Unu siri lalodiai Kristen taudia edia kara 9 e herevalai: “A Lauma huahuana binai: lalokau, moale, maino, haheauka, hebogahisi, kara maoromaoro, hereva ibadinana, manau, boga-auka.” To basitato Dirava ena lauma helaḡa na ita be durudamu unu kara mo baita hahedinaraimu.

Ede ta diba tomamu? Aposetolo Paulo na lauma huahuadia do se gwaurai neganai ia na e gwa: “Tau-anina ena kara . . . bini: heuda-hanai, kara mirodia, mata-bodaḡa, kaivakuku itomadiho-henidia, babalau, heai, heatu, mama, badu, gogosi, heiri-heiri, hahediba koikoi herevadia, heḡahusi, kekero, lebulebu; bona kara unuhetomadia iboudiai.” (Gal. 5:19-21) Paulo ese “tau-anina ena kara” ma haida danu bema gwauraidia diba, heḡereḡere Kolose 3:5 ai e herevalai karadia. Una heḡereḡerena, kara namodia 9 e herevalaidia murinai, ia na eto: “Kara unuhetomadia na asi taravatudia.” Una dainai Paulo na lauma helaḡa ena heduru amo baita hahedinarai karadia haida mo e gwaurai.

Una na baita lalopararalaiamu bema Paulo ese Efeso kongrigeisin e tore henidia listana ida baita haheḡereḡereamu, ia na e gwa: “Diari huahuadia na lalohadai namodia ai bona kara maoromaorodia ai bona hereva momokanidia ai e hedinaraimu.” (Efe. 5:8, 9) Oibe, ‘kara maoromaoro bona hereva momokani’ na e gwauraidiamu “diari huahuadia,” to danu kara maoromaoro na “lauma huahuana” ta.

Una heḡereḡerena, Paulo ese Timoteo e hagoadaia ini kara namodia siks, “kara maoromaoro, Dirava ibadinana, kamonai, lalokau, haheauka, lalo-manau” baine hahedinarai. (1 Tim. 6:11) Unu kara toi (kamonai o hereva ibadinana, lalokau, bona manau) na Galatia 5:22, 23 ai e gwauraidia ‘lauma huahuadia.’ To, Timoteo na ini kara ma haida “kara maoromaoro, Dirava ibadinana, bona haheauka” baine hahedinarai totona lauma helaḡa ena heduru baine abia na namo.​—Kolose 3:12; 2 Petro 1:5-7 ba haheḡereḡere.

Una dainai, Galatia 5:22, 23 na dia Kristen karadia iboudiai e herevalai. Dirava ena lauma helaḡa ese ita baine duruda diba ‘lauma huahuadia’ 9 baita hahedinarai totona. To, Kristen taudia goadadia ai baitala totona ma kara namodia haida danu baita hahedinarai bona ‘tau matamatana baita hahedokilaia, Dirava heida-idana, kara maoromaoro ai bona hereva momokani helaḡana ai vada e karaia.’​—Efe. 4:24.