1, 2. (a) Iesu do se mase hanuaboina ai, ena hahediba ida dahaka e herevalaiva? (Rau 17 ai laulau ba itaia.) (b) Dahaka dainai baita haroro badina baita laloa na mai anina bada? (c) Dahaka baita herevalaimu?

IESU do se mase hanuaboina ai, ena aposetolo ida e herevahereva daudau, bona e hadibadia ia ese e lalokau henidia badamu. Danu, ia ese vine parabolena e herevalaia, una parabole na atikol ginigunana ai ta herevalaia. Una parabole ai, Iesu ese ena hahediba e hagoadadia, eto “huahuamui momo bae dobi”​—Basileia sivaraina iharorolaina ai bae haheauka.​—Ioa. 15:8.

² To, Iesu ese ena hahediba na dia bae kara ḡaudia mo e hadibadia, to una bae kara badidia danu e hadibadia. Ia ese haroro ḡaukara bae karaia badidia e herevalai. Dahaka dainai unu badi baita lalodia na mai anina bada? Baita haroro hanaihanai badidia baita dibamu neganai, una ese be hagoadadamu mai haheaukada ida “bese iboudiai” baita haroro henidia. (Mat. 24:13, 14) Una dainai, namona na Baibul ai haroro ḡaukara baita karaia badidia hani baita herevalai. Bona Iehova ena harihari ḡaudia hani baita herevalaimu, unu ese be durudamu basita hesiku ela bona huahuada bae dobi.

3. (a) Ioane 15:8 ai e hahedinaraia, ita ta haroromu badina be dahaka? (b) Iesu ena parabole ai vine huahuadia ese dahaka e laulaulaia, bona dahaka dainai una na maoro?

³ Haroro ḡaukara baita karaia badina badana na, taunimanima vairadiai Iehova baita heatolaia bona ladana baita hahelaḡaia. (Ioane 15:1, 8 ba duahi.) Mani a laloa, Iesu ese Tamana, Iehova, na imea ireḡuna tauna eiava biru tauna ida e haheḡereḡerea, ia ese vine huahuadia e hatubumu. Iesu na sibona e hegwaurai ia na vine, bona ena hahediba taudia na rigi. (Ioa. 15:5) Una dainai, vine huahuadia ese Basileia sivaraina e laulaulaia, Keriso murinai e rakava taudia ese e harorolaiava sivaraina buna. Iesu ese ena aposetolo e hamaorodia: “Tamagu iheatolaina binai, huahuamui momo bae dobi.” Vine audia ese huahua namodia e havaramu neganai, una ese imea ireḡuna tauna e hanamoamu, una heḡereḡerena, Basileia sivaraina ta harorolaia goadagoadamu neganai, Iehova ta hanamoamu eiava ta heatolaiamu.​—Mat. 25:20-23.

4. (a) Ededia dala ai Dirava ladana baita hahelaḡaia? (b) Dirava ladana o hahelaḡaiamu dainai emu hemami be ede bamona?

⁴ Edena dala ai eda haroro ḡaukara ese Dirava ladana e hahelaḡaiamu? Ita ese Dirava ladana na basita hahelaḡaia herea, badina ia ladana na vada helaḡa. To mani peroveta tauna Isaia ena hereva a laloa, eto: “Iehova Sabaota hari ba gwauraia ‘helaḡa.’” (Isa. 8:13) Dirava ladana na baita hahelaḡaia diba, bema baita laloa Ia ladana ese lada iboudiai e hereadia bona ma haida baita durudia una lada bae hahelaḡaia. (Mat. 6:9) Heḡereḡere, Iehova ena kara hereadaedia bona ena ura taunimanima ediai ta harorolaimu neganai, Dirava ladana ta gimaiamu, Satana ena koikoi bona gwau-edeede karadia ese basie hadikaia helaoreana. (Gen. 3:1-5) Danu, Dirava ladana baita hahelaḡaia dalana ma ta na, baita ḡaukara goada taunimanima baita durudia bena bae laloparara Iehova ese “hairai bona hemataurai bona siahu” baine abi na maoro. (Apok. 4:11) Rune, laḡani 16 e painia tadikakana ta, na eto: “Na dibamu ḡau iboudiai Ihavaradia Tauna na harorolaiamu dainai na moalemu. Una ese e hagoadagumu baina haroro hanaihanai totona.”

5. (a) Ioane 15:9, 10 ai ta haroromu badina be ede e herevalaia toma? (b) Edena dala ai Iesu ese e hahedinaraia haheauka karana na mai anina bada?

⁵ Ioane 15:9, 10 ba duahi. Basileia sivaraina ta harorolaiamu badina iharuana na, mai kudouda idoinai ida Iehova bona Iesu ta lalokau henidiamu. (Mar. 12:30; Ioa. 14:15) Iesu ese ena hahediba e hamaorodia ena “lalokau ai [bae] noho.” Dahaka dainai? Badina ta na Keriso ena hahediba tauna korikorina ai bainela neganai, baine haheauka na namo. Ioane 15:4-10 ai Iesu ese ina hereva “noho” na e gwauraia loulou, unu amo e hahedinaraia haheauka karana na mai anina bada.

6. Edena dala ai baita hahedinaraia ita na ta uramu Keriso ena lalokau ai baita noho?

⁶ Edena dala ai baita hahedinaraia ita na ta uramu Keriso ena lalokau ai baita noho bona ena lalonamo baita abia? Namona na Iesu ena haheḡani baita badina. Una na heḡereḡere, Iesu na e gwaumu, ‘Lau ba kamonai henigu.’ To, Iesu na ita e noidamu ia heḡereḡerena baita kara, eto: “Lau heḡereḡeregu, Tamagu ena haheḡani na badinamu, bena ena lalokau ai na nohomu.” Iesu na haheitalai namona e hahedinaraia.​—Ioa. 13:15.

7. Edena dala ai kamonai karana bona lalokau na e ḡaukara heboumu?

⁷ Iesu ese e hahedinaraia kamonai karana bona lalokau na e ḡaukara heboumu, ia ese matamanai ena aposetolo e hamaorodia: “Egu haheḡani e abi daemu bona e badinamu tauna, ia bunai e lalokau henigumu.” (Ioa.  14:21) Danu, Iesu ena haheḡani heḡereḡerena haroro ḡaukara baita karaia karana amo, eda lalokau Dirava enai baita hahedinaraia, badina Iesu ena haheḡani ese Tamana ena lalohadai e hahedinaraia. (Mat. 17:5; Ioa. 8:28) Eda lalokau unu baita hahedinaraia tomamu neganai, Iehova bona Iesu ese be lalokau henidamu.

8, 9. (a) Haroro ḡaukara baita karaia badina ma ta be dahaka? (b) Dahaka dainai Esekiel 3:18, 19 bona 18:23 ai Iehova ena hereva ese e hagoadadamu dounu baita haroro?

⁸ Haroro ḡaukara baita karaia hanaihanai badina ihatoina na, ta uramu taunimanima baita hadibadia. Baibul ai, Noa na e gwauraia “kara maoromaoro iharorolaina tauna.” (2 Petro 2:5 ba duahia.) Utu-utu do se kau neganai, ia na haroro ḡaukara amo taunimanima e hadibadiava dika na be varamu. Dahaka dainai una sivarai ta herevalaiamu? Iesu na eto: “Badina be una negana ai utu-utu badana do se utua dae, idia na e anianiva, e inuinuva, e headavava, ema bona Noa lagatoi ai e gui kau dinana; matadia asie kani ema bona utu-utu badana e utua dae, bena iboudiai eha dono mamase. Taunimanima Natuna ena mai danu unu baine heto.” (Mat. 24:38, 39) Ena be taunimanima na asie kamonaiva, to Noa na mai ena abidadama ida Dirava ese e henia hahediba herevana e harorolaiava.

⁹ Hari ina negai, Basileia sivaraina ta harorolaiamu karana amo taunimanima ta durudiamu Dirava ena ura bae dibaia. Iehova heḡereḡerena, ta ura dikadikamu taunimanima na una sivarai bae kamonaia bona bae “mauri.” (Esek. 18:23) To danu, ruma ta ta ai bona pablik gabudia ai ta haroromu neganai, taunimanima ta hadibadiamu Dirava ena Basileia na be maimu bona ina tanobada oromana dikana na be haorea vaitanimu.​—Esek. 3:18, 19; Dan. 2:44; Apok. 14:6, 7.

10. (a) Mataio 22:39 ese e hahedinaraia haroro ḡaukara baita karaia badina be dahaka? (b) Filipi ai Paulo bona Sila ese dibura ruma igimana tauna e durua dalana mani a herevalaia.

¹⁰ Haroro ḡaukara baita karaia hanaihanai badina ihahanina bina: Ta haroromu badina dekeda taudia ta lalokau henidiamu. (Mat. 22:39) Una lalokau ese e durudamu dainai asita hesikumu, badina mai dibada taunimanima edia noho dalana be idaumu neganai, reana edia kara na be haidaumu. Aposetolo Paulo bona bamona Sila ediai e vara ḡauna ba laloa. Filipi hanuana ai, idia na inaidia ese dibura rumana ai e atodia. Bena, malokihi ai, tano laga e vara dainai dibura rumana na e heude-heude bona iduaradia na e hekeho. Dibura ruma igimana tauna na e gari badina e laloava dibura taudia iboudiai na vada e heau una dainai sibona baine hahemase eto. To Paulo ese e boi henia: “Sibomu asio heala.” Dibura ruma igimana tauna na e henanadai: “Ede baina kara toma bena mauri baina abia?” Idia ese e hamaoroa: “Lohiabada Iesu bavabiabiraia, bena ba mauri.”​—Kara 16:25-34.

11, 12. (a) Dibura ruma igimana tauna sivaraina amo eda haroro ḡaukara ai dahaka ta dibamu? (b) Dahaka dainai ta uramu baita haroro hanaihanai?

¹¹ Dibura ruma igimana tauna sivaraina  amo haroro ḡaukara be ede baita laloa toma? Mani a laloa: Tano laga e vara murinai dibura ruma igimana tauna na ena lalohadai e haidaua bona heduru e noi. Una heḡereḡerena, haida na guna asie urava Baibul ena hereva bae kamonai, to hari e uramu heduru bae abi badina edia mauri ai hekwakwanai haida e davarimu. Heḡereḡere, haida na edia moni ḡaukara amo e hadokodia bona e lalohisihisimu. Ma haida na edia headava e dikamu. Ma haida na gorere badadia e davarimu, eiava e lalokau heniamu tauna ta e mase dainai e dara dokomu. Unu hekwakwanai e varamu neganai, taunimanima ese mauri anina na e daradaralaiamu. Reana e lalomu, ‘Dahaka baina kara bena baina mauri?’ Taunimanima unu hetomadia baita davaridiamu neganai, be ura dikadikamu sivarai namona bae kamonai.

¹² Una dainai, haroro ḡaukara baita karaia hanaihanaimu neganai, mai eda nega heduru e uramu taudia baita hagoadadia totona. (Isa. 61:1) Charlotte, laḡani 38 ful-taim hesiai ḡaukara e karaia taihuna ta, na eto: “Hari ina negai taunimanima na asi dibadia dahaka bae kara. Una dainai sivarai namo bae kamonai na namo.” Ejvor, laḡani 34 e painia taihuna ta, na eto: “Hari ina negai, taunimanima momo na e lalomanokamu, dia guna heḡereḡerena. Na ura dikadikamu baina durudia. Una ese e hagoadagumu baina haroro.” Momokani, dekeda taudia ta lalokau henidiamu dainai, hanaihanai haroro ḡaukara ta karaiamu!

13, 14. (a) Ioane 15:11 ai edena harihari ḡauna e herevalaia? (b) Iesu ese e abia moalena be ede baita abia toma? (c) Baita abia moalena ese edena dala ai eda haroro ḡaukara baine durua?

¹³ Iesu do se mase hanuaboina ai, ena aposetolo ediai harihari ḡaudia haida e herevalai danu, unu harihari ḡaudia ese bae durudia diba bae haheauka ela bona huahuadia bae dobi. Unu harihari ḡaudia be dahaka, bona edena dala ai bae duruda diba?

¹⁴ Moale. Iesu ese e gwauraia haroro ḡaukara haheḡanina ibadinana karana be maduna metauna, a? Lasi. Iesu ese vine parabolena anina e herevalaia murinai, eto ita na Basileia iharorolaina tauda dainai, baita moalemu. (Ioane 15:11 ba duahia.) Ia ese e hadibada ia e abiava moalena na ita ese danu baita abia. Edena dala ai? Matamanai e herevalaia heḡereḡerena, Iesu na eto, ia na vine bona ena hahediba be rigi. Vine ese rigi e dogodia taomu. Rigi na una vine gabana baine badinaia neganai, vine gabana amo e dihomu ranuna baine abia diba bena baine tubu namonamo. Una heḡereḡerena, Keriso baita badinaia totona, aena gabudia ai baita rakamu neganai, ia ese Tamana ena ura ikarana ai e abia moalena na baita abia dibamu. (Ioa. 4:34; 17:13; 1 Pet. 2:21) Hanne, laḡani 40 mai kahana e painia taihuna ta, na eto: “Haroro ḡaukara na karaiamu murinai na mamiamu moalena ese e hagoadagumu Iehova baina hesiai henia hanaihanai.” Momokani, baita moalemu neganai, una ese be hagoadadamu haroro ḡaukara baita karaia hanahanai, ena be taunimanima basie kamonai.​—Mat. 5:10-12.

15. (a) Ioane 14:27 ai edena harihari ḡauna e herevalaia? (b) Dahaka dainai maino ese baine duruda huahuada bae dobi?

¹⁵ Maino. (Ioane 14:27 ba duahia.) Iesu do se mase hanuaboina ai, ena aposetolo e hamaorodia: “Egu maino name henimui.” Edena dala ai una harihari ḡauna​—iena maino​—ese baine duruda huahuada bae dobi? Baita haheaukamu neganai, mia hanaihanai mainona baita abiamu, badina mai dibada Iehova bona Iesu ese e lalonamo henidamu. (Sal. 149:4; Roma 5:3, 4; Kol. 3:15) Laḡani 45 ful-taim hesiai ḡaukara e karaia tadikakana, Ulf na eto: “Haroro ḡaukara na karaiamu neganai na hesikumu, to una ḡaukara amo  moale korikorina na abiamu bona egu mauri na mai anina bada.” Mia hanaihanai mainona ta abiamu dainai ta moalemu!

16. (a) Ioane 15:15 ai edena harihari ḡauna e herevalaia? (b) Edena dala ai aposetolo taudia na Iesu turana ai baela diba?

¹⁶ Iesu turana ai baitala. Iesu ese ena aposetolo e hamaorodia, “emui moale baine ḡuḡuru,” una murinai e hadibadia sibodia edia ura idadaraina lalokauna bae hahedinaraia na mai anina bada. (Ioa. 15:11-13) Gabeai, eto: “Turagu baina gwauraimui.” Iesu turana ai baitala na harihari ḡauna hereadaena ta! Aposetolo taudia be dahaka bae kara ia turana ai baela totona? Idia na baela bona ‘huahuadia bae dobi.’ (Ioane 15:14-16 ba duahi.) Laḡani rua gunanai, Iesu ese ena aposetolo e hadibadia, eto: “Rakamui ai ba haroro, baoto ‘Guba basileiana vada eme kahira-kahira.’” (Mat. 10:7) Una dainai, ia do se mase hanuaboina ai, e hagoadadia haroro ḡaukara ai bae haheauka na namo. (Mat. 24:13; Mar. 3:14) Iesu ena haheḡani bae badinaia na mai hekwarahina, to bae kwalimu diba bona turana ai baela diba. Edena dala ai? Harihari ḡauna ma ta ese baine durudia.

17, 18. (a) Ioane 15:16 ai edena harihari ḡauna e herevalaia? (b) Edena dala ai una harihari ḡauna ese Iesu ena hahediba e durudia? (c) Ededia harihari ḡaudia ese e hagoadadamu?

¹⁷ Ḡuriḡuri haeredia. Iesu na eto: “Lau ladagu ai Tamada ba noia ḡaudia iboudiai na ia ese baine henimui.” (Ioa. 15:16) Una gwauhamata ese aposetolo taudia na e hagoadadia! * Ena be idia na asie laloparara Iesu na kahirakahira baine mase, to heduru na bae abi diba. Iehova na noho heḡaeḡae edia ḡuriḡuri baine haerelai bona baine durudia Basileia sivaraina bae harorolaia. Bona momokani, Iehova ena heduru e noia neganai, ia ese e durudia.​—Kara 4:29, 31.

¹⁸ Hari ina nega danu unuheto. Bema basita hesiku ela bona huahuada bae dobi, Iesu turana ai baitala diba. Danu, namona na baita abia dae momokani Iehova na noho heḡaeḡae eda ḡuriḡuri baine haerelai, bona baine duruda Basileia sivaraina namona ta harorolaiamu lalonai ta davarimu hekwakwanaidia baita hanaidia totona. (Fili. 4:13) Ta moalemu badina Dirava ese eda ḡuriḡuri e haerelaimu bona Iesu turana ai baitala diba. Unu harihari ḡaudia na Iehova ena amo e maimu dainai, unu ese e hagoadadamu baita ḡaukara goada huahuada bae dobi helaoreana.​—Iak. 1:17.

19. (a) Dahaka dainai haroro ḡaukara baita karaia hanaihanai? (b) Dahaka ese e durudamu Dirava ese e henida ḡaukarana baita haḡuḡurua totona?

¹⁹ Ina atikol ai tame herevalaia heḡereḡerena, haroro ḡaukarana baita karaia hanaihanai, unu amo Iehova baita heatolaia bona ladana baita hahelaḡaia, eda lalokau Iehova bona Iesu ediai baita hahedinaraia, taunimanima baita hadibadia, bona dekeda taudia baita lalokau henidia. Danu, ini harihari ḡaudia hani: Moale, maino, Iesu turana ai baitala, bona eda ḡuriḡuri haeredia ese e hagoadadamu Dirava ese e henida ḡaukarana baita haḡuḡurua totona. Iehova na be moalemu bema be itadamu mai kudouda idoinai ida ta ḡaukara goadamu ‘huahuada bae dobi’ helaoreana!