1-3. (a) Baibul ena hereva momokani be ede baita laloa toma? Haheitalai ba gwauraia. (Rau 8 ai laulau ba itaia.) (b) Ededia henanadai baita herevalaimu?

HARI ina negai, vaevae taunimanima edia kara ta na, stoa ai e hoimu ḡaudia na ma e loulaimu. Bona intanet ai e hoi ḡaudia danu ma e siai loumu. Reana e hoia kohuna na se ura heniamu eiava e dika. Una dainai, e loulaia ma kohu idauna ta bae abia eiava edia moni bae abi lou.

² Ena be ta hoimu kohudia na ma ta loulaimu eiava davadia ta abi loumu, to Baibul amo ta dibaia ‘hereva momokanina’ na ma ta enai basita “hoihoilaia.” (Hereva Lada-isidia 23:23 ba duahia; 1 Tim. 2:4) Stadi ginigunana ese e hahedinaraia, hereva momokani baita dibaia totona ita na nega bada ta ato. Danu, hereva momokani dainai, reana moni ḡaukara namona ta ta rakatania, varavarada ese se ura henidamu, moni bona kohu momo maurina ta dadaraia, eiava Baibul ena taravatu e utuamu kastom karadia ta dadarai. To, ta davari hahenamodia ese ta haboio ḡaudia na e hereadia.

³ Baibul ena hereva momokani ta herevalaiamu neganai, eda hemami na Iesu ese e herevalaia hoihoi tauna ta ena heḡereḡerena.  Iesu na e urava baine hahedinaraia Dirava ena Basileia ena hereva momokani na mai anina bada, una dainai ena parabole ai eto, hoihoi tauna ta na aḡeva mai hairaidia e tahuva bena ta e davaria. Una aḡeva davana na bada herea dainai, ia na haraḡa herea ela “ena ḡau iboudiai eha hoi” bena una aḡeva e hoia. (Mat. 13:45, 46) Una heḡereḡerena, ta diba hereva momokanidia​—⁠Dirava ena Basileia sivaraina momokanina bona Baibul amo ta diba hereva momokanidia ma haida​—na dava bada ḡaudia dainai, mai eda ura ida ḡau haida ta dadarai. Bema hereva momokani baita laloa badamu basita ‘hoihoilaiamu.’ To, Dirava ena taunimanima haida ese hereva momokani ena namo na asie laloa bada dainai e rakatania. Asita uramu ita edai una baine vara! Hereva momokani baita laloa bada bona basita hoihoilaia totona, namona na Baibul ena sisiba baita badinaia: ‘Hereva momokani dalanai baita raka.’ (3 Ioane 2-4 ba duahi.) Anina na ta diba hereva momokanidia na baita atodia guna bona baita badinadia. Mani ini henanadai toi aita lalo: Dahaka dainai bona edena dala ai haida na hereva momokani e “hoihoilaia”? Hereva momokani basita rakatania totona dahaka baita kara? Dahaka ese baine duruda ‘hereva momokani dalanai baita raka’?

4. Aposetolo edia negai dahaka dainai haida ese hereva momokani e rakatania?

⁴ Aposetolo edia negai, haida na matamanai Iesu ena hahediba herevadia e abi dae to gabeai hereva momokani e rakatania. Heḡereḡere, Iesu ese hoa dalanai hutuma e ubudia murinai, idia na Galilea gohuna e hanaia bena Iesu murina amo ela. Unuseniai, momo na e hoa Iesu ese e gwauraia herevana dainai, Iesu na eto: “Taunimanima Natuna hidiona basio ania bona rarana danu basio inua, mauri na lalomui ai basine mia.” Idia ese Iesu na se nanadaia una hereva anina baine herevalaia, to eto: “Una na hereva metauna; daika ese baine abia dae diba?” Una dainai, “ena hahediba hutuma ese e rakatania, bona ia ida asie raka hebou lou.”​—Ioa. 6:53-66.

5, 6. (a) Hari ina negai, dahaka dainai haida na hereva momokani e rakataniamu? (b) Edena dala ai ta na taina ruana hereva momokani baine rakatania diba?

⁵ Hari ina negai, haida na hereva momokani na e rakataniamu. Badina Baibul ena hereva ta ai laloparara matamatana e lasimu neganai asie abia daemu. Haida be maduna e huamu tadikakana ta ena hereva eiava kara ese e hahekwakwanaidia. Ma haida be Baibul amo sisiba e abimu, eiava tadikaka o taihu ta ena kara dainai e lalohisihisi. A haida ese aposteit taudia bona e sivarailaida koikoimu taudia edia hereva e abi dae. Una dainai, haida na lalodia e hadai Iehova bona kongrigeisen bae “rakatania.” (Heb. 3:12-14) To Petro e kara heḡereḡerena, bema Iesu bema abidadama henia bona ena hereva bema badina, basiema hekwakwanai. Iesu ese ena aposetolo e nanadaidia eto, ‘Umui danu bo raka ohomu, a?’ Petro e heare eto: “Lohiabada e, ai be daika dekena baiala? Mauri hanaihanai herevadia na oiemu ai.”​—Ioa. 6:67-69.

⁶ Haida na se lalopararamu idia na taina ruana hereva momokani e rakataniamu. Unu e kara tomamu tauna na kone amo metairametaira e hure ohomu boutina na heto. Baibul ese e hadibadamu nahuadia baita toho, hereva momokani baita huretania na garina. (Heb. 2:1) Ena  be haida na dia mai lalodia idoidiai hereva momokani e rakataniamu, to edia hetura karana Iehova ida na dounu bae hadikaia diba. Ita edai una basine vara totona dahaka baita kara?

7. Dahaka ese baine duruda hereva momokani basita rakatania?

⁷ Hereva momokani dalanai baita raka totona, namona na Iehova ena hereva iboudiai baita abi dae bona baita badina. Namona na eda mauri lalonai hereva momokani baita atoa guna bona Baibul ena hahekau herevadia baita badina. King David na Iehova e ḡuriḡuri henia, eto: “Emu momokani ai baina raka.” (Sal. 86:11) David na lalona e hadaia unu baine kara toma. Namona na ita danu laloda baita hadai Dirava ena hereva momokani dalanai baita raka. Bema unu basita kara tomamu, reana hereva momokani dainai ta dadarai ḡaudia baita lalo loumu eiava baita abi loumu. Namona na hereva momokani baita dogoatao tarikatarika. Dia namo hereva momokani na kahana haida mo baita abi dae, a kaha haida be baita dadarai. To namona na “hereva momokani idoidiai” baita badina. (Ioa. 16:13) Hereva momokani dainai ta dadarai ḡaudia 5 mani aita herevalai. Una ese be hagoadadamu ta dadarai ḡaudia basita lalodia lou.​—Mat. 6:19.

8. Bema Kristen tauna ta na ena nega basine ḡaukaralaia namonamomu, dahaka baine vara diba? Haheitalai ta ba gwauraia.

⁸ Nega. Hereva momokani amo basita raka siri totona, namona na eda nega baita ḡaukaralaia namonamo. Bema basita henahua tohomu, reana moale karadia, laḡa-ani negadiai ta karamu ḡaudia, Intanet eiava televisen iraraina karanai eda nega bada baita haoreamu. Ena be unu na asi edia kerere, to nega bada na unu ḡau ai baita haoremu neganai, ita na asi eda nega baita stadi eiava hesiai ḡaukara ma haida baita kara. Mani taihu ta ladana Emma * enai e vara ḡauna aita laloa. Ia na maraḡina negana amo hosi e ura heniva. Ena laḡa-ani negadiai, hosi ai e guiva bona e loaloava. Gabeai, e laloparara ena nega bada na una moale karana ai e haoreava. Lalohadai maorona e abia bona una moale karana na ena gabu korikori ai e atoa. Danu, guna hosi gui mai dibana namonamo (rodeo trick rider) hahinena ta, Cory Wells, ena sivarai ese e durua. * Hari Emma na nega bada e ḡaukaralaiamu hesiai ḡaukara idauidau e karamu, bona ena Kristen ruma bese bona turana e bamodiamu. E mamiamu ia na Iehova dekedekenai bona e moalemu badina e dibamu ena nega na e ḡaukaralaia namonamomu.

9. Edena dala ai haida na kohu bona moni e lalo bada dainai edia hesiai ḡaukara e rakatania?

⁹ Moni Bona Kohu. Bema ta uramu hereva momokani dalanai baita raka, dia namo kohu na mai anina bada ḡauna ai baita halaoa. Hereva momokani ta diba neganai, Iehova ena ura ta atoa guna, a iseda ura be gabeai. Hereva momokani dalanai baita raka totona ita na ḡau haida ta dadarai. To, reana laḡani haida muridiai, baita itamu haida na mobael fon, kompiuta eiava televisen matamatadia e hoimu, eiava ḡau namodia haida e moalelaimu. Reana baita gwaumu ‘idia be mai edia kohu lau be lasi.’ Baita lalomu dekedai miadia ḡaudia na dia heḡereḡere, una dainai eda hesiai ḡaukara na  basita laloa badamu to baita taḡa daladia baita tahumu. Dema enai una na e vara. Ia ese “ina tanobada” e ura henia dainai aposetolo Paulo ida e karaiava hesiai ḡaukarana e rakatania. (2 Tim. 4:10) Dahaka dainai Dema ese Paulo e rakatania? Baibul ese una na se herevalaia. Reana Dema na kohu e ura heni bada dainai hesiai ḡaukaradia na se lalo, eiava se ura ḡau haida baine dadarai Paulo ida baine ḡaukara hebou totona. Bema basita henahua tohomu, kohu iura henina karana ese be biagudamu bena hereva momokani na basita ura heniamu.

¹⁰Hebamo. Hereva momokani dalanai baita raka totona, haida edia hedori karadia baita dadarai. Hereva momokani ta dibaia neganai, bamoda bona eda ruma bese​—dia Witnes taudia​—ibamodia karana na e idau. Haida ese na se kouda, a haida ese be e daḡedaḡe henida. (1 Pet. 4:4) Ena be ta hekwarahimu eda ruma bese taudia baita kara namo henidia, to dia namo ihamoaledia totona Dirava ena taravatu e utuamu karana ta baita karaia. Eda ruma bese taudia na dounu baita kara namo henidia. To 1 Korinto 15:33 ena sisiba heḡereḡerena, namona na Iehova e lalokau heniamu taudia mo baita bamodia.

11. Edena dala ai Dirava ese se moalelaimu lalohadaidia bona karadia baita dadarai?

¹¹ Dirava ese se moalelaimu lalohadaidia bona karadia. Hereva momokani dalanai e rakamu taudia iboudiai bae helaḡa na namo. (Isa. 35:8; 1 Petro 1:14-16 ba duahi.) Hereva momokani ta diba neganai, ita na Baibul ena taravatu heḡereḡerena ai eda mauri ta haidau. Haida na senisi badadia e kara. To namona na nega iboudiai nahuada baita toho, ina tanobada ena matabodaḡa karadia ese eda ḡoeva karana basie hadikaia. Dahaka ese baine duruda matabodaḡa karadia baita dadarai? Iehova ese Natuna, Iesu Keriso rarana hereadaena amo e hoida karana baita laloa. (1 Pet. 1:18, 19) Iehova vairanai baita ḡoeva totona, namona na darada bona kudouda ai Iesu ena mauri davana ena namo baita laloa.

12, 13. (a) Dahaka dainai Iehova ese dina helaḡadia se moalelaimu badidia baita lalopararalai na namo? (b) Hari dahaka baita herevalaimu?

¹2 Baibul ena taravatu e utumu kastom karadia. Nega haida ruma bese taudia, ta ḡaukara heboumu taudia, bona ta sikuli heboumu taudia ese be doridamu edia moale karadia ai baita vareai. Bema idia ese e doridamu Iehova se hamoaleamu kastom karadia bona dina helaḡadia ai baita vareai, edena dala ai baita dadaraidia? Namona na Iehova ese unu kara se moalelaimu badidia baita lalopararalai. Eda pablikeisen ai e halasi herevadia baita tahu unu amo dina helaḡadia e hematama badidia baita diba namonamo. Baibul ena sisiba heḡereḡerena ai unu dina helaḡadia ai e karamu karadia ta dadaraimu neganai, “Lohiabada” ta hamoaleamu. (Efe. 5:10) Iehova bona ena Hereva baita abidadama henidiamu neganai, taunimanima na basita gari henidiamu.​—Her. 29:25.

¹³ Ita na ta uramu hanaihanai hereva momokani dalanai baita raka. Edena dala ai laloda baita hadai unu baita kara toma? Dala toi mani aita herevalai.

14. (a) Edena dala ai Baibul istadilaina karana ese baine duruda hereva momokani basita rakatania? (b) Dahaka dainai aonega, hahediba, bona laloparara baita abi na ḡau badana?

¹⁴ Dala ginigunana na, hanaihanai Baibul ena hereva momokanidia baita stadilai bona baita haerodia. Oibe,  nega baita ato Dirava ena Hereva baita duahia. Una ese be durudamu hereva momokani baita badinaia. Danu, Hereva Lada-isidia 23:23 ena hereva heḡereḡerena, namona na “aonega bona hahediba bona laloparara” baita abi. Dia diba mo baita abi, to namona na ta dibamu ḡaudia na baita badina. Iehova ena hereva ta dibaiamu neganai, iena ura danu ta lalopararalaiamu. Bena e henidamu aonegana ese baine duruda ena dala baita badinaia. Nega haida Baibul ese e hadibadamu eda mauri ai ḡau haida baita haidau na namo. Baita hekwarahi Baibul ena hahekau dalana baita badinaia, badina edia namo ese silva e hereaia.​—Her. 8:10.

15. Hereva momokani ena beleta ese ita be edena dala ai baine gimada?

¹⁵ Dala iharuana na, lalomu ba hadaia dina ta ta ai hereva momokani ba badinaia. Hereva momokani na koekoemu ai ba ḡeḡea, beleta na heto. (Efe. 6:14) Baibul negadiai, tuari tauna ena beleta na ia e duruava bona e gimaiava. Una beleta ese baine gimaia totona, baine kwatua auka na namo. Bema lasi dika baine davari diba. Edena dala ai hereva momokani ena beleta ese baine gimada? Bema gabada ai baita kwatua namonamomu, hereva momokani ese ita na be gimadamu lalohadai kereredia baita dadarai bona be durudamu abi hidi maorodia baita kara. Bema hahetoho ta davarimu, Baibul ena hereva ese be durudamu kara maoromaoro baita badinaia. Tuari tauna na ena beleta e kwatuamu bena tuari e laomu, una heḡereḡerena namona na hereva momokani basita rakatania. To, hereva momokani ena beleta na baita kwatua auka, anina na eda mauri lalonai Baibul ena hereva momokani baita badinaia tarikatarika. Tuari tauna ena beleta ai ena dare baine atoa diba. Edena dala ai ita danu unu baita kara toma?

16. Baibul ena hereva ta harorolaiamu neganai, edena dala ai e durudamu hereva momokani baita badinaia?

¹⁶ Dala ihatoina be, baita ḡaukara goada Baibul ena hereva momokani na ma haida baita hadibalaidia. Unu amo lauma helaḡa ena dare, eiava “Dirava ena hereva” baita dogoatao tarikatarika. (Efe. 6:17) Namona na baita hekwarahi eda hahediba daladia baita hanamo, unu amo ‘hereva momokani igwaurai-ḡoevana taudia ai baitala.’ (2 Tim. 2:15) Baibul ena hereva amo haida ta durudiamu bena hahediba koikoidia e dadaraimu neganai, una ese ita danu e durudamu Dirava ena hereva na darada bona kudouda ai baita ato. Danu, e hagoadadamu hereva momokani dalanai baita raka.

17. Dahaka dainai hereva momokani o laloa badamu?

¹⁷ Hereva momokani na harihari ḡauna namona ta Iehova amo. Una harihari ḡauna dainai Tamada guba ai baita hetura henia diba, una na dava bada ḡauna! Ia ese ḡau momo vada e hadibada! Dirava na e gwauhamata ia na hanaihanai ita baine hadibada. Una dainai, hereva momokani na aḡeva mai hairana ta heḡereḡerena baita gimaia. Namona na hanaihanai “hereva momokani ba hoia emu, bona haida ediai ma basio hoihoilaia.” Bena David heḡereḡerena, Iehova ba gwauhamata henia, baoto: “Emu momokani ai baina raka.”​—Sal. 86:11.