hahemaoro maoromaoro na se havaraiava. Bona daḡedaḡe karadia e karava taudia na dokonai e maseva, danu momo na asie moaleva. To, na moale badina Baibul amo na diba Dirava sibona ese tanobada ai hahemaoro maoromaoro baine havaraia diba. Laḡani 25 lalodiai, lau ese una sivarai na harorolaiamu.” Saot Africa tadikakana ese ena io gabunai “Lauma ena dare” eiava Dirava ena Hereva e ḡaukaralaiva, unu amo maino sivaraina na dekena taudia ediai e harorolaiava, ena be idia na idau besedia. (Efe. 6:17) Bona central Europe taihuna na Iehova ena Witnes ta ai ela murinai, idau tano tadikakana ta e adavaia, una na guna ia ese e inai heniava tanona. Ini tadikaka bona taihu tatoiosi ese edia kara na e haidau badina e ura Keriso bae tohotohoa.

¹⁶ Unu baita kara toma na mai anina bada! Baibul ese taunimanima na davara hurehurena ida e haheḡereḡeredia, idia ediai maino na lasi. (Isa. 17:12; 57:20, 21; Apok. 13:1) Ena be politikol hepapahuahudia ese taunimanima e habadudiamu, e hapararadiamu, bona daḡedaḡe karadia e havaramu, to ita na maino bona lalotamona ai ta nohomu. Bona ina heiriheiri tanobadana ai, Iehova na e itaiamu ena taunimanima na lalotamona ai e nohomu dainai, e moalemu.​—Sefania 3:17 ba duahia.

17. (a) Ededia dala toi ai lalotamona karana baita hahedinaraia diba? (b) Stadi gabena ai dahaka baita herevalaiamu?

¹⁷ Ina stadi ai tame itaia Kristen lalotamona karana na ini dala toi amo baita hahedinarai diba: (1) Baita abidadama Dirava ena guba Basileiana ese hahemaoro kereredia baine hamaoromaoro, (2) politikol karadia ai basita vareai, bona (3) daḡedaḡe karadia baita dadaraidia. To, nega haida inai heheni karana ese eda lalotamona karana baine hadikaia diba. Stadi gabena ai baita itaiamu edena dala ai inai heheni karana baita hanaia, aposetolo edia negai Kristen taudia e kara heḡereḡerena.