1. Dahaka dainai Iesu ese Iehova e noia ena hahediba baine naridia?

IESU ena hanuaboi ginigabena ai, ia na ena hahediba ese bae davari hekwakwanaidia e lalodiava. Ia ese turana e lalokau henidiava dainai, Tamana e noia “dika tauna ena amo baine hamauridia.” (Ioa. 17:14, 15) Iesu na mai dibana guba bainela murinai, Satana Diabolo na be uramu Iehova e hesiai heniamu taudia baine tuari henidia. Una dainai, Iehova ena taunimanima ese heduru bae abi na namo.

2. Ede ta diba tomamu Iehova ese eda ḡuriḡuri na be haerelaidiamu?

² Iehova ese Iesu ena ḡuriḡuri na e haerelaia, badina Ia ese Natuna na e lalokau heniamu. Bema Iehova ihamoalena totona baita hekwarahimu, ia ese ita danu be lalokau henidamu, bona ena heduru bona henari totona baita ḡuriḡurimu neganai be kamonaimu. Iehova na ruma bese Kwarana bona ena bese na e lalodiamu dainai, ia ese natuna na hanaihanai be naridiamu, Ia ladana bona ena kara bae dika garina!

3. Dahaka dainai, hari Iehova ena hegima baita abia na namo?

³ Hari Iehova ena hegima baita abia na namo, dia guna heḡereḡerena. Satana na guba amo e tahoa dobi dainai “e badu dikadikamu.” (Apok. 12:12) Ia ese haida lalodia e animu, unu amo bae laloa e daḡedaḡe henidamu karana na ‘Dirava isiaina e lao henimu’ karana ta. (Ioa. 16:2) Ma haida, Dirava asie abia daemu taudia, ese e daḡedaḡe henidamu badina tanobada amo ita na ta idaumu. Herevana dahaka badi dainai ta hisihisimu, to baita lalogoada diba. Dahaka dainai? Badina Dirava ena Hereva na e gwa: “Lohiabada na vada momokani; bena ia ese baine haginimui tutuka-tutuka, dika amo baine hamaurimui.” (2 Tes. 3:3) Edena dalai Iehova ese ita e hamauridamu o e gimadamu? Mani dala rua aita herevalai.

4. Efeso 6:13-17 heḡereḡerena, Iehova be dahaka e heni ita baine gimada totona?

⁴ Iehova ese tuari dabuana ta e heni unu amo Satana baita laoa ahu diba. (Efeso 6:13-17 ba duahi.) Ina lauma tuari dabuana na goada bona namo herea! To una dabua ese baine gimada totona, namona na una dabua kahana iboudiai baita hahedokilai​—bona basita kokidia. Una dabua kahana idauidau ese dahaka e laulaulai? Mani aita dibadia namonamo.

5. Hereva momokani beletana be dahaka, bona dahaka dainai baita karaia na namo?

⁵ Hereva momokani beletana ese Dirava ena Hereva, Baibul, lalonai e miamu hereva momokanidia e laulaulaia. Dahaka dainai ina beleta baita karaia na namo? Badina Satana na “koikoi idoidiai tamadia.” (Ioa. 8:44) Laḡani tausen momo lalodiai koikoi karana e manadalaia bona ia ese “tanobada idoinai e koiamu”! (Apok. 12:9) To Baibul lalonai hereva momokanidia ese baine gimada, Satana ese basine koida totona. Una laulau dalanai e gwauraia beletana be ede baita karaia toma? Iehova sivaraina momokanidia baita diba, “lauma ai bona momokani ai” baita tomadiho henia, bona ḡau iboudiai mai momokanida ida baita kara.​—Ioa. 4:24; Efe. 4:25; Heb. 13:18.

6. Kara maoromaoro keme dabuana be dahaka, bona dahaka dainai baita hahedokilaia?

⁶ Kara maoromaoro keme dabuana ese Dirava ena kara maoromaoro daladia e laulaulai. Dahaka dainai keme dabuana baita hahedokilaia? Keme dabuana ese tuari tauna kudouna e gimaiamu heḡereḡerena, kara maoromaoro keme dabuana ese laulau dalanai ita kudouda o laloda na ina tanobada ena heveri ḡaudia amo baine gimaia diba. (Her. 4:23) Iehova na e uramu mai kudouda idoinai ida baita hesiai henia. (Mat. 22:36, 37) Una dainai Satana na e uramu ina tanobada ese e halasimu ḡaudia​—Iehova ese e inai henimu ḡaudia​—baita ura heni. (Iak. 4:4; 1 Ioa. 2:15, 16) Bona bema una na se ḡaukaramu, ia ese daḡedaḡe karana amo be hahisidamu, Iehova ena taravatu baita utua totona.

7. Kara maoromaoro keme dabuana be ede baita hahedokilaia toma?

⁷ Kara maoromaoro keme dabuana na baita hahedokilaia diba, bema Iehova ena taravatu namo bona dika ai baita abi dae bona unu taravatu heḡereḡeredia baita mauri. (Sal. 97:10) Reana haida na be laloamu, Iehova ena taravatu na a’auka. Bema ita ese eda mauri lalonai Baibul ena hahekau herevadia basita badinamu, ita na vaitani tuari tauna ese tuari lalonai kemena dabuana e kokiamu badina e laloamu mai metauna. Una na kavakava karana! Iehova e lalokau heniamu taudia ediai, iena haheḡani na “dia memetau,” to mauri e havaraiamu.​—1 Ioa. 5:3.

8. Aeda palapaladiai sivarai namona iseuna baita kumilaia anina be dahaka?

⁸ Paulo ese danu e haḡanidamu aeda palapaladia ai sivarai namo mainona iseuna baita kumilaia. Eiava, baita gwaumu, hanaihanai baita heḡaeḡae, Basileia sivarai namona na baita harorolaia. Baibul ena hereva na ma haida ediai ta herevalaiamu neganai, eda abidadama na e hagoadaiamu. Tanobada heḡeḡemadai Iehova ena taunimanima na dala e tahumu sivarai namona bae harorolaia​—ḡaukara gabudiai, skuli ai, bisnes gabudiai, bona ruma ta ruma ta ai, stoa ai, varavara e vadivadi henidiamu neganai, e davaridiamu taudia ediai, bona rumai e nohomu negadiai​—na hahegoada ḡauna. Bema gari dainai haroro ḡaukara baita hadokoa, ita na vaitani tuari  tauna na tuari lalonai ena tamaka baine koki na heto; aena na baine bero haraḡa diba. Una dainai, bae lasia tao diba, bona e gunalaiamu tauna ena haheḡani na basine badinaiamu.

9. Dahaka dainai abidadama kesina baita huaia na namo?

⁹ Abidadama kesina ese Iehova ta abidadama heniamu karana e laulaulaia. Ta abia dae momokanimu ia ese ena gwauhamata na be haḡuḡurudiamu. Una abidadama ese be durudamu “tau dikana ena diba lahidia” baita habodo diba. Dahaka dainai una abidadama kesina baita huaia na namo? Badina una ese be durudamu aposteit edia hahediba herevadia ese basie hakauda kereremu, eiava hereva momokani e gwauraia dikamu taudia edia hereva ese basie hagaridamu. Bema abidadama na lasi, Iehova ena taravatu iutuna karanai laloda be verimu neganai, basita goadamu. Danu, bema eda ḡaukara gabunai o skuli gabunai eda abidadama dainai baita gini goadamu neganai, ita ese eda kesi na ta huaiamu. (1 Pet. 3:15) Dava bada moni ḡaukarana ta dadaraiamu badina eda tomadiho karana e hadikaiamu negadiai, ita ese eda kesi na ta huaiamu. (Heb. 13:5, 6) Bona ena be daḡedaḡe ta davarimu, to dounu Iehova ta hesiai heniamu negadiai, ita na eda kesi ese e gimadamu.​—1 Tes. 2:2.

10. Hahemauri kwara ḡauna be dahaka, bona dahaka dainai baita karaia?

 ¹⁰ Hahemauri kwara ḡauna na Iehova ese e henida helarona​—mase amo baine hamaurida bona ena ura e karaiamu taudia ahudia baine heni helarona. (1 Tes. 5:8; 1 Tim. 4:10; Tito 1:1, 2) Kwara ḡauna ese tuari tauna kwarana e gimaiamu heḡereḡerena, hahemauri helarona ese eda lalohadai karana e gimaiamu. Edena dalai? Helaro dainai Dirava ena gwauhamata baita lalodia hanaihanaimu bona be durudamu hekwakwanai baita lalodia maoromaoromu. Ina kwara ḡauna be ede baita karaia toma? Baita karaia totona eda lalohadai na Dirava ena lalohadai ida bae heḡereḡere. Heḡereḡere, ita ese asie mia daudaumu kohudia na basita laro, a Dirava mo baita laroa.​—Sal. 26:2; 104:34; 1 Tim. 6:17.

11. Lauma ena dare be dahaka, bona dahaka dainai baita ḡaukaralaia?

¹¹ Lauma ena dare na Dirava ena Hereva, Baibul. Una dare na mai siahuna koikoi iboudiai baine utudia bona taunimanima na hahediba koikoi bona idia ese e manadalai kara kereredia amo baine ruhadia diba. (2 Kor. 10:4, 5; 2 Tim. 3:16, 17; Heb. 4:12) Una dare iḡaukaralaina namonamo karana na siboda eda stadi, bona Dirava ena orea amo ta abimu treininidia amo ta dibamu. (2 Tim. 2:15) Iehova ese una tuari dabuana bona ita igimada ḡauna goadana ma ta danu e henida. Una be dahaka?

12. Daidia edia amo heduru baita abi, bona dahaka dainai?

¹² Mai ena diba tuari tauna na mai dibana ia sibona ese tuari oreana badana na basine hadarerea dibamu; ia ese bamona edia heduru baine abi na namo. Una heḡereḡerena, ita siboda ese Satana bona ia murinai e rakamu taudia na basita tuari henidia dibamu; ita ese tadikakada bona taihuda edia heduru baita abi na namo. Iehova ese eda “orea taudia” o tadikaka oreana e heni, idia ese bae duruda diba.​—1 Pet. 2:17.

13. Heberu 10:24, 25 heḡereḡerena, hebou baitala ena namo be dahaka?

¹³ Heduru baita abi dalana ta na eda hebou baitala. (Heberu 10:24, 25 ba duahi.) Nega haida ita iboudai na ta lalomanokamu, to hebou ilao henina karana ese e hagoadadamu. Tadikaka bona taihu edia haere namodia ese e hagoadadamu. Baibul amo e henimu tok bona haheitalai idauidau ese laloda na e hagoadaiamu Iehova baita hesiai henia. Bona hebou vairadiai bona muridiai eda herevahereva karadia ese e hagoadadamu. (1 Tes. 5:14) Bona eda hebou ese dala e kehoamu haida idurudia karana amo e maimu moalena baita mamia. (Apos. 20:35; Roma 1:11, 12) Danu eda hebou ese e durudamu haroro bona hahediba taudia namodia ai baitala. Heḡereḡere, eda Hahediba Toolbox ai e uda tuludia iḡaukaralaidia daladia e hadibadamu. Una dainai kongrigeisin heboudia totodia ba heḡaeḡae namonamo. Hebou lalonai, ba kamonai namonamo. Hebou murinai, o diba ḡaudia ba badina. Unu bo kara tomamu neganai, “Keriso ena tuari tauna namona” ai bo laomu.​—2 Tim. 2:3.

14. Ita be dahaka heduru ḡauna ma ta e henida?

¹⁴ Danu ita na aneru mai goadadia daha daha ese e durudamu. Mani aneru tamona ese baine karaia ḡauna a laloa! (Isa. 37:36) Bona hari aneru edia tuari oreana goadana ta ese baine kara diba ḡaudia a lalo. Tau ta o demoni ta ese Iehova ena tuari oreana basine hadarerea diba. Iehova na siahu idoinai Diravana dainai be durudamu neganai, inaida na basie kwalimu dibamu  ena be idia na momo herea. (Hah. 6:16) Una na momokani! Bema ḡaukara taudia, o skuli heboumu taudia, o murimuri varavaradia edia hereva o kara ese baine hagarimu neganai, una ba laloa. Ba helalotao ina tuari lalonai oi na dia sibomu. Oi na Iehova ena hahekau dalana o badinaiamu.

15. Isaia 54:15, 17 heḡereḡerena, dahaka dainai Iehova ena taunimanima ududia na basie kou diba?

¹⁵ Satana ese e biaguamu tanobadana na badi momo daidiai be inai henidamu. Politikol karadia amo ta gini sirimu, bona asita tuarimu. Dirava ladana ta harorolaiamu, ena Basileia, maino helarona ihavarana ḡauna, ta haripiulaiamu, bona ena kara maoromaoro taravatudia ta badinamu. Ta hahedinaraiamu, tanobada lohiana na koikoi bona ala-ala tauna. (Ioa. 8:44) Bona taunimanima ta hadibadiamu Satana ena tanobada na kahirakahira be oremu. Satana bona ia murinai e rakamu taudia ese ita ududa na basie kou dibamu. To, ita ese dala idauidau ai Iehova ta heatolaiamu! Ena be Satana na mai ena siahu, to ia ese Basilaia sivaraina na se kouamu tanobada heḡeḡemadai taunimanima iboudiai ese bae kamonaia. Una ese e hahedinaraiamu Iehova ese ita na e gimadamu.​—Isaia 54:15, 17 ba duahi.

16. Iehova ese hisihisi badana lalonai ena taunimanima be ede be hamauridia tomamu?

¹⁶ Dahaka be vairai be varamu? Hisihisi badana lalonai, Iehova ese dala rua amo be hamauridamu. Ginigunana, Ia ese tanobada gavamanidia be doridiamu tomadiho koikoi ibounai be haoreamu neganai, ena kamonai hesiai taudia na be hamauridiamu. (Apok. 17:16-18; 18:2, 4) Bena, Satana ena tanobada kahana oredia na Aramagedono ai be haorediamu neganai, ena taunimanima na be hamauridiamu.​—Apok. 7:9, 10; 16:14, 16.

17. Edena dalai hahenamo baita abimu bema Iehova baita hakahikahiamu?

¹⁷ Iehova baita hakahikahiamu neganai, Satana ese basine hadikadamu. Ia hari be haorea vaitanimu. (Roma 16:20) Una dainai, tuari dabuana idoinai ba hahedokilaia​—bona basio kokia! Ina tuari ai sibomu basio tuari. Tadikakamu bona taihumu ba kahadia. Bona Iehova ena hahekau herevadia ba badina. Unu bo kara tomamu neganai, bo abia dae momokanimu Tamamu lalokauna gubai ese be hagoadamumu bona be gimamumu.​—Isa. 41:10.