LAU na Graz ai na bada, Austria ai. Laḡanigu 7 neganai, e siaigu tomadiho ihahedibalaidia sikulina ta nala. To, unuseni ai na itaiava pris bona nun na matabodaḡa karadia e karava. Una dainai laḡani ta murinai sinagu ese sikuli amo e kokigu.

Gabeai, lau na boarding school nala. Hanuaboi ta ai, Tamagu na ela baine hakaugu gabu namona ta baiala badina Graz na e bomua. Ai na Schladming taonina a laova. A kau bena nese a hanaia murinai, nese na e bomua. Nega ma ta ai, lau bona tubugu hahinena na emai ruma murimurinai tuari pleinidia ese kahirakahira e pidimai. Tuari e ore neganai, toana na dubu bona gavamani ese ai na asie durumai.

Laḡani 1950 ai, Iehova ena Witnes ta ese sinagu enai Baibul e herevalaia matama. Edia herevahereva na kamonaiva bona Sinagu ida kongrigeisen heboudia haida a laova. Sinagu na e diba momokani Iehova ena Witnes taudia na hereva momokani e harorolaiava, una dainai laḡani 1952 ai e bapatiso.

Una negai, lau egu ai kongrigeisen na vaitani hahine burukadia edia hebou gabuna. To, gabeai, kongrigeisen ta a vadivadia bona unuseni ai matamata taudia na momo​—dia burukadia mo edia hebou gabuna! Graz a lou lao neganai, lau na hebou iboudiai na lao matama, bona gabeai na abia dae na dibava ḡaudia na hereva momokani. Danu na diba Iehova na ena hesiai taudia e durudiamu Diravana. Hekwakwanai badadia ta davarimu negadia ai danu dounu e durudamu.​—Sal. 3:5, 6.

Na urava ma haida ediai hereva momokani baina herevalaia. Vara bougu ediai una na herevalaia matama. Kakagu kekenidia hani na ruma vada e rakatania bona sikuli  hahedibadia ai ela. To e nohova hanuadia ta ta ai na vadivadidiava bona na hagoadadiava Baibul bae stadilaia. Gabeai, idia na Baibul e stadilaia bona Iehova ena Witnes ai ela.

Ruma-ta-ruma-ta haroro ḡaukarana na karaia wikina iharuana ai, hahine ta​—laḡanina na 30 heḡereḡerena​—na hedavari henia bona ia ida Baibul a stadilaia matama. Ia na e goada ela bona e bapatiso, bona gabeai, adavana bona natuna memero rarua danu e bapatiso. Una stadi ese egu abidadama na e hagoadaia. Dahaka dainai? Nega ta Baibul stadi unu bamona ta asina karaia. Una dainai lesen ta ta na heḡaeḡaelai namonamova. Sibogu na hahediba gunava, unu amo egu stiuden baina hadibaia diba! Una dala amo hereva momokani na lalopararalaia namonamo. April 1954 ai, egu mauri na Iehova enai na gwauhamatalaia bona ranu bapatiso na abia.

Laḡani 1955 ai, lau na Germany, France, bona England edia intanesinol hebouheboudia nala. London ai, Albert Schroeder na hedavari henia. Ia na Gilead Sikuli ena hahediba ta, bona gabeai Gavanin Bodi ena memba ta ai ela. British ena Miusiem a vadivadia neganai, Tadikaka Schroeder ese Baibul ena maniuskrip haida e hahedinarai henimai. Unu maniuskrip ai Dirava ladana na Heberu revarevadia ai e tore, bona ia ese anidia e herevalaiva. Una ese egu lalokau Iehova bona hereva momokani ai e habadaia, una dainai lalogu na hadaia Baibul amo hereva momokani baina herevalaia totona.

January 1, 1956 ai, ful-taim painia ḡaukarana na karaia matama. Hua hani muridiai, e boirigu Austria ai spesol painia ḡaukarana baina karaia. Una nega ai, Mistelbach, lau baina painia taonina ai, Witnes ta na lasi. To hekwakwanai haida na davari. Lau bona painia bamogu emai mauri daladia na idau. Lau laḡanigu na kahirakahira 19 bona taoni ai na bada; ia laḡanina be 25 bona ia na hanua kekenina ta. Daba ai lau na na urava do baina mahuta; ia be e noga haraḡava. Hanuaboi ai, lau na na noga malova; ia na e urava baine mahuta haraḡa. To, Baibul ena sisiba a badinava dainai, a haheauka heheniva bona emai painia hebou karana na a moalelaiava.

To, hekwakwanai ma haida a davariva. Ena be haida ese e daḡedaḡe henimaiva, to Dirava ese na ‘se rakatanimai.’ (2 Kor. 4:7-9) Nega ta, gunika hanuana ta ai a harorova lalonai, taunimanima ese edia sisia na e ruhadia. Se daudau lau bona bamogu na sisia ese e ḡeḡemai, e kwaru henimaiva bona isedia danu e koriva. Raruosi imamai a dogotao, bona na ḡuriḡuri, “Iehova, mani emu kara, bae heau henimai neganai, baia mase haraḡa na namo!” Sisia na ema bona ai badibadimai ai neganai, e gini, iudia e davedave, bona e raka oho. A mamia Iehova ese e gimamai. Una murinai, hanua ibounai lalonai a harorova, bona a moale badina taunimanima na e kamonaiva. Reana e hoa badina sisia ese asie korimai eiava e itamai ai na a haheauka. Idia haida na gabeai Witnes taudia ai ela.

Emai ai ḡau ma ta e vara. Dina ta, tano biaguna na e inu kekero bona ema ruma, e  urava baine alamai bona e gwauva ai na dekemai taudia edia noho a hadikaiamu. Adavana ese e koua tohova to se kwalimu. Ai na atai rumana ai unu iboudiai a kamonai. Haraḡa herea sea na emai iduara vairanai atodia bona emai kohu na baege ai a uda matamava. Iduara a kehoa neganai, tano biaguna na vada ai gini, kaia badana ta e dogoatao. Una dainai muri iduarana amo a heau lasi bona mai emai kohu ida uma dalana amo ala, bona asia lou lao.

Hotel ta ala bona daiutu ta totona a noinoi. Laḡani ta heḡereḡerena unuseni ai a noho, una ese emai hesiai ḡaukarana na e durua. Edena dala ai? Una hotel na taoni bogaraḡinai, bona emai Baibul stiuden haida na e urava unuseni ai baia stadi. Gabeai, emai hotel daiutuna ai buka stadi bona pura ta ta ena Gima Kohorona Stadi a karaiava, bona taunimanima 15 e maiva.

Ai na Mistelbach ai laḡani ta mai kahana a noho. Bena lau na e siaigu Feldbach, Graz ena sautist kahana ai. Taihu ma ta ida a painia hebou, to unuseni ai kongrigeisen ta na lasi. Ai na au amo e karaia rumana ta ena henu daiutuna ai a nohova. Lai hodahodana na au padadia amo e vareaiva dainai, niuspepa amo a koudiava. Danu guri amo ranu abiva. To mai ena namo. Hua haida muridiai, grup ta e hematama. Se daudau, a stadi heniava ruma besena ta lalonai 30 na hereva momokani ai e vareai!

Unu ekspiriens ese e hagoadagu dainai Iehova ese Basileia e tahuamu taudia e durudiamu karana na laloa bada. Ena be taunimanima ese basie duruda diba, to Iehova na hanaihanai ita e durudamu.​—Sal. 121:1-3.

Laḡani 1958 ai, intanesinol hebouhebou ta na New York City, Yankee Stadium bona Polo Grounds ai e heabi. Fom ta na hahonua una hebouhebou bainala totona, bona Austria brens ese e nanadaigu bema na uramu Gilead Sikuli ena klas namba 32 bainala. Una hahenamo na asina ura baina dadaraia. Maoromaoro na haere, “Oibe!”

Gilead ai, lau na Martin Poetzinger badinai na helai. Ia na Nazi dibura kamepadia ai hahetoho momo e haheaukalai. Gabeai, ia danu Gavanin Bodi ena memba ta ai ela. Klas lalonai, nega haida Martin  na metairametaira e gwauva, “Erika, una anina be dahaka German gado ai?”

Emai sikuli dokona e lao heniava lalonai, Nathan Knorr ese emai asainmen e boilai. Egu asainmen na Paraguay bainala. Lau laḡanigu na do maraḡi dainai, una tano bainala totona tamagu ena gwaumaoro baina abi na namo. Gwaumaoro na abi murinai, March 1959 ai lau na Paraguay ai na kau. Lau na e siagu Asunción ena misinari rumana ai baina noho, painia hebou taihuna ma ta ida.

Se daudau, Walter Bright ida a hedavari, ia na klas namba 30 amo e gradueit bona misinari ḡaukara e karaiava. Gabeai, a headava bona mauri ena hekwakwanai momo a davari. Hekwakwanai ta a davariava neganai, Iehova ena gwauhamata Isaia 41:10 ai a duahiava, eto: “Basio gari, badina be lau na oi ida; kudoumu basine hetaha, badina be lau na oiemu Dirava; baina hagoadamu.” Una gwauhamata dainai Dirava baia badinaia hanaihanai bona ena Basileia baia atoa guna neganai, ia ese basine rakatanimai diba.

Gabeai, e siaimai Brazil ena boda badina hanuana ta ala. Unuseni ai dubu igunalaina tauna ese matamata taudia lalodia e veriva emai misinari rumana na nadi amo bae hodoa, una ruma na dia namo momokani. Walter na pulisi edia badana ida Baibul e stadilaia matama. Ia ese dala e kara pulisi haida ese e gimamai pura ta lalonai, bona daḡedaḡe taudia ese asie hahekwakwanaimai lou. Una murinai, ai na Brazil edia boda kahana ai ruma ta ala. Una na mai ena heduru badina unuseni ai Paraguay bona Brazil gado ai hebou baia kara diba. Una asaimen do asia rakatania neganai, unuseni ai kongrigeisen maraḡidia na rua.

Egu dokta ese e hamaorogu lau na bese na basina havara diba, una dainai a hoa badina laḡani 1962 ai lau na na rogorogo! Ai na ala Hollywood, Florida ai, Walter ena ruma bese e nohova gabuna badinai a nohova. Laḡani haida lalodiai, lau bona Walter na asia painiava. Badina egu ruma bese tauna ta a nariava. To, ai na dounu Basileia ḡaukaradia a ato gunava.​—Mat. 6:33.

November 1962 ai, Florida ala neganai, a hoa badina una tano taudia na asie urava koremadia bona kurokurodia na bae tamona, una dainai tadikaka koremadia na sibodia edia hebou e karava bona tadikaka kurokurodia danu, bona edia haroro gabudia danu e hapararadia. To Iehova ese bese idauidau na se hapararadia, bona se daudau kongrigeisen ai bese idauidau na e hebou tamonava. Iehova ena heduru amo una e vara, una dainai hari una gabu ai kongrigeisen na momo.

Laḡani 2015 ai, Walter na harana mai kensana dainai e mase. Ia na tau namona bona laḡani 55 lalonai a noho hebou, ia ese Iehova e lalokau heniava bona tadikaka momo e durudia. Na ura dikadikamu baine toreisi lou neganai tauanina goadana baina itaia lou.​—Kara 24:15.

Na moalemu badina laḡani 40 mai kahana lalonai ful-taim hesiai ḡaukarana na karaia, bona hahenamo momo na moalelai. Heḡereḡere, lau bona Walter ese emai Baibul stadi 136 e bapatiso na a itadia. Momokani, hekwakwanai haida a davari. To unu ese se koumai eda Dirava baia hesiai henia totona. Ai ese Ia a raka henia kahi, bona a abidadama Ia ese ena nega bona dala ai hekwakwanai baine hamaoromaorodia. Bona ia na unu e kara toma!​—2 Tim. 4:16, 17.

Walter na na reaia dikadikamu, to painia ḡaukara ese e durugumu baina haheauka. Ma haida na hadibadiamu bona toreisi lou helarona na herevalaiamu neganai, una ese e durugumu. Momokani, dala momo ai Iehova ese lau na se rakatanigu. Ena gwauhamata heḡereḡerena, e durugu, e hagoadagu, bona ‘imana idibana mai kwalimuna ida’ e imudagu tao.​—Isa. 41:10.