1. Ta e loumu neganai, Iehova ena hemami be ede bamona?

STADI atikol 25 ai ta herevalaia bamona, Iehova na mamoe inarina tauna heḡereḡerena, mai ena hebogahisi ida iena mamoe e naridiamu. Bona Ia na e boiomu mamoedia danu e tahudiamu. Iehova ese ia e rakatania Israel taudia e hamaorodia, eto: “A lou henigu, bena lau ese baina lou henimui.” Ta dibamu iena hemami na doini unu bamona badina ia na e gwa: “Lau Iehova na asina idaumu.” (Mal. 3:6, 7) Iesu na e gwa manoka tauna ta e loumu neganai, Iehova bona aneru na e moale badamu.​—Luka 15:10, 32.

2. Ina atikol ai, dahaka baita herevalaimu?

² Mani Iesu ena parabole toi aita herevalai, manoka taudia baita durudia daladia be hadibadamu. Bona kara haida baita herevalaimu, unu ese ita be durudamu manoka taudia baita durudia Iehova bae lou henia totona. Bona baita itaiamu dahaka dainai eda hekwarahi manoka taudia idurudia karana ai na mai anina bada.

3-4. Dahaka dainai Luka 15:8-10 ai e gwauraia hahinena ese e boio koinina e tahua namonamo?

³ Namona na baita ḡaukara goada e uramu Iehova bae lou henia taudia baita tahudia. Luka ena Evanelia bukana ai e torea parabolena ai, Iesu ese e hahedinaraia hahine ta na ena moni e boio ḡauna, dava bada ḡauna e tahuava. Una parabole ai mai anina bada ḡauna na, una hahine na e hekwarahi ena moni e tahua.​—Luka 15:8-10 ba duahi.

⁴ Iesu ese hahine ta ena moni, e boio dava bada ḡauna e davaria hemamina e herevalaia. Iesu ena negai, Israel ai kekeni ta e headavava neganai, nega haida sinana ese drekma koini 10 e heniava. Reana una koini na mai anina bada badina una na sinana ese e henia ḡauna. Hahine na e laloava una koini na floa ai e moru. Una dainai, lamepa ta e ha-araia gabu baine  itaia namonamo, to ḡau ta se davaria. Ena koini na se itaia namonamo badina iena oela na dia bada lamepa baine hadiaria totona. Dokonai, ena ruma lalona ibounai e daroa murinai, lamepa diarina ai e tahuava koinina na kahu lalonai e diaridiariva. E davaria neganai e moale dikadika. Una dainai, turana e boiridia una sivarai baine hamaorolaidia totona.

5. Dahaka dainai manoka taudia itahudia na mai hekwarahina?

⁵ Iesu ena parabole amo tame diba, ḡau ta ta haboioamu neganai baita tahua namonamo. Una heḡereḡerena, baita hekwarahi manoka taudia baita tahudia. Idia na laḡani momo lalodiai ita ida asita haroro bona asita hebou. Reana idia na gabu ma ta ela bona unuseniai e nohomu tadikakadia na asi dibadia. To, ta diba momokanimu manoka taudia haida na e ura dikadikamu Iehova bae lou henia. Idia na e uramu tadikaka taihu ida Iehova bae hesiai henia lou, to namona na baita durudia.

6. Edena dala ai kongrigeisin taudia iboudiai bae heduru diba manoka taudia bae tahudia?

⁶ Daidia ese manoka taudia bae tahudia? Ita iboudai​—elda, painia, ruma bese taudia, bona kongrigeisin pablisa iboudiai ese una hetahu ḡaukarana bae durua. Oi turamu ta eiava varavaramu ta e manoka, a? Ruma-ta-ruma-ta haroro ḡaukara eiava pablik gabudiai o haroromu neganai, manoka tauna ta o hedavari heniamu, a? Ba hamaoroa bema ia na e uramu bae vadivadia, oi ese iena fon namba bona adres na elda taudia ba henidia diba.

7. Elda ta ladana Thomas ena hereva amo dahaka o dibamu?

⁷ Elda taudia be dahaka bae kara diba unu amo e uramu Iehova bae lou henia taudia bae davaridia? Spain ai, elda ta ladana Thomas * ena hereva aita laloa. Ia na bona ia ese Witnes taudia 40 mai kahana e durudia kongrigeisin bae lou henia totona. Thomas na e gwaumu: “Matamanai, tadikaka taihu haida na nanadaidiamu, bema idia na mai dibadia manoka taudia be edekahai e nohomu. Eiava pablisa na nanadaidiamu bema nega daudau lalonai asie hebou taudia haida na e lalodiataomu. Kongrigeisin ai momo na e uramu manoka taudia bae durudia dainai e uramu bae heduru. Gabeai, e manoka tadikaka bona taihu na vadivadi henidiamu neganai, natudia bona varavaradia henanadaidia na karamu. Guna manoka taudia haida na natudia e mailaidiava hebou, bona readia unu natu na pablisa ai ela. Idia danu baita durudia Iehova bae lou henia.”

8. Luka 15:17-24 ai, e boio merona parabolena ai natu e lou neganai tama be dahaka e kara?

⁸ Ededia kara baita hahedinarai na namo, unu amo e uramu Iehova bae lou henia taudia baita durudia? Ita na Iesu ese e gwauraia parabolena amo ḡau haida baita dibamu, una parabole lalonai mero ta na ena ruma bese e rakatania. (Luka 15:17-24 ba duahi.) Iesu ese e hahedinaraia una mero na gabeai e laloparara ena mauri na e dika dainai e lalo ruma baine lou lao na namo. Tamana na e heau lasi natuna e rosia e kisi henia, unu amo natuna na e diba tamana ese ia na dounu e lalokau heniava. Una mero na e hemami ia na e kerere dainai, ia na dia heḡereḡere tamana ese ma baine gwauraia lou, ia natuna. Tamana ese natuna e bogaia hisi, bona natuna merona ese ena hemami na tamana e hamaorolaia. Tamana na ḡau haida e kara unu amo e hahedinaraia natuna na e lalokau henia dainai e abia dae, to dia hesiai tauna ai baine halaoa dainai  e abia dae. Ena lalokau e hahedinaraia dalana na, aria badana ta e karaia bona dabua namodia e henia.

9. Ededia kara baita hahedinarai amo manoka taudia na Iehova bae lou henia? (Ina maua “ Manoka Taudia Idurudia Daladia” ba itaia.)

⁹ Iehova na una parabole ai e herevalaia tama na heto. Ia ese e manoka tadikaka taihu na e lalokau henidiamu bona e uramu ia bae lou henia. Iehova baita tohotohoamu neganai, idia baita durudiamu bae lou. Unu baita kara toma totona haheauka, hebogahisi, bona lalokau baita hahedinaraia. Dahaka dainai unu kara baita hahedinarai? Bona edena dala ai unu kara baita hahedinarai?

10. Dahaka dainai ta ta duruamu Iehova baine lou henia neganai, baita haheauka na ḡau badana?

¹⁰ Namona na baita haheauka badina manoka tauna na taina ruana be goadamu. Guna e manoka taudia momo na e gwa elda taudia bona kongrigeisin taudia ma haida ese e vadivadidia loulou dainai idia na e lou. Asia ai taihu ta ladana Nancy na e gwa: “Kongrigeisin ai turagu namo hereana ta ese e durugu. Lau na ia kakana bamona e kara heniguva. Guna a kara hebouva ḡaudia a herevalaiva. Lau na herevava neganai ia na e hakala namonamova, bona e hagoadaguva danu. Ia na lau turagu korikorina, heduru na urava negadia iboudiai ia ese e duruguva.”

11. E lalohisihisimu tauna ta ta duruamu neganai, dahaka dainai hebogahisi baita hahedinaraia?

¹¹ Hebogahisi karana na muramura namona ta bamona, ta baine durua hemami namona baine abia totona. Manoka taudia haida na guna kongrigeisin ai ta ese lalodia e hahisi dainai doini e lalohisihisimu bona e badumu. Una dainai asie uramu Iehova bae lou henia. Haida na be hemamimu haida ese idia na asie kara namo henidia. Reana idia na be uramu  e herevamu neganai ta baine hakala namonamo bona edia hemami baine lalopararalai. (Iak. 1:19) Guna e manoka hahinena ta ladana María na e gwaumu: “Lau na na ura ta ese baine hakala henigu, baine hagoadagu, sisiba namodia baine henigu, bona baine durugu.”

12. Edena dala ai Iehova ena lalokau na varo ta ida baita haheḡereḡerea?

¹² Baibul ese e hahedinaraiamu Iehova ese ena lalokau amo ita na e veridamu. Edena dalai unu e kara tomamu? Mani ina haheitalai a laloa: Oi na guri dobuna ta ai o moru. Guri na dobu herea dainai oi na basio dae dibamu. To, ba dae totona ta ese varo baine tahoa dobi bena baine verimu dae. Iehova ese Israel taudia, ia e rakatania taudia na ini e herevalaidia toma: “Hebogahisi varodia bona lalokau iḡuidia amo na hakaudia.” (Hos. 11:4) Hari ina negai danu Dirava ihesiai henina karana e hadokoa bona hekwakwanai bona lalohekwarahi ese e hametaudiamu taudia na Dirava ese e lalodiamu. Ia na e uramu idia na bae diba Ia ese idia na e lalokau henidiamu, bona e uramu baine durudia Ia bae lou henia. Iehova ese oi baine ḡaukaralaimu diba iena lalokau na idia ediai ba hahedinaraia.

13. Tadikaka ilalokau henidia karana e hahedinaraiamu ekspiriens ba herevalaia.

¹³ Namona na manoka taudia baita hadibadia Iehova ese idia na e lalokau henidiamu, bona ita ese danu idia na ta lalokau henidiamu. Atikol 25 ai ta herevalaia tauna Pablo na laḡani 30 mai kahana e manoka. Ia na e gwaumu: “Daba ta, egu ruma na rakataniava lalonai, taihu burukana ta ida a hedavari bona ia na mai lalokauna ida lau e hereva henigu. Bena lau na na tai. Na hamaoroa una na e kara Iehova ese ia na e siaia lau baine hereva henigu. Una neganai lalogu na hadaia Iehova baina lou henia.”

14. Luka 15:4, 5 heḡereḡerena, mamoe inarina tauna ese e boio mamoena e davaria neganai, dahaka e kara?

¹⁴ Bema manoka taudia ta davaridiamu, namona na baita durudia bona baita hagoadadia loulou. Iesu ena parabole ai e boio merona heḡereḡerena, reana idia ese e mamiamu hisihisina na bada herea. Bona Satana ena tanobada ai e davari ḡaudia daidiai, edia hetura karana Iehova ida na dia goada. Baita hagoadadia edia abidadama Iehova enai bae hagoadaia totona. Iesu ese boio mamoena parabolena ai e hahedinaraia, mamoe inarina tauna ese mamoe na paḡanai e atoa bona e loulaia mamoe serina. Mamoe inarina tauna na ena nega bona goada e ḡaukaralai e boio mamoena baine davaria totona. To e laloparara mamoe na baine loulaia ena seri, badina una mamoe na asi goadana sibona baine lou.​—Luka 15:4, 5 ba duahi.

15. Edena dala ai e uramu Iehova bae lou henia taudia baita durudia? (Ina maua “ Tulu Namona Ta” ba itaia.)

¹⁵ Ita danu eda nega bona goada baita ḡaukaralai, manoka taudia baita durudia e hametaudiamu ḡaudia bae hanaidia totona. Iehova ena lauma, iena Hereva, bona pablikeisin idauidau amo baita durudia edia hetura karana Iehova ida bae hagoadaia totona. (Roma 15:1) Edena dala ai? Laḡani momo elda ḡaukarana e karaia tadikakana ta na e gwaumu: “Manoka taudia momo na e uramu Iehova bae lou henia neganai, stadi bae abi na namo.” * Una dainai, bema elda taudia ese oi  e noimumu manoka tauna ta ba stadi henia, namona na una hahenamo na bavabia dae.” Una elda na ma e gwa: “Manoka tauna baine stadi henia tauna na ia turana namona ai bainela, unu amo manoka tauna ese ena lalohekwarahi na baine gwaurai diba.”

16. Ede ta diba tomamu ita na aneru ese e durudamu?

¹⁶ Ekspiriens momo amo ta dibamu e uramu Iehova bae lou henia taudia itahudia ḡaukarana ai aneru na ita e durudamu. (Apok. 14:6) Heḡereḡere, Ecuador ai tadikaka ta ladana Silvio na e manoka, ia na Iehova e noia ta baine siaia ia baine durua totona. Ia e ḡuriḡuriva lalonai, ena ruma iduarana belena e reḡe. Elda rua na iena ruma murimurinai gigini. Edia vadivadi lalonai, elda taudia ese e durua.

17. Manoka taudia baita durudiamu hahenamona be dahaka?

¹⁷ Manoka tauna ta baita duruamu Iehova be lou heniamu neganai, baita moalemu. Manoka taudia e durudiava painia tadikakana ta ladana Salvador na e gwaumu: “Manoka taudia na Iehova e lou heniamu neganai, na moalemu bona nega haida na na taimu. Iehova ese iena hesiai tauna ta na Satana ena tanobada amo e hamauria karana na laloamu neganai, na moalemu, bona Iehova ida na ḡaukara heboumu na hahenamo ta.”​—Apos. 20:35.

18. Bema oi na o manoka, dahaka ba diba na namo?

¹⁸ Bema oi na o manoka, namona na ba diba Iehova ese oi na e lalokau henimumu. Ia na e uramu ba lou henia. Unu ba kara toma totona ḡau haida ba kara na namo. To Iesu ena parabole ai e gwauraia tama heḡereḡerena, Iehova na e narimu oi ba lou totona, bona ia na mai moalena ida oi be abimu daemu.