1-2. Dirava ese eda tomadiho karana baine abia dae totona, dahaka baita kara be namo?

 INA hereva “tomadiho” o kamonaimu neganai, dahaka o lalomu? Reana tadikaka ta o laloamu, ia na ena bedi badinai e tui diho bona e ḡuriḡurimu. Eiava ruma bese ta o laloamu, idia na mai moaledia ida edia ruma bese ena tomadiho e karaiamu.

² Una tadikaka bona ruma bese na Iehova itomadiho henina karadia e karamu. Iehova ese edia tomadiho karana be, be abia daemu, a? Oibe, bema edia tomadiho karana na Iena ura heḡereḡerena bona mai edia lalokau bona hemataurai ida bae karaia. Ita ese Iehova na ta lalokau henia badamu. Mai dibada Ia sibona mo baita tomadiho henia na maoro, bona ta uramu iena harihari ḡauna, ia itomadiho henina karana, na dala maorona ai baita karaia.

3. Ina atikol ai dahaka baita herevalaimu?

³ Ina atikol ai, idaunegai Iehova ese e abia daeva tomadiho dalana baita herevalaiamu, bona hari ina negai Iehova itomadiho henina totona baita kara ḡaudia 8 baita herevalaimu. Unu ta herevalaimu neganai, ita ta ta ese eda tomadiho karana baita hanamoa daladia baita lalodia diba. Danu, tomadiho momokanina ese e hamoaledamu badidia baita herevalaimu.

4. Idaunegai abidadama taudia ese Iehova be edena dalai e matauraia bona e lalokau henia?

⁴ Abidadama tataudia, heḡereḡere Abel, Noa, Abraham, bona Iobu ese Iehova na e matauraiava bona e lalokau heniava. Edena dalai? Idia ese Dirava e badinaiava, e abidadama heniava,  bona boubou ḡaudia e heniva. Baibul ese edia tomadiho lalonai e karava ḡaudia iboudiai na se herevalai. To idia na mai kudoudia ibounai ida Iehova e matauraiava, bona Iehova ese edia tomadiho karana na e abia dae. Gabeai, Iehova ese Mose ena Taravatu na Abraham ena bese e henidia. Unu taravatu bona taravatu momo lalodiai Iehova ese e abi daeva tomadiho daladia e herevalai.

5. Iesu e mase bona e toreisi lou murinai, tomadiho momokanina ai dahaka sensi e vara?

⁵ Iesu e mase bona e toreisi lou murinai, Iehova ese taunimanima na se haḡanidia Mose ena Taravatu bae badinaia. (Roma 10:4) Kristen taudia ese taravatu matamatana, “Keriso ena taravatu” bae badinaia. (Gal. 6:2, NWT) Una “taravatu” bae badinaia dalana na, Iesu ena haheitalai bae tohotohoa bona ena hahediba herevadia bae badina, to dia una taravatu bae laloatao bona dahaka bae kara bona dahaka basie kara taravatudia idauidau bae ato. Hari negai danu, Kristen taudia na e ḡaukara goadamu Keriso bae tohotohoa, unu amo Iehova bae hamoalea bona “goada matamata” bae abia diba.​—Mat. 11:29, NWT.

6. Ina atikol ese ita be ede be duruda tomamu?

⁶ Eda tomadiho karadia ta ta baita herevalaimu neganai, sibomu ba henanadai, ‘Egu tomadiho karana lalonai lau be dahaka na kara?’ Danu reana ba henanadai, ‘Egu tomadiho karana baina hanamoa diba, a?’ Emu tomadiho karana lalonai o karamu ḡaudia daidiai ba moale na namo, to danu Iehova ba noia baine durumu ḡau haida ba hanamo totona.

7. Iehova ese mai kudouda idoinai ida ta gwauraimu ḡuriḡuridia be ede e lalodia tomamu?

⁷ Iehova ta ḡuriḡuri heniamu neganai, ia ta tomadiho heniamu. Baibul ese eda ḡuriḡuri na guna kalaga helaḡana bona gabeai dubu helaḡa ai e bouboulaiava muramura mai bonana namona ida e haheḡereḡerea. (Sal. 141:2) Una muramura mai bonana namona na Dirava ese e moalelaiava. Una heḡereḡerena, mai kudouda idoinai ida ta gwauraiamu ḡuriḡurina na ia ese be “moalelaiamu,” ena be ḡuriḡuri kwadoḡina baita gwauraiamu. (Her. 15:8; Deu. 33:10) Badi namona dainai baita abia dae ḡuriḡuri amo eda lalokau bona tenkiu karana baita hahedinaraiamu neganai Iehova na be moalemu. Ia na e uramu eda lalohekwarahi, ta laromu ḡaudia, bona eda ura na ia baita hamaorolaia. Iehova do so ḡuriḡuri henia neganai, ba gwaurai herevadia na ba haerodia namonamo guna. Unu bo kara tomamu neganai, Tamamu gubai enai bo gwauraiamu ḡuriḡurina na “muramura mai bonana” namona na heto.

8. Edena negai Dirava baita hanamoa diba?

⁸ Iehova ta hanamoamu neganai, ia ta tomadiho heniamu. (Sal. 34:1) Iehova ena kara bona ḡaukara hereadaedia na ma haida ediai ta herevalaimu neganai, ia ta hanamoamu. Iehova ta tenkiu heniamu dainai ena sivarai na ta herevalaiamu. Nega baita atomu Iehova ena kara namodia​—ita daidai e kara ḡau namodia iboudiai​—baita lalodia dobumu neganai, baita itaiamu Ia baita hanamoa badidia na momo. Haroro ḡaukara ta karaiamu neganai, “Dirava iheatolaina na eda boubou ḡauna ai” ta halaoamu bona “ududa bibinadia ese ia ladana” e imodaiamu. (Heb. 13:15) Iehova do asita ḡuriḡuri henia neganai, baita gwaurai herevadia baita haerodia namonamo guna heḡereḡerena, haroro ḡaukara ai baita hereva henidia taudia ediai baita gwaurai herevadia na baita haerodia namonamo guna. Ta uramu “Dirava iheatolaina” na eda boubou ḡauna hereadaena. Una dainai, mai kudouda idoinai ida ma haida ediai hereva momokani baita herevalaia.

9. Idaunegai Israel taudia heḡereḡeredia, hebou ilao henina karana amo dahaka namo baita abimu? Emu ekspiriens ta ba herevalaia.

 ⁹ Hebou ta laomu neganai, Iehova ta tomadiho heniamu. Idaunega Israel taudia na Dirava ese e hamaorodia: “Laḡani ta lalonai emui maruane iboudiai na nega toi Iehova, emui Dirava, vairanai bae hedinarai, ia ese baine abia hidi gabuna ai.” (Deu. 16:16) Edia ruma bona uma bae rakatani bona ta ese basine itadia tao. To, Iehova ese e gwauhamata henidia, eto: “Asi tauna ta ese danu emui tano baine hekise-hekise henia, . . . Iehova emui Dirava vairanai ba dara dae bona ba toma henia diho negadia ai.” (Eso. 34:24) Israel taudia ese Iehova na e abidadama henia momokani dainai, laḡani ta ta ena aria negadia ai e laova. Una dainai, hahenamo momo e abi; idia ese Dirava ena Taravatu e lalopararalaia namonamo, ena kara namodia e lalodia dobu, bona tadikakadia ida hebamo namona e moalelaia. (Deu. 16:15) Ita danu hahenamo unu bamodia baita abimu, bema baita hekwarahimu Kristen heboudia baita laomu. Danu baita heḡaeḡae namonamomu bona haere namodia baita henimu neganai, Iehova na be moalemu.

10. Dahaka dainai eda tomadiho ai ane abi karana baita laloa bada?

¹⁰ Tadikaka taihu ida ane ta abi heboumu neganai, Iehova ta tomadiho heniamu. (Sal. 28:7) Israel taudia ese edia tomadiho lalodiai ane abi karana na e laloa badava. King David ese Levi taudia 288 e abidia hidi dubu helaḡa ai ane bae abi. (1 Sis. 25:1, 6-8) Hari ina negai, Dirava ihanamona anedia ta abimu neganai, eda lalokau ienai ta hahedinaraiamu. Ane baita abi namonamo eiava lasi na dia ḡau badana. Mani ina haheḡereḡere a laloa: Ta herevamu neganai, “ta hekwakwanai louloumu,” to una ese na se koudamu kongrigeisin bona haroro ḡaukara ai baita hereva. (Iak. 3:2) Una heḡereḡerena, ena be baita laloamu gadoda reḡena na dia namo, to una ese basine kouda na namo Iehova ihanamona anedia baita abi totona.

11. Salamo 48:13 heḡereḡerena, dahaka dainai nega baita ato ruma bese ida Baibul baita stadilaia?

¹¹ Baibul ta stadilaiamu bona natuda ediai Iehova ta herevalaiamu neganai, ia ta tomadiho heniamu. Sabati dinana ai, Israel taudia na ḡaukara ta asie karaiava, bona una dina na e ḡaukaralaiava edia hetura karana Iehova ida bae hagoadaia. (Eso. 31:16, 17) Abidadama taudia ese Iehova bona ena kara namodia na natudia e hadibalaidiava. Ita danu, namona na nega baita ato Dirava ena Hereva baita duahia bona baita stadilaia. Una na Iehova ta tomadiho heniamu dalana ta, bona una ese be durudamu Ia baita raka henia kahimu. (Sal. 73:28) Danu eda ruma bese ida Baibul baita stadilaia heboumu neganai, natuda na baita durudia dibamu edia hetura karana Tamada lalokauna ida bae hagoadaia.​—Salamo 48:13 ba duahia.

12. Iehova ese dubu helaḡa lalona ḡaudia e kara taudia edia ḡaukara e laloa dalana amo dahaka ta dibamu?

¹² Tomadiho rumadia ta haginimu bona ta reḡudiamu neganai, Iehova ta tomadiho heniamu. Baibul na e gwaumu dubu helaḡa ihaginina bona lalona ḡaukaradia na “ḡaukara helaḡana.” (Eso. 36:1, 4, NWT) Hari danu, Iehova ese Kingdom Hall bona tomadiho rumadia ma haida ihaginidia ḡaukarana na e laloamu ḡaukara helaḡana. Tadikaka bona taihu haida na nega bada e henimu unu ḡaukara ai. Una Basileia ḡaukarana e duruamu dainai, baita tenkiu henidia na namo, ani? To, idia ese haroro ḡaukarana na dounu e karaiamu. Idia haida na e uramu bae painia. Elda taudia ese unu ḡaukara goadagoada tadikaka bona taihu bae lalodia bada dalana ta na, bema idia na heḡereḡere bae painia neganai, gwaumaoro bae henidia. Ena be konstraksin ḡaukarana ai mai eda diba  eiava lasi, to namona na ita iboudai ese tomadiho rumadia baita haḡoevadia bona baita reḡudia.

13. Basileia ḡaukarana iduruna totona ta henimu kontribiusin be ede baita lalodia toma na namo?

¹³ Eda kontribiusin amo Basileia ḡaukarana ta duruamu neganai, Iehova ta tomadiho heniamu. Israel taudia na aria e laova neganai, imadia asi anidiai Iehova vairanai na basie hedinarai. (Deu. 16:16) Edia noho dalana heḡereḡerenai bae heni diba harihari ḡaudia bae laohai. Unu amo bae hahedinaraia Iehova ese lauma dalanai idia idurudia totona e kara ḡaudia iboudiai na e lalodia badava. Ita be edena dalai baita hahedinaraia Iehova na ta lalokau heniamu bona ta abimu lauma anianidia daidiai ta tenkiu heniamu? Dala ta na, eda kongrigeisin bona tanobada heḡeḡemadai ḡaukarana iduruna totona, eda noho daladia heḡereḡerediai kontribiusin baita heni. Aposetolo Paulo na ini e gwau toma: “Tau ta lalona baine haraḡa, iabi-daena be enai e miamu ḡauna heḡereḡerena, dia e dabumu ḡauna heḡereḡerena.” (2 Kor. 8:4, 12) Iehova ese mai kudouda idoinai ida ta henimu kontribiusin na e laloa badamu, ena be una na maraḡi.​—Mar. 12:42-44; 2 Kor. 9:7.

14. Hereva Lada-isidia 19:17 heḡereḡerena, e dabumu tadikakadia ta durudiamu karana be Iehova ese ede e laloa tomamu?

¹⁴ E dabumu tadikakadia bona taihudia ta durudiamu neganai, Iehova ta tomadiho heniamu. Iehova na e gwauhamata Israel taudia ese ogoḡami tauna ta bae durua neganai, Ia ese na be hanamodiamu. (Deu. 15:7, 10) Oibe, e dabumu tadikakana ta, ta duruamu neganai, Iehova ese e laloamu una na eda harihari ḡauna Ienai. (Hereva Lada-isidia 19:17 ba duahia.) Heḡereḡere, Paulo na dibura ruma ai e nohova bona Filipi Kristen taudia ese harihari ḡauna ta e siaia neganai, ia na e gwa una harihari ḡauna na ‘Dirava ese e abia daemu mai moalena ida.’ (Fili. 4:18) Emu kongrigeisin ai tadikaka taihu ba lalodia, bena sibomu ba henanadai, ‘Lau be daika baina durua diba?’ Iehova na be moalemu bema ita ese eda nega, goada, diba, bona kohu baita ḡaukaralaimu e dabumu taudia baita durudiamu. Ienai una na iseda tomadiho kahana ta.​—Iak. 1:27.

15. Tomadiho momokanina ai eda nega bona goada baita ḡaukaralai na namo, to dahaka dainai una na dia maduna metauna?

¹⁵ Tomadiho momokanina ai eda nega bona goada baita ḡaukaralai na namo. To, unu baita kara toma na dia maduna metauna. (1 Ioa. 5:3) Dahaka dainai? Badina ita na Iehova ta lalokau heniamu dainai ta tomadiho heniamu. Mani a laloa, maraḡina ta na e uramu ḡau ta tamana baine henia. Reana hora momo lalodiai laulau ta be toreamu. Ia ese una laulau itorena ai nega bada be haoreamu karana na basine laloamu, badina tamana na e lalokau heniamu, bona una harihari ḡauna tamana be heniamu dainai e moalemu. Una heḡereḡerena, Iehova ta lalokau heniamu dainai, mai moaleda ida eda nega bona goada ta ḡaukaralaimu Ia baita tomadiho henia.

16. Heberu 6:10 heḡereḡerena, Iehova ese ia ihamoalena totona ta karamu ḡaudia be ede e lalo tomamu?

¹⁶ Lalokau tama sina na se lalomu natudia ta ta ese be henidiamu harihari ḡaudia na heheḡereḡere. Idia na mai dibadia natu ta ese be karaiamu ḡauna na idau ma natu ta ena amo. Una heḡereḡerena, Tamada gubai ese ita ta ta eda noho daladia na e lalopararalaimu. Reana oi be ḡau momo bo kara dibamu to oi mai dibamu bona o lalokau henidiamu taudia momo be dia unu bamona. Eiava ḡau momo na basio kara dibamu, badina reana laḡanimu na bada, mai emu gorere, o emu ruma bese madunadia  na momo. To basio lalomanoka. (Gal. 6:4) Iehova ese emu ḡaukara na basine lalodia boiomu. Bema mai kudoumu idoinai ida bona badi maorona dainai bo karamu, Ia na be moalemu. (Heberu 6:10 ba duahia.) Iehova na kudoumu ai e miamu ḡaudia na mai dibana. Ia na e uramu oi na ia itomadiho henina totona o karamu ḡaudia na ba moalelai.

17. (a) Bema eda tomadiho karadia haida baita kara na auka, dahaka baita kara diba? (b) Maua ladana “ Emu Moale Ihabadana Ḡaudia” ai e hahedinarai ḡaudia ta ese oi be ede e durumu toma?

¹⁷ Bema eda tomadiho karana ta, heḡereḡere siboda eda stadi eiava haroro ḡaukara baita karaia na auka, dahaka baita kara diba? Bema hanaihanai unu baita karamu, baita moalelaidiamu bona namo baita abimu. Eda tomadiho karadia na eksasais eiava miusik ḡauna ta idibana karana ida baita haheḡereḡerea diba. Bema basita eksasaisimu eiava miusik ḡauna basita gadaralaia louloumu, basita manada haraḡamu. To bema dina ta ta ai baita eksasaisimu eiava miusik ḡauna baita gadaralaiamu be ede bamona? Reana matamanai hora haida mo baita karaiamu, to gabeai una hora na taina ruana baita habadaiamu. Eda hekwarahi ena namo baita itaiamu neganai, baita uramu hanaihanai baita eksasais eiava miusik ḡauna baita gadaralaia bona baita moalelaiamu. Iseda tomadiho karadia ai danu unu baita kara toma, ani?

18. Dahaka baita karaia na mai anina bada, bona dahaka be varamu?

¹⁸ Mai kudouda idoinai ida Iehova baita tomadiho henia na mai anina bada. Bema unu baita kara tomamu, eda mauri na baita moalelaiamu bona baita uramu hanaihanai Iehova baita tomadiho henia. (Her. 10:22) Lalomaino na da ta abia, badina mai dibada Iehova ese ia e tomadiho heniamu taudia na edia hekwakwanai negadiai e durudiamu. (Isa. 41:9, 10) Badi namodia dainai Tamada lalokauna​—e kara ḡaudia iboudiai amo “hairai bona hemataurai” baine abi na maoro Diravana​—ta tomadiho heniamu neganai ta moalemu!​—Apok. 4:11.