ITA ta ta na ta uramu haida ese bae laloda ita na taunimanima namodia. To, hari ina negai kara maoromaoro ihahedinaraina na mai hekwarahina. Taunimanima momo na ‘kara namo asie ura heniamu.’ (2 Ti. 3:3) Idia na Iehova ena taravatu asie badinaiamu, “dika e gwauraiamu namo bona namo e gwauraiamu dika.” (Isa. 5:20) Danu, nega momo ta hekwarahimu kara maoromaoro baita kara, badina ta tubu daladia na idauidau bona ita na dia ḡoevadae. Una dainai, nega haida eda hemami na taihu Anne * ena heḡereḡerena, ia na laḡani momo Iehova e hesiai henia; ini e gwau toma: “Na hekwarahimu baina abia dae lau na taunimanima namogu.”

To moale ḡauna na, ita iboudai ese kara maoromaoro na baita karaia diba! Una kara na Dirava ena lauma huahuana ta, bona lauma helaḡa ena siahu na bada dainai, ta davarimu hekwakwanaidia, dekeda taudia edia kara, eiava siboda eda kara gunadia na baita haheaukalaidia. Mani kara maoromaoro anina bona baita hahedinaraia daladia aita herevalai.

Kara maoromaoro anina na kara namodia baita kara bona kara dikadia baita dadarai. Taunimanima namona na nega iboudiai dala e tahumu ma haida baine durudia.

Ta itaiamu haida na edia famili bona turadia e kara namo henidiamu, to una ese e hahedinaraiamu Iehova matanai idia be kara maoromaoro taudia a? Momokani, kara namodia baita hahedinaraimu na mai hekwarahina, badina Baibul na e gwaumu: “Asi kara-maoromaoro tauna ta tanobada ai e kara namomu mo, bona nega ta se kara dikamu.” (Koh. 7:20) Aposetolo Paulo na mai momokanina ida ini e gwau toma: “Lau dibagu lau na asi egu namo tau-anigu ai.” (Rom. 7:18) Una dainai, bema ta uramu kara namodia baita hahedinarai, namona na Iehova, kara namo Badina, baita tohotohoa.

Iehova Dirava ese kara maoromaoro taravatudia e ato. Baibul ese Ia na ini e herevalaia toma: “Oi na namo, bona o kara namomu; emu taravatu ba hadibagu.” (Sal. 119:68) Una siri ai iena kara namodia rua mani aita herevalai.

Iehova na namo. Iehova na kara namodia e hahedinaraimu Diravana. Ia ese Mose e hereva henia neganai e vara ḡauna mani a laloa, eto: “Egu namo idoinai baina haheitalaimu.” Iehova ese hairaina bona ena kara namo na Mose e haheitalaia. Bena Mose na ina hereva e kamonai: “Lau binai Iehova; Iehova, hebogahisi bona harihari-bada Diravana. Badu ai na halahemu; hebogahisi ai bona uraheni ai na haraḡamu. Daha daha na bogadia hisimu; kara-havara bona kara rea bona kara-dika na gwau taomu. Ḡau tamona, kerere taudia basina kahudia nege.” (Eso. 33:19; 34:6, 7) Una hereva amo ta dibamu, Iehova na dala idauidau ai kara namodia e hahedinaraimu. Ena be Iesu na kara namodia e hahedinarai tauna hereadaena, to ia na eto: “Ta dia namo, Dirava mo sibona.”​—Luk. 18:19.

Iehova na e kara namomu. Iehova e karamu ḡaudia iboudiai na nanamo. Ia ese “taunimanima  iboudiai e kara namo henidiamu, vada e kara ḡaudia iboudiai na ia ese e bogadia hisimu.” (Sal. 145:9) Ena kara namona ta na, taunimanima toadia na se lalomu, una dainai mauri bona edia dabu ḡaudia e henimu. (Apos. 14:17) Danu Ia ese eda dika na e gwautaomu. Salamo e torea tauna na eto: “[Iehova] e, oi na namo, oi na dika o gwau taomu.” (Sal. 86:5) Ta diba momokanimu, “Iehova ese ḡau namona ta se ruamu, e raka maoromaoromu taudia ediai.”​—Sal. 84:11.

Ita na Dirava heida-idana ai e karada dainai, taunimanima namodia ai baitala diba bona kara namodia baita kara. (Gen. 1:27) Una dainai, Dirava na ena Hereva amo e hagoadadamu, “kara namo ikarana dalana ba tahua.” (Isa. 1:17) To edena dala ai kara namo ikarana dalana baita tahua? Mani ini dala toi aita herevalai.

Ginigunana na, Dirava baita noia ena lauma helaḡa amo baine duruda mai momokanida ida kara namodia baita hahedinarai. (Gal. 5:22) Oibe, Dirava ena lauma ese baine duruda diba, namo baita ura henia bona dika baita dadaraia. (Rom. 12:9) Baibul na e gwaumu, Iehova ese ‘kara namodia bona hereva namodia iboudiai lalodiai baine hagoadamui.’​—2 Te. 2:16, 17.

Iharuana na, namona na Dirava ena Hereva baita duahia. Unu amo Iehova na ena “dala namodia iboudiai” baine hadibada bona baine haheḡaeḡaeda ‘kara namo iboudiai ikaradia ai baita kwalimu.’ (Her. 2:9; 2 Ti. 3:17) Ita kudouda na dava bada kohudia ta udamu mauana na heto. Baibul ta duahiamu bena ta laloa dobumu neganai, ḡau namodia na kudouda ai ta atomu, maua lalonai dava bada kohudia ta atomu na heto, gabeai baine duruda helaoreana.​—⁠Luk. 6:45; Efe. 5:9.

Ihatoina be, baita hekwarahi “dika basita haḡoia, a namo hari.” (3 Ioa 11) Baita tohotohodia taudia momo na Baibul ese e herevalaidia. Momokani, Iehova bona Iesu na haheitalai hereadaedia. To kara namodia e hahedinarai taudia ma haida danu baita lalodia. Idia rarua na Tabita bona Banaba. (Apos. 9:36; 11:22-24) Baibul ai edia sivarai bo stadilaimu neganai, edia haheitalai namona ese be durumu dibamu. Emu famili eiava kongrigeisin ai haida idurudia daladia ba lalo. Bona Tabita bona Banaba ese haida e kara namo henidia dainai e davari hahenamodia ba lalo. Edia haheitalai namona amo ḡau momo bo dibamu.

Hari ina negai, kara namodia e hahedinaraimu taudia baita lalodia danu. Heḡereḡere, kongrigeisin lalodiai e ḡaukara goadamu bona ‘kara namo e  ura heniamu’ elda taudia baita lalodia. Danu, abidadama taihudia na edia kara bona hereva amo ‘kara namo e hahedibalaimu.’ (Tit. 1:8; 2:3) Taihu Roslyn na eto: “Turagu na ḡau haida e karamu kongrigeisin ai haida baine durudia bona baine hagoadadia. Edia hekwakwanai e lalomu bona harihari ḡaudia maraḡidia e henidiamu eiava dala ma haida ai e durudiamu. Na laloamu ia na taihu namo hereana ta.”

Iehova na ena taunimanima e hagoadadiamu ‘namo bae tahua.’ (Amo. 5:14) Unu baita kara tomamu neganai, iena taravatu baita ura henidiamu bona kara namodia baita karamu.

Haida baita kara namo henidia anina na dia dava bada kohudia baita heni eiava idia daidiai ḡau badadia haida baita kara. Ina haheitalai mani aita laloa: Tubutubu ḡauna ta baine tubu totona, ita na dia nega tamona mo ranu bada herea baita heniamu, to ranu sisina amo baita dairia louloumu. Una heḡereḡerena, bema haida idurudia totona ḡau maraḡidia haida baita kara, ita na kara namo ta hahedinaraiamu.

Baibul ese e haḡanidamu kara namodia ikaradia ai baita “heḡereḡere” bona baita “noho heḡaeḡae.” (2 Ti. 2:21; Tit. 3:1) Bema ta dibamu dekeda tauna ta na e dabumu, dala baita tahu ‘ena namo bona goada ihavarana’ totona baita durua. (Rom. 15:2) Reana dekedai miana ḡauna ta baita henia. (Her. 3:27) Eiava ta baita boiria baita aniani hebou eiava baita hahegoada heheni. Bema mai dibada ta na gorere, kadi ta baita siai henia, baita vadivadia eiava baita rini henia. Oibe, dala idauidau ai “hereva namodia baita gwaurai, taunimanima lalodia baita hapararalai, bena bae kamonai taudia ese harihari-bada bae abia.”​—Efe. 4:29.

Iehova heḡereḡerena, ta uramu taunimanima iboudiai baita kara namo henidia. Una dainai taunimanima toadia basita lalo, to iboudiai baita kara henidia heḡereḡere. Unu baita kara toma dalana namona ta na, Basileia sivaraina namona baita harorolaia. Iesu ena haheḡani heḡereḡerena, e hadikadamu taudia danu baita kara namo henidia. (Luk. 6:27) Haida baita kara namo henidia na mai anina bada, badina “kara unuhetomadia na asi taravatudia.” (Gal. 5:22, 23) Ena be mai eda hekwakwanai eiava haida ese bae hahisida to eda kara namodia na dounu baita hahedinarai, badina una ese haida baine veridia diba, hereva momokani bae abia dae bona Dirava bae imodaia.​—1 Pe. 3:16, 17.

Tau namona na “ena kara huahuadia amo” hahenamo e davarimu. (Her. 14:14) Hahenamo haida be dahaka? Haida ta kara namo henidiamu neganai, idia ese danu e kara namo henidamu. (Her. 14:22) Ena be haida ese bae kara auka henidia, to dounu baita kara namo henidia, una ese lalodia bae haidau diba bona bae kara namo henida danu.​—Rom. 12:20.

Tadikaka bona taihu momo na e gwaumu kara namodia ese idia na e durudia dainai dika e dadarai. Nancy enai e vara ḡauna mani a laloa. Ia na eto: “Lau na tubu daeva neganai, haida na asi na lalodiava, kara mirodia na karava, bona asina hematauraiva. To Dirava ena taravatu namodia na dibadia bona na badinava neganai, na moaleva. Hari, sibogu egu kara na biagumu.”

Kara namodia baita kara badina badana na, Iehova baita hamoalea. Ena be momo ese ta karamu ḡaudia na asie itamu to Iehova ese unu na e itamu. Ta karamu bona ta lalomu ḡau namodia iboudiai na mai dibana. (Efe. 6:7, 8) Edena dalai e hanamodamu? “Tau namona ese harihari-bada na Iehova ena amo e abiamu.” (Her. 12:2) Una dainai, namona na hanaihanai kara namodia baita hahedinaraia. Iehova ena gwauhamata binai, “kara namo taudia ese hairai bona hemataurai bona maino bae davari.”​—Rom. 2:10.