IESU na e peroveta, ia murinai bae raka taudia na ina nega dokona ai uit ihabouna ḡaukarana badana bae karaia. (Mat. 9:37; 24:14) Mani Ukraine ai hanua ta ladana Transcarpathia ai, Iesu ena hereva e ḡuḡuru dalana a laloa. Una hanua ena badi taonidia ai kongrigeisen na 50 bona pablisa iboudiai na 5,400 mai kahana. * Momokani, unu taoni toiosi ai taunimanima hani amo tamona na Iehova ena Witnes ai e laomu!

Teritori ai taunimanima be ede bamona? Tadikaka ta ladana, Vasile na eto: “Taunimanima ese Baibul na e matauraiamu, hahemaoro maoromaoro karana e laloa badamu, ruma bese e lalodia badamu, bona mai momokanidia ida e heduru hehenimu.” Ma eto: “Ta abi daemu ḡaudia na nega haida asie abi daemu. To Baibul amo ḡau ta bo herevalaiamu neganai, idia na be kamonai namonamomu.”

Momokani, eda tadikaka bona taihu na nega haida e hekwarahiva badina e harorova gabudia ai pablisa na momo herea to taunimanima na dia momo. Heḡereḡere, kongrigeisen ta ai pablisa iboudiai na 134 to edia teritori ai ruma iboudiai na 50! Pablisa be ede e haroro tomava?

Tadikaka bona taihu momo na edia hesiai ḡaukara e habadaia unu amo pablisa dia momo gabudia ela. Laḡanina 90 tadikakana ta, ladana Ionash, na eto: “Emai kongrigeisen ena teritori ai pablisa rua amo tamona ese taunimanima e haroro henidiava. Lau na hanua ai na harorova, to hari egu gorere na bada, danu lau na kilomita 160 heḡereḡerena na laova daudau teritorina. Unuseniai Hungary gado taudia na haroro henidiava.” Pablisa ese edia ura ḡaudia haida e dadarai unu teritori haida ai bae haroro totona. Ionash na eto: “Lau na daba 4 oklok na nogava bona trein ai na guiva, una gabu a laova lalonai, na harorova ela bona adorahi 6 oklok ai, trein amo ma na louva egu noho gabuna. Wiki ta lalonai nega rua eiava toi unu na kara tomava.” Ionash e mamia ena hekwarahi be asi anina, a? Ia na eto: “Una haroro dalana amo moale bada na davaria. Danu na moale badina daudau teritorina amo lau ese ruma bese ta na durua hereva momokani e dibaia.”

Momokani, kongrigeisen iboudiai na dia heḡereḡere unu gabu daudaudia baela totona. To pablisa iboudiai, burukadia danu, na e ḡaukara goadava teritori ibounai bae haḡuḡurua totona. Una dainai, laḡani 2017 ai, unu taoni toiosi ai Memorial ela taudia edia namba e haboua neganai, una ese kahirakahira pablisa edia namba na nega rua e hahanaia​—eiava edia popiuleisen kahana heḡereḡerena. Oibe, herevana edeseniai baita haroro, to “Lohiabada ena ḡaukara lalonai [baita] goada balaheni” na namo.​—1 Kor. 15:58.