Rehoboam tamana na Solomon, ia na laḡani 40 lalodiai Israel e lohiaia. (1 Han. 11:42) Solomon na laḡani 997 B.C.E. ai e mase. Bena Rehoboam na Ierusalem ena not kahana amo Sekem ela, bae horoa pavapava ai bainela totona. (2 Sis. 10:1) Momo na mai dibadia Solomon na aonega herea tauna, una dainai o laloamu Rehoboam be e gari Solomon aena gabudia ai baine raka totona, a? Rehoboam be ede e diba toma gabeai hekwakwanai ihamaoromaorodia karana ai ena diba bae tohoa?

Rehoboam na e davaria Israel taudia na e lalohisihisiva. Gabeai, edia gwaukau taudia na ela bona edia lalohekwarahi herevadia na Rehoboam e hamaorolaia: “Tamamu ese emai maduna e hametaua. Taunabunai, harihari tamamu ena hesiai ilao-henina aukana bona ena maduna metauna latamai ai na ba haharaḡaia; bena ai ese oi isiaimu baia lao heni.”​—2 Sis. 10:3, 4.

Rehoboam na asi dibana dahaka baine kara! Bema taunimanima edia noinoi baine abi dae, anina na ia, ena ruma bese, bona ena ruma ai e nohova taudia iboudiai ese kohu bona moni momo iabidia karana bae hamaraḡia dia guna heḡereḡerena. To, bema edia noinoi basine abi dae, reana bae gwau-edeede henia. Ia be dahaka baine kara? Matamanai ia ese tau badadia, Solomon ena sisiba e heniva taudia, edia heduru e tahu. To gabeai, ia ida e uru hebou eregabe taudia, edia heduru e tahu. Rehoboam ese edia sisiba e badinaia, bona lalona e hadaia taunimanima baine kara auka henidia. Ia na e haere, eto: “Tamagu ese maduna metauna na umui latamui ai e atoa, a lau ese ma baina hametaua; bona tamagu ese hekwadi varodia amo e hahisimui, a lau ese doadoa amo baina hahisimui.”​—2 Sis. 10:6-14.

Una sivarai amo dahaka ta dibamu? E hahedinaraia ḡoevaḡoevamu, taunimanima badadia eiava lo Kristen taudia, baita kamonai henidiamu neganai baita aonegamu. Idia na ḡau momo mai dibadia, idia ese abi hidi ta ena namo bona dika na e  lalopararalaiamu dainai, sisiba namodia be henidamu.​—Iobu 12:12.

Rehoboam ese ena tuari taudia e haboudia ia e gwau-edeede henia taudia bae tuari henidia totona. To Iehova ese peroveta tauna Semaia ena amo e koudia, eto: “Basiola, varavaramui Israel taudia basio tuari henidia; ta ta emu ruma emu ruma ba lou lao, badina be ina na lauegu amo e vara.”​—1 Han. 12:21-24. *

Idia be basie tuari, a? Mani a laloa, Rehoboam na una hereva dainai e lalohekwarahi! Taunimanima ese ia be ede be laloa tomamu, badina e hagaridia, eto “doadoa” amo baine hahisidia to hari ḡau ta basine karaia dibamu? (2 Sisiga 13:7 ba itaia.) To, king bona ena tuari taudia ese “Iehova ena hereva e hakala henia, edia ruma e lou heni, Iehova ena hereva heḡereḡerena.”

Una sivarai amo dahaka ta dibamu? Dirava baita kamonai henia na aonega karana, ena be haida ese bae kirikirilaida. Dirava baita kamonai heniamu neganai, be lalonamo henidamu bona be hanamodamu.​—Deu. 28:2.

Rehoboam enai be dahaka e vara? Ia ese Dirava e kamonai henia bona bese matamatana ituari henina totona e karaia palanina na e haidaua, danu ia ese e lohiadiava hanuadia, Iuda bona Beniamina, ai hanua haida e haginidia. Bona hanua haida na “e ha-aukadia herea.” (2 Sis. 11:5-12) Mai anina bada ḡauna na, gabeai ia na Iehova ena taravatu e badinaia. Ieroboam ena lohia henunai Israel ena iduhu 10 basileiana ese kaivakuku e tomadiho henidiava, una dainai momo na Ierusalem ela “Rehoboam” bae durua bona tomadiho momokanina bae badinaia totona. (2 Sis. 11:16, 17) Oibe, Rehoboam na Dirava e kamonai henia dainai, ena basileia na e goada.

To, Rehoboam ese ena basileia e hagoadaia neganai, kara ma ta e karaia. Ia ese Iehova ena taravatu se badinaia bona kaivakuku e toma henidia diho matama! To dahaka dainai? Ia sinana, Amono hahinena, ese e hakaua kerere dainai unu e kara toma, a? (1 Han. 14:21) Herevana dahaka badi dainai, to bese ibounai na ia e badinaia. Una dainai Aigupto Pavapavana, Sisaka, ese Iuda hanuadia momo herea e abidia neganai Iehova ese se koua, ena be unu hanua na Rehoboam ese e ha-aukadia herea!​—1 Han. 14:22-24; 2 Sis. 12:1-4.

Sisaka ese Ierusalem, Rehoboam ese e lohiaiava hanuana, e tuari henia neganai dika bada herea e vara. Una nega ai, peroveta tauna Semaia ese Rehoboam bona Iuda lohiadia ediai Dirava ena hereva e gwauraia, eto: “Umui ese o kahugu nege dainai lau ese baina kahumui nege, Sisaka imana ai.” Rehoboam ese una matahakani be ede e laloa toma? Ia ese e abia dae! Baibul na e gwaumu: “Israel lohiadia bona hanua pavapavana na sibodia e hahemanau, eto, Iehova na maoromaoro.” Una dainai, Iehova ese Rehoboam e hamauria bona Ierusalem na se habuaia tari.​—2 Sis. 12:5-7, 12.

Una murinai, Rehoboam na dounu saot basileiana e lohiaiava. Ia do se mase neganai, harihari ḡaudia momo na natuna e henidia, bona se ura tadikakadia Abia, gabeai ia gabuna baine abia tauna, bae gwau-edeede henia. (2 Sis. 11:21-23) Unu amo, Rehoboam na aonega karana e hahedinaraia, eregabena ai una na se hahedinaraia.

Ena be Rehoboam na kara namodia haida e hahedinarai, to Dirava ena lalonamo na se abia. Baibul ese ena lohia negana na ini e herevalaia toma: “Ia na e kara havara.” Dahaka dainai? Badina “ia ese lalona se ha-aukaia Iehova itahuna ai.”​—2 Sis. 12:14.

Ena mauri sivaraina amo ta dibamu ḡauna binai: Rehoboam na nega haida Dirava e badinaiava. Bona Iehova ena bese daidiai ḡau namodia haida e karava. To ia ese ena hetura karana Iehova ida na se hagoadaia, bona se ura Iehova baine hamoalea. Una dainai, kara dikadia e kara bona tomadiho koikoi e badinaia. Reana bo lalomu: ‘Rehoboam ese Dirava ena matahakani e abia dae neganai, ia be haida ese e doria dainai unu e kara toma eiava  mai kudouna idoinai ida e helalo-kerehai bona e ura Dirava baine hamoalea, a?’ (2 Sis. 11:3, 4; 12:6) Gabeai, ia na ma e kara havara. Ia na tubuna, King David, ena amo idau! Oibe, ena be David na kerere e karava, to ena mauri lalonai Iehova ilalokau henina karana e hahedinaraia, tomadiho momokanina e badinaiava, bona ena kara dika amo e helalo-kerehai momokani.​—1 Han. 14:8; Sal. 51:1, 17; 63:1.

Rehoboam ena sivarai amo ḡau momo ta dibamu. Taunimanima ese edia ruma bese e durudiamu bona e ḡaukara goadamu ḡau namodia haida e haḡuḡurumu neganai, ta moalemu. To, Dirava ena lalonamo baita abia totona, tomadiho momokani baita durua bona baita badinaia na ḡau ginigunana.

Una na baita karaia diba bema baita hekwarahi Iehova ilalokau henina karana baita habadaia. Lahi basine bodo totona au momo ta rakumu heḡereḡerena, eda lalokau Dirava enai baita habadaia totona, ena Hereva baita stadilaia hanaihanai, ta duahimu ḡaudia baita lalodia dobu, bona ḡuriḡuri karana basita hadokoa na namo. (Sal. 1:2; Roma 12:12) Iehova ilalokau henina karana ese be hagoadadamu ḡau iboudiai lalodiai Ia baita hamoaleamu. Danu be hagoadadamu kerere ta karamu neganai, baita helalo-kerehai momokani. Unu amo Rehoboam heḡereḡerena basita kara, to tomadiho momokanina baita badinaia tarika-tarika.​—Iuda 20, 21.