“HAHINE.” Nega haida Iesu ese hahine e hereva henidiava neganai, una hereva e gwauraiava. Heḡereḡere, hahine ta na laḡani 18 lalonai doru laoho o doru kwaidu gorerena e abia, bona Iesu ese e hanamoa neganai, ini e gwau toma: “Hahine e, emu doru laoho vada eme maoro.” (Luka 13:10-13) Danu, Iesu na sinana e hereva henia neganai, una hereva “hahine” e ḡaukaralaia​—Baibul negadiai una na hemataurai herevana. (Ioa. 19:26; 20:13) To una e hereaia herevana ma ta danu mia.

Baibul ese hahine haida e herevalaidia neganai, hebogahisi herevana ta e ḡaukaralaia. Iesu ese laḡani 12 lalonai rara moru gorerena e abia hahinena ta e hereva henia neganai, una hereva e ḡaukaralaia. Una hahine Iesu dekena ela karana na dia Dirava ena Taravatu heḡereḡerena​—Taravatu ai na eto unu e gorere tomava tauna na miro. Reana taunimanima na e tomava una gorere dainai ia na haida edia amo bema daudau na namo. (Lev. 15:19-27) To hahine na e ura dikadika baine namo. Ia na “muramura taudia ese e hahisihisiava bona idume ai ena kohu vada e ore, a ia na se namova, ena gorere na e bada e laova.”​—Mar. 5:25, 26.

Hahine na asi reḡereḡena ida hutuma bogaraḡidia amo ela Iesu murinai e gini, bena ena dabua rimuna ai e dau kau. Bena ena rara moru na haraḡa herea e doko! Hahine na e laloava ta na basine dibamu, a Iesu na e henanadai: “Daika ese e daugu toho?” (Luka 8:45-47) Una dainai, hahine na mai garina bona mai heudeheudena ida Iesu vairanai e goru diho, bona “ena kara e hamaorolaia.”​—Mar. 5:33.

Iesu ese una hahine lalona ihagoadana totona, mai hebogahisina ida ini e gwau toma: “Natugu e, ba goada.” (Mat. 9:22) Baibul e diba momo taudia edia hereva heḡereḡerena, Heberu bona Grik gado ai ina hereva, “natugu,” e hahanaia anina ta na “hebogahisi.” Iesu ese una hahine na ma e hagoadaia, eto: “Emu abidadama ese e hamaurimu; mai mainomu ida aola, emu gorere vada eme doko vaitani.”​—Mar. 5:34.

“Natugu.” Israel ai taḡa tauna Boa ese Moab hahine Ruta e hereva henia neganai, una hereva e gwauraia. Ruta na e daradarava badina asi dibana tauna ta ena tano ai bali anidia e gogova. Boa na eto: “Natugu, eregu a kamonai.” Bena ia ese Ruta e hamaoroa ena uma ai bali anidia baine gogo. Ruta na Boa vairanai e goru diho bona e nanadaia: “Dahaka dainai lau, idau hahinena, o lalonamo henigumu bona o haḡeregumu?” Boa ese e haere henia, eto: “Harimu vada na kamonai, adavamu e mase murinai ravamu [vabu hahinena Naomi] ede o karaia toma; . . . Iehova ese davamu baine henimu, emu kara heḡereḡerena.”​—Ruta 2:8-12.

Iesu bona Boa na haheitalai namodia Kristen elda taudia ediai. Nega haida, elda rarua ese Baibul amo heduru baine abi na namo taihuna ta ida be herevaherevamu. Unu elda na ḡuriḡuri ai Iehova ena hahekau dalana bae tahua bona taihu ena hereva bae kamonai namonamo murinai, Dirava ena Hereva amo heduru maorona bona tauhalo bae henia diba.​—Roma 15:4.